1. Yika mutuhasa kushimbwila, nawa shindakenyo yika twatamba kupwa nayo?

 MUTUHASA kushimbwila kupalika mu yihungumiona muze tunalingi mulimo wetu wa kwambujola. Yihungumiona yacho kota muyikoka chinji kulutwe lia matangwa. (Danie. 11:44; 2 Timo. 3:12; Uso. 16:21) Alioze tuli ni shindakenyo ngwetu, Yehova matukwasa ha yize mutufupiwa. Mumu liaka? Mumu iye mashimbu eswe kakukwasa tuvumbi twenyi hanga alinge milimo yo chipwe ngwe muchipwa chikalu. Chakutalilaho, mutumona yimwe yuma yize yalingiwile kuli profeta Ezekiele, muze ambujolwele kuli A-Yunda apwile mu undungo ku Babilonia.

2. Ezekiele te mambulwila atu a mutapu uka, nawa yika mutumona ha mutwe uno? (Ezekiele 2:3-6)

² Ezekiele te mambulwila atu a mutapu uka? Yehova kambile ngwenyi, atu jacho kali “akwa shino,” “akwa pami,” nawa “kapwa munyachi wa yihulia.” Chapwile ngwe, Ezekiele kali mukachi ka mbimbo ni tuvwanda. Kashika, kutushi kukomoka ha unji wa yisuho yize Yehova amulwezele ngwenyi: “Kanda uvwila woma!” (Tanga Ezekiele 2:3-6.) Ezekiele kahashile kulinga mulimo wenyi mumu (1) kamutumine kuli Yehova, (2) spiritu yisandu yamuhele tachi ni (3) maliji a Zambi kakolesele ufulielo wenyi. Kuchi yuma yino yitatu yakwashile Ezekiele? Kuchi muyihasa kutukwasa musono?

3. Maliji aka kota atakamishine Ezekiele, nawa kuchi Yehova asolwele ngwenyi, mapwa hamwe nenyi?

³ Yehova kalwezele Ezekiele ngwenyi: “Ngunakutumu.” (Eze. 2:3, 4) Maliji wano kota katakamishine chinji Ezekiele. Mumu liaka? Mumu kota kewulukile ngwenyi, Yehova kazachishile maliji wano ene muze atumine Izaia ni Mose ngwe aprofeta. (Kutuhu. 3:10; Iza. 6:8) Ezekiele nawa kanyingikine ngwenyi, Yehova kakwashile aprofeta wano aali kukumba kapinda wo. Kashika, muze Yehova amulwezele ha yisuho yaali ngwenyi: “Ngunakutumu,” Ezekiele kapwile ni shindakenyo ngwenyi Yehova mamukwasa. Chikwo nawa, mu mukanda wa Ezekiele twakuwanamo chinji maliji wano ngwo: “Liji lia Yehova yiliza kuli yami.” (Eze. 3:16) Ha yisuho yinji, Ezekiele kasonekene ngwenyi: ‘Liji lia Yehova yiliza nawa kuli yami.’ (Eze. 6:1) Kwamba pundu, Ezekiele kanyingikine ngwenyi, Yehova unamutumu. Chikwo nawa, iye kapwile mwana wa sasendote, kashika kota tato kamulongesele ngwo, Yehova nihindu kakukwasa aprofeta Jenyi. Chilweza chacho chinasoloka ha yize Yehova ambile kuli Izake, Yakomba ni Jeremia ngwenyi: “Nguli hamwe ni yena.”—Uputu. 26:24; 28:15; Jere. 1:8.

4. Maliji aka kota atakamishine Ezekiele?

⁴ Yika te A-Izalele malinga ha kwambujola cha Ezekiele? Yehova kambile ngwenyi: “Akwa munyachi wa Izalele kechi kukwivwa, mumu kazangile kungwivwa yami.” (Eze. 3:7) Ha kulituna Ezekiele, atu te kanalitunu Yehova. Maliji ja Yehova kakwashile Ezekiele kumona ngwenyi, kuhona utayizo wa atu kuchalumbunukine ngwo, kalingile kanawa mulimo wenyi ngwe profeta. Yehova nawa kamuhele shindakenyo ngwenyi, muze upatwilo uze ambujolwele muputuka, atu ‘makanyingika ngwo profeta hwali hakachi ko.’ (Eze. 2:5; 33:33)  Pundu lume, maliji wano kahanyine tachi kuli Ezekiele hanga anunge ni kulinga mulimo wenyi wa kwambujola.

5. Kulita ni Izaia 44:8, yika yakutwaha hamu?

⁵ Twakupwa ni hamu lia kwambujola ngwe Ezekiele, mumu tunanyingika ngwetu, Yehova mwe wakututuma. Yehova hanatupwisa “Yela” yenyi. (Iza. 43:10) Chili kuyuka chinene kuli yetu! Chizechene Yehova alwezele Ezekiele ngwenyi: “Kanda uvwila woma,” ni yetu kanatulweze ngwenyi: ‘Kanda nwivwa woma.’ Mumu liaka kutwatambile kwivwa woma wa waze kulimika ni yetu? Mumu chizechene ngwe Ezekiele, ni yetu Yehova mwe watutuma nawa tuli ni ukwaso wenyi.—Tanga Izaia 44:8.

6. (a) Maliji aka a Yehova akutwaha shindakenyo ngwo, tuli ni ukwaso wenyi? (b) Yika yakutukolweza ni kututakamisa?

⁶ Yehova kanalakenya kutukwasa. Chakutalilaho, shimbu Yehova ambe wika ngwenyi: “Yenu nuli Yela jami.” Iye yamba ngwenyi: “Muze mukapalika mu meya mungukapwa hamwe ni yena, ndusu mu njiji, kujichi kakukumba. Ha kwenda mu kahia kuchi kawema; mulengi wako kuuchi kakulalisa.” (Iza. 43:2) Muze twakwambujola, ha mashimbu amwe twakulitakana ni yipikalo yize yapwa ngwe meya ni kapinda yoze wapwa ngwe kahia. Chipwe chocho, ni ukwaso wa Yehova twakununga ni kwambujola. (Iza. 41:13) Chizechene ngwe ha matangwa ja Ezekiele, atu anji musono keshi kutayiza sango jetu. Alioze tunanyingika ngwetu, chipwe ngwe o malituna, chino kuchalumbunukine ngwo, kutwalingile kanawa mulimo wetu ngwe Yela ja Zambi. Chuma chakututakamisa ni kutwaha tachi chili kunyingika ngwo, Yehova kakuwahilila muze twakununga ni kwambujola ni ushishiko. Postolo Paulu kambile ngwenyi: “Mutu ni mutu kumakatambula fweto yenyi mwene, nikulita ni kukilikita chenyi mwene.” (1 Kori. 3:8; 4:1, 2) Umwe pangi yoze wakukalakala ngwe pionelu ha miaka yinji, yamba ngwenyi: “Chuma chakungwaha chiseke chili kunyingika ngwo, Yehova kakuwahisa tachi jetu.”

7. Kuchi Ezekiele te akulivwa muze apwile ni kwiwuluka usolwelo uze amwene? (Tala chizulie ha chifukilo.)

⁷ Ezekiele kamwene chize spiritu yisandu ya Zambi yikwete ndundo. Usolwele uze amwene, wamukwashile kumona ngwo, spiritu yisandu yahanyine ndundo kuli angelo ni ku maroda a temba lia mwilu. (Eze. 1:20, 21) Yika Ezekiele alingile? Iye kasonekene yize amwene. Yamba ngwenyi: “Ha kuumona nafulamanyine hashi.” Ezekiele kakomokene chinji ha iye amwene, chocho yafulamana hashi. (Eze. 1:28) Hanyima lia chino, muze Ezekiele te akwiwuluka usolwelo uno wa kukomwesa, kota kapwile ni kutakama ha kunyingika ngwo, ni ukwaso wa spiritu yisandu ya Yehova mahasa kulinga mulimo wenyi.

8-9. (a) Yika Yehova atumine Ezekiele kulinga? (b) Ukwaso ukwo uka Yehova ahanyine kuli Ezekiele hanga akumbe kapinda mu njiza yize apwile ni kwambulwila?

⁸ Yehova yalweza Ezekiele ngwenyi: “Mwana mutu, mana ha molu je mba munguhanjika ni yena.” Maliji wano kamuhele tachi hanji ngwetu “spiritu” yize te anafupiwa hanga ahase kumana. Ezekiele kasonekene ngwenyi: “Spiritu yangunjila, yangumanyisa ha molu jami.” (Eze. 2:1, 2) Kukatuka haze, mu mulimo wenyi weswe Ezekiele yamusongwela ku “kwoko” lia Zambi hanji ngwetu, ni spiritu yisandu ya Zambi. (Eze. 3:22; 8:1; 33:22; 37:1; 40:1) Spiritu yisandu ya Zambi yatakamishine Ezekiele hanga ahase kulinga mulimo uze amuhele wa kwambulwila akwa “mahuma akalu, ni mbunge ja pami.” (Eze. 3:7) Yehova yalweza nawa Ezekiele ngwenyi: “Hinapwisa meso je akalu  kulimika ni meso jo; hinakalisa huma lie kulimika ni mahuma jo. Hinakalisa huma lie kuhiana diamante, ngwe liwe lia kahia. Kanda uavwila woma; kanda utatajala ha kutala cho.” (Eze. 3:8, 9) Chapwile ngwe Yehova kanalweze Ezekiele ngwenyi: ‘Kanda wecha ukalu wa atu wano ukuhongese. Yami mungukutakamisa.’

⁹ Chize haze, spiritu ya Zambi yisongwela Ezekiele mu njiza yeswe yize apwile ni kwambujola. Ezekiele yasoneka ngwenyi: “Kwoko lia Yehova te lili hali yami ni tachi.” Kwapalikile poso yimuwika mba Ezekiele anyingike lusango yoze mambujola ni kuhanjika ni shindakenyo. (Eze. 3:14, 15) Mba Yehova yamulweza hanga aye ku chana kuze ‘spiritu yanjilile muli iye.’ (Eze. 3:23, 24) Hachino, Ezekiele te halilulieka kulu hanga aputuke mulimo wenyi.

10. Ukwaso uka tunafupiwa mba tulinge mulimo wetu wa kwambujola, nawa mumu liaka?

¹⁰ Ukwaso uka tunafupiwa mba tulinge kanawa mulimo wetu wa kwambujola? Mba tukumbulule chihula chino, tunyongenu ha yize yalingiwile kuli Ezekiele. Muze te kanda achiputuka kwambujola, spiritu yisandu ya Zambi yamuhele tachi jize te anafupiwa. Musono, chizechene ngwe Ezekiele, ni yetu twakuhasa kwambujola mumu lia ukwaso wa spiritu yisandu ya Zambi. Mumu liaka? Mumu Satana kanase jita ni yetu, nawa kanazange hanga tweche kwambujola. (Uso. 12:17) Atu anji kakunyonga ngwo Satana kali ni ndundo, kashika nyi twasa nenyi jita kutuchi kuhasa kukumba. Alioze, twakumukumba kupalikila mu mulimo wetu wa kwambujola! (Uso. 12:9-11) Mu mutapu uka? Muze twakulinga mulimo wa kwambujola, twakusolola pundu ngwetu kutushi ni woma wa yeseko ya Satana. Hita shimbu mutwambujola, acho tunakumbu Satana. Mba, shindakenyo yika twapwa nayo ha kunyingika ngwo, mutuhasa kununga ni kwambujola chipwe ngwe akwa-kole malimika ni yetu? Twapwa ni shindakenyo ngwetu, tuli ni utayizo wa Yehova nawa iye kakututakamisa kupalikila mu spiritu yisandu.—Mateu 5:10-12; 1 Petu. 4:14.

11. Kuchi spiritu yisandu muyihasa kutukwasa, nawa kuchi mutuhasa kununga ni kutambula spiritu yisandu?

 ¹¹ Yehova kapwishile ku meso ni huma lia Ezekiele likalu ngwe liwe. Shindakenyo yika yino yinatwehe? Yinatwehe shindakenyo ngwetu, spiritu yisandu ya Zambi muyihasa kututakamisa hanga tukumbe yipikalo yeswayo mutuliwana nayo mu mulimo wa kwambujola. (2 Kori. 4:7-9) Alioze yika twatamba kulinga mba tununge ni kutambula spiritu yisandu ya Yehova? Twatamba kulemba mashimbu eswe ni kupwa ni shindakenyo ngwetu, Yehova matwivwa ni kutwaha spiritu yenyi. Yesu kalongesele tumbaji twenyi ngwenyi: “Etenu, . . . fupenu, . . . Ngongwelenu,” mba Yehova mahana ‘spiritu yisandu kuli waze mamwita yo.’—Luka 11:9, 13; Yili. 1:14; 2:4.

12. Kulita ni Ezekiele 2:9–3:3, kuliko kwakatukile chivungo, nawa yika yasonewenemo?

¹² Spiritu ya Zambi yahanyine tachi kuli Ezekiele hanga ahase kwambujola. Alioze, hi yino wika ko, maliji a Zambi no katakamishine Ezekiele. Mu umwe usolwelo, Ezekiele yamona limwe kwoko linakwata chivungo. (Tanga Ezekiele 2:9–3:3.) Kuliko kwakatukile chivungo chacho? Yika te yinasonewamo? Kuchi chatakamishine ufulielo wa Ezekiele? Chivungo chakatukile ku ngunja ya Yehova. Kota Yehova kazachishile umwe wa kuli angelo awana waze Ezekiele amwene ku uputukilo hanga amwehe chivungo. (Eze. 1:8; 10:7, 20) Mu chivungo chacho, te muli mwakusoneka maliji a Zambi, lusango wa upatwilo yoze te Ezekiele mambujola kuli akwa-munyachi wa pami uze wapwile mu undungo. (Eze. 2:7) Lusango yono te kali wa kusoneka kulutwe ni kunyima lia chivungo.

13. Yika Yehova ambile hanga Ezekiele alinge ni chivungo, mba mumu liaka chapwile ni kuyema?

¹³ Yehova kalwezele profeta wenyi ngwenyi, liako chivungo chino “ukakute” nacho. Yononoka, yalia chivungo cheswe. Yika chihanda chino cha usolwelo chinalumbunuka? Chinalumbuka ngwo, Ezekiele te katamba kunyingika kanawa lusango yoze mambujola. Kafupiwile kunyingika lusango wacho ni kumuhanjika ni shindakenyo yeswe. Hazehene, yikulingiwa chuma cha kukomwesa. Ezekiele yanyingika ngwenyi, chivungo chili ni “uyema ngwe wuchi.” (Eze. 3:3) Mumu liaka? Mumu kuli Ezekiele, kumanyinako Yehova chapwile chuma chiyema hanji chipema chize hanapalika ku mwono wenyi. (Samu 19:8-11) Iye kasakwilile Yehova ha kumusakula ngwe profeta.

14. Yika yakwashile Ezekiele kutayiza mulimo uze amuhele?

¹⁴ Yehova kalwezele Ezekiele ngwenyi: ‘Maliji jami eswe waze munguhanjika kuli yena, atambule mu mbunge ye, apanjike ni matwi je.’ (Eze. 3:10) Yehova kazangile hanga Ezekiele ewuluke yuma yeswe yize asonekene mu chivungo ni kuyipukuna. Chino te muchikolesa ufulielo wa Ezekiele. Chikwo nawa, yono kapwile lusango wa tachi yoze te mambulwila atu. (Eze. 3:11) Ni maliji a Zambi mu mbunge ni ku mivumbo yenyi, Ezekiele te halilulieka kulu hanga aputuke mulimo wa kwambujola ni kununga ndo haze maumanunwina.—Tesa ni Samu 19:14.

15. Mba tunyongonone mu mulimo wetu wa kwambujola, yika twatamba “kutambula mu mbunge”?

¹⁵ Mba tunyongonone mu mulimo wa kwambujola, ni yetu tunafupiwa kwecha maliji a Zambi hanga akolese ufulielo wetu. Kashika, tunafupiwa “kutambula mu mbunge” yetu yuma yeswe yize Yehova akutulweza. Musono, Yehova kakuhanjika ni yetu kupalikila mu Mbimbiliya. Yika mutuhasa kulinga mba Mbimbiliya yinunge ni kusongwela manyonga ni yitanga yetu?

16. Yika twatamba kulinga mba tunyingike kanwa Liji lia Zambi?

 ¹⁶ Muze twakulia ni kusa mashimbu hanga tuhwime, mujimba wetu wakutatuka kanawa. Chizechene nawa, muze twakulilongesa Mbimbiliya ni kupukuna ha yize tunalilongesa, ufulielo wetu wakukola. Twakufunga longeso lia chivungo mu mbunge yetu. Yehova kanazange hanga ‘tukute’ ni Liji lienyi. Chino chinalumbunuka ngwo, iye kanazange hanga tunyingike kanawa Mbimbiliya. Mutuhasa kuchilinga ha kulemba, kutanga ni kupukuna ha yize tunatange. Chitangu, twakulemba hanga tululieke mbunge yetu mba tuhase kunyingika manyonga ja Zambi. Hanyima, mba mututanga umwe lusango wa mu Mbimbiliya. Kusulaho, twakumana hanga tupukune ha yize twatanga. Yika mutuzuka ha kulinga yuma yino? Nyi twapukuna chinji mutunyingika kanawa Liji lia Zambi nawa chino muchikolesa ufulielo wetu.

17. Mumu liaka chili chilemu kupukuna ha yuma yize twakutanga mu Mbimbiliya?

¹⁷ Mumu liaka chili chilemu kutanga Mbimbiliya ni kuyipukuna? Mumu kulinga chino, muchitwaha tachi hanga tuhase kwambujola sango ja Wanangana haliapwila, ni kulilulieka hanga tukambujole sango ja upatwilo kulutwe. Chikwo nawa, muze twakupukuna ha yitanga yipema ya Yehova, usepa wetu ni iye wakukola. Chino chakutwaha chuma chiyema nawa chipema, sambukila ya ku mbunge ni usakwililo.—Samu 119:103.

18. Yika atu a mu njiza yetu makanyingika, nawa mumu liaka?

¹⁸ Ezekiele kapwile profeta, yetu hi tuli aprofeta ko. Chipwe chocho, tunazange kununga ni kwambujola sango jize jili mu Mbimbiliya, ndo haze mwene mamba ngwenyi, kutwafupiwile nawa kwambujola. Muze upatwilo muheta, atu mu njiza yetu kechi kasamba ha kwamba ngwo, kutwakaalwezele hanji ngwo, Zambi kaavulamine. (Eze. 3:19; 18:23) Alioze, o makatayiza ngwo, sango twapwile ni kwambujola jakatukile lume kuli Zambi.

19. Yika muyitwaha tachi mba tulinge kanawa mulimo wetu wa kwambujola?

¹⁹ Yika muyitwaha tachi mba tulinge kanawa mulimo wetu wa kwambujola? Yuma yizeyene yitatu yatakamishine Ezekiele. Twakwambujola, mumu tuli ni shindakenyo ngwetu, Yehova mwe wakututuma, twakuwana utakamiso kupalikila mu spiritu yisandu ya Zambi, nawa Liji lia Zambi liakutwaha tachi. Ni ukwaso wa Yehova, tuli ni tachi ja kununga ni kwambujola ni ‘kunyongonona ndo ku songo.’—Mateu 24:13.