MUTWE WAKULILONGESA 41
Chize Mutuhasa Kukwasa Alongi a Mbimbiliya Hanga Ajame ni Kwapapachisa—Chihanda 1
“Nuli mukanda wa Kristu, wa kulinga kuli yetu.”—2 KORI. 3:3.
MWASO 78 “Kulongesa Liji lia Zambi”
CHIKUMA CHILEMU *
Mandumbu eswe mu chikungulwila kakuwahilila chinji muze akumona longi wa Mbimbiliya malihana kuli Zambi ni kumupapachisa. (Tala paragrafu 1)
1. Kuchi 2 A-Korindu 3:1-3, unatukwase hanga tulemese mulimo wetu wa kukwasa alongi a Mbimbiliya hanga aapapachise? (Tala chizulie ha chifukilo.)
KUCHI wakwivwa muze wakumona longi wa Mbimbiliya mu chikungulwila chenu kanamupapachisa? Kwamba umwenemwene, wakwivwa kuwaha. (Mateu 28:19) Nyi longi wacho kakulilongesa ni yena, wakwivwa chiseke chinji kuhiana! (1 Tesa. 2:19, 20) Alongi a Mbimbiliya waze akupapachisa kali “mukanda” upema hi wika ko kuli waze akulilongesa no, alioze ni mu chikungulwila.—Tanga 2 A-Korindu 3:1-3.
2. (a) Chihula chika twatamba kulihula, nawa mumu liaka? (b) Kusongwela longeso lia Mbimbiliya yika chinalumbunuka? (Tala maliji mushi lia lifwo.)
2 Chili chipema kunyingika ngwo, ha kupalika cha miaka yiwana, malongeso a Mbimbiliya * waze asongwela hashi heswe hita kakweji, kali unji wa 10,000,000. Nawa ha miaka yino yiwana, hita mwaka kapapachisa atu kuhiana 280,000. Kuchi mutuhasa kukwasa alongi a Mbimbiliya waze kanda achaapapachisa? Yehova kanahane mashimbu kuli atu hanga apwe tumbaji twa Kristu, kashika twatamba kulinga yize mutuhasa hanga twakwase aapapachise kawashi-washi. Mumu mashimbu akehe tuli no!—1 Kori. 7:29a; 1 Petu. 4:7.
3. Yika mutulilongesa ha mutwe uno hakutwala ku kusongwela longeso lia Mbimbiliya?
3 Mulimo wa kutayisa tumbaji uli ulemu chinji, kashika Chizavu cha Tusongo akulweza mandumbu ku mitango, yize atamba kulinga hanga akwase alongi anji aapapachise. Ha mutwe uno, ni uze muuhataho, mutumona yize mutuhasa kulilongesa ha yilweza ya mapionelu, mishionaliu ni tulayi a mambonge. * (Yishi. 11:14; 15:22) Mitwe yino muyisolola yize alongeshi a Mbimbiliya ni alongi jo mahasa kulinga hanga longeso lia Mbimbiliya lijame. Ha mutwe uno, mutulilongesa yuma yitano yize alongi atamba kulinga mba aapapachise.
LILONGESE NENYI POSO JESWE
Hula longi ye nyi munuhasa kutwama hanga nulilongese Mbimbiliya (Tala maparagrafu 4-6)
4. Yika twatamba kunyingika hakutwala kuli mutu yoze twakulilongesa nenyi Mbimbiliya ku chikolo?
4 Mandumbu anji kakusongwela longeso lia Mbimbiliya kuli atu ku chikolo cha zuwo lio. Chipwe ngwe yino yili jila yipema yakukwashilamo mutu hanga azange umwenemwene, nihindu mashimbu waze twakuhanjika no kali akehe nawa hi ha poso jeswe ko. Mandumbu amwe kakuzanga kukwasa atu hanga azange Mbimbiliya, kashika akwita numeru yo ya telefone hanga ahanjike no ni kwasonekena yimwe ya mu Mbimbiliya. Yino muyihasa kumbata mashimbu anji chakuhona kukwasa mutu wacho hanga asenye kulutwe. Mba mutu wacho alihane kuli Zambi ni kumupapachisa katamba kusa tachi * ja kununga ni kulilongesa Mbimbiliya.
5. Kulita ni Luka 14:27-33, yika Yesu ambile yize muyihasa kutukwasa mu mulimo wa kutayisa tumbaji?
5 Tangwa limwe Yesu yata chishima chinasolola ndando yize mutu atamba kufweta mba apwe kambaji kenyi. Iye yahanjika hakutwala kuli umwe mutu yoze wazangile kutunga kaposhi. Mutu wacho te katamba “kulianga kutwama alule ndando, atale nyi kali ni mbongo” ja kutunga najo kaposhi. Yahanjika nawa hakutwala kuli mwanangana yoze wazangile kwasa jita ni mukwo. Mwanangana wacho te katamba ‘kulianga kutwama atale nyi shina’ maswalale jenyi mahasa kulimika ni mukwa-kole wenyi. (Tanga Luka 14:27-33.) Chizechene nawa, Yesu kanyingikine ngwenyi, mutu yoze unazange kupwa kambaji kenyi chitangu katamba kunyingika yize malinga. Kashika, twatamba kukolweza alongi jetu a Mbimbiliya hanga alilongese ha poso jeswe. Kuchi mutuhasa kuchilinga?
6. Yika mutuhasa kulinga mba longeso lia Mbimbiliya lisenye kulutwe?
6 Longeso lize wakusongwela ku chikolo kanda lipwa lia kawashi-washi, wezelako amwe mashimbu. Chino muchikukwasa hanga upwe ni mashimbu akushimutwina nenyi yimwe Yisoneko ha shimbu lieswe mumumeneka. Muze mwenya-zuwo mejilila kuhanjika ne ha mashimbu anji, muhule nyi kali ni chihela haze munuhasa kutwama hanga nulilongese kanawa. Kumbululo lize longi makwaha, mulisolola nyi kakulemesa longeso lia Mbimbiliya nyi ka. Mba umukwase asenye kulutwe, muhasa kumuhula nyi muchilita hanga nupwe ni kulilongesa kaali ha poso. Alioze, watamba kulinga yuma yinji hi wika ko kulilongesa nenyi kaali ha poso.
LILULIEKE HA HITA LONGESO
Lulieka kanawa longeso lia Mbimbiliya, nawa lweza longi ye chize mahasa kululieka longeso lienyi (Tala maparagrafu 7-9)
7. Kuchi longeshi atamba kulilulieka ha kusongwela hita longeso lia Mbimbiliya?
7 Yetu alongeshi, twatamba kulilulieka kanawa ha hita longeso lia Mbimbiliya. Mutuhasa kuchilinga ha kutanga yikuma ni yisoneko yize mutulongesa. Pachika mu manyonga yikuma yilemu yize unazange kulongesa. Nyonga ha mutwe wa longeso, yikuma yikehe-yikehe, yihula ya longeso, yisoneko yize yakwiza ngwo “tanga,” yizulie ni yinema yize muyihasa kukukwasa kulumbununa yize unalongesa. Hanyima, nyonga ha chize mulumbunwina longi ye chikuma chacho mu jila yashi nawa yalita. Chino muchikwasa longi ye kukaula yize analilongesa.—Nehe. 8:8; Yishi. 15:28a.
8. Mukanda wa A-Kolosu 1:9, 10, yika unatulongesa hakutwala ku kulembela alongi jetu a Mbimbiliya?
8 Muze unalilulieka, watamba kulemba kuli Yehova hakutwala kuli longi ye ni ha yize anafupiwa. Chikwo nawa, eta kuli Yehova hanga akukwase kulongesa kanawa Mbimbiliya mu jila yize muyikwata ku mbunge ya longi ye. (Tanga A-Kolosu 1:9, 10.) Lianga kunyonga ha chikuma chize kuchishi kulumbunukina kanawa longi ye hanji chize keshi kutayiza. Kanda uvulama ngwo, chikuma chilemu chili kumukwasa kusenya kulutwe ni kumupapachisa.
9. Kuchi longeshi mahasa kukwasa longi yenyi hanga alulieke longeso? Lumbununa.
9 Tunafuliela ngwetu, nyi longi yetu malilongesa Mbimbiliya mashimbu eswe, muchimukwasa kulemesa yize Yehova ni Yesu akulinga, nawa mazanga kulilongesa yuma yinji. (Mateu 5:3, 6) Longi katamba kulihulikila ha yize analilongesa mba longeso lia Mbimbiliya limukwase. Mba achilinge, mulweze ulemu wa kulianga kululieka hita longeso ni kumulumbunwina ngwo, katamba kupukuna ha chize malongeso jacho mamukwasa ku mwono wenyi. Kuchi muhasa kumukwasa? Luliekenu limwe longeso hamuwika hanga umulweze chize mapwa ni kulilulieka. * Mulweze chize mahasa kuwana kumbululo lia yihula ya longeso, ni chize mahasa kufunjika maliji alemu hanji yikuma yize muyimukwasa kwiwuluka kumbululo. Hanyima, muhule hanga akumbulule mu maliji jenyi. Muze makumbulula, muhasa kunyingika nyi longeso liamulumbunukina nyi ka. Kuli nawa chuma chikwo chize muhasa kukolweza longi ye hanga alinge.
MULONGESE APWE NI KUHANJIKA NI YEHOVA MATANGWA ESWE
Longesa longi ye wa Mbimbiliya chize mahanjika ni Yehova (Tala maparagrafu 10-11)
10. Mumu liaka longi atamba kutanga Mbimbiliya matangwa eswe, nawa yika atamba kulinga mba ayuke ha yize anatange mu Mbimbiliya?
10 Chipwe ngwe longi katamba kulilongesa ha poso jeswe, kuli nawa yuma yize atamba kulinga ukawenyi matangwa eswe. Kuhanjika ni Yehova ni kumupanjika. Kuchi mahasa kuchilinga? Mahasa kuchilinga ha kutanga Mbimbiliya matangwa eswe. (Yoshu. 1:8; Samu 1:1-3) Mulweze chize mahasa kukaula “Katalilo wa Kutanga Mbimbiliya” yoze uli ha jw.org. * Mba ayuke ha yize anatange mu Mbimbiliya, mulweze hanga apwe ni kupukuna ha yize analilongesa. Mulweze nawa ngwo, muze anatange Mbimbiliya katamba kulihula ngwenyi: ‘Yika yino yinangulongesa hakutwala kuli Yehova? Kuchi munguhasa kuyikaula ku mwono wami?’—Yili 17:11; Tia. 1:25.
11. Kuchi mutuhasa kukwasa longi hanga anyingike kulemba, nawa mumu liaka atamba kulemba kuli Yehova matangwa eswe?
11 Kolweza longi ye hanga apwe ni kulemba kuli Yehova matangwa eswe. Lemba ha kuputuka longeso ni ha kuhwisa, nawa vuluka longi ye mu yilemba. Muze mevwa yilemba ye, malilongesa chize mahasa kulemba ni mbunge yeswe ni kutondekeza yilemba yenyi kuli Yehova mu jina lia Yesu Kristu. (Mateu 6:9; Yoa. 15:16) Nyonga chize kutanga Mbimbiliya matangwa eswe (kupanjika Yehova) ni kulemba (kuhanjika ni Yehova) muchikwasa longi ye hanga akundame kuli Zambi! (Tia. 4:8) Kulinga yuma yino, muchikwasa longi ye hanga apwe ni chuma chikwo chize muchimukwasa kulihana ni kumupapachisa.
MUKWASE HANGA APWE NI USEPA UPEMA NI YEHOVA
12. Kuchi longeshi mahasa kukwasa longi hanga apwe ni usepa upema ni Yehova?
12 Yuma yize longi analilongesa mu Mbimbiliya yatambile kusulila wika mu manyonga, alioze yatamba kuheta ku mbunge. Mumu liaka? Mumu mbunge yetu, chekwamba usolo, manyonga ni yitanga yetu—ye yakutusongwela hanga tulinge yuma. Yesu te kakulongesa atu yuma yinji nawa te kakuzanga kumupanjika. Alioze atu kapwile ni kumukaula mumu yuma yize apwile ni kwalongesa te yakwakwata ku mbunge. (Luka 24:15, 27, 32) Longi ye katamba kunyingika ngwo, Yehova kali Mutu wamwenemwene, yoze mahasa kujikijila ni kulikata nenyi, nawa ngwo kali Tato, Zambi yenyi kanda Sepa lienyi. (Samu 25:4, 5) Muze unasongwela longeso lia Mbimbiliya, shindakenya ha utu wa Zambi. (Kutuhu. 34:5, 6; 1 Petu. 5:6, 7) Chipwe ngwe nunalilongesa sango jeswajo, nihindu shindakenya ha Utu ni zango lia Yehova. Kwasa longi ye hanga azange yitanga yipema ya Yehova—ngwe zango, upeme ni keke. Yesu kambile ngwenyi, “liji litangu kanda linene lia shimbi” lili ngwo, ‘ukazange Yehova Zambi ye.’ (Mateu 22:37, 38) Kwasa longi ye hanga azange Zambi ni mbunge yenyi yeswe.
13. Hana chilweza cha chize mutuhasa kukwasa longi ye hanga anyingike yitanga yipema ya Yehova.
13 Muze unahanjika ni longi ye, mulumbunwine mumu liaka wakuzanga chinji Yehova. Yino muyihasa kukwasa longi ye hanga anyingike ulemu wa kupwa ni usepa ukolo ni Zambi. (Samu 73:28) Chakutalilaho, shina mukanda uze nunalilongesa hali maliji hanji chisoneko chize chinasolola chitanga cha Yehova ngwe zango, mana, ululi hanji ndundo—chize cha kukukwata ku mbunge? Chilweze kuli longi ye, nawa mulweze hanga anyingike mumu liaka wakuzanga chinji Tata yetu wa mu malilu. Kuli chuma chikwo chize longi atamba kulinga mba amupapachise.
MUKOLWEZE HANGA APWE NI KUYA KU KUKUNGULUKA
Kolweza longi ye hanga ahone kushimbula kuya ku kukunguluka! (Tala maparagrafu 14-15)
14. Kulita ni A-Hepreu 10:24, 25, kuchi kukunguluka muchihasa kukwasa longi wa Mbimbiliya hanga ajame ni kumupapachisa?
14 Yetu eswe tunazange hanga alongi jetu ajame ni kwapapachisa. Jila yimwe yize mutuhasa kwakwashilamo yili kwakolweza hanga apwe ni kuya ku kukunguluka. Alongeshi ajama kakwamba ngwo, longi yoze keshi kushimbula kuya ku kukunguluka kukatuka ha shimbu lize akuputuka kulilongesa, kakukola kawashi ku ufulielo. (Samu 111:1) Alongeshi amwe kakulweza alongi jo ngwo, sango jize akulilongesa ha longeso lia Mbimbiliya jili wika ndambu, kashika mba azuke ndambu yikwo, katamba kuya ku kukunguluka. Tanga A-Hepreu 10:24, 25 ni longi ye, nawa mulweze yiwape yize mazuka nyi maya ku kukunguluka. Musolwele chinema chinambe ngwo, Yika Yakupwa mu Zuwo Lia Wanangana? * Kwasa longi ye hanga anyingike ngwo kuya kukunguluka ha poso jeswe chili chilemu ku mwono wenyi.
15. Yika mutuhasa kulinga mba tukwase longi ye hanga apwe ni kuya ku kukunguluka mashimbu eswe?
15 Yika muhasa kulinga nyi longi ye kanda achiya ku kukunguluka hanji kakuya ko nyi mazanga? Mulweze yize wakulilongesa ku kukunguluka. Muze mamona chize yena wakuwahilila ha kuya ku kukunguluka, chino muchihasa kumukwasa hanga neye ayeko. Mwehe Kaposhi wa Kutalila hanji Mukanda Wakuzachisa ha Kukunguluka uze nunalilongesa ku kukunguluka. Mulweze chikuma chize munukalilongesa ku kukunguluka, nawa muhule hanga ambe chihanda chize azanga chinji. Yuma yize longi ye mamona ni kupanjika ha kukunguluka chitangu, muyilisa chinji ni yize akumona ku mangeleja akwo. (1 Kori. 14:24, 25) Ku kukunguluka maliwana ni mandumbu akwo waze ali yilweza yipema yize iye mahasa kukaula, ni kumukwasa hanga ajame ni kumupapachisa.
16. Yika twatamba kulinga mba tukwase longi wa Mbimbiliya ajame ni kumupapachisa, nawa yika mutulilongesa ha mutwe uze muuhataho?
16 Kulita ni yize twalilongesa, kuchi mutuhasa kukwasa alongi a Mbimbiliya hanga ajame ni kwapapachisa? Mutuhasa kuchilinga ha kukolweza hita longi hanga alemese longeso lia Mbimbiliya, alilongese poso jeswe ni kululieka hita longeso. Twatamba nawa kumukolweza hanga apwe ni kuhanjika ni Yehova matangwa eswe ni kupwa ni usepa upema ni Iye. Twatamba kumukolweza hanga apwe ni kuya ku kukunguluka matangwa eswe. (Tala mushete “ Yize Longi Atamba Kulinga Mba Amupapachise.”) Alioze, ngwe chize mutumona ha mutwe uze muuhataho, kuli nawa yuma yitano yize alongeshi a Mbimbiliya mahasa kulinga hanga akwase alongi jo mba ajame ni kwapapachisa.
MWASO 76 Chize Twakwivwa!
^ kax. 5 Kulongesa mutu chinalumbunuka kumukwasa hanga “anyonge, evwe, hanji alinge chuma mu jila yeka.” Chisoneko cha mwaka 2020, cha Mateu 28:19, chinatwiwulula ngwo, kutwatambile wika kulongesa atu Mbimbiliya, alioze twatamba nawa kwakwasa hanga aapapachise ni kupwa tumbaji twa Yesu Kristu. Ha mutwe uno ni uze muuhataho, mutulilongesa chize mutuhasa kuwahisa utotombo wetu mu mulimo uno ulemu.
^ kax. 2 ULUMBUNWISO WA AMWE MALIJI: Nyi mashimbu eswe wakuhanjika ni umwe mutu hakutwala ku Mbimbiliya, chekwamba, wakusongwela longeso lia Mbimbiliya. Nyi walilongesa nenyi kaali ni kumusolwela chize longeso lia Mbimbiliya liapwa nawa nyi wapwa ni shindakenyo ngwo longeso liacho mulinunga, ku songo lia kakweji muhasa kulialula ha lifwo lia sango ja mu munda.
^ kax. 3 Ha mutwe uno, hali nawa usongwelo unakatuka ha yikuma yinambe ngwo, “Chize Mutusongwela Longeso lia Mbimbiliya lize Mulisenya Kulutwe” yize yili ha Mulimo Wetu wa Wanangana wa Julho 2004 ndo Maio 2005.
^ kax. 4 Alongi tunatongola hano hi a malunga wika ko ni a mapwo nawa.
^ kax. 9 Tala chinema cha minutu yiwana chinambe ngwo, Kulongesa Alongi Jetu Chize Atamba Kulilulieka. Mu JW Library®, yako ha YINEMA > KUKUNGULUKA NI MULIMO WETU > KUWAHISA UHASHI WETU.
^ kax. 10 Yako ha chikuma MIKANDA > MIKANDA NI TUMIKANDA.
^ kax. 14 Mu JW Library®, yako ha YINEMA > KUKUNGULUKA NI MULIMO WETU > YUMA YAKUZACHISA MU MUNDA.
