1. Yika yinasolola pundu ngwo tuli “ha matangwa a kusula”?

SHINA nwasemukine hanyima lia mwaka 1914? Nyi chocho, nwatwama mwono wenu weswe mu “matangwa a kusula” a miaka yino. (2 Timo. 3:1) Tulieswe hitunevu yize Yesu ambile ngwenyi, muyikasoloka ha matangwa jetu. Yuma yacho yili jita, kapunga, minyiko, yilungo, kwoka cha upi ni kuhungumiona atu ja Yehova. (Mateu 24:3, 7-9, 12; Luka 21:10-12) Tunamono nawa chize atu anasolola yitanga yize postolo Paulu ambile. ( Tala mushete, “Yitanga Yize Atu Ali Nayo Musono.”) Kashika, etu twakuwayila Yehova tunanyingika pundu ngwetu tuli “ha matangwa a kusula.”— Mika 4:1.

2. Yihula yika yinafupiwa kumbululo?

² Tuli kusongo lia “matangwa a kusula,” mumu miaka yinji yapalika kukatuka mu 1914. Amu songo hi liakundama, twatamba kunyingika makumbululo a yihula yino yilemu: Yuma yika muyilingiwa kusongo lia “matangwa a kusula”? Yika Yehova anazange tulinge muze tunashimbwila yuma yacho?

3. Mutambi uka makatwa akwa-kuyula kulita ni uprofeto uli ha 1 A-Tesalonika 5:1-3?

³ Tanga 1 A-Tesalonika 5:1-3. Ha maliji twatanga, Paulu kavulukaho “tangwa lia Mwene.” Kulita ni chisoneko chino, tangwa liacho linalumbunuka shimbu lize  makalukukila “Babilonia Yinene,” hanji ngwetu uwayilo wa mahuza wa hashi heswe ndo muze Armagedone muyikahwa. (Usolwelo 16:14, 16; 17:5) Ha amwe mashimbu, muze “tangwa” liacho kanda liheta, yifuchi muyikatwa mutambi wa “Sambukila, [ni] kutwama kawape.” Ewa, mashimbu amwe, akwa-kuyula kakwamba maliji alifwa ni maliji jacho muze akuhanjika ha sambukila yize yili hakachi ko. * Alioze, mutambi wa ‘sambukila ni kutwama kawape’ anambe mu Mbimbiliya muukalisa chinji ni yize atu jacho anamba-mba musono. Mumu liaka? Mumu muze atu makevwa mutambi wacho, o makanyonga ngwo akwa-kuyula kaneha pundu sambukila ni ukulungunga. Kuma ka, “hohene kwenyeka” muchikaatulumukina muze “luyinda munene” maputuka.—Mateu 24:21.

4. (a) Yika tunashimbwila hakutwala ku mutambi wa kwamba ngwo ‘sambukila ni kutwama kawape’? (b) Yika yize hi tunanyingika kulu ha lusango wacho?

⁴ Kuli yimwe twanyingika hakutwala ku mutambi wa ‘sambukila ni kutwama kawape.’ Alioze kuli yize nawa kutwanyingikine. Kutwanyingikine yize muyikalingiwa mba akwa-kuyula akatwe mutambi wacho ni chize makautwa. Kutwanyingikine nyi makautwa kamuwika nyi yisuho yinji. Hindu, tunanyingika ngwetu: Kutwatambile kunyonga ngwetu, akwa-kuyula mahasa pundu kuneha sambukila hano hashi. Kashika, etu tunashimbwila wika mutambi wacho, mumu we muukasolola ngwo tangwa lia Yehova hi muliputuka!

5. Kuchi mukanda wa 1 A-Tesalonika 5:4-6 unatukwase tulilulieke hakutwala ku ‘tangwa lia Yehova?’

⁵ Tanga 1 A-Tesalonika 5:4-6. Mu maliji twatanga, Paulu katulweza yize twatamba kulinga muze tunashimbwila ‘tangwa lia Yehova.’ Kashika, kutwatambile “kuya tulo ngwe atu akwo.” Twatamba ‘kukeya’ ni kulawola. Chakutalilaho, twatamba kukeya tuhone kulinjisa mu yuma ya mafwefwe. Nyi twalinjisa mu yuma yacho, mutulifwa ni “akwa hashi.” (Yoa. 15:19) Alioze, tunanyingika ngwetu, Wanangana wa Zambi we wika muukaneha sambukila hashi.

6. Kuchi twatamba kukwasa akwetu, nawa mumu liaka?

⁶ Alioze muze tunalawola, twatamba nawa kukwasa akwetu hanga no alawole, amone yize Mbimbiliya yinambe ngwo muyisoloka mu chifuchi. Twatamba kunyingika ngwetu, muze luyinda munene maputuka muchikapwa chikalu atu kuputuka kuwayila Yehova. Yeyize kuma twatamba kusa tachi haliapwila hanga twambujole sango lipema. *

7. Yika Yehova anazange hanga tulinge haliapwila?

⁷ Yehova kanazange hanga twambujole chinji ha shimbu likehe lize liasalako shimbu “tangwa” lienyi kanda liza. Kashika, twatamba kukalakala chinji kuhiana “matangwa eswe  mu milimo ya Mwene.” (1 Kori. 15:58) Yino ye ambile Yesu. Hanyima yakutongola yuma yeswe yize muyikalingiwa ha matangwa akusula, yawezelako nawa ngwenyi: “Lie sango lipema ndo malianga kuliambujola ku mavungu eswe.” (Marku 13:4, 8, 10; Mateu 24:14) Tunyingikenu ngwetu: Hita tangwa mutuya ni kwambujola, tunamanununa uprofeto uno wa Mbimbiliya!

8. Kuchi tunanyingika ngwetu mulimo wa kwambujola unende kanawa?

⁸ Mba kuchi mulimo wa kwambujola Wanangana unende? Hita mwaka, atu anji anevu sango lia Wanangana. Chakutalilaho, uchinyongenu ha chize akwa-kwambujola Wanangana oka chinji ha matangwa wano a kusula. Mu 1914, kwapwile wika akwa-kwambujola 5,155 mu yifuchi 43. Alioze musono, kuli unji wa akwa-kwambujola 8,500,000 mu yifuchi 240. Nihindu nawa, mulimo wetu kanda uchihwa. Kashika, twatamba kununga ni kulweza atu ngwetu Wanangana wa Zambi we wika muukahwisa lamba lize tunamono musono.—Samu 145:11-13.

9. Mumu liaka twatamba kununga ni kwambujola sango lipema?

⁹ Kutuchi kwecha kwambujola nyi Yehova kambile ngwenyi tweche. Kwasala mashimbu angahi mba atu anyingike Yehova Zambi ni Yesu Kristu? (Yoa. 17:3) Kutwanyingikine. Chuma tunanyingika chili ngwo waze “Zambi hanafunjikila ku mwono wa mutolo” katamba kulilongesa sango lipema muze luyinda munene kanda aputuka. (Yili. 13:48) Kuchi mutuhasa kukwasa atu jacho hanga ahone kuchelewa?

10. Ukwaso uka Yehova akutwaha hanga utukwase kulongesa atu umwenemwene?

¹⁰ Yehova kupalikila mu ululikiso wenyi, kanatwehe yeswe yize tunafupiwa hanga tulongese atu umwenemwene. Chakutalilaho, hita poso, kakutulongesa mwakulingila mulimo wacho ha kukunguluka cha mwono ni mulimo wetu. Kukunguluka chacho chakutukwasa tunyingike chize mutuputuka kuhanjika ni mutu yoze twalitakana nenyi chitangu ni chize mutufuna ni kumumeneka. Twakulilongesa nawa mwakusongwela longeso lia Mbimbiliya.  Ululikiso wa Yehova watwaha nawa Mushete Wetu wa Yikwata ya Kulongesa Nayo. Yikwata yacho yakutukwasa . . .

• kuputuka kuhanjika ni atu,

• tuhanjike kanawa ni atu,

• hanga tukwase atu azange kulilongesa yuma yinji,

• kulongesa atu umwenemwene kupalikila mu longeso lia Mbimbiliya, ni

• kwakwasa anjile ha site yetu ni kwiza ku Zuwo lia Wanangana.

Alioze, kutwatambile kupwa wika ni yikwata yacho. Twatamba kuyizachisa. * Chakutalilaho, hanyima lia kuhanjika kanawa ni umwe mutu, nyi wamuhichikila kalifwo hanji kaposhi, mwene mahasa kutanga ndo haze mukafuna ni kumumeneka. Hita umwe wa kuli yetu kali ni chiteli chakuya ni kwambujola Wanangana hita kakweji.

11. Mumu liaka asako Malongeso a Mbimbiliya ha Internet?

¹¹ Tutalenu chize Yehova anazachisa Longeso lia Mbimbiliya ha site jw.org^® hanga akwase atu alilongese umwenemwene. (Yako ha ENSINOS BÍBLICOS > LIÇÕES ON-LINE.) Mumu liaka asako malongeso jacho? Hita kakweji, atu anji akufupa-fupa malongeso a Mbimbiliya ha Internet. Malongeso ali ha site yetu, mahasa kukwasa atu aputuke kulilongesa umwenemwene wa Liji lia Zambi. Atu amwe waze twakulitakana no, keshi kuzanga kupwa ni longeso lia Mbimbiliya. Atu amutapu au, twatamba kwalweza wika site yetu hanji kwatumina link ya malongeso jacho. *

12. Yika mutu mahasa kulilongesa ha Malongeso a Mbimbiliya ha Internet?

¹² Malongeso a Mbimbiliya ha Internet, kali ni yikuma yino: “Mbimbiliya ni Mwenyayo,” “Atu Waze Asoneka mu Mbimbiliya,” ni “Sango ja Mbimbiliya Hakutwala ku Kutalatala Chipema cha Kulutwe.” Mu hita chikuma muli malongeso wano:

• Chize Mbimbiliya muyihasa kukwasa mutu

• Yehova iya, Yesu iya nawa angelo aya

• Mumu liaka Zambi atangile atu

• Mumu liaka kuli lamba ni yuma yipi

Malongeso jacho kanalumbununa nawa chize Yehova . . .

• makahwisa lamba ni kufwa,

• makahindwisa afu, ni chize

• makasalakanyisa Wanangana wenyi ha unguvulu wa atu.

13. Shina Malongeso a Mbimbiliya ha internet kasalakana longeso lia Mbimbiliya lize mutu akulilongesa ni umwe Chela ja Yehova? Lumbununa.

¹³ Malongeso a Mbimbiliya ha internet kasalakanyine longeso lia Mbimbiliya lize mutu akulilongesa ni umwe Chela cha Yehova. Yesu hanatwehe mulimo wa kutayisa tumbaji. Kashika, tunafuliela ngwetu atu matanga malongeso ha internet maapwa ni pwila ya kufupa kulilongesa yuma yinji. Achi muchakwasa atayize longeso lia Mbimbiliya. Kusongo lia hita longeso lia Mbimbiliya ha internet, kanakolweza mukwa-kutanga hanga ete umwe Chela cha Yehova amulongese Mbimbiliya. Hachino, hita tangwa atu kuhiana 230 kakwita longeso lia Mbimbiliya ha site yetu. Ewa, chili chilemu mutu kumulongesa Mbimbiliya ni umwe Chela cha Yehova kuhiana ha internet!

14. Kulita ni usongwelo wa Yesu uli ha Mateu 28:19, 20, yika twatamba kulinga, nawa mumu liaka?

¹⁴ Tanga Mateu 28:19, 20. Muze mutulongesa  atu Mbimbiliya, tusenu tachi hanga twakwase apwe “tumbaji . . . , nikualongesa kufunga yuma yeswe yize [Yesu hanatwehe ngwe] shimbi.” Twatamba kwakwasa amone ulemu wakuwayila Yehova ni kukwasa Wanangana wenyi. Chekwamba, twatamba kwakwasa akaule yize analilongesa, ni kulihana ene kuli Yehova ni kwapapachisa. Achi che muchaakwasa mba akaalamwine ha tangwa lia Yehova.—1 Petu. 3:21.

15. Kutushi nawa ni shimbu lia kulinga yika, nawa mumu liaka?

¹⁵ Ngwe chize hi twamba kulu, kwasala shimbu likehe kukatuka haliapwila ni ku kuhwa cha yuma ya mwakono. Kashika, kutwatambile kukisa mashimbu jetu ni kulongesa Mbimbiliya kuli atu waze kazangile kupwa tumbaji twa Kristu. (1 Kori. 9:26) Twatamba kulinga mulimo wetu kafuji-fuji. Atu anji achiliko waze atamba kwivwa sango lia Wanangana muze kuchili ka shimbu.

16. Yika yetweswe twatamba kulinga kulita ni Usolwelo 18:2, 4, 5, 8? (Tala nawa maliji mushi lia lifwo.)

¹⁶ Tanga Usolwelo 18:2, 4, 5, 8. Versu aji jinalumbununa yuma yikwo yize Yehova anazange hanga akwa-kumuwayila alinge. Akwa-Kristu amwenemwene, katamba kwehuka yuma yeswe ya mu uwayilo wa mahuza. Hanji longi wa Mbimbiliya kapwile mu uwayilo wa mahuza shimbu te kanda alilongesa Mbimbiliya. Hanji kapwile ni kuya ku yingeleja ni kulinga yuma yize akulinga ko. Hanji nawa te kakuhana mbongo jinji ku yingeleja yacho. Kashika, longi wa Mbimbiliya katamba kwecha yuma yeswayi, shimbu kanda achimutayiza kupwa mukwa-kwambujola yoze kanda achimupapachisa. Katamba kusoneka mukanda ku yingeleja yacho hanji ku ululikiso weswawo unalingi chihanda cha uwayilo wa mahuza hanga alumbunune ngwo kecha kupwa mutu wo. *

17. Milimo yika yize mukwa-Kristu katambile kulinga, nawa mumu liaka?

¹⁷ Mukwa-Kristu wamwenemwene keshi kukalakala milimo yize yinakwata ku uwayilo wa mahuza. (2 Kori. 6:14-17) Chakutalilaho, keshi kutayiza kukalakala ku yingeleja. Chikwo nawa, mukwa-Kristu yoze wakalakala ku yimwe impreza kechi kutayiza alinge yimwe milimo ku zuwo lize akuzachisa ku uwayilo wa mahuza. Chipwe ngwe kakulinga milimo yenyi mwene, nihindu kechi kutayiza nyi mamusanyika hanga aye ni kulinga milimo yacho ku yingeleja.  Mumu liaka twatamba kulinga chocho? Mumu kutwazangile kulinga milimo yize muyikwasa uwayilo wa mahuza ni kulinjisa mu shili yo.—Iza. 52:11. *

18. Kuchi ndumbu umwe akawile shimbi ja Mbimbiliya hakutwala ku milimo wenyi?

¹⁸ Miaka yimwe kunyima, lunga umwe yoze ahele milimo ya mu yingeleja, yasanyika ndumbwetu mukulwana wa mu chikungulwila yoze te wanyingika milimo yacho. Lunga wacho te kanyingika ngwenyi, ndumbwetu te kakwamba mashimbu eswe ngwo iye keshi kulinga milimo ku yingeleja. Alioze ha shimbu liacho, lunga yono te kanafupu chinji yoze malinga mulimo wacho. Nihindu ndumbwetu yalituna kulinga mulimo wacho, hamukunda wa shimbi ja Mbimbiliya. Ha poso yize yasulileko, akwa-sango yatuhwisa chizulie cha lunga yoze watayijile mulimo wacho, kanase kulusu ha yingeleja. Nyi te ndumbwetu katayijile mulimo wacho, kachi chizulie chenyi che chatuhukile mu papilo lia sango. Achi kachi chapinjishile chinji mandumbu jenyi akwa-Kristu. Uchinyongenu ha chize kachi Yehova neye evwile.

19-20. (a) Yika twalilongesa ha mutwe uno? (b) Yika mutulilongesa ha mutwe uze musulaho?

¹⁹ Kulita ni uprofeto wa Mbimbiliya, chuma chinene chize tunashimbwila hanga chilingiwe chili mutambi wa akwa-kuyula wa kwamba ngwo, ‘sambukila ni kutwama kawape.’ Tunasakwila chinji Yehova hakutulongesa ngwo, manguvulu kechi kuhasa kuneha sambukila ni ukulungunga wamwenemwene. Yika mba twatamba kulinga shimbu kanda achitwa mutambi wacho ni kwenyeka yuma yipi? Yehova kanazange twambujole chinji sango lia Wanangana ni kutayisa tumbaji anji. Kanazange nawa twehuke yuma yeswe yize yinatale ku uwayilo wa mahuza. Chekwamba, twatamba kwecha kupwa atu jo, ni kulituna kukalakala milimo yeswayo yinalingi chihanda ku mayingeleja amu Babilonia Yinene.

²⁰ Kuli yuma yikwo yize muyilingiwa kusongo lia “matangwa [wano] a kusula.” Kuli nawa yize Yehova anashimbwila kuli yetu. Yuma yika yenayo? Kuchi mutuhasa kulilulieka ha yuma yeswe yize muyiza kulutwe lia matangwa? Mutulilongesa yuma yacho ha mutwe uze unasulaho.