“MWESWAWO wa kuli yenu malituna kwasa jita ni França hanji Inglaterra eswe manushiha!” Che ambile umwe swalale Nazista kuli chimwe chizavu cha Yela ja Yehova ha mashimbu a Jita Yamuchiali ya Hashi Heswe. Maswalale a Nazista te halilulieka kulu hanga aashihe, alioze niumwe chela cha Yehova wehukule ufulielo wenyi wakuhi. Ayo kapwile ni hamu linji! Chilweza chino chinasolola chize akunyonga Yela ja Yehova eswe. Yetu kutushi kwasa jita muze yifuchi ya kulimika yimwe ni yikwo. Chipwe ngwe mwono wetu uli mu ponde, nihindu kutushi kwasa jita.

1. ATU JA ZAMBI ESWE KAPWILE A KU VUNGU LIMUWIKA

Kunyima, Yehova kakungulwile atu jenyi mu vungu limuwika—Izalele. Iye kavulukile A-Izalele ngwenyi: “Upite wami wa kutongola hakachi ka mavungu eswe” (Kutuhu. 19:5) Zambi nawa kaahele ngiza ya ukawo. Kashika, muze Zambi apwile ni kulweza hanga A-Izalele aye ni kwasa jita ni mavungu akwo, o te keshi kwasa jita ni mandumbu jo, hanji ngwetu atu waze te akuwayila Yehova. *

Musono, atu waze akuwayila Yehova kali “a ku mavungu eswe, ni ku minyachi yeswe, ni kuli atu eswe, ni ku malimi eswe.” (Uso. 7:9) Nyi te atu ja Zambi kakwasa jita kachi kakushiha mandumbu jo a ku ufulielo.

 2. YEHOVA KATAYIJILE A-IZALELE KUYA NI KWASA JITA

Kunyima, Yehova mwe wapwile ni kusakula shimbu ni mumu liaka A-Izalele atamba kwasa jita. Chakutalilaho, Zambi kalwezele A-Izalele alinge upatwilo wenyi hali A-Kanana, atu waze ayile lufuma wa kuwayila andemoniu, kulinga utanji ni kuhana ana jo ngwe yitapo kuli tuzambi two. Chikwo nawa, A-Kanana te katwama mu chifuchi chize Yehova alakenyene kuhana kuli atu jenyi. Kashika Yehova atumine A-Izalele hanga aye ni kwanongesa hanga yuma yipi yize A-Kanana apwile ni kulinga yihone kwapiangula. (Levi 18:24, 25) Chipwe muze A-Izalele apwile mu chifuchi cha Chilakenyo, nihindu mashimbu amwe Zambi te kakwatuma hanga aye ni kwasa jita ni akwa-kole jo. (2 Samue. 5:17-25) Alioze, Yehova te keshi kutayiza hanga A-Izalele akwate chiyulo ene cha kuya ni kwasa jita. Muze apwile ni kuchilinga, o te kakumona lamba.—Kwa. 14:41-45; 2 Sango 35:20-24.

Musono, Yehova keshi kwecha tuvumbi twenyi aye ni kwasa jita. Mavungu kakwasa jita hanga akalile chifuchi cho hi Zambi ko. Kanji-kanji o kakwasa jita mumu lia yimwe ngiza, upite hanji kukalila limwe nyonga lia mafwefwe. Mba yika mutwamba hali waze akwamba ngwo, kakwasa jita mu jina lia Zambi hanga akalile yingeleja yo hanji kushiha akwa-kole ja Zambi? Yehova makafunga tuvumbi jenyi amwenemwene, ni kunongesa akwa kole jenyi kulutwe lia matangwa, ha jita ya Armagedone. (Uso. 16:14, 16) Jita yacho kechi kayasa kuli mutu mweswawo, wika kuli chizavu cha tujita a mu malilu.—Uso. 19:11-15.

3. A-IZALELE KAPWILE NI KUFUNGA ATU WAZE TE AKUFULIELA MULI YEHOVA

Kunyima, chizavu cha maswalale A-Izalele kanji-kanji te kakufunga mwono wa atu waze apwile ni kufuliela muli Zambi, ni kushi wika waze Yehova apwile ni kwatuma ngwo, katamba lume kufwa. Tutalenu yilweza yaali. Yehova katumine A-Izalele hanga apupe Yeriku ni kuyinongesa, alioze A-Izalele yafunga Rahape ni asoko jenyi mumu lia ufulielo uze asolwele. (Yoshu. 2: 9-16; 6:16, 17) Kulutwe, mbonge yeswe ya A-Ngibeone kakayinongesene mumu o kasolwele ngwo kakuvumbika Zambi.—Yoshu. 9:3-9, 17-19.

Musono, mavungu waze akwasa jita keshi kufunga mwono wa waze akusolola ufulielo. Ha mashimbu amwe, kakushiha chipwe atu waze hi maswalale ko.

4. A-IZALELE TE KUKAULA USONGWELO WA ZAMBI AKUTWALA KU JITA

Kunyima, Yehova te kakushimbwila hanga maswalale A-Izalele akaule usongwelo wenyi muze anayi ni kwasa jita. Chakutalilaho, Zambi kapwile ni kwalweza ngwo, katamba ‘kulilweza sambukila’ ni akwa-mbonge yize masa no jita. (Shimbi 20:10) Chikwo nawa, Yehova kapwile ni kushimbwila hanga maswalale A-Izalele alinange ku mujimba ni kukaula shimbi jenyi. (Shimbi 23:9-14) Chakutalilaho, maswalale a ku mavungu akwo, kanji-kanji kapwile ni kupihisa mapwo a mu mbonge jize o te akukumba. Alioze Yehova kalwezele A-Izalele hanga ahone kuchilinga. Chipwe chocho, ayo te mahasa kumbata pwo wa mu mbonge yize akumba ha kupalikisa cha kakweji umuwika.—Shimbi 21:10-13.

Musono, yifuchi yinji yili ni shimbi jize ja kutala ha kwasa jita. Shimbi jacho kakujitunga ha afunge atu waze hi maswalale ko. Alioze, kanji-kanji chino chishi kulingiwa.

5. ZAMBI KASHILILE ATU JENYI JITA

Kunyima, Yehova kashilile A-Izalele jita, kanji-kanji kukumba cho chapwile cha yikomokeso. Chakutalilaho, kuchi Yehova akwashile A-Izalele kukumba mbonge ya Yeriku? Kulita ni usongwelo wa Yehova, muze A-Izalele ‘akololokele ni liji linene lia jita, chipanga-cha-mawe yichinunguka,’ chocho o yakumba mbonge yacho. (Yoshu. 6:20) Kuchi ayo akumbile jita ni A-Amore? Mbimbiliya yinambe ngwo: “Yehova mwilu yanokesa mawe anene-anene hali ayo . . . Waze afwile ni mawe anji; waze ashihile kuli A-Izalele ni kata akepe.”—Yoshu. 10:6-11.

AKWA-KRISTU AMWENEMWENE KAPWA AKWA-SAMBUKILA

Ngwe chize twamona, musono yetu kutwalifwile ni, A-Izalele. Alioze, kalisa wacho hi wika ko mwe wakututwala tuhone kwasa jita. Kuli yikuma yikwo. Chakutalilaho, Zambi hanambe ngwenyi ha matangwa a kusula waze iye makalongesa “kechi kalilongesa nawa kwasa jita” chipwe kuya ku jita. (Iza. 2:2-4) Chikwo nawa, Kristu kalwezele tumbaji twenyi ngwenyi, “hi nuli akwa hashi ko” chekwamba, te kechi kulinjisa mu mbwanja ja hano hashi.—Yoa. 15:19.

Kristu kakolwezele nawa tumbaji twenyi hanga alinge yuma yikwo. Iye yaalweza ngwenyi, kanda nupwa ni yitanga ya kufunga toto, ufwatulo ni ya jita. (Mateu 5:21, 22) Kakwashile nawa hanga apwe “yitakanyishi” hanji ngwetu, apwe akwa- sambukila ni kuzanga akwa-kole jo.—Mateu 5:9, 44.

Mba yika mutwamba hali yetu? Hanji kutuchi kuzanga kwasa jita, alioze shina mu mbunge yetu muli manyonga a kole waze matutwala ku ndombo hanji kulihandununa mu chikungulwila? Tusenu tachi hanga tukumbe manyonga api waze ali mu mbunge yetu.—Tia. 4:1, 11.

Yetu kutushi kulinjisa mu jita ya akwa-mavungu, alioze twakusa tachi hanga tufunge sambukila ni zango mukachi ketu. (Yoa. 13:34, 35) Kashika, muze tunashimbwila tangwa lize Yehova makahwisa jita liakulu, tunungenu ni kwehuka yuma ya mafwefwe.—Samu 46:9.