MUTWE WAKULILONGESA 40
‘Makatewulwila Anji ku Ululi’
“Waze matewulwila anji ku ululi makapanguka ngwe matongonoshi ndo ku miaka yeswe ya mutolo.”—DANIE. 12:3.
MWASO 151 Makasanyika
CHIKUMA CHILEMU *
1. Yuma yika yipema muyikalingiwa ha Kanunu ka Miaka ya Kuyula cha Yesu?
HIUNANYONGO chize hashi muhakapwa muze atu waze hanafu maputuka kwahindwisa ha Kanunu ka Miaka ya Kuyula cha Yesu? Kwamba pundu, makapwa mashimbu apema chinji. Waze eswe hanafwisa atu kakwevwila usona unji nawa kanazange kwamona cheka. Yehova neye che akwivwa. (Yombi 14:15) Muchikapema chinji kupwa hamwe ni masepa ni asoko jetu waze hanafu. Ngwe chize twamona ha mutwe wapalika, “akwa ululi” waze majina jo hanaasoneka mu mukanda wa mwono, makapwa ni “uhindukilo wa mwono.” (Yili. 24:15; Yoa. 5:29) Muchihasa kupwa ngwe atu waze hitunafwisa malianga kwahindwisa hanyima lia Armagedone. * Chikwo nawa, makahindwisa “yihenge,” atu waze kakapwile ni uhashi wa kunyingika Yehova ni kumulingila ni ushishiko weswe, shimbu te kanda achifwa. Atu jacho makapwa ni “uhindukilo wa upatwilo.”
2-3. (a) Kulita ni Izaia 11:9, 10, yika muyikalingiwa hashi heswe? (b) Yika mutumona ha mutwe uno?
2 Atu eswe waze makahindwisa makafupiwa kwalongesa. (Iza. 26:9; 61:11) Kashika, mukukapwa katalilo munene wa malongeso yoze kanda achilingiwa hano hashi. (Tanga Izaia 11:9, 10.) Mumu liaka? Mumu yihenge waze makahindwisa makafupiwa kulilongesa hakutwala kuli Yesu, Wanangana wa Zambi, ukuule, jina lia Yehova ni kunyingika mumu liaka Yehova mwe wika watela kuyula. Chipwe akwa-ululi no makafupiwa kwalongesa yuma yaha hakutwala ku upale wa Yehova hano hashi yize akusolwela atu jenyi hakehe-hakehe. Atu amwe waze alingilile Yehova ni ushishiko weswe kafwile muze Mbimbiliya te kanda yihwa kusoneka. Kashika, chipwe yihenge ni akwa-ululi eswe makafupiwa kulilongesa yuma yinji.
3 Ha mutwe uno, mutumonaho makumbululo a yihula yino: Kuchi katalilo yono wa kulongesa atu hashi heswe makapwa? Kuchi katalilo yono anatale ha kusoneka cha majina ja atu mu mukanda wa mwono? Makumbululo a yihula yino kali alemu chinji kuli yetu. Ngwe chize mutumona, uprofeto umwe mu mukanda wa Daniele ni wa Usolwelo, muutukwasa kunyingika kanawa yize muyikalingiwa muze afu makaahindwisa. Alioze chitangu, tutalenu yuma yize muyikalingiwa yili mu uprofeto wa Daniele 12:1, 2.
“WAZE AKUPOMBA TULO MU MAVU . . . KUMAKAHINDUKA”
4-5. Yika mukanda wa Daniele 12:1 unasolola hakutwala ku yize muyikalingiwa ha matangwa a kusula?
4 Tanga Daniele 12:1. Mukanda wa Daniele unasolola chize yuma muyikalingiwa ha matangwa a kusula. Chakutalilaho, Daniele 12:1 unambe ngwo Mikele, chekwamba Yesu Kristu ‘yoze wakufunga atu [ja Zambi] makamana.’ Uprofeto uno waputukile kumanunuka ha mwaka 1914 muze Yesu aputukile kuyula mu Wanangana wa Zambi.
5 Alioze Daniele kambile nawa ngwenyi, Yesu “makamana” ha “mwaka wa lamba limwe, [lize] kanda lisoloka chize ku uputukilo wa vungu lino ndo ku miaka yize.” ‘Mwaka uno wa lamba’ uli “luyinda munene” yoze anatongola ha Mateu 24:21. Yesu kanamane hanga akalile atu ja Zambi, chino makachilinga kusongo lia mwaka wa lamba, chekwamba ha Armagedone. Mukanda wa Usolwelo unatongola atu jacho ngwo, ‘mbunga yinene ya waze anatuhuka mu luyinda munene.’—Uso. 7:9, 14.
6. Yika muyikalingiwa muze mbunga yinene muyikapalika ha luyinda munene? Lumbununa. (Hakutwala ku uhindukilo wa hano hashi, tala nawa “Yihula ya Waze Akutanga Mikanda Yetu” mu Kaposhi yono.)
6 Tanga Daniele 12:2. Yika muyikalingiwa muze mbunga yinene muyikapalika ha mwaka uno wa lamba? Uprofeto uno kuushi kuhanjika ha uhindukilo wa tuvumbi twa Zambi akuwayisa uze unalingiwa ha matangwa wano a kusula, ngwe chize twapwile ni kunyonga kunyima. * Alioze, unahanjika ha uhindukilo wa afu uze muukalingiwa mu chifuchi chaha. Mumu liaka tunambe chocho? Liji “mavu” hanji fufuta kanalizachisa nawa ha Yombi 17:16 ngwe “muma mwa afu.” Yino yinasolola ngwo, mukanda wa Daniele 12:2 unahanjika ha uhindukilo wa afu uze muukalingiwa hanyima lia Armagedone.
7. (a) Mu mutapu uka amwe makaahindwisa “ku mwono wa mutolo”? (b) Mumu liaka ‘uhindukilo uno wahiana’?
7 Yika mukanda wa Daniele 12:2 unalumbunuka muze unambe ngwo, amwe makaahindwisa “ku mwono wa mutolo”? Maliji wano kanalumbunuka ngwo, ha kanunu ka miaka waze makahindwisa makafupiwa kununga ni kulilongesa hakutwala kuli Yehova ni Yesu ni kwononokena, mba akatambule mwono wa mutolo. Kashika, chipwe akwa-ululi waze makahindwisa makafupiwa kusa tachi mba akazuke mwono wa mutolo. (Yoa. 17:3) Uno mukapwa “uhindukilo wahiana” uze walingiwile kunyima. (Hepre. 11:35) Mumu liaka? Mumu atu waze ahindwishile kunyima kafwile cheka.
8. Kuhindwisa amwe ku “sonyi ni ku sau lia mutolo” yika chinalumbunuka?
8 Alioze hi eswe ko waze makahindwisa makatayiza malongeso a Yehova. Uprofeto wa Daniele unambe ngwo, amwe makaahindwisa ku “sonyi ni ku sau lia mutolo.” Mumu lia yitanga ya uhulia yize makasolola, atu jacho majina jo kechi kaasoneka mu mukanda wa mwono nawa kechi kazuka mwono wa mutolo. Alioze makatambula “sau lia mutolo,” chekwamba makaanongesa. Kashika, mukanda wa Daniele 12:2 unahanjika ha yize mukalingiwa kuli waze makahindwisa kulita ni yize makalinga hanyima lia kwahindwisa. * (Uso. 20:12) Amwe makazuka mwono wa mutolo; akwo ka.
‘MAKATEWULWILA ANJI KU ULULI’
9-10. Aya ‘makapanguka ngwe pangu lia mwilu,’ nawa ha shimbu lika chino muchikalingiwa?
9 Tanga Daniele 12:3. Yika nawa muyikalingiwa hanyima lia “mwaka wa lamba”? Kuchizako yize twashimutwina ha Daniele 12:2, versu 3 yinahanjika ha chuma chikwo chize muchikalingiwa hanyima lia luyinda munene.
10 Aya waze ‘makapanguka ngwe pangu lia mwilu’? Mukanda wa Mateu 13:43 unatukwase kuwana kumbululo lia chihula chino. Unambe ngwo: “Hohene akwa ululi kumakatemuka ngwe tangwa mu Wanangana wa Tato.” Maliji a chisoneko chino kanatukwase kunyingika ngwo Yesu te kanahanjika hali “ana ja Wanangana,” mandumbu jenyi akuwayisa, waze makakalakala nenyi hamuwika mu malilu. (Mateu 13:38) Kashika, mukanda wa Daniele 12:3 kota unahanjika hali Akwa-Kristu akuwayisa ni mulimo uze o makalinga ha Kanunu ka Miaka.
Akwa-Kristu akuwayisa makakalakala hamuwika ni Yesu hanga akasongwele mulimo wa kulongesa uze muukalingiwa hashi ha 1.000 ka miaka (Tala paragrafu 11)
11-12. Yika Akwa-Kristu akuwayisa 144.000 makalinga ha kanunu ka miaka?
11 Kuchi Akwa-Kristu akuwayisa ‘makatewulwila anji ku ululi’? Ayo makakalakala hamuwika ni Yesu Kristu hanga akasongwele mulimo wa kulongesa uze muukalingiwa hashi ha kanunu ka miaka. Akwa-Kristu akuwayisa 144.000 kechi kakalakala wika ngwe mianangana, alioze makakalakala nawa ngwe asasendote. (Uso. 1:6; 5:10; 20:6) Amu makakalakala ngwe asasendote o ‘makawuka mavungu,’ chekwamba makakwasa atu hakehe-hakehe hanga apwe angunu. (Uso. 22:1, 2; Eze. 47:12) Chochene, Akwa-Kristu akuwayisa makawahilila chinji!
12 Mba “anji” waze ‘makatewulwila ku ululi’ aya? Kali waze makahindwisa, waze makalamwina ha Armagedone ni ana waze makasemukina mu chifuchi chaha. Kusongo lia kanunu ka miaka, eswe waze makatwama hashi makapwa angunu. Mba shimbu lika atu wano makapwa ni majina jo akusoneka mu mukanda wa mwono ku miaka yeswe?
CHESEKO CHA KASULA
13-14. Yika atu eswe hano hashi makafupiwa kusolola shimbu kanda azuka mwono wa mutolo?
13 Twatamba kwiwuluka ngwetu, mutu kechi kupwa wika ni mwono wa mutolo mumu ngwo kali mungunu. Tunyongenu hali Alama ni Eva. O kapwile angunu, alioze mba apwe ni mwono wa mutolo katambile kwononokena Yehova. Chaluyinda, ayo kakachilingile.—Roma 5:12.
14 Kusongo lia kanunu ka miaka atu eswe hano hashi makapwa angunu. Shina atu eswe angunu makanunga ni kwononokena Yehova ku miaka yeswe? Nyi amwe makapwa ngwe Alama ni Eva waze kakononokene Yehova? Yihula yino ye mutukumbulula haliapwila. Mba mu mulali uka?
15-16. (a) Ha shimbu lika atu eswe hano hashi makapwa ni uhashi wa kusolola ushishiko wo kuli Yehova? (b) Yika muyikalingiwa ha cheseko cha kasula?
15 Ha kanunu ka miaka Satana makamukasa. Ha mashimbu jacho, iye kechi kahasa kupiangula mutu niumwe. Alioze kusongo lia kanunu ka miaka, makamutusula. Iye makazanga kupiangula atu waze ha shimbu liacho makapwa angunu. Ha cheseko chino cha kasula, atu eswe angunu hano hashi makapwa ni uhashi wa kusolola nyi kakulemesa jina lia Zambi ni Wanangana wenyi, nyi ka. (Uso. 20:7-10) Yuma yize hita mutu makalinga ha cheseko chino cha kasula, muyikasolola nyi jina lienyi mulikanunga mu mukanda wa mwono ku miaka yeswe, nyi ka.
16 Mbimbiliya yinalumbununa ngwo atu amwe kutwanyingikine nyi angahi, kechi kwononokena Yehova ngwe chize alingile Alama ni Eva. Nawa kechi katayiza Wanangana wenyi. Yika muyikalingiwa kuli ayo? Usolwelo 20:15 unambe ngwo: Mweswe yoze “kamuwanyine wa kusoneka mu mukanda wa mwono, amunyashine mu chitende cha kahia.” Waze eswe kechi kwononoka makaanongesa liakulu. Alioze atu anji angunu makapalika mu cheseko cha kasula. Nawa majina jo makanunga mu mukanda wa mwono ku miaka yeswe.
“KU MWAKA WA KU SONGO”
17. Yika mungelo alwezele Daniele yize te muyilingiwa ha matangwa jetu? (Daniele 12:4, 8-10.)
17 Chili chilemu chinji kunyonga ha yize muyikalingiwa kulutwe lia matangwa! Alioze, Daniele katambwile jimwe sango jilemu kuli mungelo hakutwala “ku mwaka wa ku songo” hanji ngwetu, matangwa a kusula. (Tanga Daniele 12:4, 8-10; 2 Timo. 3:1-5) Mungelo kalwezele Daniele ngwenyi: “Yinyingi muyikaliwezela,” chekwamba atu ja Yehova te manyingika kanawa uprofeto wa mu mukanda Daniele. Mungelo yamba nawa ngwenyi, ha mashimbu jacho “yingulungulu malinga ungulungulu; mba yino yuma kuyichi kulumbunuka kuli ni umwe chingulungulu.”
18. Yika kwasala hakehe hanga yilingiwe kuli atu api?
18 Musono, muchihasa kusolola ngwe atu waze akulinga yuma yipi keshi kwapatwila kulita ni yitanga yo. (Mala. 3:14, 15) Alioze kwasala hakehe, Yesu makapatwila waze apwa ngwe pembe ha kwahandununa ni waze apwa ngwe mapanga. (Mateu 25:31-33) Atu wano akulinga yuma yipi kechi kaalamwina ha luyinda munene, chipwe kwahindwisa hanga akatwame mu chifuchi chaha. Majina jo kechi kapwa mu “mukanda wa kwiwuluka” uze anatongola ha Malakia 3:16.
19. Wano kali mashimbu akulinga yika, nawa mumu liaka? (Malakia 3:16-18)
19 Wano kali mashimbu akusolola mu yitanga yetu ngwo hi tuli atu api ko. (Tanga Malakia 3:16-18.) Yehova kanakungu atu waze apwa alemu kuli iye. Kashika, tunazange kupwa mukachi ka atu jacho.
Mutukawahilila chinji ha kumona Daniele, asoko ni masepa jetu maahindwisa hanga atambule chawaha cho mu chifuchi chaha! (Tala paragrafu 20)
20. Yika Yehova alakenyene Daniele, nawa mumu liaka unazange kumona umanunuko wa uprofeto wacho?
20 Tuli ha mashimbu waze kunalingiwa yuma ya kukomwesa. Alioze kulutwe, mukukalingiwa nawa yuma yinji ya kukomwesa. Kwasala hakehe, yuma yeswe yipi mayinongesa. Kusulaho, mutukamona umanunuko wa uprofeto uze Yehova alwezele Daniele, unambe ngwo: “Kumukamana kuma kwe ha songo lia matangwa.” (Danie. 12:13) Chochene, kota unashimbwila tangwa lize makahindwisa Daniele, asoko ni masepa je! Kashika, sako tachi hanga upwe kavumbi wa Yehova washishika, mba jina lie likanunge mu mukanda wa mwono wa Yehova.
MWASO 80 Esekenu Numone Ngwenu Yehova Mupema”
^ Ha mutwe uno, mutumonaho ulumbunwiso waha wa mukanda wa Daniele 12:2, 3, unahanjika hakutwala ku mulimo unene wa kulongesa atu uze muukalingiwa hano hashi. Mutulilongesa shimbu lize mulimo wacho muukalingiwa ni waze makaulinga. Nawa mutumona chize mulimo wacho muukakwasa atu eswe waze makapwa hano hashi hanga alilulieke ha cheseko chize muchikalingiwa kusongo lia Kanunu ka Miaka ya Kuyula cha Yesu.
^ Muchihasa kupwa ngwe uhindukilo mukaputuka ni waze afwile ni ushishiko weswe kuli Yehova ha matangwa a kusula, hanyima mba mahindwisa waze aliangile kufwa kulutwe lio. Nyi uhindukilo mulingiwa chocho, hita atu makatambwisa atu waze atwamineno ha shimbu limuwika. Cheswacho muchikalingiwako, Yisoneko yinambe hakutwala ku uhindukilo wa waze makaya mu malilu ngwo, mutu mweswe makahinduka mu “ngango yenyi,” chekwamba mu mutapu wa kululieka. Kashika mutuhasa kwamba ngwetu, ni uhindukilo wa waze makatwama hano hashi muukalingiwa mu yimako-yimako, chekwamba wa kululieka.—1 Kori. 14:33; 15:23.
^ Uno uli ulumbunwiso waha uze unakwate ha ulumbunwiso uli ha mukanda Preste Atenção à Profecia de Daniel! kapitulu 17, ni ha Kaposhi wa Kutalila 1 Julho 1987, mafwo 21-25.
^ Alioze, “akwa ululi” ni “yihenge” waze anatongola ha Yilinga 24:15 ni maliji “waze hanalingi yipema” ni “waze hanalingi yipi” anatongola ha Yoano 5:29 kanatale ha yize waze makahindwisa alingile shimbu te kanda achifwa.
