1. Yika yize Yehova mahasa kulinga hanga amanunune upale wenyi?

YEHOVA mahasa kulilingila mwene yesweyo yinafupiwa hanga alinge upale wenyi. Chakutalilaho, milimo yimwe yize Yehova akulinga yili ya kulongesa, kulembejeka, ni kwambujola sango lipema. (Iza. 48:17; 2 Kori. 7:6; Ngala. 3:8) Alioze, nihindu kakuzachisa atu hanga amulingile. (Mateu 24:14; 28:19, 20; 2 Kori. 1:3, 4) Yehova kakutwaha mana ni tachi ja kulinga yeswayo yinafupiwa kulita ni upale wenyi. Yuma yeswayi yakulingiwa kulita ni jina lienyi, ngwe chize alinyingika kuli akwa-mana.

2. (a) Mumu liaka mashimbu amwe twakuyambashana nyi Yehova mwe unatuzachisa? (b) Yika mutushimutwina ha mutwe uno?

² Tulieswe twakuzanga hanga Yehova atuzachise, alioze amwe kakuyambashana nyi chamwenemwene iye mwe unaazachisa. Mumu liaka? Mumu kakulivwa ngwe keshi nawa ni kukalakala chinji mumu lia miaka yize ali nayo, kukaliwa cha mwono wo hanji kuhona uhashi. Kuli nawa waze akuwahilila wika ni milimo yize ali nayo mu chikungulwila, chakuhona kusa tachi hanga asenye kulutwe. Ha mutwe uno, mutumonaho chize Yehova mahasa kutukwasa hanga tulinge upale wenyi. Hanyima, mba mutuhengwola sango ja Mbimbiliya jize jinasolola  chize Yehova akwashile atu jenyi hanga apwe ni mbunge ya kumulingila. Kusongo, mutumona chize mutuhasa kulihana kuli Yehova hanga atuzachise.

3. Kulita ni A-Fwilipu 2:13, kuchi Yehova mahasa kutukwasa hanga tulinge yimwe?

³ Tanga A-Fwilipu 2:13. * Yehova mahasa kutukwasa hanga tulinge yimwe. Kuchi mahasa kuchilinga? Hanji mutuhasa kunyingika mandumbu amwe waze anafupiwa ukwaso mu chikungulwila. Hanji makulwana matanga mukanda unakatuka ku mutango uze unasolola ngwo kuli chikungulwila chize chinafupiwa chinji ukwaso. Hachino, mutuhasa kulihula ngwetu, ‘Shina munguhasa kukwasa?’ Nyi hanji katwaha mulimo ukalu, mba kutwanyingikine nyi mutuhasa kuulinga. Hanji nawa twatanga jimwe sango mu Mbimbiliya, mba kutwanyingike chize mutuhasa kujizachisa hanga tukwase akwetu. Yehova kechi kutushinjila tulinge yuma yacho. Alioze muze Yehova mamona ngwenyi tuli nyonga lia kukwasa, iye matukwasa ni kutwaha tachi hanga tuyilinge.

4. Kuchi Yehova mahasa kutwaha tachi ja kulinga yimwe yuma?

⁴ Yehova mahasa nawa kutwaha tachi ja kulinga yimwe yuma. (Iza. 40:29) Mahasa kutwaha spiritu yenyi hanga yitukwase. (Kutuhu. 35:30-35) Yehova mahasa kuzachisa ululikiso wenyi hanga atulongese chize twatamba kulinga yimwe milimo. Nyi kutwanyingikine kanawa yimwe milimo, twitenu ukwaso. Tupwenu ni kwita Tata yetu wa zango hanga atwehe ‘tachi jahiana’ hita shimbu mutufupa ukwaso. (2 Kori. 4:7; Luka 11:13) Mbimbiliya yikwete yilweza yinji yinasolola chize Yehova ahele tachi kuli malunga ni mapwo hanga alinge yize apalile ku ma mbunge jo. Muze mutuhengwola sango jacho, nyongenu ha chize Yehova mahasa kunuzachisa ni yenu nawa.

5. Yika twalilongesa ha chize Yehova azachishile Mose hanga apulwile atu jenyi?

⁵ Yehova kakwashile Mose hanga apulwile A-Izalele. Mba shimbu lika Yehova amuzachishile? Shina ha shimbu lize Mose anyongene ngwenyi hahetaho kumuzachisa mumu ‘halongoloka mu mana eswe a Engitu?’ (Yili. 7:22-25) Ka. Yehova kazachishile Mose muze te hamukwasa kupwa mukwa-kulikehesa nawa chimbovu. (Yili. 7:30, 34-36) Yehova yamwaha hamu lia kuya ni kuhanjika ni mwanangana wa ndundo wa mu Engitu. (Kutuhu. 9:13-19) Yika mutulilongesa ha chize Yehova azachishile Mose? Yehova kakuzachisa waze akwimbulula yitanga yenyi ni kujikijila ha tachi jenyi.—Fwili. 4:13.

6. Yika twalilongesa ha chize Yehova azachishile Bazilai hanga akwase Mwanangana Ndawichi?

⁶ Hakupalika cha miaka yinji, Yehova yazachisa Bazilai hanga akwase Mwanangana Ndawichi. Ndawichi ni atu jenyi te kali ni “zala, kanahongo ni pwila” muze te anachina mwana wa Ndawichi, Absalome. Bazilai, te hapwa kashinakaji, nihindu yasa mwono wenyi ni wa akwo mu ponde hanga aye ni kukwasa Ndawichi ni atu jenyi. Bazilai kakanyongene ngwenyi, Yehova kechi kuhasa kumuzachisa mumu lia ushinakaji. Alioze, iye yazachisa yeswayo te ali nayo hanga akwase atu ja Zambi. (2 Samue. 17:27-29) Longeso lika mutwanda hano? Miaka tuli nayo  kuyishi ni mulonga niumwe, Yehova mahasa kutuzachisa hanga tukwase mandumbu jetu muze mahona yimwe ku mwono wo. (Yishi. 3:27, 28; 19:17) Chipwe ngwe kutuchi kuhasa kwakwasa yetwene, nihindu mutuhasa kuhana chawana ku mulimo uze analingi hashi heswe hanga mbongo jacho jikwase mandumbu waze mafupiwa ukwaso.—2 Kori. 8:14, 15; 9:11.

7. Kuchi Yehova azachishile Simeone, mba kuchi sango jacho jinatukolweza?

⁷ Yehova kalakenyene Simeone, lunga washishika yoze wapwile mu Yerusaleme ngwenyi, kechi kalianga kufwa shimbu kanda amona Mesaya. Chilakenyo chacho kota chakolwezele chinji Simeone, mumu te hashimbwila miaka yinji amone Mesaya. Yayuka chinji ha kunyongonona ni kushimbwila. Tangwa limwe, yeza ku tembele “ku tachi ja spiritu.” Mba yamona kanuke Yesu. Yehova yazachisa Simeone hanga ambe uprofeto hakutwala kuli kanuke yoze wapwile Kristu. (Luka 2:25-35) Chipwe ngwe Simeone hanji kafwile shimbu Yesu te kanda aputuka milimo yenyi, nihindu yawahilila chinji ha chize Yehova amuzachishile. Mba kulutwe lia matangwa makamona nawa kuyuka chikwo. Mu chifuchi chaha, lunga yono washishika makamona chize Yesu makayula ni kulingila atu yuma yipema hano hashi. (Uputu. 22:18) Kashika, ni yetu nawa tupwenu ni kusakwila chinji Yehova ha mulimo weswawo matwaha.

8. Kuchi Yehova mahasa kutuzachisa ngwe chize alingile kuli Mbarnabe?

⁸ Ku sekulu yitangu, lunga umwe avulukile ngwo Yosefwe yalihana mwene hanga amuzachise kuli Yehova. (Yili. 4:36, 37) Kota Yosefwe kapwile ni mbunge yakukwasa akwo, kashika amuhele jina ngwo Mbarnabe, lize linalumbunuka ngwo “chikwashi.” Chakutalilaho, muze Saulu hapwa mukwa-Kristu, mandumbu anji yamuvwila chinji woma mumu te kakuhungumiona chinji tumbaji twa Yesu. Alioze Mbarnabe yaya ni kukwasa Saulu ni mbunge yeswe. Kota Saulu kamusakwilile chinji ha keke yenyi. (Yili. 9:21, 26-28) Kulutwe, makulwana a mu Yerusaleme yamona ngwo mandumbu aku Andiakia ya ku Seria kafupiwile utakamiso. Mba iya atumineko? Mweka wakuhi, shina Mbarnabe wika. Chino te chinalite. Twakutanga ngwo, Mbarnabe yakolweza ‘eswe hanga alalaminye kuli Mwene ni mbunge yeswe.’ (Yili. 11:22-24) Ni musono nawa, Yehova mahasa kutuzachisa hanga tukolweze mandumbu jetu. Chakutalilaho, mahasa kutuzachisa tulembejeke waze afwisa. Mahasa nawa kutulingisa tuye hanji tutume fone kuli ndumbu yoze unayiji hanji unahongo hanga tumukolweze ni maliji apema. Shina munulihana hanga Yehova anuzachise ngwe chize alingile kuli Mbarnabe?—1 Tesa. 5:14.

9. Yika twalilongesa ha chize Yehova akwashile ndumbu Vasily apwe mukulwana mupema wa mu chikungulwila?

⁹ Yehova kakwashile ndumbu Vasily hanga apwe kafunga mupema mu chikungulwila. Vasily kamutongwele ha ukulwana muze te ali ni miaka 26. Kapwile ni kwivwa woma ngwenyi te kanda achipwaho ni kukwasa chikungulwila, chipi-chipi kukwasa waze te akumona lamba linji. Alioze yatambula ukwaso unji kuli makulwana-ni-akwo ni ku Shikola ya Mulimo wa Wanangana. Ni Vasily mwene neye yasa tachi jinji hanga alinge kanawa mulimo wacho. Chakutalilaho, yasoneka yuma yikehe-yikehe yize afupile kulinga. Muze apwile ni kumanununa yuma yize mwene atesele, chocho woma yiuputuka kuhwa.  Mwene ngwenyi: “Yuma napwile ni kuvwila woma ye yinanguvwisa kuwaha haliapwila. Muze Yehova akungukwasa nguwane chisoneko chalita chize mungukwasa nacho ndumbwami mu chikungulwila, nakuwahilila chinji.” Mandumbu, nyi twalihana ngwe chize alingile Vasily, Yehova matwaha tachi ja kulinga milimo yinji mu chikungulwila.

10. Yika Abigale alingile, mba longeso lika mutwanda ha chilweza chenyi?

¹⁰ Shimbu limwe Ndawichi ni atu jenyi kafupiwile ukwaso muze te anaahangashana kuli Mwanangana Saulu. Mba malunga apwile no Ndawichi yaya ni kwita kulia kuli pichi Nabale. Yeta kulia kuli Nabale mumu kamufungilile mapanga jenyi mu puya. Alioze Nabale, ha mbunge yenyi yipi, yalituna kwaha kulia. Ndawichi yatenuka chinji ni kufupa kushiha Nabale ni asoko jenyi eswe. (1 Samue. 25:3-13, 22) Alioze, Abigale, pwo lia Nabale yasolola mana ni mbunge yipema. Yahamuka ni kuliumba ku molu ja Ndawichi ni kumwita hanga ehuke mulonga wa manyinga. Yamukolweza hanga ahichike yuma yeswe mu moko ja Yehova. Maliji ja Abigale ni yitanga yenyi yipema yiyikwata Ndawichi ku mbunge. Mba yamona ngwenyi, Yehova mwe watumine Abigale. (1 Samue. 25:23-28, 32-34) Abigale kapwile ni yitanga yize yamulingishile mba Yehova amuzachise. Ewa, ni mapangi jetu akwa-Kristu no nyi masolola mana ni malinjekela, Yehova maazachisa hanga akolweze asoko jo ni mandumbu akwo mu chikungulwila.— Yishi. 24:3; Titu 2:3-5.

11. Yika ana ja Shalume alingile, mba aya anaembulula musono?

¹¹ Mukwapalika mashimbu, Yehova yazachisa ana ja Shalume a mapwo hanga atungulule yikalakala ya Yerusaleme. (Nehe. 2:20; 3:12) Ana jacho yalihana ni kulinga mulimo wacho ukalu chipwe ngwe tato kapwile mwanangana. (Nehe. 4:15-18) O yalisa chinji ni A-Tekoa a lufuma waze ahonene kuhetamisa “kota jo” hanga no akalakale. (Nehe. 3:5) Achinyongenu kuwaha chize evwile ana ja Shalume muze mulimo wahwile hakupalika cha matangwa 52! (Nehe. 6:15) Ni musono, mapangi jetu kakuwahilila chinji ha kulinga milimo yisandu ya kutunga ni kululieka ma zuwo waze twakuzachisa ku milimo ya Yehova. Utotombo, uwahililo ni ushishiko wa mapangi wano, yakukwasa mulimo hanga wende kanawa.

12. Kuchi Yehova mahasa kutuzachisa ngwe chize alingile kuli Tavwita?

¹² Yehova yalingisa Tavwita azale “too ni yitanga ya vumbi ni yawana” yize apwile ni kuhana tuliwa. (Yili. 9:36) Hachino, muze afwile atu yamulila chinji mumu lia zango ni keke yenyi. Alioze, ayo yawahilila chinji muze Petulu amuhindwishile. (Yili. 9:39-41) Yika mutulilongesa hali Tavwita? Longeso lili ngwo, twatamba kukwasa mandumbu jetu chipwe ngwe tuli twanuke hanji makulwana, mapwo hanji malunga.—Hepre. 13:16.

13. Kuchi Yehova azachishile pangi Ruth yoze te wakwivwa sonyi jinji, mba yika mwene amba?

¹³ Pangi Ruth, yoze te wakwivwa chinji sonyi kazangile kupwa mishionaliu. Kuwanuke wenyi te kakuzanga chinji kuya ku zuwo ni zuwo hanga ahane wika mikanda kuli atu. Mwene yamba ngwenyi: “Nazangile chinji mulimo wacho.” Nihindu te chakumukalila chinji kuhanjika ni atu meso-ni-meso hakutwala ku Wanangana wa Zambi. Alioze, pangi Ruth yapwa upionelu wa shimbu lieswe  muze te ali ni miaka 18 chipwe ngwe te kakwivwa sonyi jinji. Ha mwaka 1946, yaya ku Shikola ya Ngiliate, mba hanyima yakalakala mu Havaí ni ku Japão. Yehova yamuzachisa chinji ambujole sango lipema mu yifuchi yacho. Hanyima yakukalakala miaka 80, pangi Ruth yamba ngwenyi: “Yehova mwe wakungujikijisa ni kungukolweza chinji. Kangukwasa nguhone kwivwa chinji sonyi. Hinamona ngwami, Yehova mahasa kukwasa hita mutu yoze mamufuliela.”

14. Kulita ni A-Kolosu 1:29, yika twatamba kulinga mba Yehova atuzachise?

¹⁴ Ha miaka yeswayi, Yehova kazachisa tuvumbi twenyi hanga alinge milimo yinji. Mba ena? Kuchi Yehova mahasa ku kuzachisa? Mahasa ku kuzachisa nyi muusa tachi jinji. (Tanga A-Kolosu 1:29.) Nyi yena mwene walihana kuli Yehova, iye mahasa kukukwasa hanga upwe mukwa-kwambujola mupema, mukwa-kulongesa kanawa, mukwa-kulembejeka akwenu, chikilikita mupema, sepa mupema hanji kulinga yeswayo mazanga kulita ni upale wenyi.

15. Ngwe chize twevwa ha 1 Timoteu 4:12, 15, yika yize akweze atamba kwita kuli Yehova hanga aakwase kulinga?

¹⁵ Mba yika mutwamba hali yenu akweze? Akweze anji anafupiwa hanga apwe tuvumbi mu yikungulwila. Mu yikungulwila yimwe muli makulwana anji kuhiana tuvumbi. Amwe akuli yenu akweze munuhasa kulihana hanga nulinge milimo yinji mu chikungulwila. Ha mashimbu amwe, mandumbu kakwamba ngwo: “Nguli kwami kanawa kupwa wika mukwa-kwambujola.” Nyi, ni yena che wakunyonga, lemba kuli Yehova akukwase use tachi hanga upwe kavumbi ni kutambula tachi jize mujikukwasa umulingile ni mbunge yeswe. (Chilu. 12:1) Mala, tunechi ukwaso wenu!—Tanga 1 Timoteu 4:12, 15.

16. Yika twatamba kwita kuli Yehova, nawa mumu liaka?

¹⁶ Yehova mahasa kunukwasa numulingile yeswayo mazanga kulita ni upale wenyi. Kashika, mwitenu anukwase hanga nupwe ni zango lia kulinga milimo yenyi ni kumwita anwehe tachi jize nunafupiwa. Chipwe nuli twanuke hanji makulwana, zachisenu mashimbu, tachi ni yuma yize nukwete hanga nuhalise Yehova haliapwila. (Chilu. 9:10) Kanda nulituna hanji kwivwa woma wa kulinga yeswayo milimo manwaha mu ululikiso wa Yehova. Chili kuyuka chinene kuli yetweswe, kulinga cheswacho muchifupiwa hanga tuchichimieke Tata yetu wa zango.