MANDUMBU anji kahichikile yifuchi yo ni kuya ku yifuchi kuze te mazuka mbongo jinji, haliapwila kanafuna mu yifuchi yo. Zango lize apwile nalio hali Yehova ni hali enyembo jo, liaakwashile kwalukila kuze kunafupiwa ukwaso. (Mateu 22:37-39) Tachi jika ayo asele, chikwo nawa kuchi Yehova aawahishile? Mba tuwane kumbululo, tuyenu ku chifuchi cha Camarões, ku oeste ya África.

Ha mwaka 1998, ndumbu Onésime yahichika chifuchi cha Camarões yaya ni kutwama kweka. Mu chifuchi chacho katwaminemo miaka 14. Tangwa limwe, muze te ali ha kukunguluka, yevwa chimwe chilweza chinatale ha mulimo wa kwambujola sango lipema. Ndumbu yoze te unahanjika pande yamba ngwenyi: “Tuchinyongenu ngwetu, atu aali waze ali masepa, kanatela yishi ha yihela yalisa, hachino, umwe wa kuli ayo moza yishi anji kuhiana mukwo. Shina mutu yoze unakwata yishi akehe kechi kuya kuze mukwo anozela yishi anji?”

Chilweza chino, chatwalile ndumbu Onésime hanga anyonge kufuna mu chifuchi cho muze mwapwile akwa-kwambujola akehe. Alioze, kalipikalile chinji. Amu atwamine mu chifuchi cheka ha miaka yinji, shina te mahasa kwijilila kutwama mu chifuchi muze asemukine? Mba ahase kwijilila, ndumbu Onésime yaya ni kutwama mu Camarões ha tukweji asambano. Hachino, ha mwaka 2012, yalukila ku Camarões.

Ndumbu Onésime yamba ngwenyi: “Nafupiwile kwijilila ni chivukuminya ni yuma yikwo ya ku mwono. Mu Zuwo lia Wanangana te twakutwama ha yitwamo ya mapaya. Alioze kulihulikila ha ku kukunguluka, changukwashile kwecha kunyonga chinji ha yitwamo yipema yize nahichikile mu chifuchi muze napwile.”

Ha mwaka 2013, Onésime yalimbata ni Géraldine yoze watwamine mu França ha miaka livwa, mba yafuna mu Camarões. Yehova kaawahishile chinji, mumu kasele upale wenyi kulutwe ku mwono wo. Onésime yamba ngwenyi: “Ami ni mukwetu-pwo katusanyikine ku Shikola ya Akwa-Kwambujola Wanangana, hanyima yitukalakala ku Mbetele. Ha mwaka wapalika, alongi a Mbimbiliya 20 mu chikungulwila chetu yaapapachisa. Musono nakulivwa ngwami, nguli ha chihela chalita cha “kutela atu” hanji ngwetu kwambujola. (Marku 1:17, 18) Géraldine yamba ngwenyi: “Hinayuka yiwape yinji yize te kanda nguchinyonga kama.”

Judith kalukilile ku Estados Unidos, alioze kazangile kulihana chinji mu mulimo wa Yehova. Yamba ngwenyi: “Hita shimbu te nakuya ni kumeneka asoko jami ku Camarões, muze mungupwa ha kufuna te nakulila, mumu te chakupwa  chikalu kuhichika alongi a Mbimbiliya waze te nakuputuka kulilongesa no.” Chipwe chocho, Judith kakapwile ni shindakenyo yakufuna ni kutwama ku Camarões. Iye kapwile ni mulimo upema uze te wakumukwasa kufweta uwukiso wa tato ku Camarões. Alioze Judith yafuliela muli Yehova, chocho yafuna ku Camarões. Yamba ngwenyi, te kakwivwa usona wa mwono upema uze apwile nawo mu Estados Unidos. Judith yalemba kuli Yehova hanga amukwase kwijilila, chikwo nawa, yamukolweza chinji kuli umwe kalayi wa mbonge ni mukwo-pwo.

Judith yamba ngwenyi: “Ha miaka yitatu nalinga kuno, ngunawahilila chinji mumu nakwasa alongi awana kupwa tumbaji twa Yesu.” Judith yaputuka kukalakala ngwe pionelu walipwila. Musono iye ni mukwo-lunga Sam-Castel kanakalakala mu mulimo wa kumeneka yikungulwila. Mba yika yalingiwile kuli tato ya Judith? Iye ni asoko jenyi yanyingika yimwe shipitali mu chifuchi cheka yize yatayijile kupasula tato chawana. Hachino, tato ya Judith yahinduka ku musongo wenyi.

Ndumbu Victor, kalukilile ku Canadá. Muze atangile hakutwala ku kulilongesa shikola yinene ha Kaposhi wa Kutalila, yaputuka kunyonga ha shikola yenyi. Yecha shikola yinene, yaputuka kulinga yimwe milimo. Yamba ngwenyi: “Chino changukwashile kuwana mulimo ni kawashi, ni kulinga yize te nakuzanga kulinga, kupwa pionelu.” Kulutwe, victor yalimbata ni Caroline, hachino yaya ni kumeneka chifuchi cha Camarões. Muze ayile ni kumeneka mutango wa mu Camarões, yaakolweza hanga aye ni kukalakalila mu Camarões. Victor yamba ngwenyi: “Kutwakahashile kulituna, nawa amu twapwile ni mwono washi, chocho yitutayiza kwiza ni kukalakalila mu Camarões.” Chipwe ngwe Caroline kapwile ni yimwe misongo, nihindu ayo yatayiza kwaluka.

Amu kwapwile atu anji waze azangile kulilongesa Mbimbiliya, chocho Victor ni Caroline yaputuka kukalakala ngwe pionelu a shimbu lieswe hanga aakwase. O katulikile mbongo jakumbana jize te mujaakwasa ku uputukilo. Mba akalakale ngwe pionelu a shimbu lieswe mu Camarões, ayo yafuna ku Canadá ni kukalakala ha amwe tukweji. Yiwape yika ayo ayukile? Yaasanyika ku Shikola ya Akwa-Kwambujola Wanangana, yaputuka kukalakala ngwe pionelu alipwila, haliapwila kali tuvumbi akwa-kutunga mazuwo. Victor yamba ngwenyi: “Kuhichika chihela chize twazanga chinji, chatukwasa kumona ukwaso wa Yehova.”

Ha mwaka 2002, Alain yoze te unalilongesa ku shikola yinene mu Alemanha yatanga mukanda Jovens—Como Usarão Sua Vida? Mukanda wacho wamukwashile kutesa yuma ya ku spiritu. Chocho, ha mwaka 2006, yamusanyika ku Shikola ya Kulilongesa Milimo ya mu Ululikiso ni kumutuma ku Camarões, chifuchi chize asemukine.

Muze ahetele ku Camarões yawana mulimo wa mashimbu akehe. Kulutwe yawana mulimo uze te mahasa kuzuka mbongo jinji, alioze yalipikala mumu mulimo wacho te muupinjisa mulimo wenyi wa kwambujola. Kashika muze amusanyikine hanga akalakale ngwe pionelu walipwila, iye katalile nawa kunyima. Mwata wenyi ku mulimo yamuweza mbongo hanga anunge ni kukalakala, alioze Alain katayijile. Kulutwe, Alain yalimbata ni Stéphanie yoze watwamine yimwe miaka mu França. Kapinda muka awanyine muze alukilile ku Camarões?

Stéphanie yamba ngwenyi: “Naputukile kuyiza-yiza chinji, alioze yinguwana uwukiso, chocho yingulivwa kanawa.” Chipwe chocho, ayo kayukile yiwape yinji mumu lia kunyongonona cho. Alain  yamba ngwenyi: “Muze twayile ni kwambujola ku chimwe chihunda avuluka ngwo Katé, twawanyine atu anji waze azangile kulilongesa Mbimbiliya. Kulutwe, yituputuka kusongwela malongeso a Mbimbiliya kupalikila mu telefone. Alongi aali a Mbimbiliya yaapapachisa, chocho ku chihela chacho yikupwa chizavu.” Stéphanie yawezela ngwenyi: “Kukushi uwahililo walifwa ni wa kukwasa atu kulihana kuli Yehova. Kulingila Yehova kuno, chatwaha uwahililo wacho ha yisuho yinji.” Musono, Alain ni Stéphanie kanakalakala mu mulimo wa kumeneka yikungulwila.

Gisèle kamupapachishile muze te machililongesa ku shikola yinene mu Itália. Iye kakomokene ha kumona mwono washi uze apwile nayo atu waze amulongesele Mbimbiliya, chocho neye yazanga kulihana chinji mu mulimo wa kwambujola. Hachino, Gisèle yaputuka kukalakala ngwe pionelu wa shimbu lieswe muze te anayi ni kuhwisa shikola.

Gisèle kazangile kufuna ku Camarões hanga alihane chinji mu mulimo wa Yehova, alioze yuma yimwe yimupikalisa. Yamba ngwenyi: “Nafupiwile kuhichika zuwo liami mu Itália, kulihandununa ni asoko ni masepa jami waze atwama mu Itália.” Chipwe chocho, ha kakweji wa Maio 2016, Gisèle yalukila ku Camarões. Hakupalika cha mashimbu, yalimbata ni Léonce, mba mutango wa Camarões yiweeta hanga aye ni kukalakalila ku Ayos, mbonge yize te yinafupiwa chinji ukwaso wa akwa-kwambujola.

Kuchi mwono wapwile ku Ayos? Gisèle yamba ngwenyi: “Mashimbu amwe twapwile ni kuhona kahia ka zembwe ha poso jaali, kashika chapwile ni kukaliwa kusa kahia mu ma telefone. Ha mashimbu anji te kutushi kuzachisa telefone. Nalilongesele kuteleka ha kunyi ni kuya ni kutaha meya ku lwiji, chipwe ngwe te kwakuzala too ni atu.” Yika Gisèle ni Léonce alingile mba akumbe kapinda wacho? Gisèle yamba ngwenyi: “Spiritu ya Yehova, kulivwashana mu ulo, utakamiso ni ukwaso wa asoko ni masepa jetu ha yuma yize twapwile ni kufupiwa yatukwashile chinji.”

Shina Gisèle kanawahilila ha kuhiluka mu chifuchi chize asemukine? Mwene ngwenyi: “Ewa! Ngunawahilila chinji. Ku uputukilo chapwile chikalu kukumba manyonga eka ni eka, alioze muze twakumbile yuma yacho, ami ni mukwetu-lunga yitulinga yize te chatutamba kulinga. Tunakajikijila muli Yehova ni kukundama kuli iye.” Léonce ni Gisèle yaasanyika ku Shikola ya Akwa-Kwambujola Wanangana, musono kanakalakala ngwe pionelu alipwila.

Chizechene ngwe akwa-kutela yishi akupalika mu kapinda walisa mba oze yishi, ni waze akwalukila mu chifuchi chize asemukine kakusa tachi jinji mba akwase atu waze anazange kupanjika sango ja Wanangana. Yehova kakwiwuluka akwa-kwambujola wano waze akusolola zango ha jina lienyi. (Nehe. 5:19; Hepre. 6:10) Nyi watwama mu chifuchi cheka, mba munyingika ngwe mu chifuchi chenu munafupiwa ukwaso wa akwa-kwambujola, shina muhilukako hanga ukwase? Eseka utale, yiwape ya Yehova yinakushimbwila.—Yishi. 10:22.