Amu kwapwile akwa-kwambujola anji, kashika mandumbu te kakufupiwa mikanda yinji. Mandumbu a ku Mbetele ya Brooklyn kapwile ni kufwambwisa tuposhi, alioze mba afwambwise mikanda, ayo te kakuzachisa makina ya akwa-mingoso. Muze akwa-mingoso alalukile kuhana mikanda ha tukweji anji ni kupinjisa mulimo wa kwambujola, ndumbu Rutherford yahula Robert Martin yoze te wakusongwela mulimo wa kutuhwisa tuposhi nyi te mutuhasa kutuhwisa mikanda yetu.

Ndumbu Martin yamba ngwenyi, “liapwile nyonga lipema, mumu chino te chinalumbunuka kusa makina yize muyitukwasa kutuhwisa mikanda.” Mandumbu yalukala chihela mu Rua 18 ya Concord Brooklyn ni kulanda yikwata yeswe yize te makalakala nayo.

Alioze hi eswe ko kapwile ni kuwahilila ha mulimo wacho. Mwenya milimo yoze wapwile ni kututuhwishila mikanda yeza ni kutala makina yetu. Yamba ngwenyi: “Talenu atu wano kali ni makina apema akutuhwishila mikanda, alioze kukushi niumwe yoze unanyingika kukalakala no, yuma yeswayi muyipiha ha kupalika cha tukweji asambano.”

Ndumbu Martin yamba ngwenyi, “chino muchihasa kupwa chamwenemwene, alioze iye kavulamine Zambi, yoze wakutukwasa mashimbu eswe.” Maliji ja ndumbu Martin kapwile amwenemwene. Ha shimbu likehe wika, makina yaha yiyiputuka kufambwisa mikanda 2.000 ha tangwa.

Hi wika ko kutuhwisa mikanda, atu ja Yehova kapwile ni kuzachisa jila yikwo hanga ambujole sango lipema—chisaji. Liayenga ha chingoloshi 26 Fevereiro, 1922, Ndumbu Rutherford yahanjika ku chisaji ha chisuho chitangu. Yahanjika pande jili ni mutwe ngwo: “Atu Anji Waze Ali ni  Mwono Haliapwila Kechi Kafwa” ku chisaji cha fuji cha KOG mu Los Angeles, California, E.U.A.

Unji wa atu 25.000 kevwile sango jacho. Amwe a kuli ayo katumine mikanda ni kusakwilila ndumbu Rutherford. Umwe wa ku mikanda yacho wapwile wa Willard Ashford wa ku Santa Ana, California. Iye yachichimieka ndumbu Rutherford ha pande jize alingile ha kwamba ngwenyi “japwa jalipwila.” Yamba nawa ngwenyi: “Ni atu atatu nayiza ku zuwo te muchikaliwa kwivwa pande je nyi kujakapalikile ku chisaji chipwe ngwe pande jacho te mujilingila hakamwihi ni zuwo liami.”

Pande jikwo kanungine ni kujivwa ha poso jize jahachileko. Kaposhi wa kutalila kambile ngwo, “kusongo lia mwaka wacho kota atu 300.000 kevwile sango kupalikila ku chisaji.”

Amu atu azangile kwivwa sango jacho, Alongi a Mbimbiliya yasa chisaji cha fuji ku Staten Island, hakamwihi ni Mbetele ya Brooklyn. Ha kupalika cha miaka, chisaji chacho cha WBBR, te machizachisa chinji kuli Alongi a Mbimbiliya hanga ambujole sango ja Wanangana.

Kaposhi wa Kutalila 15 Junho 1922, kambulwile kukunguluka cha mambonge chize te muchilingiwa ku Cedar, Ohio, ha 5 ndo 13 ya Setembro. Alongi a Mbimbiliya kawahililile chinji muze ahetele ku chihela chacho.

Ha pande jenyi jitangu, Ndumbu Rutherford yalweza mbunga ngwenyi: “Nguli ni shindakenyo ngwami, Zambi mawahisa kukunguluka chino ni kuhana uchela hashi heswe.” Akwa-kulinga pande ha kukunguluka chacho kakolwezele mandumbu ha yisuho yinji hanga ambujole sango lipema.

Kusulaho, Liamatano 8 Setembro unji wa atu 8.000 yazalisa chihela chacho, ni kushimbwila kwivwa pande ja Ndumbu Rutherford. O te kanashimbwila hanga evwe ulumbunwiso wa sona “ADV,” jize japwile ni kusoloka ha convite. Muze te anafupu yihela haze matwama, atu amwe kota kamwene lona munene helu lia palku. Arthur Claus yoze wakatukile ku Tulsa Oklahoma, E.U.A., ni kuya ku kukunguluka cha mambonge yawana chihela chize chamukwashile  kwivwa kanawa pande, mumu ha matangwa jacho kukwakapwile yisaji ya kuhanjikila.

Mba ase shindakenyo ngwo eswe mevwa kanawa pande, kasongo yamba ngwenyi, atu waze te malaluka kechi kunjila ha shimbu lize Ndumbu Rutherford analingi pande. Ha ola 9:30, Ndumbu Rutherford yaputuka ni maliji a Yesu waze ali ha Mateu 4:17, anambe ngwo: “Wanangana wa malilu hiwakundama.” (Versão Rei Jaime) Muze ahanjikile ha chize te atu manyingika Wanangana wacho, iye yamba ngwenyi: “Mwene Yesu kambile ngwenyi, ha shimbu lia kwiza chenyi te makakunga atu jenyi, ha kukunga chacho masakula tuvumbi amwenemwene nawa ashishika.”

Ndumbu Claus watwamine ku chihela cha kulutwe yamba ngwenyi: “Twapanjikile kanawa hita liji.” Chaluyinda, Arthur yatuhuka mumu kakalivwile kanawa. Iye kanyongene ngwe kechi kuhiluka nawa.

Ha shimbu likehe wika yaputuka kulivwa kanawa. Muze te anafuna mu chihela chacho yevwa koshi jinji. Yino yamuvwishile kuwaha chinji! Amu azangile chinji kwivwa songo lia pande jacho, chocho yafupa kunyina ha fulumba. Ndumbu Claus, wapwile ni miaka 23 ha mashimbu jacho, yafupa uhashi hanga anyine ha fulumba. Tupenda kapwile awashi, chocho yamona ngwo haze apwile mahasa “kwivwa kanawa pande.”

Alioze Arthur te keshi ukawenyi. Amwe masepa jenyi no kapwile ha fulumba. Frank Johnson umwe wa kuli ayo, yamuhula ngwenyi: “Uli kama ni poko yinambuka?”

Arthur yakumbulula ngwenyi: “Ewa.”

Frank yamba ngwenyi: “Yena uli kumbululo lia yilemba yetu. Unamono chivungo chino? Kali lona yoze anakashila ku mbambo jino. Panjika kanawa Ngaji * muze anahanjika. Muze mamba  ngwenyi: ‘Ambujolenu, ambujolenu,’ yena muteta ngoji jino jiwana.”

Hachino, Arthur yakwata poko ku kwoko ni kushimbwila chilayi. Ha mashimbu akehe wika Ndumbu Rutherford yaheta ha chikuma chilemu cha pande jenyi. Ni kuwahilila cheswe, Ndumbu Rutherford kota kakalumukine ni kwamba ngwenyi: “Shishikenu ha kupwa yela amwenemwene a Mwene. Nungenu ni kushishika ndo haze manongesela uwayilo weswe wa mahuza. Ambujolenu sango mu yifuchi yeswe. Atu eswe katamba kunyingika ngwo, Yehova iye Zambi, Yesu iye Mwanangana wa mianangana ni Mwene wa ene. Lino liapwa tangwa lilemu kuhiana matangwa akwo. Talenu, Mwanangana kanayulu! Yenu nuli akwa-kwambujola Wanangana wenyi. Kashika, ambujolenu, ambujolenu, ambujolenu, mwe Mwanangana ni Wanangana wenyi!”

Arthur yamba ngwenyi, hazehene iye ni mandumbu akwo yateta ngoji, mba chivungo chacho yichazuluka. Kulita ni sona “ADV,” jinalumbunuka mu inglês kwambujola, chivungo chapwile ni kwamba ngwo: “Ambujolenu Mwanangana ni Wanangana.”

Kukunguluka cha mambonge mu Cedar Point chakwashile mandumbu hanga alihulikile ha mulimo ulemu, kwambujola sango ja Wanangana. Waze apwile ni spiritu yakulihana kazangile chinji kulinga mulimo wacho. Umwe colportor (yoze musono twakuvuluka ngwo pionelu) wa ku Oklahoma, E.U.A., kasonekene ngwenyi: “Twambulwile mu yimwe njiza muze atu te akulinga mulimo wa kufula makala (carvão mineral), ayo kapwile chinji yiswale.” Iye yamba ngwenyi, kanji-kanji muze atu apwile ni kwivwa sango ja mukanda Idade de Oru “ayo kapwile ni kulila.” Yamba nawa ngwenyi: “Chili chiwape chinene kutakamisa atu jacho.”

Alongi jacho a Mbimbiliya kamwene ulemu wa maliji a Yesu waze ali ha Luka 10:2, anambe ngwo: “Kucha chamwenemwene chinene, alioze akwa milimo akehe.” Kusongo lia mwaka 1922, ayo te hakwata kulu chiyulo cha kwambujola sango ja Wanangana hashi heswe.