1. Yika tunafupiwa ku “spiritu,” nawa kuchi chino chinakwate ha uwahililo wetu?

 UWAHILILO wamwenemwene, hi chiseke ko chize mutuhasa kwivwa ha amwe mashimbu. Hakutwala ku uwahililo, Yesu yamba ha Longeso lienyi lia ha Mulundu ngwenyi: “Kawaha yiswale mu spiritu.” (Mateu 5:3) Kashika, mutuhasa kupwa ni uwahililo ku mwono wetu weswe. Mu mutapu uka? Yesu kanyingikine ngwenyi, atu kaatangile ni pwila ya ku spiritu, hanji ngwetu ni uhashi wakunyingika ni kuwayila Sakatanga wo, Yehova Zambi. Amu Yehova ali Zambi ya uwahililo, waze akumuwayila no mahasa kuwahilila.—1 Timo. 1:11.

2-3. (a) Kulita ni maliji a Yesu, aya nawa mahasa kupwa ni uwahililo wamwenemwene? (b) Yika mutumona ha mutwe uno, nawa mumu liaka yino yili ni ulemu?

² Shina mutuhasa wika kuwahilila ni twapwa ni mwono upema? Ka. Yesu kambile chuma chakukomwesa, ngwenyi: “Waze akulinyenga”—mumu lia yikola yize akwivwa ha shili yo hanji mumu lia kupwa ni yipikalo yinji ku mwono—mahasa kuwahilila. Kambile nawa ngwenyi, ni ‘waze akuhungumiona mumu ha ululi’ hanji waze ‘akuchoka’ mumu lia kupwa tumbaji twa Kristu, no mahasa kuwahilila. (Mateu 5:4, 10, 11) Mba kuchi mutu mahasa kuwahilila chipwe muze mapalika mu yipikalo yino?

³ Yesu te kanatulongesa ngwenyi, uwahililo wakwiza, hi wika ko muze yuma yeswe yinende kanawa ku mwono wetu. Alioze muze mutusa yuma ya ku spiritu ha chihela chitangu ni muze  mutukundama kuli Zambi. (Tia. 4:8) Kuchi mutuhasa kuchilinga? Ha mutwe uno, mutumonaho yikuma yitatu yize muyitukwasa kuwana uwahililo wamwenemwene.

4. Chikuma chika chitangu chize muchitukwasa kuwana uwahililo wamwenemwene? (Samu 1:1-3)

⁴ CHIKUMA 1: Tunafupiwa kulia cha ku spiritu, mba tupwe ni uwahililo wamwenemwene. Atu ni tushitu kakufupiwa kulia cha ku musunya mba anunge ni mwono. Alioze atu e wika akufupiwa kulia cha ku spiritu. Yetu lume twakufupiwa kulia cha ku spiritu. Kashika Yesu ambile ngwenyi: “Hi ku mbolo wika ko, mutu mapwa ni mwono, alioze ku maliji eswe akutuhuka mu kanwa lia Zambi.” (Mateu 4:4) Hachino, kutwatambile kutwama tangwa lia muwundu chakuhona kuhengwola Liji lia Zambi, Mbimbiliya. Mukwa-kwimba masamu kambile ngwenyi: ‘Kawaha mutu yoze kuwahilila chenyi chili mu shimbi ja Yehova. Nawa yoze wa kutanga shimbi jenyi mwalwa ni ufuku.’—Tanga Samu 1:1-3.

5-6. (a) Yika mutuhasa kulilongesa mu Mbimbiliya? (b) Kuchi kutanga Mbimbiliya muchihasa kutukwasa?

⁵ Mu Mbimbiliya, muli shimbi jize Yehova atuhele mumu lia zango jize jakutukwasa kumona chize mutuhasa kuwahilila ku mwono. Chakutalilaho, twakulilongesa mumu liaka iye atutangile, mumu liaka twatamba kukundama kuli iye, kupwa ni ukonekeno wa shili yetu ni kutalatala cha kulutwe lia matangwa. (Jere. 29:11) Muze twakulilongesa Mbimbiliya ni kunyingika umwenemwene uno, mbunge yetu yakuzala too ni uwahililo!

⁶ Mu Mbimbiliya nawa munazale too ni yiyulo yize muyitukwasa ku mwono wetu wa  tangwa ha tangwa. Muze mutusa mu yitanga yiyulo yacho, mutuhasa kuwana uwahililo wamwenemwene. Nyi ngwe munenganyana mumu lia yipikalo ya ku mwono, muhasa kutanga Liji lia Yehova ni kupukuna ha yize unatange. Yesu kambile ngwenyi: “Kawaha waze akwivwa liji lia Zambi nikulifunga.”—Luka 11:28.

7. Kuchi muhasa kuzachisa kanawa mashimbu waze wakusa hanga utange Mbimbiliya?

⁷ Muze unatange Liji lia Zambi, sako mashimbu hanga unyonge ha yize unatange. Tutalenu chilweza chino. Nyonga ngwe umwe makululiekela kulia chize wazanga chinji. Alioze mumu lia kuchilia kafuji-fuji kuuchi kuhasa kuwana uyeme wa kulia chacho. Muze muhwisa kulia, mba mumona ngwe walianga kafuji-fuji, chocho muliseha ha kuhona kulia makoke-makoke. Shina hiunatange kama Mbimbiliya kafuji-fuji, mba yiuhona kwivwa kanawa sango jize unatange? Nyi chenacho, sako mashimbu hanga utange Mbimbiliya, unyonge ha sango jacho, wivwe maliji ja atu waze anatongolaho ni kupukuna ha yize unatange. Nyi wachilinga, muwahilila chinji.

8. Kuchi “ndungo wamwenemwene” analingi kanawa chiteli chize Yesu amuhele? (Tala nawa maliji mushi lia lifwo.)

⁸ Yesu kasakwile “ndungo wamwenemwene” hanga atwehe kulia cha ku spiritu ha shimbu lialita. Yetu tukwete kulia chinji cha ku spiritu. * (Mateu 24:45) Kulia cheswe chize tuli nacho, chahiana ulemu chili Mbimbiliya. (1 Tesa. 2:13) Kulia chino chakutukwasa kumona mutapu wa kunyonga cha Yehova. Kashika twakutanga Kaposhi wa Kutalila, Laulenu! ni mikanda yikwo ha site jw.org. Twakulilulieka hanga tuye ku kukunguluka ni kutala JW Broadcasting^® ha hita kakweji. Muze twakusa mashimbu hanga tulie kulia chino cha ku spiritu, twakuhasa kuheta ha chikuma chamuchiali chize chakutwaha uwahililo wamwenemwene.

9. Chikuma chika chamuchiali chize chakutukwasa kupwa ni uwahililo wamwenemwene?

⁹ CHIKUMA 2: Mba tupwe ni uwahililo wamwenemwene, twatamba kutwama kulita ni shimbi ja Yehova. Mukwa-kwimba masamu kasonekene ngwenyi: “Kawaha mweswawo wakuvwila woma Yehova; yoze wakwenda mu majila jenyi.” (Samu 128:1) Kuvwila woma Yehova yika chinalumbunuka? Chinalumbunuka kuvumbika Yehova ni mbunge yeswe ha kulinga yuma yize kuyishi kumuvwisa yinyengo. (Yishi. 16:6) Kashika twakusa tachi hanga twononokene shimbi jenyi hakutwala ku chipi ni chipema. (2 Kori. 7:1) Mutuwahilila chinji ni twononokena Yehova ha kulinga yize iye akuzanga ni kuvwila lwaji yuma yize keshi kuzanga.—Samu 37:27; 97:10; Roma 12:9.

10. Kulita ni A-Roma 12:2 chiteli chika tuli nacho?

¹⁰ Tanga A-Roma 12:2. Mutu umwe mahasa kunyingika ngwenyi, Yehova kali ni ulite wa kutesa chipi ni chipema. Alioze mutu wacho katamba nawa kutayiza shimbi ja Yehova. Chakutalilaho, mutu umwe mahasa kunyingika ngwo, nguvulu kali ni ulite wa kutesa fuji jize mashinyi atamba kwenda najo mu tapalo. Alioze hanji iye kechi kuzanga kwononokena shimbi jacho. Hachino, iye maputuka kwendesa mashinyi ni fuji jinji kulita ni chize anazange. Yitanga yetu ye muyisolola ngwo twakutayiza ngwetu, kwononokena shimbi ja Yehova yili jila yipema ya kumbachilamo mwono wetu. (Yishi. 12:28) Ndawichi neye che te akunyonga, yamba hakutwala kuli Yehova ngwenyi: “Mukangulweza ye jila ya mwono. Kumeso je kwatwama chiseke cheswe. Ku chindume che kwatwama yiwape ya mutolo.”—Samu 16:11.

11-12. (a) Muze tunapalika mu umwe kapinda hanji tunanenganyana, ha yika twatamba kukeya? (b) Kuchi A-Fwilipu 4:8 mutukwasa kusakula kanawa yiheho?

 ¹¹ Ha yisuho yimwe, yetu eswe twakupalika mu kapinda hanji kunenganyana. Muze yino yakulingiwa, twakufupa kulinga yimwe hanga tuchine kulihulikila ha yipikalo yetu. Kulinga chino chapwa chipema, alioze twatamba kukeya hanga tuchine kulinga yuma yize Yehova keshi kuzanga.—Efwe. 5:10-12, 15-17.

¹² Mukanda uze postolo Paulu asonekenene A-Fwilipu wakolwezele Akwa-Kristu hanga anunge ni kunyonga ha “yeswayo ya ululi, . . . yeswayo yitoma, . . . yeswayo yatela kufwila, [ni] yeswayo ya lufuma mupema.” (Tanga A-Fwilipu 4:8.) Kwamba umwenemwene, Paulu kakaasonekenene hakutwala ku yiheho. Alioze yuma yize asonekene yatamba kukwata ha yiheho yize mutulinga hanji mututala. Fupa kulinga chino: Muze kanda usakula “miaso,” “yinema,” “mikanda” hanji “yiheho,” tala nyi yinalite ni yitanga yize twatanga ha A-Fwilipu. Kulinga chino, muchikukwasa kumona nyi Zambi kakuzanga yiheho yize wasakula nyi ka. Twatamba kumbata mwono wetu kulita ni shimbi ja Yehova. (Samu 119:1-3) Nyi twachilinga, mutupwa ni mbunge yitoma, mba mutuheta ha chikuma chamuchitatu chize muchitukwasa kuwana uwahililo wamwenemwene.—Yili. 23:1.

13. Chikuma chika chamuchitatu chize muchitukwasa kuwana uwahililo wamwenemwene? (Yoano 4:23, 24)

¹³ CHIKUMA 3: Sako shindakenyo ngwe uwayilo we kuli Yehova uli ha chihela chitangu. Yehova kali Sakatanga yetu nawa katela uwayilo wetu. (Uso. 4:11; 14:6, 7) Kashika, chuma chilemu ku mwono wetu, chatamba kupwa kuwayila Yehova mu jila yalita “ni spiritu ni umwenemwene.” (Tanga Yoano 4:23, 24.) Chino chinalumbunuka kutayiza hanga uwayilo wetu ausongwele ni ukwaso wa spiritu yisandu ya Zambi, kulita ni umwenemwene uze uli mu Mbimbiliya. Kuwayila Yehova chatamba kupwa ha chihela chitangu ku mwono wetu, chipwe ngwe twatwama mu chifuchi chize mulimo wetu uli wakukanjisa. Unji wa mandumbu jetu kuhiana 100 kali mu mazuwo a ususu mumu lia kupwa Yela ja Yehova. * Chipwe chocho, ayo kakuwahilila ha kulinga yize mahasa hanga alembe, kulilongesa ni kwambulwila akwo hakutwala kuli Zambi ni Wanangana wenyi. Chipwe muze akutwamba hanji kutuhungumiona, twakuwahilila ha kunyingika ngwetu Yehova kali hamwe ni yetu nawa makatuwahisa.—Tia. 1:12; 1 Petu. 4:14.

14. Yika yalingiwile kuli umwe ndumbu ku Tajiquistão, nawa mumu liaka?

¹⁴ Sango ja mandumbu jetu jinasola ngwo, yikuma yitatu yize twalilongesa yakutukwasa kupwa ni uwahililo wamwenemwene, chipwe ngwe mutupalika mu yuma yeswayo. Tala yize yalingiwile kuli ndumbu Jovidon wa miaka 19 ku Tajiquistão yoze walitunyine kupwa swalale. Mumu lia chino, ha tangwa 4 Outubro 2019, yamusa mu zuwo lia ususu ha amwe tukweji ni kumupatwila ngwe chingalwe. Upi uze amulingile yaunyingika mu yifuchi yinji. Kamulambile kuli maswalale, yamushinjila hanga azale mazalo ja maswalale ni kumulweza hanga alinge chilakenyo cha kupwa swalale. Kulutwe lia chino, yamuhisa ni kumutwala mu chilombo kuze apwile ni kulinga milimo yikalu. Hanyima, nguvulu yamukonekena ni kumutusula. Chipwe ngwe kapalikile  mu yuma yeswayi, nihindu Jovidon kanungine ni kushishika ni kuwahilila. Kuchi ahashile kuchilinga? Kahashile kuchilinga mumu te kakulia kanawa ku spiritu.

15. Kuchi ndumbu Jovidon te akulia ku spiritu muze apwile mu zuwo lia ususu?

¹⁵ Muze apwile mu zuwo lia ususu, Jovidon te kakulia ku spiritu, chipwe ngwe kakapwile ni Mbimbiliya ni mikanda yetu. Kuchi ahashile kuchilinga? Mandumbu waze apwile ni kumutwalila kulia te kakumusonekena chisoneko cha ha tangwa ha sakola yakulanjila kulia. Hachino, iye te kakuhasa kutanga Mbimbiliya tangwa ha tangwa ni kuyipukuna. Hanyima lia kumutusula mu zuwo lia ususu, yahana chiyulo kuli waze te kanda apalika mu yeseko ya ku ufulielo, ngwenyi: “Wano kali mashimbu a kuzachisa utuswilo wenu hanga nwokese yinyingi yenu ha kutanga Mbimbiliya ni mikanda yetu.”

16. Ha yuma yika ndumbu Jovidon alihulikilile?

¹⁶ Ndumbwetu kasele tachi hanga anunge ni kutwama kulita ni shimbi ja Yehova. Shimbu alihulikile ni kunyonga yuma yipi, iye yalihulikila hali Yehova ni ha yuma yize akutayiza. Jovidon kapwile ni kukomoka upeme wa yitangiwa ya Yehova. Hita tangwa muze apwile ni kuhinduka te kakwivwa tujila memba. Ha ufuku  te kakukomoka kakweji ni tutongonoshi. Iye yamba ngwenyi: “Napwile ni kutakama ni kuwahilila ha yawana yino ya Yehova.” Muze twakusakwilila Yehova ha yuma ya kumusunya ni ya ku spiritu yize akutwaha, twakupwa ni uwahililo wamwenemwene. Uwahililo wacho muhasa kutwaha tachi hanga tunyongonone.

17. Kuchi 1 Petulu 1:6, 7 muhasa kukwasa ndumbu yoze unapalika mu yipikalo ngwe ya Jovidon apalikile?

¹⁷ Jovidon kasele uwayilo wa Yehova ha chihela chitangu. Iye kanyingikene ngwenyi, chili chilemu kununga ni kushishika kuli Zambi wamwenemwene. Yesu kambile ngwenyi: “Ukawayile Mwene Zambi ye, Iye wika ukamulingile.” (Luka 4:8) Yilolo ni maswalale kazangile hanga ndumbu Jovidon eche uwayilo wenyi. Shimbu achilinge, iye te kakulemba mwalwa ni ufuku ni kwita Yehova amukwase hanga achine kulikala ufulielo wenyi. Chipwe ngwe kapalikile mu yipikalo, nihindu Jovidon kanungine ni kushishika. Chipwe ngwe kamuchijile ku zuwo lio, yamulamba ni kumusa mu zuwo lia ususu, alioze kazuka chuma chize kakapwile nacho, kupwa ni ufulielo uze wapalika mu cheseko.—Tanga 1 Petulu 1:6, 7.

18. Yika tunafupiwa kulinga mba tupwe ni uwahililo wamwenemwene?

¹⁸ Yehova kananyingika yize tunafupiwa mba tupwe ni uwahililo wamwenemwene. Kashika, nyi mutukaula yikuma yitatu yize yakuneha uwahililo wamwenemwene, ni yetu mutuwahilila chipwe ngwe tunapalika mu yipikalo. Hachino ni yetu mutuhasa kwamba ngwetu: “Kawaha atu aze akwete Zambi yo Yehova.”—Samu 144:15.