1-2. (a) Yika manguvulu amwe akulinga kuli Yela ja Yehova, mba yika ayo akulinga? (b) Kuchi mutuhasa kuwahilila chipwe ngwe matuhungumiona? (Hanjika nawa ha chizulie cha ha chifukilo.)

 MUSONO, hashi heswe mulimo wa Yela ja Yehova uli wakukanjisa mu yifuchi kuhiana 30. Mu yimwe ya ku yifuchi yacho, mandumbu ni mapangi jetu anji kali mu mazuwo a ususu. Yuma yika yipi yize ayo alingile? Kuli Yehova, o kakalingile upi niumwe. Yuma anakalinga wika yili, kutanga ni kulilongesa Mbimbiliya, kwambujola kuli akwo ni kuya ku kukunguluka ni mandumbu jo. Ayo nawa keshi kulinjisa mu yuma ya mafwefwe. Chipwe ngwe, kakupalika mu yipikalo yino yeswe, tuvumbi wano a Yehova kananungu ni kufunga ungunu wo * ha kusolola ngwo, yeswayo muyilingiwako o manunga ni kushishika kuli Yehova. Muze akulinga chino, ayo kakuwahilila chinji!

² Kota hiunamono kama foto ya amwe a kuli mandumbu jacho a hamu waze anahungumiona ni kumona ngwe kanawahilila. O kakuwahilila mumu kananyingika ngwo, Yehova kanevu kuwaha ha ushishiko wo. (1 Sango 29:17) Yesu kambile ngwenyi: “Kawaha waze anaahungumiona mumu ha  ululi . . . Wahililenu, likwizenu, mumu kwononona chenu chinene.”—Mateu 5:10-12.

3. Kulita ni Yilinga 4: 19, 20, yika apostolo ja Yesu ambile muze te anaahungumiona, nawa mumu liaka ambile chocho?

³ Yize yinalingiwa kuli mandumbu jetu yinalifu ni yize apostolo apalikile muze aahungumionene mumu lia kwambujola hakutwala kuli Yesu. Ha yisuho yinji, ngaji amu chota chinene cha A-Yunda yaalweza ngwo: “Kanda nukahanjika nawa mu jina lia Yesu.” (Yili. 4:18; 5:27, 28, 40) Mba yika apostolo alingile? (Tanga Yilinga 4:19, 20.) Kupalikila mu jina lia apostolo eswe, Petulu ni Yoano yamba ni hamu lieswe ngwo, o mononokena Zambi kuhiana kwononokena ngaji jacho, nawa ngwo kechi kwecha kwambujola ha jina lia Yesu. Chapwile ngwe kanambe kuli ngaji jacho ngwo, ‘Shina yenu nuli alemu kuhiana Zambi mba atu anwononokene?’ Ayo kakwachile chiyulo chacho, mumu umwe yoze te wahiana ngaji jacho kaehele shimbi hanga ambujole kuli atu ni kuhana uchela hali Kristu.—Yili. 10:42.

4. Kulita ni Yilinga 5:27-29, chilweza chika apostolo ahichikilile Akwa-Kristu chize twatamba kwimbulula?

⁴ Apostolo kahichikile chilweza chipema chize Akwa-Kristu eswe mahasa kwimbulula, cha “kwononoka kuli Zambi, hi kuli atu ko.” (Tanga Yilinga 5:27-29.) Muze haalamba mumu lia ushishiko wo, apostolo yatuhuka mu chota cha A-Yunda “nikuwahilila se Zambi yaanyonga akwa kutela kusauka mumu ha lie jina lia Yesu,” chocho yanunga ni kwambujola!—Yili. 5:40-42.

5. Yihula yika twatamba kukumbulula?

⁵ Chilweza chize apostolo ahichikile muchihasa kuneha yimwe yihula. Chakutalilaho, kuchi apostolo te mahasa kwononokena kuli Zambi, hi kuli atu ko ha shimbu lioliene ‘mazeyela kuli waze ali ni poko ya kuyula’? (Roma 13:1) Kuchi mutuhasa kwononokena “mianangana ni akwa kuyula,” ngwe chize postolo Paulu ambile, aku nawa mutushishika kuli Zambi Mwanangana wetu munene?—Titu 3:1.

6. (a) “Waze ali ni poko ya kuyula” anatongola ha A-Roma 13:1 aya, nawa yika twatamba kwaha? (b) Ndundo ja mutapu uka manguvulu eswe ali najo?

⁶ Tanga A-Roma 13:1. Ha versu yino, “waze ali ni poko ya kuyula” kali atu waze akwete ndundo hali akwo. Akwa-Kristu katamba kwononokena manguvulu wano, mumu ayo kakusa shimbi ni kululieka yuma mu chifuchi, ha mashimbu amwe kakukwasa chipwe atu ja Yehova. (Uso. 12:16) Kashika, twatamba kufweta lijimu ni kuvumbika manguvulu jacho. (Roma 13:7) Chipwe chocho, manguvulu kali ni ndundo mumu Yehova mwe uneche hanga apwe najo. Yesu kasolwele chikuma chacho zwalala muze amuhulile kuli nguvulu wa A-Roma Ponshu Pilatu. Muze Pilatu ambile ngwenyi kali ni ndundo ja kutusula Yesu hanji kwita hanga amushihe, Yesu yamba ngwenyi: “Kunushi ni chiyulo nichimwe hali yami nyi kanuhelecho mwilu.” (Yoa. 19:11) Chizechene ngwe Pilatu, ndundo ja manguvulu eswe a hano hashi jili ni haze jasulila.

7. Ha shimbu lika kutwatambile kwononokena manguvulu, nawa yika ayo atamba kwiwuluka?

⁷ Akwa-Kristu katamba kwononokena manguvulu nyi shimbi jo kujalimikine ni shimbi ja Zambi. Alioze, yetu kutwatambile kwononokena atu muze matwita tulinge yuma yize Zambi akukanjisa hanji muze matukanjisa kulinga yuma yize Yehova akutwita hanga tulinge. Chakutalilaho, ayo hanji masa shimbi ngwo, malunga katamba kupwa maswalale. * Hanji makanjisa Mbimbiliya yetu, mikanda yetu, mulimo wetu wa kwambujola ni kulikungulula hamuwika. Nyi manguvulu mazachisa chipi wata uze akwete ha kumwesa lamba tumbaji twa Kristu, ayo makakumbulula kuli Zambi. Mumu Yehova kanamono yuma yeswe!—Chilu. 5:8.

8. Kalisa muka uli ha liji “poko ya kuyula” ni “Chitunda,” nawa mumu liaka chino chili chilemu?

⁸ Liji “poko ya kuyula” linalumbunuka nawa, “kupwa ni ulemu ni ndundo jinji.” Alioze kulialumbunukine ngwo, “mulemu wahiana nawa mukwa ndundo jeswe.” Kwamba pundu uno uli ulumbunwiso wa liji likwo—“Chitunda.” Chipwe ngwe manguvulu a hano hashi kali ni “poko ya kuyula,” nihindu kuli umwe unahiane ku ndundo. Mu Mbimbiliya Yehova kanamusanyika ngwo “Chitunda ha yisuho yiwana.”—Danie. 7:18, 22, 25, 27.

9. Usolwelo uka profeta Daniele amwene?

⁹ Profeta Daniele kamwene mu usolwelo ngwo, Yehova kali ni ndundo jinji kuhiana atu eswe. Chitangu Daniele kamwene ngongo awana waze te analumbunuka mawanangana a ndundo a hashi eswe, a ku matangwa a kunyima ni a musono: Babilonia, A-Media ni A-Persia, Ngresia, Roma ni Anglo-America. (Danie. 7:1-3, 17) Kusulaho Daniele yamona Yehova kanatwame ha ngunja yenyi mu malilu. (Danie. 7:9, 10) Yize profeta wacho amwene yili utowezo kuli manguvulu waze anayulu musono.

10. Kulita ni Daniele 7:13, 14, 27, kuli aya Yehova ahana ulite wa kuyula hashi, nawa yika yino yinasolola hakutwala kuli Iye?

¹⁰ Tanga Daniele 7:13, 14, 27. Yehova hanatambula ndundo jeswe jize manguvulu akwete ni kujihana kuli atu akwo waze atela, nawa ali ni ndundo jinji. Atu jacho aya? Umwe kali “ngwe mwana mutu,” Yesu  Kristu ni “asandu a mwe Chitunda,” Akwa-Kristu 144.000 waze makayula ni Yesu “ku miaka ya mutolo.” (Danie. 7:18) Chochene, Yehova kali lume Chitunda mumu iye wika mwe uli ni ulite wa kulinga yuma yacho.

11. Yika nawa Daniele asonekene yize yinasolola ngwo Yehova mwe Chitunda?

¹¹ Usolwelo uze Daniele amwene unashindakenya yuma yize iye aliangile kwamba. Kambile ngwenyi: “Zambi ya mwilu . . . , kakuchiza mianangana; kakumika mianangana.” Yamba nawa ngwenyi: “Mwe Chitunda kakuyula mu wanangana wa atu, kakuuhana kuli mweswawo mapala.” (Danie. 2:19-21; 4:17) Shina Yehova hanachiza wanangana kuli umwe nguvulu ni kuuhana kuli mukwo? Ewa, hanauchiza!

12. Ha mashimbu aka Yehova achijile mianangana ha ngunja jo ni kusalakanyisaho akwo? (Tala chizulie.)

¹² Yehova hanasolola ngwo kali Chitunda helu lia manguvulu eswe. Tutalenu yilweza yitatu. Falau kamwesene lamba atu ja Yehova mu Engitu ni kulituna kwatusula ha yisuho yinji. Chipwe chocho, Yehova yatusula atu jenyi ni kunongesa Falau mu Kalunga-lwiji Muchila. (Kutuhu. 14:26-28; Samu 136:15) Mwanangana wa mu Babilonia Beleshazare, kalingile chiwanyino ni kulinangamisa ha ‘kulimika ni Mwene wa mwilu’ nawa ‘yahalisa tuzambi twa prata, ni oru’ chakuhona kuhalisa Yehova. (Danie. 5:22, 23) Alioze, Zambi yakolesa sonyi lunga wacho mukwa-kulinangamisa. “Ufuku uzewene,” Beleshazare yamushiha nawa wanangana wenyi yauhana kuli A-Media ni A-Persia. (Danie. 5:28, 30, 31) Mwanangana Heronde Akripa I wa ku Palestina, kashihile postolo Tiangu, yasa postolo Petulu mu zuwo lia ususu ni nyonga lia kumushiha. Alioze, Yehova kakechele hanga Heronde alinge yize atesele. ‘Mungelo wa Yehova yamulamba,’ chocho yafwa.—Yili. 12:1-5, 21-23.

13. Hana chilweza chinasolola chize Yehova anongesene yizavu ya akwa-kuyula.

¹³ Yehova nawa hanasolola ngwo, kali Chitunda chipwe kuli yizavu ya akwa-kuyula. Iye kanakashila A-Izalele jita, yakumba mianangana A-Kanana 31 ni kutambula chihanda chinene cha Chifuchi cha Chilakenyo.  (Yoshu. 11:4-6, 20; 12:1, 7, 24) Yehova nawa kakwashile A-Izalele kukumba Mwanangana Mben-hadade ni akwa-kuyula akwo 32 a A-Seria.—1 Mia. 20:1, 26-29.

14-15. (a) Yika Mwanangana Nabukanezore ni Dariu ambile hakutwala ku wata wa Yehova? (b) Yika mukwa-kwimba masamu ambile hali Yehova ni hali atu jenyi?

¹⁴ Yehova hanasolola ha yisuho yinji ngwo, iye mwe Chitunda! Muze Mwanangana Nabukanezore wa mu Babilonia alinangamishine ha kuhanjika ha ‘ndundo, ngolo ni uhenya wenyi,’ chakuhona kutayiza ngwenyi Yehova mwe watela uhaliso, chocho Yehova yamuzalwisa. Muze ahindukile, Nabukanezore yahalisa Yehova ni kutayiza ngwenyi, “chiyulo “[cha Yehova] chapwa cha mutolo.” Yamba nawa ngwenyi: Kukushi yoze “makwika kwoko lienyi.” (Danie. 4:30, 33-35) Hanyima lia kusa ushishiko wa Daniele mu cheseko, ni kumulamwina kuli Yehova mu wina wa ndumba, Mwanangana Dariu yamba ngwenyi: “Atu eswe akachikime ni woma kumeso ja Zambi ya Daniele, mumu iye Zambi ya mwono, katwama wa mutolo. Wanangana wenyi kechi kuhasa kuwonwona; chiyulo chenyi kuchichi kasula.”—Danie. 6:7-10, 19-22, 26, 27.

¹⁵ Mukwa-kwimba masamu yasoneka ngwenyi: “Yehova kakupwisa yamokomoko yiyulo yeswe ya mavungu; manyonga eswe a atu kakuapwisa amokomoko.” Yawezela nawa ngwenyi: “Vungu lize lili ni Yehova Zambi yo kuliawaha. Kawaha atu waze iye hatongola akapwe chihinga chenyi.” (Samu 33:10, 12) Pundu lume, yino yili yuma yize muyitukwasa kununga ni kushishika kuli Yehova!

16. Shindakenyo yika mutuhasa kupwa nayo ha “luyinda munene,” nawa mumu liaka? (Tala chizulie.)

¹⁶ Yetu hitwamona yize Yehova alingile kunyima. Mba yika mutuhasa kushimbwila  yize iye makalinga kulutwe? Mutuhasa kupwa ni shindakenyo ngwetu, Yehova makalamwina tuvumbi twenyi ashishika ha “luyinda munene” yoze unakundama. (Mateu 24:21; Danie. 12:1) Iye makachilinga muze chizavu cha akwa-mavungu avuluka ngwo, Ngoke wa Mangoke makalukukila tuvumbi twenyi ashishika hashi heswe. Chipwe ngwe chizavu chino cha akwa-mavungu muchichinga atu eswe 193 waze analingi chihanda ku Nações Unidas, ayo kechi kahiana Chitunda ni tujita twenyi a mu malilu! Yehova kanalakenya ngwenyi: “Mungukasolola unene wami ni usandu wami, ni kulisolola yami mwene kumeso ja mavungu anji. Henaho makanyingika yami nguli Yehova.”—Eze. 38:14-16, 23; Samu 46:10.

17. Yika Mbimbiliya yinambe yize muyikalingiwa kuli mianangana eswe a hashi ni kuli akwa-ululi?

¹⁷ Kulimika cha Ngoke wa Mangoke ni atu ja Yehova, muchikatutwala ndo ku jita ya Armagedone, haze Yehova makanongesa “mianangana a yifuchi yeswe ya hashi.” (Uso. 16:14, 16; 19:19-21) Alioze, “akwa ululi makatungisa chifuchi; atu angunu kumakalindulukamo.”—Yishi. 2:21.

18. Yika Akwa-Kristu anji amwenemwene akulinga, nawa mumu liaka? (Daniele 3:28)

¹⁸ Hakupalika cha miaka, Akwa-Kristu anji amwenemwene kasele utuswilo ni mwono wo mu ponde, mumu lia kuzanga Yehova Mwanangana wo Munene. Ayo kakununga ni kushishika ngwe chize alingile A-Hepreu atatu waze ambilile mu lutengo wa kahia, ni kwalamwina mumu lia kushishika kuli mwe Chitunda.—Tanga Daniele 3:28.

19. Kulita ni Samu 7: 8, kuchi Yehova makapatwila atu jenyi, nawa yika yetu twatamba kulinga haliapwila?

¹⁹ Ndawichi kasonekene hakutwala ku ulemu wa kushishika kuli Zambi, ngwenyi: “Yehova kumakapatwila e atu. Ngupatwile kama Yehova nikulita ni kutuwika chami chize chili muli yami.” (Samu 7:8) Ndawichi yasoneka nawa ngwenyi: “Kutuwika cha mbunge ni ululi yingufunge.” (Samu 25:21) Jila yipema yakumbachilamo mwono wetu yili kushishika kuli Yehova ni kufunga ululi wetu chipwe ngwe mukulingiwa yuma yeswayo! Nyi twachilinga, mutulivwa ngwe mukwa-kwimba masamu yoze wasonekene ngwenyi: “Kawaha waze alulama . . . , waze enda mu shimbi ja Yehova.”—Samu 119:1.