Ha limwe shimbu ha 1940, yisemi jami ya yaputuka kulilongesa Mbimbiliya ni Yela ja Yehova. Kulutwe, yalitwamina kulilongesa. Alioze mama yanunga ni kutambula Kaposhi wa Kutalila ni Laulenu!. Hanyima lia 1950, asoko jami yatayiza kuya ku kukunguluka cha mambonge cha yifuchi yinji mu Nova York.

Hakupalika cha shimbu likehe, ndumbu Lawrence Jeffries yaputuka kwiza ku zuwo lietu. Iye kazangile chinji hanga ngulilongese umwenemwene. Alioze ku uputukilo, ami te chishi kutayiza nyonga lia Yela ja Yehova lia kuhona kulinjisa mu yuma ya mafwefwe ni jita. Yingumulweza ngwami, nyi niumwe katayijile kwasa jita akwa-kole mahasa kunjila mu chifuchi ni kuchipupa. Ni uhumikizo weswe, ndumbu Jeffries yamba ngwenyi: “Kuchi wanyonga yize Yehova malinga nyi atu eswe mu América mapwa Yela jenyi mba chifuchi chimwe muchaalukukila?” Yize ahanjikile ha chikuma chino ni ha yikuma yikwo, yangukwashile kumona ngwami yize napwile ni kunyonga te kuyishi kulita. Yino yeswe yakukwashile kuzanga umwenemwene.

Napalikishile mashimbu ni kutanga Tuposhi ni Laulenu! a kulu waze mama apwile ni kutambula. Hakupalika cha mashimbu yingunyingika ngwami, pundu te ngunalilongesa umwenemwene. Kashika, yingutayiza kulilongesa Mbimbiliya ni ndumbu Jeffries. Yinguputuka kuya ku kukunguluka cheswe. Nazangile chinji yeswe yize te ngunalilongesa, chocho yingupwa mukwa-kwambujola. Nyonga lize napwile nalio lialumukine muze nanyingikine ngwami, “tangwa linene lia Yehova linakundama.” (Zefa. 1:14) Chakazangile nawa kuya ku shikola yinene, chuma nazangile chapwile kulongesa akwetu umwenemwene.

Nahwishile shikola yikehe ha 13 ya Junho 1956, hakupalika cha matangwa atatu, yangupapachisa  ha kukunguluka cha mbonge. Chakanyingikine yawana yize te mungutambula mumu lia kuhana mwono wami kuli Yehova ni kumulingila.

Hakupalika cha tukweji asambano chize haze angupapachishile, yingupwa pionelu wa shimbu lieswe. Mulimo Wetu wa Wanangana wa Dezembro 1956 wapwile ni chimwe chikuma chinambe ngwo: “Muhasa Kuya Kuze Kunafupiwa Ukwaso?” Yami te munguhasa. Nazangile chinji kuya kuze kunafupiwa ukwaso.—Mateu 24:14.

Nalukilile mu mbonge ya Edgefield, ku Carolina do Sul. Mu chikungulwila mwapwile akwa-kwambujola awana wika, yami wamuchitano. Twapwile ni kulikungulwila ku zuwo lia umwe ndumbu. Hita kakweji napwile ni kulinga maola 100 mu mulimo wa kwambujola. Te chishi kupwa ni mashimbu mumu lia mulimo wa kwambujola ni yihanda yize te nakulinga ha kukunguluka. Chapwile chipema mumu muze te nakukalakala chinji mu chikungulwila te chakungukwasa kunyingika kanawa Yehova.

Napwile ni umwe longi wa pwo yoze te ukwete zuwo lia kulanjishila tushau mu mbonge ya Johnston, hakamwihi ni Edgefield. Kapwile mutu mupema chinji, chocho yangwaha mulimo wa shimbu likehe, uze napwile ni kufupa. Iye nawa yatwaha limwe zuwo muze twapwile ni kukungulukila.

Ndumbu Jolly Jeffries, mwana wa ndumbu yoze wangulongesele Mbimbiliya yalukila ku Brooklyn, Nova York, chocho yituputuka kukalakala chimuwika mulimo wa upionelu. Nawa twapwile mu chipatulo chimuwika chize atuhele kuli umwe ndumbu.

Ku Sul lia chifuchi, mbongo jize apwile ni kutufweta ha tangwa lia milimo japwile jikehe chinji. Te kakutufweta dolar 2 hanji 3 ha tangwa. Tangwa limwe, tumbongo tuze napwile natwo yingutulanda kulia mu chimwe chihela. Muze te ngunatuhuka, umwe lunga yanguhula ngwenyi: “Unazange kukalakala? Munguhasa kukufweta dolar yimuwika ha ola.” Yangwaha mulimo ya matangwa atatu hanga ngukombe chihela cha mulimo ya kutunga. Chino chakungukwashile kunyingika ngwami, Yehova te kanangukwase ngununge ni kukalakala mu Edgefield. Chipwe chocho, nahashile kuya kukunguluka cha mambonge cha yifuchi yinji ha 1958 mu Nova York.

Ha tangwa liamuchiali lia Kukunguluka cha mambonge, kwalingiwile chuma chipema chinji. Yingunyingika pangi Ruby Wadlington, yoze te wakukalakala ngwe pionelu ku Gallatin, mu Tennessee. Amu yetu eswe aali twazangile kupwa mishionaliu, chocho yituya ha kukunguluka cha waze anazange kuya ku shikola ya Ngiliate. Hanyima, yituputuka kulisonekena mikanda. Ha kupalika cha amwe mashimbu, yinguya ni kulinga pande mu chikungulwila cho. Hanyima lia pande, yingumwita hanga tulimbate. Yingwalukila mu chikungulwila cho, chocho yitulimbata ha 1959.

Muze napwile ni miaka 23 yangutongola ngwe kasongo wa chikungulwila (yoze musono anavuluka ngwo kasongo wa chizavu cha makulwana) mu  Gallatin. Yetu twapwile chikungulwila chitangu chize ndumbu Charles Thompson amenekene muze amutongwele ngwe kalayi wa mbonge. Iye kapwile ni yinyingi yinji, chipwe chocho te kakunguhula hanga ngumulweze yipikalo yize mandumbu anapalika mu chikungulwila ni chize tulayi akwo a mbonge akwashile chikungulwila. Nalilongesele kuli iye ngwami, shimbu kanda nguchikwata yiyulo, natamba kuhula hanga ngunyingike yuma yeswe yize yinatale ha chiyulo chacho.

Ha Maio 1964, yangusanyika ku Shikola ya Mulimo wa Wanangana yize te muyilinga kakweji umuwika ku Sul ya Lansing, mu Nova York. Alongeshi a ku shikola yacho, kangukwashile kuzanga kunyingika kanawa Yehova ni kukola ku ufulielo.

Ha Janeiro 1965, yami ni Ruby yatusanyika hanga tukalakale mu mulimo wa kalayi wa mbonge. Katusele mu mbonge yize yapwile ni njiza yinene chinji yize yapwile ni kukatuka ku Knoxville, mu Tennessee, ndo kuheta ku Richmond, mu Virginia. Mbonge yize te twakumeneka mwapwile yikungulwila ya ku Norte ya Carolina, Kentucky, ni ya Virginia Ocidental. Napwile ni kumeneka wika yikungulwila ya mandumbu alaa, mumu ha mashimbu jacho shimbi ja nguvulu japwile ni kukanjisa atu alaa kupwa hamuwika ni yindele. Amu mandumbu apwile ni yikumba yikehe, twalilongesele kulianyina ni waze te akufupiwa ukwaso. Tangwa limwe kalayi wa mbonge yoze te wajama yangulongesa chimwe chikuma chilemu ngwenyi: “Pwako ndumbu. Kanda umeneka mandumbu ni kulipwisa ngwe uli mwata wo. Yena muhasa wika kwakwasa nyi o makumona ngwe ndumbwo.”

Mu chikungulwila chimwe te tunameneka, Ruby yaputuka kulilongesa ni umwe mwana pwo yoze wapwile ni mwana wa mwaka umuwika. Muze niumwe mu chikungulwila kakapwile ni kulilongesa nenyi, Ruby kapwile ni kuchilinga kupalikila mu mikanda. Muze twamenekene nawa chikungulwila chacho, pwo wacho yaya ha kukunguluka cheswe. Muze mapionelu aali alipwila ayileko, yanunga ni kulilongesa nenyi ha amwe mashimbu yamupapachisa. Hakupalika cha miaka 30 mu 1995, muze te tuli ku Mbetele ya Patterson, umwe pangi mukweze yeza ni kuhanjika ni Ruby. Kapwile mwana wa pwo yoze walilongesele Mbimbiliya Ruby. Iye ni mukwo-lunga te kali ku kalasa 100 wa Shikola ya Ngiliate.

Mu mbonge yamuchiali muze atutumine, yapwile mukachi ka Flórida. Ha mashimbu jacho te tunafupiwa mashinyi, chocho yitulanda amwe mu ndando yipema. Alioze ha poso yitangu, yimwe mu mutoli yiyipiha. Kutwakapwile ni mbongo ja kwalulieka. Chocho, yingusanyika umwe ndumbu ni kumwita ukwaso. Iye yatuma umwe ku mulimo wenyi alulieke mashinyi, alioze ketele nichimwe. Yamba ngwenyi: “Kuwafupile kungwaha nichimwe.” Kusulaho, yatwaha nawa mbongo. Chino chatukwashile kumona chize Yehova akufunga tuvumbi twenyi. Chatulongesele nawa ngwo twatamba kupwa yihanyi.

Muze te twakumeneka hita chikungulwila, twapwile ni kutulila ku mazuwo ja mandumbu. Chino chatukwashile kulikata ni mandumbu anji. Tangwa limwe, napwile ni kusoneka lusango hakutwaka ku chimwe chikungulwila, yingumuvulama ha makina yami yakusonekena. Muze nafunyine ha ufuku wacho hanga ngumuhwise, yinguwana hamuhwisa kuli mwana wa miaka yitatu wa ndumbu yoze watuzumbwile. Ha miaka yinji, muze te nakuliwana ni ndumbu wacho napwile ni kuheha nenyi ha yize alingile.

Ha 1971, yangutuma ngukalakale ngwe kalayi wa mambonge mu Nova York. Twakomokene chinji! Muze twaputukile mulimo wacho, yami te nguli ni miaka 34. Nawa napwile kalayi wa mambonge mutangu mulaa kuli mandumbu jacho. Ayo kangutambwile kanawa.

Ngwe kalayi wa mambonge napwile ni uhashi wakulongesa mandumbu hita poso ha kukunguluka cha mbonge. Tulayi a mbonge anji kapwile ni yinyingi yinji kuhiana yami. Umwe wa kuli ayo mwe walingile pande ja upapachiso wami. Mukwo ndumbu Theodore Jaracz, kulutwe yapwa mu Chizavu cha Tusongo. Kwapwile nawa mandumbu akwo ajama waze te akukalakala ku Mbetele ya Brooklyn. Chipwe tulayi a mbonge ni Mambetelita eswe kapwile ni kungwecha hanga ngulivwe kanawa. Nakusakwilila chinji ha chize mandumbu apwile  ni kungukwasa. Namwene chize mandumbu wano ali tufunga a zango waze te akujikijila mu Liji lia Zambi ni kukwasa ululikiso wenyi ni ushishiko. Kulikehesa cho changukwashile kukalakala ngwe kalayi wa mambonge.

Ha 1974, Chizavu cha Tusongo yatongola mandumbu akwo hanga akalakale ngwe tulayi a mambonge, yami yangufunyisa mu mulimo wa kalayi wa mbonge, alioze ha shimbu lino ku Carolina ya ku Sul. Ha chisuho chino, kukwakapwile nawa shimbi yize yapwile ni kukanjisa atu alaa kulikungulula hamuwika ni yindele. Chino chapwile ni kukwasa mandumbu eswe kupwa hamuwika.

Ha 1976, yangutuma ngwe kalayi wa mbonge ku Geórgia mu mbonge ya Atlanta ni Columbus. Ngunewuluka shimbu lize nalingile pande ja ufwe ja twanuke atano waze afwile muze umwe ochele zuwo lio. Naye yapwa mu shipitali mumu lia mbandu jize apwile najo. Nawa mandumbu anji yindele ni alaa kayile ku shipitali ni kwatakamisa. Namwene zango linene lize mandumbu apwile nalio. Zango lia mutapu au, liakukwasa tuvumbi twa Yehova kukumba yipikalo yeka ni yeka.

Ha 1977, katusanyikine hanga tukalakale ku Mbetele Brooklyn ha amwe tukweji. Muze te mulimo unaheta kusongo, mandumbu aali a mu Chizavu cha Tusongo, yanguhula nyi mutuhasa kununga ni kukalakala ku Mbetele. Yitutayiza.

Nakalakalile ku Chipatulo cha Serviço ha miaka 24. Mu chipatulo chacho, mandumbu kakutala ha yikuma yikalu. Alioze ha kupalika cha miaka, Chizavu cha Tusongo yichihana usongwelo unji uze unakatuka ha shimbi ja mu Mbimbiliya. Usongwelo wacho wakukwasa mandumbu mu Chipatulo cha Serviço kukumbulula yihula yikalu. Alioze kakuuzachisa nawa hanga afumbe tulayi a mbonge, makulwana ni mapionelu. Fumbo liacho linakwase mandumbu anji kukola ku ufulielo. Chino chakukwasa chinji kukolesa ululikiso wa Yehova.

Kukatuka ha 1995 ndo 2018, nameneka mitango yeka ni yeka hashi heswe ngwe mukwa-kumanyinako chishina chinene. Napwile ni kulikungulula ni mandumbu amu Komite ya Mutango, Mambetelita ni mamishionaliu hanga ngwatakamise ni kwakwasa ha yize yinaapinjisa. Mandumbu jacho no te kakututakamisa chinji ha kutulweza yize apwile ni kulitakana nayo. Chakutalilaho, muze twamenekene Ruanda ha mwaka 2000, twakomokene hakunyingika chize mandumbu ni usoko wa ku Mbetele alilamwinyine muze atu apwile ni kulishiha ha 1994. Mandumbu anji kafwishile asoko ni masepa jo. Chipwe chocho, o kakatokesele ufulielo wo, kutalatala cho ni uwahililo wo.

Haliapwila tuli ni miaka kuhiana 80. Ha miaka 20, nakukalakala mu Komite ya Mutango mu Estados Unidos. Kuchakayile ku shikola yinene, alioze natambula fumbo liahiana lize Yehova akuhana mu ululikiso wenyi. Mumu lia fumbo liacho, nakukwasa akwetu anyingike umwenemwene uze mwakwasa ku mwono wo weswe. (2 Kori. 3:5; 2 Timo. 2:2) Nahasa kumona chize Mbimbiliya yakwasa atu anji kwalumuna yitanga yo ni kupwa ni usepa upema ni Sakatanga yo. (Tia. 4:8) Yami ni Ruby twakuzachisa uhashi weswawo tuli nawo hanga tukwase mandumbu alemese uhashi wa kulilongesa hakutwala ku Yehova ni wa kulongesa umwenemwene kuli akwo. Uno we mulimo ulemu uze kavumbi ka Yehova mahasa kupwa nawo!