1. Muze twakunyonga hali mukwa-keke, yika twakumona?

MUZE twakunyonga hali mukwa-keke, twakumona mutu yoze ukwete mbunge yipema, mukwa-zango nawa chihanyi. Mutu wamutapu au, kakutwiwulula chishima cha Yesu cha Ka-Samaria. Lunga wacho kakapwile Ka-Yunda, alioze ‘yasolwela keke’ umwe Ka-Yunda yoze eyile yuma kuli eji ni kumulamba. Ka-Samaria ‘yavwila keke’ Ka-Yunda wacho nawa yamukwasa. (Luka 10:29-37) Chishima chino, chinasolola chimwe chitanga chipema cha Zambi yetu—keke. Hita tangwa, Yehova kakutusolwela keke mu majila anji. Chikwo nawa, iye kakuchilinga mumu kakutuzanga.

2. Yika nawa mutu yoze ukwete keke mahasa kulinga?

² Muze twakwivwa liji keke, kota twakunyonga nawa chize mutu mahasa kuyisolola mu jila yeka. Mutu yoze ukwete keke, mahasa kwecha kuzangamisa mutu yoze te atamba kuzangamisa. Mutuhasa kwamba ngwetu, ha chikuma chino Yehova kakusolola chinji keke. Mukanda wa Samu 103:10, unambe ngwo: “Kalingile ni yetu nikulita ni milonga yetu.” Alioze ha mashimbu amwe, Yehova mahasa kufumba lume mutu yoze walinga shili.

3. Yihula yika mutukumbulula ha mutwe uno?

³ Ha mutwe uno, mutumona chize Liji lia Zambi linakumbulula yihula yino: Mumu liaka Yehova ali mukwa-keke? Shina hali kulifwa ha kufumba mutu ni kumusolwela keke? Yika muyihasa kutukwasa hanga tupwe akwa-keke?

4. Mumu liaka Yehova akusolola keke?

⁴ Yehova kakuzanga kupwa mukwa-keke. Postolo Paulu kasonekene ngwenyi, ‘Zambi kali mukwa-keke ya kulumbama.’ Iye kasonekene maliji wano, mumu Yehova kahanyine kuli atu waze yihenge kutalatala cha kuya mu malilu. (Efwe. 2:4-7) Alioze, Yehova keshi kusolola wika keke kuli akwa-Kristu akuwayisa.  Ndawichi yasoneka ngwenyi: “Yehova iye mupema kuli eswe. Keke yenyi yinene yahiana yitanga yenyi yeswe.” (Samu 145:9) Amu Yehova akuzanga atu, kashika nyi mawana chikuma chipema cha kusolwela umwe mutu keke, iye kakuchilinga.

5. Kuchi Yesu alilongesele ha keke ya Yehova?

⁵ Yesu kananyingika kanawa chize Yehova akuzanga kusolola keke kuhiana atu eswe. Muze te kanda achiza hano hashi, katwamine ni Tato mu malilu ha miaka yinji. (Yishi. 8:30, 31) Iye kapwile ni kumona chize Yehova akusolwela yihenge keke. (Samu 78:37-42) Muze apwile ni kulongesa atu, Yesu te kakushindakenya ha chitanga chino chipema cha Tato.

6. Kuchi Yesu anatukwase kunyingika chize Yehova apwa mukwa-keke?

⁶ Ngwe chize twamonanga ha mutwe wapalika, Yesu katele chishima cha mwana-chimwangi hanga atulongese chize Yehova akuzanga kusolola keke. Mwana wacho kakatukile ku zuwo lia tato, kuze ayile yakisa “yikumba yenyi nikuhungumuka ni yipi.” (Luka 15:13) Kulutwe, yalikonyeka ha shili yenyi, chocho yalikehesa ni kuhiluka ku zuwo. Mba yika tato alingile? Mwana kaliangile kumona keke ya tato. Yesu yamba ngwenyi: “Shimbu uchili kusuku chikolo, tato yamumona, yamuvwila keke, yazomboka, yamukangayika mu kondo, yamumbeja chikolo.” Tato kakamuzwelesele. Shimbu achilinge, iye yamusolwela keke, yamukonekena ni kumutambula kanawa. Mwana wacho, kalingile chuma chipi chinji, alioze amu alikonyekene, tato yamukonekena. Yehova mwe Tata mukwa-keke wa ha chishima chino. Yesu katele chishima chino chipema hanga asolole ngwo, Yehova kakuzanga chinji kukonekena atu waze akulikonyeka ni mbunge yeswe.—Luka 15:17-24.

7. Kuchi mutapu uze Yehova akusolwelamo keke unasolola ngwo kakwete mana anji?

⁷ Yehova kakusolola keke mumu kakwete mana anji. Iye mashimbu eswe kakukwata yiyulo yipema yize yakuyukisa yitangiwa yenyi. Mbimbiliya yinambe ngwo: “Mana a kwilu” kapwa “a too ni keke ni mihuko yipema.” (Tia. 3:17) Chizechene ngwe tata wa zango, Yehova kananyingika ngwenyi, muze akusolola keke kakuyukisa ana jenyi. (Samu 103:13; Iza. 49:15) Amu Yehova akusolwela atu jenyi keke, ayo kali ni kutalatala cha kulutwe lia matangwa chipwe ngwe kali yihenge. Kashika, mumu lia mana waze Yehova akwete, chino chakumutwala kusolola keke mashimbu eswe nyi muchilita. Alioze, iye nawa kananyingika mashimbu waze katambile kusolola keke. Mumu lia mana jenyi anji, Yehova kechi keza kasolola keke ha kulengulula upi.

8. Yika yatamba kulingiwa ha mashimbu amwe, nawa mumu liaka?

 ⁸ Tuchinyongenu ngwe, umwe ndumbu mazanga kumbata mwono wa upangala. Yika twatamba kulinga? Yehova katumine Paulu kusonekena mandumbu mu chikungulwila hanga eche ‘kuliendela’ ni ndumbu wacho. (1 Kori. 5:11) Yivulumunyi waze keshi kulikonyeka, kakwasosolola mu chikungulwila. Chino kakuchilinga hanga afunge mandumbu jetu waze ashishika nawa hanga tupwe asandu ngwe Yehova. Alioze atu amwe kakunyonga ngwo, nyi masosolola umwe mu chikungulwila, acho Zambi kamusolwelele keke. Shina manyonga wano kali amwenemwene? Tutalenu chikuma chacho.

9-10. Kulita ni A-Hepreu 12:5, 6, mumu liaka mutuhasa kwamba ngwetu, kusosolola mutu chili kusolola keke? Hana chilweza.

⁹ Twakwivwa yikola yinji ku mbunge muze twakwivwa mutambi ha kukunguluka ngwo, mutu yoze twanyingika nawa twazanga, “keshi nawa Chela cha Yehova.” Hanji mutuhasa kulihula ngwetu, shina te chinafupiwa lume kumusosolola? Kutala kusosolola mutu mu chikungulwila chili lume kusolola keke? Ewa, chili kusolola keke. Kuhona kufumba mutu yoze unafupiwa fumbo, hi kusolola ko mana, keke ni zango. (Yishi. 13:24) Shina kusosolola mutu yoze walinga shili chakuhona kulikonyeka, muchihasa kumukwasa kwalumuna yitanga yenyi? Ewa, muchihasa. Mandumbu anji waze alingile shili yinene kambile ngwo, te kanafupiwa lume kwasosolola mba alikonyeke ni kwalumuna yitanga yo hanga ahiluke kuli Yehova.—Tanga A-Hepreu 12:5, 6.

¹⁰ Tunyongenu ha chilweza chino: Kafunga mamona ngwo, umwe panga kanayiji. Iye kananyingika ngwenyi, mba awuke musongo wacho, katamba kuchiza panga wacho mukachi ka akwo. Alioze mapanga kakuzanga chinji kupwa hamuwika. Ayo kakuzanga kupwa mu chendo chimuwika, kashika kakupinjisa chinji nyi maahandununa ni akwo. Shina chino chinalumbunuka ngwo, kafunga yoze wahandununa panga unayiji mukachi ka akwo kakwete mbunge yipi? Ka, keshi ni mbunge yipi. Iye kananyingika ngwenyi, nyi mecha panga yoze unayiji hanga anunge mukachi ka akwo, yikola yacho muyisambuluka kuli mapanga eswe. Ha kuhandununa panga yoze unayiji, iye mafunga mapanga eswe waze ali mu chendo.—Tala nawa Ulevi 13:3, 4.

11. (a) Mujila yika ndumbu yoze asosolola ali ngwe panga yoze unayiji? (b) Yika waze hanasosolola mahasa kulinga, nawa ukwaso uka mahasa kutambula?

¹¹ Nyi masosolola umwe ndumbu, twatamba kumumona ngwe panga wacho unayiji. Alioze yikola yenyi yili ya ku spiritu. (Tia. 5:14) Ngwe chize misongo yikwo tunanyingika yakusambuluka, misongo ya ku spiritu neyo muyihasa kusambuluka ni kawashi. Kashika, ha mashimbu amwe, chakufupiwa kuhandununa panga yoze unayiji mu chikungulwila. Fumbo lino, linalumbunuka zango lia Yehova hali mapanga jenyi ashishika waze ali mu chendo, nawa mulihasa kukwasa mutu yoze walinga shili hanga alikonyeke. Alioze, mutu yoze asosolola mahasa kuya ku kukunguluka kuze mawana kulia cha ku spiritu chize muchikolesa ufulielo wenyi. Mahasa nawa kutambula mikanda hanga alinge longeso lienyi lia wika ni kutala JW Broadcasting^®. Ha kupalika cha mashimbu, muze makulwana mamona ngwo, mutu wacho kanalumunako yimwe, ayo mahasa kumwaha yiyulo ni usongwelo hanga ahinduke ku spiritu. Chino muchihasa kumukwasa hanga ahiluke mu chikungulwila. *

12. Jila yika yipema yize makulwana akusolwelamo zango ni keke kuli mutu yoze walinga shili chakuhona kulikonyeka?

 ¹² Chili chilemu kwiwuluka ngwo, atu waze akulinga shili chakuhona kulikonyeka e wika akusosolola. Makulwana a mu chikungulwila kananyingika ngwo, katamba kunyonga kanawa shimbu kanda achikwata chiyulo cha kusosolola umwe ndumbu. Ayo kananyingika ngwo, fumbo lia Yehova katamba kulihana “nikulita.” (Jere. 30:11) Makulwana kakuzanga mandumbu, nawa keshi kuzanga kulinga nichimwe chize muchihasa kupihisa usepa wo ni Yehova. Alioze, ha mashimbu amwe, jila yipema yakusolwelamo zango ni keke, yili kusosolola mu chikungulwila mutu yoze walinga shili.

13. Mumu liaka umwe mukwa-Kristu mu Korindu atambile kusosolola?

¹³ Tutalenu yize postolo Paulu alingile hali umwe chivulumunyi yoze kakalikonyekene. Umwe mukwa-Kristu mu chikungulwila cha Korindu te kakulinga utanji ni pwo lia tato. Chino chapwile chuma chipi chinji! Yehova kahanjikile ni A-Izalele hakutwala ku chikuma chino, ngwenyi: “Lunga yoze hanapombo ni pwo lia tato hanafukula uselesele wa tato. Kashika akaashihe eswe ni aali.” (Levi 20:11) Paulu te kechi kuhasa kulweza mandumbu mu chikungulwila hanga ashihe lunga wacho. Alioze, kaalwezele hanga amusosolole. Yitanga ya luchisa ya lunga wacho te yinakwate hali mandumbu akwo mu chikungulwila, chocho amwe yaputuka kunyonga ngwo iye kalingile upi niumwe!—1 Kori. 5:1, 2, 13.

14. Kuchi Paulu asolwele keke kuli umwe yoze asosolwele mu chikungulwila cha Korindu, nawa mumu liaka achilingile? (2 A-Korindu 2:5-8, 11)

¹⁴ Kulutwe, Paulu yevwa ngwo lunga wacho kalumuna yitanga yenyi. Iye kalikonyekene ni mbunge yeswe! Lunga wacho kevwishile chikungulwila sonyi, alioze Paulu yalweza makulwana ngwenyi, kakazangile kupwa mukalu. Chocho, yaasongwela ngwenyi: “Chanutamba kumukonekena ni kumutakamisa.” Paulu yaalweza nawa mumu liaka te ayo atamba kuchilinga, ha kwamba ngwenyi: “Kuchina hanji umwe ngwe yono mamushata ni yinyengo yinji.” Paulu yevwila lunga wacho keke mumu kalikonyekene. Iye kakazangile hanga yinyengo yishate lunga wacho mumu lia yize alingile, ni kumutwala ahone kufupa ukonekeno wa Zambi.—Tanga 2 A-Korindu 2:5-8, 11.

15. Kuchi makulwana mahasa kuhana fumbo ni kusolola keke ha shimbu limuwika?

¹⁵ Makulwana a mu chikungulwila kakuzanga kusolola keke ha kwimbulula chilweza cha Yehova. Nyi umwe mavulumuna, ayo  kakumufumba lume nyi muchilita, alioze kakusolola nawa keke nyi muchifupiwa. Makulwana kananyingika ngwo, kuhona kufumba mutu yoze unatela fumbo liacho, hi kusolola keke ko, chili kulelesa shili yize alinga. Shina makulwana wika e atamba kusolola keke?

16. Kulita ni Yishima 21:13, yika Yehova akulinga kuli atu waze keshi kusolola keke?

¹⁶ Tulieswe tunazange kupwa akwa-keke ngwe Yehova. Mumu liaka? Mumu Yehova keshi kwivwa yilemba ya atu waze keshi kusolola keke. (Tanga Yishima 21:13.) Niumwe wa kuli yetu kazangile hanga chino chilingiwe kuli iye; kashika, twatamba kukeya hanga tuchine kupwa ni mbunge yikalu. Yetu kutushi kulituna kukwasa ndumbwetu yoze unamono lamba, alioze nihindu twakupanjika “muze yiswale mateta.” Chikwo nawa, twakukaula chiyulo chize chili ha Tiangu 2:13, chinambe ngwo: “Yoze kalwezele keke kumakatambula upatwilo uze kuushi keke.” Nyi nikulikehesa cheswe mutunyingika chize tunafupiwa hanga akwetu atusolwele keke, chino muchitukwasa ni yetu tusolwele akwetu keke. Ha chikuma chimwe chize tunafupiwa kusolola keke, chili muze ndumbu yoze asosolwele malikonyeka ni kuhiluka mu chikungulwila.

17. Kuchi Mwanangana Ndawichi asolwele ngwo kali mukwa-keke?

¹⁷ Mu Mbimbiliya muli yilweza yinji yize muyihasa kutukwasa hanga tupwe akwa-keke, ni kwecha kupwa atu akalu. Chakutalilaho, tutalenu chilweza cha mwanangana Ndawichi. Iye kasolwele ha yisuho yinji ngwo kali mukwa-keke. Saulu kafupile kumushiha, alioze Ndawichi yasolola keke hali mwanangana yono yoze Zambi awahishile. Nawa kakafupile kumufunyishina upi ha upi hanji kumulinga yuma yipi.—1 Samue. 24:9-12, 18, 19.

18-19. Tongola yisuho yaali yize Ndawichi ahonene kusolola keke?

¹⁸ Alioze ha yisuho yikwo, Ndawichi kakasolwele keke. Chakutalilaho, Nabale, umwe lunga yoze te ukwete mbunge yikalu, kahonene Ndawichi vumbi ni kulituna kumwaha kulia ni atu jenyi. Ndawichi yevwa uli unji, chocho yazanga kushiha Nabale ni malunga eswe a ku zuwo lienyi. Iye kahonene kumwanga manyinga, mumu Abigale, pwo lia Nabale kapwile mutu mupema, chihomboloji nawa kalingile yuma ni kawashi hanga atwalile Ndawichi kulia.—1 Samue. 25:9-22, 32-35.

¹⁹ Ha chisuho chikwo, profeta Natane yalweza Ndawichi ngwenyi, umwe lunga pichi keyile panga wa mwenyembo wenyi yoze te chiswale. Ndawichi yevwa uli, chocho yamulweza ngwenyi: “Ni mwono wa Yehova, yono lunga halinga chuma chino kanatela kufwa!” (2 Samue. 12:1-6) Ndawichi te kananyingika kanawa Shimbi ya Mose. Kulita ni Shimbi yacho, nyi mutu meya panga umuwika te katamba kufweta kuli mwenyayo mapanga awana. (Kutuhu. 22:1) Mba mumu liaka Ndawichi ambile ngwenyi, mutu wacho te kanatela kufwa? Upatwilo uno wapwile ukalu chinji. Natane katele chishima chino hanga akwase Ndawichi kunyingika ngwo, kalingile yuma yipi. Nawa ngwo, Yehova  kanakamusolwela keke kuhiana chize iye te anapatwila lunga wa ha chishima cha Natane!—2 Samue. 12:7-13.

20. Yika chilweza cha mwanangana Ndawichi chinatulongesa?

²⁰ Nyingika ngwe muze Ndawichi alingile yuma ni uli, iye kazangile kushiha Nabale ni malunga eswe a ku zuwo lienyi. Hanyima, Ndawichi yamba ngwenyi, lunga wa ha chishima cha Natane te katamba kumushiha. Ha lusango yono wamuchiali, mutuhasa kulihula ngwetu: ‘Mumu liaka mutu yoze wapwile ni kusoloka keke, anakapatwila mukwo ni mbunge yikalu?’ Tunyongenu ha yize te yinalingiwa ku mwono wa Ndawichi. Ha mashimbu jacho, Ndawichi mbunge te yinamuleme mumu lia yize alingile. Nyi mutu mapatwila akwo ni mbunge yikalu, chino chakusolola ngwo, usepa wenyi ni Yehova kuushi kanawa. Yesu katowezele tumbaji twenyi ngwenyi: “Kanda nupatwila akwenu, mba o kechi kanupatwila. Mumu upatwilo uze munupatwila nawo akwenu, uzewene makanupatwila nawo.” (Mateu 7:1, 2) Kashika, twatamba kukeya hanga tuchine kusolwela akwetu mbunge yikalu, alioze twasolwele “keke ya kulumbama” ha kwimbulula Zambi.

21-22. Majila aka mutuhasa kusolwelamo akwetu keke?

²¹ Mukwa-keke keshi kulisa wika mu chihela cha akwo, alioze “kakulinga nawa yimwe hanga aakwase.” Kashika, tulieswe twatamba kusa shindakenyo hanga tumone nyi umwe mu usoko, mu chikungulwila chetu hanji ku chihela kuze twatwama kanafupiwa ukwaso. Nyi twachilinga, mutupwa ni uhashi unji wa kusolwelamo akwetu keke! Shina haze uli hali umwe yoze unafupiwa utakamiso? Kutala muhasa kama kumukwasa ha kumwaha kulia hanji yuma yikwo? Shina umwe ndumbu yoze wafuna mu chikungulwila kanafupiwa umwe sepa hanga amutakamise hanji kumukolweza? Kutala mutuhasa kutakamisa atu mu njiza yetu ha kwambulwila sango lipema? Yino yili yimwe jila yipema yakusolwelamo akwetu keke.—Yombi 29:12, 13; Roma 10:14, 15; Tia. 1:27.

²² Nyi mutunyingika yize akwetu anafupiwa, mutumona ngwetu kuli majila anji waze mutuhasa kusolwelamo keke. Muze twakusolola chitanga chino, twakuvwisa kuwaha Tata yetu wa mu malilu, Zambi “mukwa keke ya kulumbama!”