1. Kuchi tunanyingika ngwetu, Yehova kanazange tukundame kuli iye?

 YEHOVA kanatusanyika hanga tukundame kuli iye. (Tia. 4:8) Kanazange kupwa Zambi yetu, Tata kanda Sepa lietu. Iye nawa kakukumbulula yilemba yetu ni kutukwasa ha mashimbu akalu. Kakuzachisa ululikiso wenyi hanga atulongese ni kutufunga. Yika yetu twatamba kulinga mba tukundame kuli Yehova?

2. Kuchi mutuhasa kukundama kuli Yehova?

² Mutuhasa kukundama kuli Yehova ha kulemba, kutanga Mbimbiliya ni kupukuna ha yize tunatange. Yino muyokesa zango ni usakwililo wetu kuli iye. Nyi twachilinga, mutumwaha yuma yize atela—kumwononokena ni kumuwayila. (Uso. 4:11) Nyi twanyingika kanawa Yehova, mutumujikijila chinji ni kujikijila ku ululikiso uze akuzachisa hanga atukwase.

3. Yika Ndiapu akulinga hanga atuhandunune kuli Yehova, mba yika muyitukwasa hanga tuchine kuhichika Yehova ni ululikiso wenyi? (Samu 31:13, 14)

³ Alioze, Ndiapu kakufupa kutuhandununa kuli Yehova, chipi-chipi muze tunapalika mu yipikalo. Kuchi akuchilinga? Iye kakweseka hakehe-hakehe kutepulula ujikijilo wetu muli Yehova ni ku ululikiso wenyi. Alioze mutuhasa kukumba manyonga jenyi api. Nyi ufulielo ni ujikijilo wetu muli Yehova muyikola, kutuchi kwecha nichimwe chituhandunune kuli iye ni ku ululikiso wenyi.—Tanga Samu 31:13, 14.

4. Yika mutumona ha mutwe uno?

⁴ Ha mutwe uno, mutumonaho kapinda mutatu wakukatuka haze lia chikungulwila, yoze mahasa kutepulula ujikijilo wetu muli Yehova ni ku ululikiso wenyi. Kuchi kapinda wacho  mahasa kutuhandununa kuli Yehova? Yika twatamba kulinga mba tulifunge ku miheto yino ya Satana?

5. Kuchi yipikalo muyihasa kweseka ujikijilo wetu muli Yehova ni ku ululikiso wenyi?

⁵ Ha mashimbu amwe, yetu eswe twakupalika mu yipikalo ngwe, kutuhungumiona kuli asoko ni kutokesa mulimo wetu. Yipikalo yacho muyihasa kweseka ujikijilo wetu ku ululikiso wa Yehova ni kutuhandununa kuli iye. Mu mutapu uka? Nyi yipikalo muyishimbula chinji, mutuhasa kulivwa ukawetu ni kunenganyana. Satana kakuzachisa mashimbu jacho hanga atutwale tunyonge ngwetu, Yehova keshi kutuzanga. Chakutalilaho, mutuhasa kulihula ngwetu, shina Yehova kakutuzanga lume? Shina lamba lize tunamono linakatuka kuli Yehova ni ku ululikiso wenyi? Yuma ya mutapu au, yalingiwile kuli amwe A-Izalele mu Engitu. Ku uputukilo, ayo kapwile ni kutayiza ngwo Yehova kasakwile Mose ni Arone hanga aatusule mu undungo. (Kutuhu. 4:29-31) Alioze, muze Falau aapinjishile chinji, o yasuma mulonga Mose ni Arone, ngwo: “Hinwatunukisa ni vumba lipi kumeso ja Falau ni kumeso ja ngamba jenyi ha kuhana katana mu kwoko lio akatushihe.” (Kutuhu. 5:19-21) Ayo yalamikiza tuvumbi ashishika a Zambi. Chapihile chinji! Nyi unapalika mu yipikalo ha mashimbu anji, yika muhasa kulinga hanga ununge ni kujikijila kuli Yehova ni ku ululikiso wenyi?

6. Yika twalilongesa ha chilweza cha profeta Habakuke? (Habakuke 3:17-19)

⁶ Lemba kuli Yehova ni mbunge yeswe, nawa mwite ukwaso. Profeta Habakuke kapalikile mu yipikalo yinji. Ha shimbu limwe, iye yaputuka kuyambashana nyi Yehova te kakulihulumba lume hali iye. Kashika, yalemba kuli Yehova ni kumulweza chize te anevu. Yamba ngwenyi: “Yehova ndo mwiji muka munguteta ungukwase mba yena kushi kwivwa? . . . Kuchi te wakungumwesa chipi?” (Haba. 1:2, 3) Yehova kakumbulwile kulemba cha kavumbi kenyi washishika. (Haba. 2:2, 3) Muze Habakuke apukwine ha yuma yeswe yize Yehova alingilile atu jenyi, mba yapwa cheka ni uwahililo. Yapwa nawa ni shindakenyo ngwenyi, Yehova mamufunga ni kumukwasa kukumba yipikalo yeswayo. (Tanga Habakuke 3:17-19.) Yika twalilongesa? Twalilongesa ngwetu, nyi tunapalika mu yipikalo, twatamba kulemba kuli Yehova ni kumulweza chize tunalivu. Hanyima tufupenu ukwaso wenyi. Nyi twachilinga, mutupwa ni shindakenyo ngwetu, Yehova matwaha tachi jize tunafupiwa hanga tunyongonone. Muze mutulivwa ngwetu Yehova kanatukwase, ufulielo wetu muli iye muukola chinji.

7. Yika umwe mu usoko wa Shirley amwambile, alioze yika yakwashile Shirley mba anunge ni kujikijila muli Yehova?

⁷ Nunga ni kulinga yuma yize muyikukwasa kupwa hakamwihi ni Yehova. Shirley, umwe pangi ku Papua-Nova Guiné, kapalikile mu yuma yikalu chinji. b Asoko jenyi kapwile yiswale, kashika ha mashimbu amwe, te chakupwa chikalu kuwana yuma ya kulia. Umwe mu usoko wenyi yamba kumutwala hanga eche kujikijila kuli Yehova. Iye yamwamba ngwenyi: “Wakwamba ngwe spiritu yisandu yakukukwasa, mba ukwaso wacho kuliko uli? Asoko je nihindu achili yiswale. Yena unakisa mashimbu je ni kwambujola.” Shirley yamba ngwenyi: “Yingulihula ngwami: ‘Shina Zambi kakungupala lume yami ni asoko jami?’ Yingulemba kuli Yehova ni kumulweza  yeswe yize te ngunanyongo. Yingununga ni kutanga Mbimbiliya, mikanda yetu, kwambujola ni kuya ku kukunguluka.” Ha kupalika cha amwe mashimbu, iye yaputuka kumona ngwenyi Yehova kanakwase asoko jenyi. Asoko jenyi te keshi kutwama ni zala, nawa kapwile ni kuwahilila. Shirley yamba nawa ngwenyi: “Namwene ngwami Yehova kanakumbulula yilemba yami.” (1 Timo. 6:6-8) Nyi wanunga ni kulinga yuma ya ku spiritu, yipikalo hanji kuyambashana kuyichi kukuhandununa kuli Yehova.

8. Yika muyihasa kulingiwa kuli mandumbu jetu waze akwete yiteli mu ululikiso wa Yehova?

⁸ Kupalikila mu yisaji ni ha internet, akwa-kole jetu kakumwanga mahuza hanji sango ja saki hakutwala kuli mandumbu jetu waze akwete yiteli mu ululikiso wa Yehova. (Samu 31:13) Mandumbu amwe kakwasa mu mazuwo a ususu ni kwapatwila ngwo, yingalwe. Yino yalingiwile nawa kuli Akwa-Kristu ku sekulu yitangu muze asumine Paulu mulonga ni kumusa mu zuwo lia ususu. Yika ayo alingile?

9. Yika amwe Akwa-Kristu alingile muze Paulu amusele mu zuwo lia ususu?

⁹ Muze postolo Paulu amusele mu zuwo lia ususu ku Roma, amwe Akwa-Kristu yecha kumukwasa. (2 Timo. 1:8, 15) Mumu liaka? Shina ayo kapwile ni kuvwila Paulu sonyi mumu atu te kakumumona ngwe chingalwe? (2 Timo. 2:8, 9) Nyi kapwile ni kwivwa woma ngwo, no mahungumiona? Twanyingikine yize yaatwalile kuchilinga, alioze kota Paulu kevwile chinyengo chinji. Iye kapalikile mu yipikalo yinji ni kusa mwono wenyi mu ponde mumu lia mandumbu jacho. (Yili. 20:18-21; 2 Kori. 1:8) Kutwazangile kupwa ngwe Akwa-Kristu waze ahichikile Paulu ha shimbu lize te anafupiwa ukwaso. Yika twatamba kwiwuluka muze mandumbu waze akwete yiteli maahungumiona?

10. Yika twatamba kwiwuluka muze mandumbu jetu waze akwete yiteli maahungumiona, nawa mumu liaka?

¹⁰ Iwuluka mumu liaka akutuhungumiona,  nawa iya uli kunyima lia yuma yacho. Mukanda 2 Timoteu 3:12 unambe ngwo: “Waze eswe mazanga kwenda ni ululi muli Kristu Yesu kumakamona yihungumiona.” Kashika, kutwatambile kukomoka ngwetu Satana mahungumiona, chipi-chipi mandumbu waze akwete yiteli. Iye kanazange hanga mandumbu wano eche kushishika kuli Yehova, nawa kanazange kutuvwisa woma.—1 Petu. 5:8.

11. Yika twalilongesa ha chilweza Oneseforu? (2 Timoteu 1:16-18)

¹¹ Nunga ni kukwasa mandumbu je ni kushishika kuli ayo. (Tanga 2 Timoteu 1:16-18.) Ku sekulu yitangu, Oneseforu umwe Mukwa-Kristu kakahichikile Paulu ngwe chize alingile Akwa-Kristu akwo. Iye “kevwile sonyi ha lenge [lia Paulu].” Shimbu evwe sonyi, yafupa Paulu, muze amuwanyine yamukwasa ha yize te anafupiwa. Ha kulinga chino, iye yasa mwono wenyi mu ponde. Yika twalilongesa? Twalilongesa ngwetu, kanda twecha woma utukinde kukwasa mandumbu jetu waze anahungumiona. Shimbu twivwe woma, twatamba kwakalila ni kwakwasa ha yize anafupiwa. (Yishi. 17:17) Ayo kanafupiwa chinji zango ni ukwaso wetu.

12. Yika twalilongesa ha chilweza cha mandumbu jetu mu Rússia?

¹² Tutalenu chilweza cha mandumbu jetu mu Rússia. Ayo keshi kwecha kukwasa mandumbu ni mapangi jo waze ali mu mazuwo a ususu. Muze amwe akwatwala ku chota cha usopelo, mandumbu anji kakuyako ni kwakwasa. Yika twalilongesa? Twalilongesa ngwetu, muze mandumbu waze akwete yiteli mu ululikiso wetu malamikiza yuma, mahungumiona hanji kwakwata, kanda twivwa woma. Twalembelenu, tukwasenu asoko jo ni kufupa majila akwo a kwakwashilamo ha yize anafupiwa.—Yili. 12:5; 2 Kori. 1:10, 11.

13. Kuchi kutukekuna muchihasa kukwata ha ujikijilo wetu kuli Yehova ni ku ululikiso wenyi?

¹³ Asoko jetu waze hi Yela ya Yehova ko, atu waze twakulilongesa no ku shikola, ni waze twakalakala no mahasa kutukekuna mumu lia kwambujola sango lipema ni kukaula shimbi ja Yehova. (1 Petu. 4:4) Ayo mahasa kwamba ngwo: “Yetu twakukuzanga, alioze uwayilo wenu wapwa chinji ukalu nawa wakukaula yuma ya ku shakulu.” Chikuma chize chakupinjisa atu anji chili muze akusosolola umwe mu chikungulwila. Ayo kakwamba ngwo: “Yenu nwakwamba ngwo nukwete zango, alioze talenu chize nwakutwama ni mutu yoze asosolola.” Maliji a mutapu au, mahasa kututwala hanga tuputuke kuyambashana. Chocho, mutuputuka kulihula ngwetu: ‘Shina yuma yize Yehova anangwite hanga ngulinge hi yikalu ko? Shina ululikiso kuwatambile kwashiwisa yuma ha chikuma chino?’ Nyi unapalika mu yuma ya mutapu au, kuchi muhasa kukundama kuli Yehova ni ku ululikiso wenyi?

14. Yika twatamba kulinga muze atu matukekuna mumu lia kutwama kulita ni shimbi ja Yehova? (Samu 119:50-52)

¹⁴ Sako tachi hanga ulinge yize Yehova akwamba ngwo yalita. Yombi te kakukaula shimbi ja Yehova chipwe ngwe kapwile ni kumukekuna ha kuchilinga. Umwe wa kuli masepa a Yombi yafupa kumutwala hanga atayize ngwo, chipwe ngwe malinga yuma yipi hanji yipema, nihindu Zambi keshi kuyipala. (Yombi 4:17, 18; 22:3) Alioze, Yombi kakatayijile mahuza jacho. Iye kanyingikine ngwenyi, shimbi ja Yehova hakutwala ku chipi ni chipema jalita, nawa te hakwata chiyulo cha kutwama kulita ni shimbi jacho. Kakechele chuma chimwe hanji umwe mutu apihise ushishiko wenyi  kuli Yehova. (Yombi 27:5, 6) Yika twalilongesa? Twalilongesa ngwetu, kanda twecha kutukekuna kuli akwetu chitutwale kuyambashana ha shimbi ja Yehova. Tunyongenu ha yeswe yize hitwapalika ku mwono. Shina kutushi kumona ngwetu, shimbi jeswe ja Yehova jalita nawa jakutuyukisa? Kashika, tunungenu ni kukwasa ululikiso uze wakukaula shimbi jacho. Hachino, chipwe ngwe atu anji matukekuna, nihindu kutuchi kwecha kuwayila Yehova nilimwe tangwa.—Tanga Samu 119:50-52.

15. Mumu liaka Brizit amukekwine?

¹⁵ Tutalenu yize yalingiwile kuli Brizit, umwe pangi ku Índia, yoze akekwine kuli asoko mumu lia ufulielo wenyi. Ha amwe mashimbu muze te hamupapachisa ha mwaka 1997, mukwo-lunga yoze te hi Chela cha Yehova ko yatokesa mulimo. Hachino, lunga yakwata chiyulo cha kuya ni kutwama ku zuwo lia yisemi jenyi mu mbonge yikwo. Amu mukwo-lunga kakapwile ni mulimo, Brizit katambile kukalakala mashimbu eswe hanga akwase usoko. Chikwo nawa, Zuwo lia Wanangana lize liapwile hakamwihi, mba ahete ko te kakulinga kilometro 350. Chaluyinda, asoko ja mukwo-lunga yaputuka kulimika nenyi mumu lia ufulielo wenyi. Yihungumiona yiyoka chinji, chocho ayo yakatuka ku zuwo liacho ni kwalukila kweka. Kuze ayile, susumuku mukwo-lunga yafwa. Kulutwe, mwanenyi wa pwo wa miaka 12 neye yafwa ni musongo wa câncer. Chikwo nawa, asoko jenyi yamwamba ngwo, ni kakapwile Chela cha Yehova kachi yuma yacho kuyakalingiwile. Chipwe chocho, iye yanunga ni kujikijila kuli Yehova ni ku ululikiso wenyi.

16. Kuchi Brizit amuwahishile ha kujikijila kuli Yehova ni ku ululikiso wenyi?

¹⁶ Amu Brizit te atwama kusuku ni chikungulwila, kalayi wa mbonge yamulweza hanga apwe ni kwambulwila kuzekwene atwama ni kulinga kukunguluka ku zuwo lienyi. Ku uputukilo, kamwene ngwe chikalu, chipwe chocho yakaula usongwelo wacho. Iye te kakwambujola kuli akwo, kulinga kukunguluka ku zuwo lienyi ni kulinga uwayilo wa  mu usoko mashimbu eswe amwe ni ana jenyi a mapwo. Mba yika azukile? Brizit yaputuka kusongwela malongeso anji a Mbimbiliya, anji a kuli alongi jacho yaapapachisa. Ha 2005 iye yapwa pionelu wa shimbu lieswe. Brizit kanakamuwahisa ha kujikijila kuli Yehova ni kushishika ku ululikiso wenyi. Anenyi kanawayila Yehova ni ushishiko, nawa mu ngiza yize apwile ni kwambulwila muli yikungulwila yaali. Brizit kali ni shindakenyo ngwenyi, Yehova kamwaha tachi jize te anafupiwa hanga ahase kukumba yipikalo ni kunyongonona chipwe ngwe asoko jenyi kamukekwine.

17. Yika twatamba kununga ni kulinga?

¹⁷ Satana kanazange hanga tutayize ngwo, Yehova kakutwehuka muze twakupalika mu yipikalo ku mwono wetu. Nawa ngwo, nyi twanunga ni kushishsika kuli Yehova yuma muyinunga ni kukala. Iye kakuzanga kutuvwisa woma muze mandumbu jetu waze akwete yiteli akwaliongela yuma, kwahungumiona ni kwasa mu mazuwo a ususu. Iye nawa kakuzachisa atu atukekune hanga tuchine kujikijila kuli Yehova ni ku ululikiso wenyi. Alioze, tunanyingika kanawa miheto yenyi, kashika kechi kuhasa kutupiangula. (2 Kori. 2:11) Hachino, nunga ni kushishika kuli Yehova ni ku ululikiso wenyi ha kwehuka mahuza a Satana. Iwuluka ngwe, Yehova kechi kakuvulama nilimwe tangwa. (Samu 28:7) Kashika, kanda wecha nichimwe chikuhandunune kuli Yehova!—Roma 8:35-39.

18. Yika mutukalilongesa ha mutwe uze muuhataho?

¹⁸ Ha mutwe uno, twamonaho yipikalo ya haze lia chikungulwila yize muyihasa kutupinjisa. Alioze, ujikijilo wetu kuli Yehova ni ku ululikilo wenyi mahasa nawa kuweseka kupalikila mu kapinda yoze wakusoloka mu chikungulwila. Kuchi mutuhasa kukumba kapinda wacho? Yino ye mutukalilongesa ha mutwe uze muuhataho.