1. Mumu liaka Yehova wika mwe watela uwayilo wetu?

YEHOVA kali Tangi yetu nawa mwe watwehele mwono. Kashika twatamba kuwayila wika iye. (Uso. 4:11) Alioze kuli yimwe ponde. Chipwe ngwe twakuzanga Yehova ni kumuvumbika, nihindu mutuhasa kwecha hanga yuma yikwo yitukwike kuwayila wika Yehova. Chili chilemu kunyingika chize chino muchihasa kulingiwa. Alioze, chitangu, tutalenu yize yinalumbunuka kuwayila wika Yehova.

2. Kulita ni Kutuhuka 34:14, kuwayila wika Yehova yika chinalumbunuka?

² Kulita ni Mbimbiliya, kuwayila wika Yehova chinalumbunuka kumuzanga ni mbunge yetu yeswe. Chinalumbunuka nawa ngwo kutwatambile kuwayila tuzambi eka. Hachino, kutuchi kwecha nichimwe hanji niumwe hanga amusalakane mu mbunge yetu.—Tanga Kutuhuka 34:14.

3. Mumu liaka kutushi kuwayila Yehova ngwe tuli akukasa ha meso?

³ Yetu kutushi kuwayila Yehova ngwe tuli akukasa ha meso. Mumu liaka? Mumu uwayilo wetu unakatuka ha yuma yize twakulilongesa hakutwala kuli iye. Yetu twakukomoka yitanga yenyi yipema. Tunanyingika yize akuzanga ni yize keshi kuzanga ni kutayiza yize iye  akwamba. Twakunyingika upale wenyi hali atu nawa twakuukwasa. Kuli yetu, chili kuyuka chinene kupwa masepa ja Zambi. (Samu 25:14) Hita chuma chize twakulilongesa hakutwala kuli Tangi yetu chakutukundamisa kuli iye.—Tia. 4:8.

4. (a) Yika Ndiapu akuzachisa hanga apihise uwayilo wetu kuli Yehova? (b) Yika mutulilongesa ha mutwe uno?

⁴ Ndiapu kakusongwela yuma ya hano hashi. Nawa kakuzachisa yuma yize twakufupiwa ku mwono hanga atupiangule ku yitanga ya musunya. (Efwe. 2:1-3; 1 Yoa. 5:19) Iye kakuzanga hanga tulihane chinji ku yuma ya hano hashi. Mumu kananyingika ngwo, nyi twalihana chinji ku yuma yacho kutuchi kuzanga Yehova ni mbunge yetu yeswe. Ha mutwe uno, mutulilongesaho mutapu waali uze Satana akuzachisa hanga amanunune nyonga lienyi. Chitangu, kakutulingisa hanga tuzange chinji mbongo, nawa chamuchiali, kakutulingisa hanga tusakule yiheho yipi.

5. Mumu liaka twatamba kukeya hanga tuhone kuzanga mbongo?

⁵ Yetweswe twakufupiwa kulia, mazalo ni chihela chipema cha kutwama. Alioze, twatamba kukeya hanga tuhone kuzanga mbongo. Atu anji waze ali sali lia Satana kakuzanga chinji mbongo ni yuma yize akulanda ni mbongo. (2 Timo. 3:2) Yesu kanyingikine ngwenyi, tumbaji twenyi te mahasa kupwa mu cheseko cha kuzanga mbongo. Kashika ambile ngwenyi: “Niumwe mahasa kulingila miata aali: mumu hanji mavwila kole umwe, mazanga mukwo; hanji makakaminya kuli umwe, malelesa mukwo. Kunwahashile kulingila Zambi ni kulingila upite hamuwika.” (Mateu 6:24) Mutu yoze wakuwayila Yehova aku nawa mazachisa mashimbu anji ni tachi jenyi hanga azuke mbongo jinji mu chifuchi chino, chekwamba kakulingila miata aali. Mutu wacho keshi kuwayila Yehova ni mbunge yeswe.

6. Yika twalilongesa ha chiyulo chize Yesu ahanyine ku chikungulwila cha Laotisea?

 ⁶ Kusongo ya sekulu yitangu, akwa-Kristu amu chikungulwila chize chapwile mu mbonge ya Laotisea, te kakulizata hakwamba ngwo: “Nguli pichi, hingunapichi upite, chahonene nichimwe.” Alioze kuli Yehova ni Yesu, ayo kapwile ‘akwa lamba, akwa hunya, yiswale, tupuputa nawa te uselesele ali nawo.’ Chocho, Yesu yaaha chiyulo hi mumu lia kupwa pichi ko, alioze mumu lia kuzanga upite. Zango liacho liapwile ni kupihisa usepa wo ni Yehova. (Uso. 3:14-17) Nyi twanyingika ngwetu mbunge yetu yinazange chinji mbongo, twatamba kuchiza manyonga jacho ni kawashi. (1 Timo. 6:7, 8) Nyi ka, mbunge yetu muyizanga chinji mbongo, hachino Yehova kechi kutayiza nawa uwayilo wetu. Mumu iye kali “Zambi ya ukwa.” (Shimbi 4:24) Kuchi mutuhasa kuzanga chinji mbongo ku mwono wetu?

7-9. Yika walilongesa ha chilweza cha David, umwe mukulwana wa mu chikungulwila?

⁷ Tutalenu chilweza cha David, umwe mukulwana wa mu chikungulwila yoze watama mu Estados Unidos. Iye yamba ngwenyi, te kakukalakala kanawa ku mulimo wenyi. Chocho, yamuwezela yiteli ni mbongo jinji nawa yamunyingika ngwe umwe wa kuli waze akulinga kanawa mulimo wacho mu chifuchi cho. David yamba ngwenyi: “Ha mashimbu jacho, te nakunyonga ngwe Yehova mwe unanguwahisa.” Alioze, shina Yehova mwe wapwile lume ni kumuwahisa?

⁸ Kulutwe David yanyingika ngwenyi, mulimo wenyi te unapihisa usepa wenyi ni Yehova. Mwene yamba ngwenyi: “Muze te nakupwa ha kukunguluka chipwe mu munda te nakunyonga  chinji ku mulimo wami. Te kakungufweta mbongo jinji, chipwe chocho te nakusakalala nawa te ngukwete yipikalo mu ulo wami.”

⁹ David yanyingika ngwenyi te katamba kumona yize masa ha chihela chitangu ku mwono wenyi. Yamba ngwenyi: “Nakwachile chiyulo cha kululieka mwono wami.” David kazangile kwalumuna mashimbu a ku mulimo wenyi, chocho yahanjika ni mwata wenyi. Mba yika yalingiwileko? Yamuhanga ku mulimo! Yika iye alingile? Mwene yamba ngwenyi: “Mukwachako, yingusoneka petisau ya pionelu wa shimbu likehe ha tukweji eswe.” Hakupalika cha mashimbu, David yapwa pionelu wa shimbu lieswe, kulutwe mukwo-pwo neye yapwa pionelu. Mba awane kulia, ayo te kakulinga milimo ya kukomba-komba. Mulimo uno atu anji keshi kuulemesa. Alioze kuli David ni mukwo-pwo, chuma chilemu hi mulimo wa ku musunya ko, alioze mulimo wa Yehova. Chikwo nawa, mbongo jize apwile ni kutambula yijitepuluka. Chipwe chocho, ha hita kakweji o kakwete yize anafupiwa ku mwono. Ayo kanazange kusa Yehova ha chihela chitangu ku mwono wo, nawa kanamono chize Yehova akukwasa atu waze akusa Wanangana wenyi kulutwe.—Mateu 6:31-33.

10. Kuchi mutuhasa kufunga mbunge yetu hakutwala ku mbongo?

¹⁰ Chipwe ngwe tuli pichi hanji yiswale, nihindu tulieswe tunafupiwa kufunga mbunge yetu hakutwala ku mbongo. Mu mutapu uka? Hakusa tachi hanga tuhone kuzanga mbongo, ni kuhona kulemesa chinji mulimo wetu wa ku musunya kuhiana mulimo wa Yehova. Kuchi muhasa kunyingika nyi wakuzanga chinji mbongo? Lihule ngwe: ‘Shina muze nguli ha kukunguluka hanji mu munda, nakunyonga wika mulimo wami? Kutala nakulihulumba ha kukunga mbongo jize mujikangukwasa kulutwe lia matangwa? Shina nakuzwela-zwela ni yoze nalimbata nenyi mumu lia mbongo ni yikumba yize tukwete? Shina mungutayiza kulinga mulimo uze amwe akulelesa hanga ngupwe ni mashimbu akulingila chinji Yehova?’ (1 Timo. 6:9-12) Muze mutulihula chocho, tunyingikenu ngwetu Yehova kakutuzanga. Nawa iye kanalakenya kuli waze eswe akuwayila wika iye ngwenyi: “Chichi kukuhichika nichimwe, chipwe kukwehuka, ka.” Kashika postolo Paulu asonekene ngwenyi: ‘Ndako jenu jikapwe kujishi zango lia mbongo.’—Hepre. 13:5, 6.

11. Yika yiheho muyihasa kulinga ku mwono wa mutu?

¹¹ Yehova kanazange hanga tuwahilile ku mwono. Hachino, yiheho muyihasa kutukwasa hanga tupwe ni uwahililo wacho. Mbimbiliya  yakwamba ngwo: “Nyi mutu malia, manwa, mawahisa mbunge yenyi ni upeme wa mulimo yenyi, nichimwe chikwo cha kuwaha chakuhi.” (Chilu. 2:24) Alioze yiheho yinji hano hashi, muyihasa kupihisa mwono wetu. Mumu yakupihisa yitanga yipema ya atu, nawa yakwakolweza hanga atayize ni kuzanga yuma yize Zambi keshi kuzanga.

12. Kulita ni 1 A-Korindu 10:21, 22, mumu liaka twatamba kukanyama ha kusakula yiheho?

¹² Yetu tunazange kuwayila wika Yehova. Kashika kutwatambile kulia ku ‘mesa ya Yehova ni mesa ya andemoniu.’ (Tanga 1 A-Korindu 10:21, 22.) Kanji-kanji kulia hamuwika chakusolola usepa. Nyi mutusakula yiheho ya ungalwe, yipepela, upangala ni yitanga yikwo ya musunya, acho tunali hamuwika ni akwa-kole ja Zambi. Yino kuyichi kupihisa wika yetu, alioze muyipihisa nawa usepa wetu ni Yehova.

13-14. Kulita ni Tiangu 1:14, 15, mumu liaka twatamba kukanyama ha kusakula yiheho? Hana chilweza.

¹³ Tutalenu yize yinasolola ngwo, yiheho mutuhasa kuyitesa ni kulia. Muze tunali, mutuhasa kusakula yize mutusa mu kanwa. Alioze nyi hi twayimina, kutuchi kusakula yize kulia chacho muchilinga mu mujimba wetu. Kusulaho, kulia chize twaminanga muchitunga mujimba. Kulia chipema muchihasa kutukwasa kupwa ni mujimba upema. Alioze kulia chipi muchihasa kutunehena yikola. Yikola yacho hanji kuyichi kusoloka ha tangwa lizeliene, alioze muyihasa kusoloka hakupalika cha mashimbu.

¹⁴ Chino che chakulingiwa nawa ha yiheho yize twakusakula. Yetu mutuhasa kusakula yiheho yize mututala. Alioze nyi hi twayitala, kutuchi kusakula yuma yize yiheho yacho muyilinga mu manyonga ni mu mbunge yetu. Yiheho yipema muyihasa kutuvwisa kuwaha ku mbunge, alioze yiheho yipi muyihasa kupihisa mbunge yetu. (Tanga Tiangu 1:14, 15.) Upi uze wakwiza ku yiheho yipi hanji kuuchi kusoloka ha shimbu lizeliene, alioze muuhasa kusoloka kulutwe lia matangwa. Kashika Mbimbiliya yakututoweza ngwo: “Kanda nulionga. Zambi keshi kulenyewa. Cheswacho mutu makuwa, chenacho makacha nawa. Yoze makuwa ku musunya wenyi mwene, ku musunya kumakacha kupola.” (Ngala. 6:7, 8) Kwamba pundu, chili chilemu kwehuka yiheho yeswe yize yakusolola yuma yize Yehova keshi kuzanga!—Samu 97:10.

15. Chawana chika chize Yehova hanatwehe?

¹⁵ Mandumbu anji kakuzanga kutala JW Broadcasting^®, televizau yetu ya ha internet. Pangi Marilyn yamba ngwenyi: “JW Broadcasting yakungukwasa kupwa ni uwahililo, nawa munguhasa kutala yuma yeswe yize yakwizaho mumu yapwa yipema. Muze nakulivwa ukawami, nakupanjika pande hanji Uwayilo wa Chimene, chino chakungutakamisa chinji. Chino chakungukundamisa nawa kuli Yehova ni ku ululikiso wenyi. JW Broadcasting yalumuna chinji mwono wami.” Mba yena? Shina unazachisa chawana chino cha Yehova? Kuchizako pande ja hita kakweji, ha JW Broadcasting hakwiza nawa miaso yipema ni yinema yikwo yize mutuhasa kutala ha ola yeswayo mutuzanga.

16-17. Kuchi mutuhasa kuzachisa kanawa maola waze twakupalikisa ha yiheho, nawa kuchi mutuhasa kuchilinga?

¹⁶ Kutwatambile wika kukanyama ha mutapu wa yiheho yize mututala, alioze twatamba nawa kukanyama ha unji wa maola waze mutupalikisaho. Nyi ka, mutuhasa kupalikisa maola anji ni kuheha chakuhona kulinga mulimo wa Yehova. Kuli atu anji, kuzachisa kanawa maola chapwa chikalu. Abigail, yoze uli ni  miaka 18, yamba ngwenyi: “Kutala TV hanyima lia kukatuka ku mulimo chakungwaha tachi. Alioze nyi kuchakanyamine munguhasa kupalikisa maola anji ni kutala TV.” Samuel, umwe mukweze yamba ngwenyi: “Nanyingikine ngwami, nakutala yinema yinji ya minutu yikehe-yihehe ha internet. Te nakuputuka kutala chinema chimuwika, chocho ngutungumuka hinalinga maola atatu hanji awana.”

¹⁷ Kuchi muhasa kunyingika maola waze wakupalikisa ha kutala yiheho? Chitangu, watamba kunyingika unji wa maola waze wakupalikisa ha kutala yiheho. Eseka kwalula maola waze wakulinga ha poso yimuwika. Soneka ha umwe katalilo, maola waze wakupalikisa ha kutala TV, kuya ha internet ni kuheha yiheho ha telefone. Nyi wanyingika ngwe wakupalikisa maola anji, eseka kulinga umwe katalilo. Sako maola hanga uliange kulinga yuma yize yahiana ulemu, mba hi musa maola akutala yiheho. Kusulaho, eta kuli Yehova hanga akukwase ukaule kanawa katalilo wacho. Hachino, mupwa ni mashimbu ni tachi ja kulilongesa Mbimbiliya, kulinga uwayilo wa mu usoko, kuya kukunguluka ni kwambujola sango lipema. Chino muchikukwasa nawa kupwa ni mbunge yitoma, mumu wakusa Yehova kulutwe ku mwono we.

18-19. Kuchi mutuhasa kusolola ngwetu twakuwayila wika Yehova?

¹⁸ Muze te hahanjika hakutwala kukunongesa cha chifuchi chino cha Satana ni chifuchi chaha, postolo Petulu yamba ngwenyi: “Akwetu a zango, se nwakutalatala yino yuma, lulikenu mbunge jenu hanga iye akanuwane ni sambukila, kunushi chipeka hanji kapalia.” (2 Petu. 3:14) Chino chinalumbunuka ngwo, twatamba kusa tachi hanga tununge ni kupwa apema ku manyonga ni ku spiritu. Nyi twachilinga mutusolola pundu ngwetu twakuwayila wika Yehova.

¹⁹ Satana ni chifuchi chenyi, nihindu manunga ni kutweseka hanga tuse yuma yikwo kulutwe kuhiana Yehova. (Luka 4:13) Alioze chipwe mutupalika mu yeseko yeswayo, kanda twecha nichimwe hanji niumwe hanga asalakane Yehova mu mbunge yetu. Tunazange kuwayila wika Yehova, mumu che atela.