MUTWE WAKULILONGESA 41
Nunga ni Kushishika ha “Luyinda Munene”
“Zangenu Yehova, enu asandu jenyi eswe; Yehova kakufunga waze akushishika.”—SAMU 31:23.
MWASO 129 Mutunyongonona
CHIKUMA CHILEMU *
1-2. (a) Mutambi uka makatwa manguvulu a hano hashi? (b) Yihula yika twatamba kukumbulula?
ACHINYONGA ngwe, manguvulu a yifuchi yeswe hatwa kulu mutambi wa ‘sambukila ni kutwama kawape.’ Ni kulizata cheswe ayo hanji mamba ngwo, kaneha sambukila hashi heswe. Ayo mafupa hanga atu eswe anyonge ngwo hashi heswe yuma kuyili kanawa. Kumana manguvulu wano keshi kunyingika yuma yize muyilingiwa kulutwe. Mumu liaka? Mumu kulita ni uprofeto wa Mbimbiliya, “hohene kwenyeka muchitulumuka hali ayo . . . mba kechi komboka nichimwe.”—1 A-Tesalonika 5:3.
2 Twatamba kukumbulula yihula yino yilemu: Yika muyikalingiwa ha “luyinda munene”? Yika Yehova makashimbwila hanga tulinge ha mashimbu jacho? Nawa kuchi mutuhasa kulilulieka haliapwila mba tukanunge ni kushishika ha luyinda munene?—Mateu 24:21.
YIKA MUYIKALINGIWA HA “LUYINDA MUNENE”?
3. Kulita ni Usolwelo 17:5, 15-18, kuchi Zambi makanongesa “Babilonia Yinene”?
3 Tanga Usolwelo 17:5, 15-18. “Babilonia Yinene” makayinongesa! Ngwe chize twamba ku uputukilo, manguvulu a hano hashi kechi kanyingika yize muyikalingiwa ha mashimbu jacho. Mumu liaka? Mumu ‘Zambi makasa nyonga lienyi mu ma mbunge jo mukulinga upale wenyi.’ Nyonga lika lienalio? Liakunongesa uwayilo weswe wa mahuza, kuchingako akwa-Kristu a mahuza. * Zambi makasa nyonga lienyi mu mbunge ya “kumi lia mbinga” ja “ngongo muchila.” Kumi lia mbinga linalumbunuka manguvulu eswe waze anakwase “ngongo” che Kulinunga cha Mavungu. (Nações Unidas.) (Uso. 17:3, 11-13; 18:8) Muze manguvulu makalimika ni uwayilo wa mahuza, hohene mutukanyingika ngwetu luyinda munene haputuka. Wano makapwa mashimbu a yinyengo ni lamba kuli atu eswe hano hashi.
4. (a) Yika hanji muyikatwala manguvulu hanga anongese uwayilo wa mahuza? (b) Yika hanji makanyingika atu waze te akuya mu uwayilo wacho?
4 Yetu kutwanyingikine chiyulo chize manguvulu makakwata mba anongese Babilonia Yinene. Ayo hanji makamba ngwo mayingeleja kanapinjisa sambukila hano hashi nawa ngwo, kakulinjisa mu yuma ya mafwefwe. Nawa hanji mahasa kwamba ngwo, mayingeleja hanalikungulwila upite ni yikumba yinji. (Uso. 18:3, 7) Chinasoloka ngwe kunongesa cha Babilonia Yinene, kuchalumbunukine ngwo atu eswe waze atwama mu uwayilo wacho makaashiha. Alioze, kota manguvulu makanongesa maululikiso a mayingeleja. Muze uwayilo weswe wa mahuza maunongesa, atu waze te akuyamo makanyingika ngwo kuma te kakwonga kuli mangana jo. Hachino, ayo hanji makalikala ngwo te keshi kuya mu uwayilo wacho.
5. Yika Yehova analakenya hakutwala ku luyinda munene, nawa mumu liaka?
5 Mbimbiliya kuyishi kusolola nyi kunongesa cha Babilonia Yinene muchikambata matangwa angahi. Alioze yetu tunanyingika ngwetu, muchikambata mashimbu akahe. (Uso. 18:10, 21) Yehova hanalakenya ‘kutepulula matangwa’ a luyinda munene hanga alamwine “waze hanaatongola” ni ululikiso wamwenemwene. (Marku 13:19, 20) Alioze, yika Yehova makashimbwila hanga tulinge ha mashimbu jacho—kukatuka ha uputukilo wa luyinda munene ndo kusongo lia Armagedone?
NUNGA MU UWAYILO WAMWENEMWENE
6. Kutuhuka mu uwayilo wa mahuza yika chinalumbunuka nawa?
6 Ngwe chize twamona ha mutwe uze wapalika, Yehova kanazange hanga tuvumbi twenyi alihandunune ni Babilonia Yinene. Kulinga chino, chinalumbunuka yuma yinji, hi wika ko kutuhuka mu uwayilo wa mahuza. Tunafupiwa kusa tachi hanga tununge mu uwayilo wamwenemwene, chekwamba uwayilo walinanga wa Yehova. Tutalenu majila aali waze mutuhasa kuchilingilamo.
Chipwe ha mashimbu akalu, kutuchi kwecha kulikungulula (Tala paragrafu 7) *
7. (a) Kuchi mutuhasa kukwasa shimbi jingunu ja Yehova ni hamu lieswe? (b) Kulita ni A-Hepreu 10:24, 25, mumu liaka kuya kukunguluka haliapwila chili ni ulemu unji?
7 Jila yitangu, ni hamu lieswe twatamba kukalila shimbi jingunu ja Yehova. Kutwatambile kutayiza shimbi ni yitanga ya hano hashi. Chakutalilaho, yetu kutushi kutayiza upangala niumwe, kuchingako ulo wa malunga ni malunga hanji mapwo ni mapwo ni yitanga yikwo ya utanji. (Mateu 19:4, 5; Roma 1:26, 27) Jila yamuchiali, twatamba kununga ni kuwayila Yehova hamwe ni mandumbu jetu akwa-Kristu. Yetu nihindu mutununga ni kulikungulula mu Mazuwo a Wanangana, chipwe ku mazuwo ja mandumbu hanji mu usweke. Chipwe ngwe mukulingiwa cheswacho, nihindu kutuchi kecha kulikungulula hanga tuwayile Yehova. Kwamba pundu, tunafupiwa kulikungulula ‘kuhiana chikolo shimbu tunamona lie tangwa linakundama.’—Tanga A-Hepreu 10:24, 25.
8. Kwalumuka chika hanji muchikalingiwa ha sango jize mutukambujola ha luyinda munene?
8 Kota ha mashimbu a luyinda munene, sango jize twakwambujola mujikalumuka. Musono twakwambujola sango lipema lia Wanangana nawa twakusa tachi hanga tutayise tumbaji. Alioze ha luyinda munene, sango jetu hanji mujikapwa jikalu, ngwe chiwe chinene cha makelekeshi. (Uso. 16:21) Hanji mutukambujola ngwetu, chifuchi chino cha Satana kwasala hakehe achinongese. Muze mutuheta ha mashimbu jacho, mba mutukanyingika kanawa sango jize mutukambujola ni chize mutukajambujola. Shina mutukambujola ngwe chize twakwambujola haliapwila? Kutala mutukazachisa majila aha? Mashimbu makasolola yize mutukalinga. Alioze chipwe ngwe mutukalinga yesweyo, kota mutukapwa ni uhashi wa kwambujola ni hamu lieswe sango ja upatwilo wa Yehova!—Eze. 2:3-5.
9. Kuchi akwa-mavungu makevwa ha sango jetu, nawa shindakenyo yika tuli nayo?
9 Chinasoloka ngwe sango jetu mujikevwisa akwa-mavungu kupihia. Hachino, ayo hanji makafupa kutukanjisa kwambujola liakulu. Kashika mutukafupiwa kufuliela muli Yehova ni mbunge yeswe. Musono iye kakutwaha ukwaso weswawo mutufupiwa hanga twambujole sango lipema. Kashika tuli ni shindakenyo ngwetu, kulutwe lia matangwa Zambi makatwaha tachi jize mutukafupiwa hanga tulinge upale wenyi.—Mika 3:8.
LILULIEKE MUZE AKWA-KOLE MAKALUKUKILA ATU JA ZAMBI
10. Kulita ni uprofeto uli ha Luka 21:25-28, kuchi atu anji makevwa ha luyinda munene?
10 Tanga Luka 21:25-28. Ha luyinda munene, atu makevwa yikola ku mbunge, mumu yeswayo te akunyonga ngwo muyinunga makayinongesa. Ayo ‘makapinda,’ ni kwivwa woma wa kutokesa mwono wo ha mashimbu jacho a lamba ku mwono wa atu. (Zefa. 1:14, 15) Ha mashimbu jacho, mwono hanji muukakaliwa chinji chipwe kuli tuvumbi twa Yehova. Amu kutushi kulinga yuma ya mafwefwe, hanji mutukapalika mu kapinda munji. Hanji mutukahona chipwe yuma yakulikwasa nayo ku mwono wa hita tangwa.
11. (a) Mumu liaka akwa-mavungu makahulikila meso jo hali Yela ja Yehova? (b) Mumu liaka kutuchi kafupiwa kwivwa woma ha luyinda munene?
11 Ha mashimbu amwe, atu waze apwile mu uwayilo wa mahuza makamona ngwo, Yela ja Yehova wika e ananungu ni uwayilo wo. Chino muchikeevwisa kupihia. Hachino, achinyonga chizungozungo chize atu jacho makaneha ni ha internet. Akwa-mavungu ni lemba lio Satana, makatuvwila kole mumu lia kusala wika yetu. Ayo makamona ngwo, kahashile kumanununa upale wo wakuhwisa uwayilo weswe hano hashi. Hachino, makahulikila meso jo hali yetu. Ha shimbu liacho he akwa-mavungu makalipwisa Ngoke wa Mangoke. * Ayo makalikungulula hamuwika hanga akalukukile tuvumbi twa Yehova. (Eze. 38:2, 14-16) Yino muyihasa kutusakalalisa, mumu kutwanyingikine mu yimako-yimako chize ayo makatulukukila. Alioze, tuli ni shindakenyo ngwetu, kutuchi kafupiwa kwivwa woma ha luyinda munene. Yehova makatwaha usongwelo uze mukatulamwina. (Samu 34:19) Yetu ‘mutukahetuka wika ni kutala kwilu,’ mumu mutukanyingika ngwetu ulamwino wetu hiwakundama. *
12. Yika ‘ndungo wamwenemwene, wa kanyama’ akulinga hanga atululieke hakutwala ku tangwa lia Yehova?
12 ‘Ndungo wamwenemwene, wa kanyama’ kanatululieka hanga tukanunge ni kushishika ha luyinda munene. (Mateu 24:45) Iye kakuchilinga mu majila eka ni eka, alioze tutalenu chilweza chimuwika: kukunguluka cha mambonge cha 2016 ndo 2018. Hita kukunguluka chacho, chinakashimutwina chimwe chitanga chize tunafupiwa hanga akatulamwine ha tangwa lia Yehova. Tutalenu yitanga yacho.
KOLESA USHISHIKO, KUNYONGONONA NI HAMU LIE
Lilulieke haliapwila hanga ukalilamwine ha “luyinda munene” (Tala maparagrafu 13-16) *
13. Yika muyitukwasa kukolesa ushishiko wetu kuli Yehova, nawa mumu liaka twatamba kuchilinga haliapwila?
13 Kushishika: Mutwe wa kukunguluka cha mambonge cha 2016 wapwile ngwo: “Nunga ni Kushishika Kuli Yehova!” Kukunguluka chino chatulongesele ngwo, mba tushishike kuli Yehova, twatamba kukolesa usepa wetu ni iye. Pande jambile ngwo, mutuhasa kukolesa usepa wetu ni Yehova ha kulemba ni mbunge yeswe ni kulilongesa chinji Mbimbiliya. Kulemba ni kulilongesa Mbimbiliya, chakutwaha tachi hanga tuhase kukumba yipikalo. Amu songo lia hano hashi ha Satana linakundama, ushishiko wetu kuli Yehova ni ku Wanangana wenyi, muhasa kupalika mu yeseko yinji. Kota atu makatukekuna chinji. (2 Petu. 3:3, 4) Chino muchikalingiwa mumu kutushi kukwasa chizavu nichimwe cha mafwefwe. Nyi tunazange kununga ni kushishika kuli Yehova ha luyinda munene, twatamba kukolesa ushishiko wetu haliapwila.
14. (a) Yika muyikalumuka kuli mandumbu waze anasongwela ululikiso wa Yehova hano hashi? (b) Mumu liaka mutukafupiwa kushishika muze yino muyikalingiwa?
14 Ha luyinda munene, yimwe muyikalumuka hakutwala kuli mandumbu waze anasongwela ululikiso wa Yehova hano hashi. Ha amwe mashimbu, mandumbu eswe a kuwayisa waze makapwa hano hashi makaya mu malilu hanga akase jita ya Armagedone. (Mateu 24:31; Uso. 2:26, 27) Chino chinalumbunuka ngwo, mandumbu amu Chizavu cha Tusongo kechi kapwa hamwe ni yetu hano hashi. Chipwe chocho, mbunga yinene muyikapwa yakululieka kanawa. Mandumbu ajama a kuli mapanga akwo makanunga ni kusongwela atu ja Yehova. Muze yino muyikalingiwa, mutukafupiwa kusolola ushishiko wetu ha kukwasa mandumbu jacho ni kukaula usongwelo uze Zambi makatwaha kupalikila muli ayo. Nyi tunazange lume kulilamwina ndo tukakaule usongwelo wo!
15. Yika muyitukwasa kukolesa kunyongonona chetu, nawa mumu liaka twatamba kuchilinga haliapwila?
15 Kunyongonona: Mutwe wa kukunguluka cha mambonge cha 2017 wapwile ngwo: “Kanda Uhonga!” Kukunguluka chino chakolesele uhashi wetu wa kukumba yihungumiona. Twalilongesele ngwetu, kutushi kunyongonona wika muze yuma yinende kanawa. Mutuhasa kukolesa kunyongonona chetu ha kujikijila muli Yehova. (Roma 12:12) Kutwatambile kuvulama chilakenyo cha Yesu chize chinambe ngwo: “Mweswe manyongonona ndo ku songo, kumakamulamwina.” (Mateu 24:13) Chilakenyo chino chinasolola ngwo, twatamba kununga ni kushishika chipwe muze mutupalika mu yihungumiona. Nyi mutunyongonona mu hita kapinda yoze tunapalika musono, mutukahasa kunyongonona ha luyinda munene.
16. Hamu liamwenemwene kulihi liakwiza, nawa kuchi mutuhasa kukolesa hamu lietu haliapwila?
16 Hamu: Mutwe wa kukunguluka cha mambonge cha 2018 wapwile ngwo: “Pwako ni Hamu!” Kukunguluka chino chinakatwiwulula ngwo hamu kuliatalile ha uhashi uze tukwete. Hachino, chizechene ngwe kunyongonona, hamu liamwenemwene liakwiza ha kujikijila kuli Yehova. Kuchi mutuhasa kukolesa ujikijilo wetu kuli Yehova? Mutuchilinga ha kutanga Mbimbiliya hita tangwa ni kupukuna ha chize Yehova alamwinyine tuvumbi twenyi ku mashimbu a kunyima. (Samu 68:20; 2 Petu. 2:9) Muze akwa-mavungu makatulukukila ha luyinda munene, ha mashimbu jacho mutukafupiwa chinji hamu ni kujikijila kuli Yehova kuhiana musono. (Samu 112:7, 8; Hepre. 13:6) Nyi twajikijila kuli Yehova haliapwila, mutukapwa ni hamu muze Ngoke makatulukukila. *
SHIMBWILA ULAMWINO WE NI MBUNGE YESWE
Kwasala hakehe, Yesu ni tujita twenyi a mu malilu eze ni kunongesa akwa-kole ja Zambi mu Armagedone! (Tala paragrafu 17)
17. Mumu liaka kutwafupiwile kwivwa woma ha Armagedone? (Tala chizulie ha chifukilo.)
17 Ngwe chize twalilongesanga ha mutwe uze wapalika, anji a kuli yetu tuli ni mwono ha matangwa wano a kusula. Alioze, tuli nawa ni kutalatala cha kulilamwina ha luyinda munene. Jita ya Armagedone ye muyikahwisa kuyula cheswe cha Satana. Chipwe chocho, kutwafupiwile kwivwa woma. Mumu liaka? Mumu jita yacho yili ya Zambi. (Yishi. 1:33; Eze. 38:18-20; Zeka. 14:3) Muze Yehova makemba chitavwi, Yesu Kristu makasongwela tujita twa Zambi ha jita yacho. Iye hamwe ni akwa-Kristu akuwayisa waze makahindwisa ni tununu a tununu twa angelo, ayo eswe makasa jita ni Satana, andemoniu jenyi hamwe ni yizavu ya maswalale a hano hashi.—Danie. 12:1; Uso. 6:2; 17:14.
18. (a) Yika Yehova anatulakenya? (b) Kuchi Usolwelo 7:9, 13-17, unatwehe shindakenyo hakutwala kulutwe lia matangwa?
18 Yehova kanatulakenya ngwo: “Nichimwe chikungo kuchichi kawaha nyi hachifula chikalimike ni yena.” (Iza. 54:17) “Mbunga yinene” ya tuvumbi ashishika a Yehova, ‘makatuhuka ni mwono ha luyinda munene!’ Nawa ayo eswe makanunga ni kulingila Zambi mulimo usandu. (Tanga Usolwelo 7:9, 13-17.) Mbimbiliya yinatukolweza ngwo, makatulamwina kulutwe lia matangwa. Tulieswe tunanyingika ngwetu, “Yehova kakufunga waze akushishika” kuli iye. (Samu 31:23) Kashika eswe waze akuhalisa Yehova makawahilila chinji ha kumona chize jina lienyi makalichiza luchoko mweswe.—Eze. 38:23.
19. Kutalatala chika chipema tukwete hakutwala kulutwe lia matangwa?
19 Nyonga chize maliji a chisoneko cha 2 Timoteu 3:2-5 te mapwa nyi kanahanjikila yitanga ya atu mu paraisu, muze kumuchikapwa chiyulo cha Satana. (Tala kasha, “ Yitanga Yize Atu Makapwa Nayo.”) Ndumbu George Gangas, * yoze wapwile mu Chizavu cha Tusongo, kambile ngwenyi: “Paraisu muyikapwa chihela chipema chinji, mumu atu eswe makawayila Yehova! Yena mukawahilila ha kutwama mu chifuchi chaha. Mukapwa ni mwono ngwe Yehova ha kukatwama ku miaka ya mutolo.” Pundu lume, chino chili kutalatala chipema!
MWASO 122 Jikizenu, Kanda Nukokoloka!
^ kax. 5 Tunanyingika ngwetu, kwasala hakehe atu mapalika mu “luyinda munene.” Mba yika muyikalingiwa kuli tuvumbi twa Zambi ha mashimbu jacho? Yika Yehova makashimbwila hanga tulinge? Yitanga yika twatamba kupwa nayo haliapwila mba tukanunge ni kushishika ha luyinda munene? Yino ye mutulilongesa ha mutwe uno.
^ kax. 3 ULUMBUNWISO WA AMWE MALIJI: Akwa-Kristu a mahuza kali mayingeleja eswe waze a kuliamba ngwo, kali akwa-Kristu, alioze keshi kulongesa atu umwenemwene hakutwala kuli Zambi.
^ kax. 11 ULUMBUNWISO WA AMWE MALIJI: Liji Ngoke wa Mangoke (hanji ngwetu Ngoke) linalumbunuka chizavu cha akwa-mavungu waze makalukukila tuvumbi twa Yehova ha luyinda munene.
^ kax. 11 Mba unyingike mu yimako-yimako yuma yize muyikatwala ku jita ya Armagedone, tala mukanda Wanangana wa Zambi Unayulu!, kapitulu 21 (O Reino de Deus já Governa!). Alioze, mba unyingike chize Ngoke wa Mangoke makalukukila tuvumbi twa Yehova ni chize Yehova makapulwila atu jenyi ha jita ya Armagedone, tala mukanda Uwayilo Wamwenemwene Hi Wafuna!, tupitulu 17 ni 18. (Adoração Pura de Jeová É Restaurada!)
^ kax. 16 Kukunguluka cha mambonge cha 2019 chakwamba ngwo: “Zango Kulishi Kuhwa!”, chinakasolola ngwo twatamba kulivwa ngwo Yehova matufunga mumu lia zango lienyi.—1 Kori. 13:8.
^ kax. 19 Tala chikuma, “Yitanga yenyi Muyikamukaula” (Suas obras o seguirão) chili mu Kaposhi wa Kutalila 1 Dezembro 1994.
