1. Mumu liaka kutushi kukomoka ha kumona atu keshi kulijikijila umwe ni mukwo?

 MU CHIFUCHI chino anayula kuli Satana, atu keshi kulijikijila chinji. Mumu liaka? Mumu lia yize akumona hanji akulinga akwa-mafwefwe, mangana a mayingeleja ni akwa-mingoso. Manyonga jacho kakukwata nawa hali enyembo jetu, masepa, chipwe ni hali asoko jetu. Yino kuyishi kutukomwesa, mumu Mbimbiliya hiyinambe ngwo: “Ha matangwa a kusula . . . , atu kumakapwa . . . akwa luchisa, . . . yilamikiji, . . . akwa kuhandukulula.” Mu maliji akwo, atu te masolola yitanga ya Satana, mutu yoze katambile kumujikijila.—2 Timo. 3:1-4; 2 Kori. 4:4.

2. (a) Yetu Akwa-Kristu aya twakujikijila? (b) Yika amwe akulihula?

² Yetu Akwa-Kristu, kutwalifwile ni akwa-hashi mumu twakujikijila muli Yehova, Yesu ni ha Mbimbiliya. Mumu liaka? Mumu tuli ni shindakenyo ngwetu, Yehova kakutuzanga nawa kechi keza ‘kutwehuka’ nilimwe tangwa. (Samu 9:10; Jere. 17:7, 8) Chikwo nawa, twakujikijila hali Yesu mumu katufwilile. (1 Petu. 3:18) Twakujikijila ha Mbimbiliya mumu muli usongwelo uze wakutukwasa mashimbu eswe. (2 Timo. 3:16, 17) Amwe kakulihula ngwo, shina mutuhasa kujikijila mandumbu jetu a mu chikungulwila? Yino ye mutulilongesa ha mutwe uno.

3. Yika twakuyuka ha kupwa mu ululikiso wa Yehova? (Marku 10:29, 30)

³ Yehova hanatukoka mu ululikiso wenyi hanga tulinge chihanda cha usoko wenyi wa hashi weswe. Kulinga chihanda cha usoko wa Yehova chili chiwape chinene nawa chakutuyukisa chinji! (Tanga Marku 10:29, 30.) Tuli ni mandumbu hashi heswe akuzanga Yehova ngwe yetu, nawa akusa tachi hanga akaule shimbi jenyi. Chipwe ngwe twakolelele ku chifuchi cheka, tuli ni ndako jeka, nawa twakuhanjika limi lialisa, nihindu  twakulizanga chipwe muze twakuliwana ha chisuho chitangu. Chikwo nawa, twakuzanga kuwayila no hamuwika Tata yetu wa mu malilu.—Samu 133:1.

4. Mumu liaka tunafupiwa ukwaso wa mandumbu ni mapangi jetu?

⁴ Wano kali mashimbu waze tunafupiwa chinji kupwa hamwe ni mandumbu jetu kuhiana kunyima. Ha mashimbu amwe, ayo kakutukwasa hanga tumone chize mutumbata yiteli yetu. (Roma 15:1; Ngala. 6:2) Ayo nawa kakutukolweza hanga tununge ni kulinga mulimo wa Yehova ni kutukwasa tukole ku ufulielo. (1 Tesa. 5:11; Hepre. 10:23-25) Uchinyonga yize te muyilingiwa kuli yetu nyi kukushi chikungulwila chize chakutukwasa hanga tulimike ni Satana ni hashi henyi hapi. Kwasala hakehe, Satana ni atu jenyi malimika ni yetu. Alioze ha mashimbu jacho, mutukawahilila chinji ha kupwa ni ukwaso wa mandumbu ni mapangi jetu!

5. Mumu liaka mashimbu amwe muchihasa kupwa chikalu kujikijila hali mandumbu jetu?

⁵ Alioze, amwe chakwakalila kujikijila muli mandumbu jo mumu hanji umwe kalingile yimwe kuyalitele hanji kakamanunwine yize alakenyene. Hanji umwe mu chikungulwila kalingile hanji kwamba chimwe chize chaalemekene ku mbunge. Nyi yino muyilingiwa, muchihasa kupwa chikalu kujikijila hali akwetu. Yika muyihasa kutukwasa mba tujikijile muli mandumbu?

6. Kuchi zango mulihasa kutukwasa kujikijila muli mandumbu jetu? (1 A-Korindu 13:4-8)

⁶ Zango liakutukwasa kulijikijila umwe ni mukwo. Mukanda 1 A-Korindu kapitulu 13, unalumbununa yimwe yikuma ya zango yize muyitukwasa hanga tujikijile hali mandumbu jetu. (Tanga 1 A-Korindu 13:4-8.) Chakutalilaho, versu 4 yinambe ngwo: “Zango  uhomboloji lili nawo, utu lili nawo.” Yehova kapwa chihomboloji kuli yetu chipwe muze twakuvulumuna. Chochene, twatamba kupwa yihomboloji kuli mandumbu jetu chipwe muze matwamba hanji matulinga yuma yize muyitulemeka ku mbunge. Versu 5 yinambe ngwo: “[Zango] kulishi kutenuka nikawashi, kulishi kushinginyeka yipi.” Kutwazangile kununga ni “kushinginyeka yipi,” hanji ngwetu kwiwuluka yuma yipi yize mandumbu jetu atulingile. Mukanda wa Chilumbununyi 7:9 unambe ngwo: “Kanda ulipupula kutenuka mu mbunge.” Chili chilemu kukaula maliji waze ali ha A-Efwesu 4:26, anambe ngwo: “Kanda nufunga utenu wenu ndo kunjila cha tangwa”!

7. Kuchi shimbi yize yili ha Mateu 7:1-5 yinatukwase kujikijila hali mandumbu jetu?

⁷ Chuma chikwo chize muchitukwasa kujikijila muli mandumbu jetu, chili kwamona ngwe chize Yehova akwamona. Yehova kakwazanga nawa keshi kulihulikila ha uhenge wo. Ni yetu che twatamba kulinga. (Samu 130:3) Shimbu tulihulikile ha yitanga yo yipi, tusenu tachi hanga tumone yitanga yo yipema ni kunyonga ha yuma yipema yize mahasa kulinga. (Tanga Mateu 7:1-5.) Twakufuliela ngwetu ayo keshi kuzanga kutulinga yuma yipi chipwe kutulemeka ku mbunge mumu zango “kuliakufuliela yuma yeswe.” (1 Kori. 13:7) Maliji wano kalumbunukine ngwo, Yehova kanashimbwila hanga tujikijile atu waze katelele, alioze kanalumbunuka ngwo twatamba kujikijila hali atu waze akusolola ngwo, mutuhasa kwajikijila. *

8. Yika muyitukwasa mba tujikijile hali mandumbu jetu?

⁸ Ujikijilo wapwa ngwe vumbi, twatamba kusa tachi mba akwetu atujikijile. Alioze chino chakumbata mashimbu. Yika muyikukwasa mba ujikijile hali mandumbu je? Anyingike kanawa. Muhasa kuchilinga ha kuhanjika no muze kukunguluka kanda chiputuka ni muze muchihwa. Sako mashimbu hanga wambujole no. Pwako chihomboloji nawa aehe mashimbu hanga asolole ngwo kali atu waze muhasa kujikijila. Alioze ku uputukilo watamba kusakula yuma yize mulweza mutu yoze kanda uchinyingika kanawa. Muze usepa wenu muuya ni kukola, hanji mba mumulweza yuma ya ku mwono we. (Luka 16:10) Yika mulinga nyi umwe ndumbu malinga yuma yize muyikutwala hanga uhone kumujikijila? Kanda ulipupula kupihisa usepa wenu, mwehe amwe mashimbu. Nawa kanda wecha yitanga ya amwe yikutwale uhone kujikijila hali mandumbu je. Ha chikuma chino, mutuhengwola yilweza ya amwe tuvumbi ashishika a Yehova waze anakajikijila muli akwo, chipwe ngwe amwe kalingile yuma yize kuyalitele.

9. (a) Kuchi Hana anungine ni kujikijila ha ululikiso wa Yehova chipwe ngwe amwe waze te akwete yiteli kakalingile yuma yalita? (b) Yika chilweza cha Hana chinatulongesa hakutwala ku kujikijila mandumbu waze akwete yiteli? (Tala chizulie.)

⁹ Shina umwe ndumbu yoze ukwete yiteli hanakwambe chimwe chuma chize chakulemekene ku mbunge? Nyi chocho, chilweza cha Hana muchihasa kukukwasa. Ha mashimbu jacho, Eli kapwile Sasendote wa Lutwe mu Izalele, mutu yoze wapwile ni kusongwela uwayilo wa Yehova. Alioze, asoko jenyi kakapwile chilweza chipema. Ana jenyi waze no apwile asasendote te kakulinga upangala, alioze tato kapwile ni kulengulula yitanga yo. Yehova kakachijile Eli ha usasendote ha shimbu lizeliene. Hana kakechele kuya ni kuwayila  ku tabernakulu mumu ngwo, Eli mwe wapwile Sasendote wa Lutwe. Muze Eli amwene Hana kanalembe nyi chinyengo ku mbunge, yamwamba ngwenyi kanazengewa. Shimbu ahwime mbunge hanga anyingike yize te yinalingiwa kuli iye, Eli yalipupula ha kumwamba yuma yize kuyalitele. (1 Samue. 1:12-16) Chipwe chocho, Hana yalakenya ngwenyi nyi masema mwana wa lunga te mamutwala ku tabernakulu kuze mapwa mu ufunge wa Eli. (1 Samue. 1:11) Shina yuma yipi yize ana ja Eli apwile ni kulinga yafupiwile kuyilulieka? Ewa, Yehova kaahele fumbo. (1 Samue. 4:17) Alioze, yawayisa Hana ha kumwaha mwana wa lunga, Samuele.—1 Samue. 1:17-20.

10. Kuchi Ndawichi anungine ni kujikijila muli akwo chipwe ngwe amwe kamulingile yuma yipi?

¹⁰ Shina umwe sepa lie hanakulingi yuma yize kuyalitele? Nyi chenacho, tala yize muhasa kulilongesa ha chilweza cha Ndawichi. Umwe wa kuli masepa ja Ndawichi jina lienyi te Ahitofele. Alioze muze Absalome, mwana wa Ndawichi afupile kutambula wanangana wa tato, Ahitofele yalichinga ha uhulia wenyi. Chino kota chevwishile Ndawichi yikola yinji ku mbunge ha kumona mwana ni sepa lienyi mamwehuka! Chipwe chocho, yize yalingiwileko kuyakatwalile Ndawichi hanga ahone kujikijila hali atu akwo. Iye yanunga ni kujikijila hali sepa lienyi mukwo wa shishika Hushai, yoze walitunyine kulichinga ha uhulia wacho. Kwapwile yuma yinji yize yatwalile Ndawichi kujikijila hali Hushai. Hushai kasolwele ngwo, kali sepa mupema, muze asele mwono wenyi mu ponde hanga akwase Ndawichi.—2 Samue. 17:1-16.

11. Kuchi umwe kavumbi ka Nabale asolwele ngwo mahasa kujikijila hali akwo?

¹¹ Tutalenu chilweza cha umwe kavumbi ka Nabale. Ndawichi ni atu jenyi kafungile tuvumbi a umwe Ka-Izalele yoze te avuluka ngwo, Nabale. Ha kupalika cha amwe mashimbu, Ndawichi yeta Nabale hanga ahane yuma ya kulia kuli atu jenyi, yeswayo te mahasa kwaha. Muze Nabale alitunyine, Ndawichi yevwa uli, chocho yakatuka hanga aye ni kushiha malunga eswe a ku zuwo lia Nabale. Umwe kavumbi ka Nabale yalweza lusango wacho kuli Abigale, pwo lia Nabale. Amu apwile ku zuwo lia Nabale, iye kanyingikine  ngwenyi Abigale te malamwina mwono wenyi. Shimbu achine, yafuliela ngwenyi Abigale te malulieka yuma. Iye kasolwele ujikijilo wacho, mumu Abigale te kamunyingika ngwo pwo wa mana. Yize yalingiwile kulutwe, yasolwele ngwo te chinalite kujikijila muli Abigale. Ni hamu lieswe, Abigale yakwasa Ndawichi hanga achine kumwanga manyinga. (1 Samue. 25:2-35) Abigale kafulielele ngwenyi, Ndawichi te malumuna nyonga lienyi.

12. Kuchi Yesu asolwele ngwo te kakujikijila hali tumbaji twenyi chipwe ngwe ayo kapwile ni kuhengesa?

¹² Yesu kanakajikijila hali tumbaji twenyi chipwe ngwe ayo kapwile ni kuhengesa. (Yoa. 15:15, 16) Tiangu ni Yoano etele Yesu hanga aehele chihela chilemu mu Wanangana, Yesu kakaamwene ngwe akwa-kuzo hanji kwamona ngwe katelele kupwa apostolo. (Marku 10:35-40) Kulutwe, ha ufuku uze akwachile Yesu tumbaji twenyi eswe yamuhichika ukawenyi. (Mateu 26:56) Alioze, Yesu kakechele kwafuliela. Iye kanyingikine kanawa uhenge wo, chipwe chocho yanunga ni kwazanga “ndo ku songo.” (Yoa. 13:1) Muze amuhindwishile, Yesu yahana chiteli chilemu kuli apostolo jenyi ashishika 11 hanga alinge mulimo wa kutayisa tumbaji ni kufunga mapanga jenyi. (Mateu 28:19, 20; Yoa. 21:15-17) Ujikijilo wenyi hali malunga wano yihenge kuwakalitokelele. Ayo eswe kanungine ni kushishika ndo ku kufwa cho. Chochene, Hana, Ndawichi, kavumbi ka Nabale, Abigale ni Yesu kahichikile yilweza yipema ya kujikijila hali akwo.

13. Yika muyihasa kutukwika kujikijila muli akwetu?

¹³ Shina hi unalweze umwe ndumbu sango je mba hanyima yiunyingika ngwe kajilweza atu akwo? Chino muchihasa kupihisa ujikijilo uze wapwile nawo hali ndumbu wacho. Tangwa limwe, umwe pangi yalweza mukulwana umwe sango ja ku mwono wenyi. Mukwachako, pwo lia mukulwana wacho yasanyika pangi hanga amutakamise. Chino yichisolola ngwo, mukwo-lunga kamulwezele sango ja pangi wacho. Kwamba pundu, ujikijilo wa pangi yono hali mukulwana wacho wapwile mu ponde. Chipwe chocho, pangi yafupa ukwaso kuli mukulwana mukwo, yoze wamukwashile kujikijila cheka muli makulwana.

14. Yika yakwashile umwe ndumbu kujikijila nawa muli mandumbu jenyi?

¹⁴ Umwe ndumbu kapwile ni kuvwila uli makulwana aali ha mashimbu anji. Chino yichimutwala ahone kwajikijila. Alioze, yaputuka kunyonga ha maliji waze ambile umwe ndumbu yoze iye te akuvumbika chinji. Maliji jacho kanambe ngwo: “Satana mwe mukwa-kole yetu, hi mandumbu jetu ko.” Ndumbwetu yanyonga chinji ha maliji jacho ni ha yize te atamba kulinga. Hanyima lia kulemba ni kwita ukwaso kuli Yehova, iye yalivwashana ni makulwana eswe aali.

15. Mumu liaka kujikijila cheka muli mandumbu muchihasa kumbata mashimbu? Hana chilweza.

¹⁵ Shina hiunatokesa chimwe chiteli mu chikungulwila? Chino chakuneha yikola yinji. Grete ni naye kapwile Yela ja Yehova ashishika mu Alemanha Nazista, muze mulimo wetu wapwile wakukanjisa shimbu Jita Yamuchiali ya Hashi Heswe te kanda yiputuka. Grete kazangile chinji mulimo wenyi wakulingila mandumbu copia ja Kaposhi wa Kutalila. Alioze, muze mandumbu anyingikine ngwo tato kakulimika ni umwenemwene, yamutambula chiteli chacho, mumu kevwile woma ngwo tato mahasa kumwanga sango ja mandumbu kuli akwa-kole jetu. Hi yino wika ko yalingiwile kuli Grete. Ha mashimbu a Jita Yamuchiali ya Hashi Heswe, mandumbu te keshi kuhana tuposhi kuli Grete ni naye, nawa te keshi  kuhanjika no. Chino chevwishile Grete yikola yinji ku mbunge, chocho yikupalika mashimbu anji mba akonekene mandumbu jacho ni kwajikijila nawa. Ha kupalika cha mashimbu, iye yanyingika ngwenyi kota Yehova hanaakonekena, kashika ni yami natamba kuchilinga. *

16. Mumu liaka twatamba kusa tachi hanga tujikijile nawa muli mandumbu jetu?

¹⁶ Nyi hiunapalika mu chilweza ngwe cha Grete, sako tachi hanga ujikijile nawa muli mandumbu je. Chino muchihasa kumbata mashimbu, alioze tachi jize musa kujishi kulitokela. Tutalenu chimwe chilweza. Nyi twalile yimwe yize yatuyinjishile, mutuhasa kukanyama ha yize mutulia. Alioze, chino kuchichi kututwala hanga tweche kulia. Chizechene nawa, kutwatambile kwecha hanga yuma yipi yize atulingile yitutwale tuhone kujikijila muli mandumbu jetu, waze tunanyingika ngwetu no kali yihenge. Nyi mutujikijila nawa muli mandumbu jetu, mutuwahilila ni kulihulikila ha yize mutuhasa kulinga hanga mandumbu mu chikungulwila chetu apwe ni kulijikijila umwe ni mukwo.

17. Mumu liaka kujikijila akwetu chili chilemu, nawa yika mutulilongesa ha mutwe uze muuhataho?

¹⁷ Mu chifuchi chino anayulu kuli Satana, atu anji keshi kulijikijila. Alioze yetu mutuhasa kujikijila mandumbu jetu, mumu twakwazanga no kakutuzanga. Ujikijilo wacho wakutwaha sambukila ni kulinunga chize chakutufunga haliapwila nawa muchikatufunga kulutwe muze mutukapalika mu yuma yikalu. Yika mulinga nyi umwe ndumbu kakulingile yuma yipi, mba hi kuushi kumujikijila nawa? Mona yuma yacho ngwe chize Yehova akuyimona, kaula shimbi ja mu Mbimbiliya, zanga mandumbu je nawa lilongese ha yilweza ya mu Mbimbiliya. Muhasa kuvulama yuma yipi yize akulingile ni kujikijila cheka muli mandumbu je. Nyi wachilinga, muopwa ni masepa anji waze ‘akulalaminya kuhiana yoze wasemuka nenyi.’ (Yishi. 18:24) Alioze, chikuma cha kujikijila chinatale hali yetu eswe, chekwamba, akwetu no katamba kunyingika ngwo tuli atu waze mahasa kujikijila. Kashika, mutwe uze muuhataho, muutukwasa tumone chize mutuhasa kupwa atu waze mandumbu jetu majikijila.