MUTWE WAKULILONGESA 39
Shina Jina Lie Lili “mu Mukanda wa Mwono”?
“Yasoneka mukanda wa kwiwuluka kumeso jenyi, wa waze evwilile woma Yehova.”—MALA. 3:16.
MWASO 61 Nungenu, Enu Yela!
CHIKUMA CHILEMU *
Kukatuka hali Abele ndo musono, Yehova kanawezela majina “mu mukanda wa mwono” (Tala maparagrafu 1-2)
1. Kulita ni Malakia 3:16, mukanda uka Yehova anasoneka, nawa yika yili mu mukanda wacho?
YEHOVA kanasoneka umwe mukanda ulemu chinji. Iye kaputukile kuusoneka ha miaka yinji kunyima. Mu mukanda wacho kanasonekamo majina, jina litangu lili lia kavumbi kenyi washishika, Abele. * (Luka 11:50, 51) Kukatuka haze, Yehova kakuwezelamo majina. Musono, muli tununu a tununu twa majina. Mu Mbimbiliya, mukanda wacho kanavuluka ngwo, “mukanda wa kwiwuluka,” “mukanda wa mwono,” nawa ngwo “chivungo cha mwono.” Ha mutwe uno, mutuvuluka mukanda wacho ngwo, “mukanda wa mwono.”—Tanga Malakia 3:16; Uso. 3:5; 17:8, NWT.
2. Majina jaya ali mu mukanda wa mwono, nawa yika twatamba kulinga mba jina lietu lipwe mu mukanda wacho?
2 Mu mukanda wacho muli majina ja waze eswe akuwayila Yehova ni mbunge yeswe ni kulemesa jina lienyi. Ayo kali ni kutalatala cha mwono wa mutolo. Ni yetu majina jetu mahasa kwasoneka mu mukanda wa mwono. Mba chino chilingiwe, twatamba kupwa ni usepa upema ni Yehova ni kufuliela ha ukuule wa Yesu Kristu. (Yoa. 3:16, 36) Chipwe ngwe tuli ni kutalatala cha kuya mu malilu hanji kutwama hano hashi, yetu eswe tunazange hanga jina lietu alisoneke mu mukanda uno.
3-4. (a) Nyi jina lietu lili mu mukanda wa mwono, chinalumbunuka ngwo kwahwa mutukazuka mwono wa mutolo? Lumbununa. (b) Yika mutulilongesa ha mutwe uno ni uze muusulaho?
3 Shina atu eswe waze ali ni majina mu mukanda wa mwono, chinalumbunuka ngwo kwahwa makazuka mwono wa mutolo? Mutuwana kumbululo ha maliji waze Yehova alwezele Mose ali ha Kutuhuka 32:33. Yehova yamba ngwenyi: “Mweswawo hanguvulumuna, mwenawo mungujimuna mu mukanda wami.” Maliji wano kanasolola ngwo, majina waze ali mu mukanda wacho mahasa kwajimuna. Chili ngwe Yehova kazachishile kala hanga asoneke majina jacho. (Uso. 3:5) Twatamba kusa tachi hanga jina lietu linunge mu mukanda wa mwono ndo haze malisonekena ni ulombo uze kuushi kujimuka.
4 Chino muchihasa kututwala hanga tulihule ngwetu: Yika Mbimbiliya yakwamba hali waze ali ni majina akusoneka mu mukanda wa mwono ni waze majina jo keshi akusonekamo? Ha shimbu lika waze ali ni majina mu mukanda wacho makazuka mwono wa mutolo? Mba yika mutwamba hali atu waze afwile chakuhona kunyingika Yehova? Shina majina jo mahasa kwasoneka mu mukanda wa mwono? Mutuwana makumbululo a yihula yino ha mutwe uno ni uze muusulaho.
MAJINA JAYA ALI MU MUKANDA WA MWONO?
5-6. (a) Kulita ni A-Fwilipu 4:3, aya waze ali ni majina akusoneka mu mukanda wa mwono? (b) Ha shimbu lika makasoneka majina jo mu mukanda wa mwono ni ulombo uze kuushi kujimuka?
5 Aya ali ni majina jo akusoneka mu mukanda wa mwono? Mba tukumbulule chihula chino, tuhengwolenu yizavu yitano hanga tumone yizavu yize yili ni majina akusoneka mu mukanda wa mwono.
6 Chizavu chitangu chili cha waze makayula ni Yesu mu malilu. Shina majina jo kali kulu akusoneka mu mukanda wa mwono? Ewa, mwali. Kulita ni yize postolo Paulu ambile kuli mandumbu jenyi mu Fwilipu, majina ja Akwa-Kristu akuwayisa waze makayula ni Yesu hanaasoneka kulu mu mukanda wa mwono. (Tanga A-Fwilipu 4:3.) Alioze, o katamba kununga ni kushishika hanga majina jo ahone kwajimuna mu mukanda wacho. Akwa-Kristu wano akuwayisa majina jo makaasoneka ni ulombo uze kuushi kujimuka muze matambula chijikilo cha chakasula. Chijikilo chacho mahasa kuchitambula muze kwasala hakehe hanga afwe hanji muze kwasala hakehe hanga luyinda munene aputuke.—Uso. 7:3.
7. Kulita ni Usolwelo 7:16, 17, ha shimbu lia mbunga yinene majina jo makapwa kusoneka mu mukanda wa mwono ni ulombo uze kuushi kujimuka?
7 Chizavu chamuchiali chili cha mbunga yinene ya mapanga akwo. Shina atu a mu chizavu chino majina jo kali akusoneka mu mukanda wa mwono? Ewa. Kutala hanyima lia Armagedone majina jo makanunga mu mukanda wacho? Ewa. (Uso. 7:14) Yesu kambile ngwenyi, atu wano alifwa ni mapanga makatambula “mwono wa mutolo.” (Mateu 25:46) Alioze ayo kechi katambula mwono wa mutolo ha shimbu lizeliene Armagedone muyipalika. Mumu majina jo makapwa akusoneka mu mukanda wa mwono ni kala, chekwamba mahasa kwajimuna. Ha Kanunu ka Miaka, Yesu kumakapwa “kafunga ko, maasongwela ku mafuji a meya a mwono.” Waze makwononokena usongwelo wa Kristu ni kwapatwila kuli Yehova ngwo kashishika, majina jo makaasoneka mu mukanda wa mwono ni ulombo uze kuushi kujimuka.—Tanga Usolwelo 7:16, 17.
8. Atu aka waze majina jo keshi akusoneka mu mukanda wa mwono, nawa yika muyikalingiwa kuli ayo?
8 Chizavu chamuchitatu chili cha pembe waze makanongesa mu jita ya Armagedone. Majina jo keshi mu mukanda wa mwono. Yesu kambile ngwenyi, ‘kumakaya ku konwona cha mutolo.’ (Mateu 25:46) Ni ukwaso wa spiritu yisandu, Paulu yamba ngwenyi: “Kumakaafwetesa ha milonga yo, kwenyeka cha mutolo.” (2 Tesa. 1:9; 2 Petu. 2:9) Chino nawa che muchikalingiwa kuli waze avulumwine spiritu yisandu ku tachi chize ku shakulu. Pundu, wano eswe kechi kaahindwisa, makatambula unongeso wa mutolo hi mwono wa mutolo ko. (Mateu 12:32; Marku 3:28, 29; Hepre. 6:4-6) Haliapwila tutalenu yizavu yikwo yaali ya waze makahindwisa hanga akatwame mu paraisu hano hashi.
AYA WAZE MAKAHINDWISA?
9. Kulita ni Yilinga 24:15, yizavu yika yaali ya atu waze makahindwisa akatwame hano hashi, nawa kalisa muka uli ha yizavu yino yaali?
9 Mbimbiliya yinahanjika ha yizavu yaali ya atu waze makahindwisa ali ni kutalatala cha kutwama hano hashi ku miaka yeswe. Atu jacho kali “akwa ululi” ni “yihenge.” (Tanga Yilinga 24:15.) “Akwa ululi” kali waze alingilile Yehova ni ushishiko weswe shimbu te kanda achifwa. Alioze, “yihenge” kali waze afwile chakuhona kulingila Yehova ni ushishiko weswe. Kanji-kanji, anji a kuli yihenge jacho kapwile ni kulinga yuma yinji yipi. Atu a mu yizavu yino yaali makaahindwisa, shina mutuhasa kwamba ngwetu, majina jo kali mu mukanda wa mwono? Mba tukumbulule chihula chino, tushimutwinenu hita chizavu.
10. Mumu liaka Yehova makahindwisa “akwa ululi,” nawa yiteli yika makatambula? (Hakutwala ku uhindukilo wa hano hashi, tala nawa “Yihula ya Waze Akutanga Mikanda Yetu” mu Kaposhi yono.)
10 “Akwa ululi” kali chizavu chamuchiwana. Majina jo kaasonekene mu mukanda wa mwono, shimbu te kanda achifwa. Shina muze afwile majina jo kaachijile mu mukanda wa mwono? Ka, mumu mu manyonga ja Yehova o achili ni “mwono.” Yehova “hi Zambi ya afu ko, alioze ya a mwono; mumu eswe katwama ni mwono kuli iye.” (Luka 20:38) Chino chinalumbunuka ngwo, muze “akwa ululi” makaahindwisa majina jo makapwa akusoneka mu mukanda wa mwono, alioze ni “kala.” (Luka 14:14) Kwamba pundu, amwe a kuli wano makahindwisa, makatambula yiteli yakukalakala ngwe “yilolo hashi heswe.”—Samu 45:16.
11. Yika “yihenge” makafupiwa kulinga mba majina jo akaasoneke mu mukanda wa mwono?
11 Haliapwila tutalenu chizavu chamuchitano, “yihenge.” Kota amu kakatwamine kulita ni shimbi ja Yehova, kashika majina jo keshi mu mukanda wa mwono. Yehova makahindwisa atu wano ni kwaha uhashi wa kupwa ni majina jo akusoneka mu mukanda wa mwono. “Yihenge” wano makafupiwa ukwaso unji. Shimbu te kanda achifwa, amwe a kuli ayo kalingile yuma yinji yipi. Ayo makafupiwa kutwama kulita ni shimbi ja Yehova. Hachino, Wanangana wa Zambi muukasongwela mulimo wa kulongesa atu hashi heswe.
12. (a) Aya makalongesa yihenge? (b) Yika muyikalingiwa kuli waze makalengulula yize anaalongesa?
12 Mba aya makalongesa yihenge? Mbunga yinene ni akwa-ululi waze makahindwisa. Mba yihenge apwe ni majina jo mu mukanda wa mwono, makafupiwa kupwa ni usepa upema ni Yehova ni kulihana kuli iye. Yesu Kristu ni Akwa-Kristu akuwayisa, makalihulikila ha yize yihenge wano makalinga hakutwala ku malongeso waze makatambula. (Uso. 20:4) Mweswawo makalituna kutwama kulita ni shimbi ja Zambi, makamwonona chipwe ngwe hapwa ni miaka 100. (Iza. 65:20) Yehova ni Yesu kakutala ku mbunge ya mutu, kashika kechi kecha niumwe hanga alinge yuma yipi mu chifuchi chaha.—Iza. 11:9; 60:18; 65:25; Yoa. 2:25.
UHINDUKILO WA MWONO NI WA UPATWILO
13-14. (a) Ku mashimbu akunyima, ulumbunwiso uka te tukwete ha maliji a Yesu waze ali ha Yoano 5:29? (b) Chikuma chika chilemu twawana ha maliji wano?
13 Yesu kahanjikile hakutwala kuli waze makahindwisa hanga atwame hano hashi. Chakutalilaho, iye kambile ngwenyi: “Kanda nukomoka ha chuma chino: mumu ola muyiza, muze waze eswe ali mu mafuka makevwa liji lienyi, makatuhuka; waze hanalingi yipema ku uhindukilo wa mwono; waze hanalingi yipi ku uhindukilo wa upatwilo.” (Yoa. 5:28, 29) Yika Yesu azangile kwamba ha maliji wano?
14 Ku mashimbu akunyima, te twakwamba ngwetu maliji wano a Yesu kanatale ha yuma yize waze makahindwisa makalinga muze haahindwisa, hanji ngwetu, waze makahindwisa amwe makalinga yuma yipema akwo yuma yipi. Alioze, Yesu kakambile ngwenyi, waze makahindwisa makalinga yuma yipema hanji yuma yipi. Maliji jenyi kanatale ha yuma yize hiyinalingiwa hi ha yize ko kanda yichilingiwa. Iye kahanjikile hali waze “hanalingi yipema” ni hali waze “hanalingi yipi,” hanji ngwetu, yuma yize o alingile shimbu te kanda achifwa hi muze ko makaahindwisa. Yino yinalite mumu mu chifuchi chaha, kechi kecha niumwe hanga alinge yuma yipi. Yihenge kota kalingile yuma yino yipi muze te kanda achifwa. Mba, yika Yesu azangile kwamba muze ahanjikile hakutwala “ku uhindukilo wa mwono” ni “uhindukilo wa upatwilo”?
15. Aya makapwa ni “uhindukilo wa mwono,” nawa mumu liaka?
15 “Akwa ululi,” waze alingile yuma yipema shimbu te kanda achifwa makapwa ni “uhindukilo wa mwono” mumu majina jo kali akusoneka mu mukanda wa mwono. Chino chinalumbunuka ngwo, uhindukilo wa “waze hanalingi yipema” uli ha Yoano 5:29 we umuwika ni wa “akwa ululi” uze anatongola ha Yilinga 24:15. Ulumbunwiso uno unalite ni maliji ali ha A-Roma 6:7, anambe ngwo: “Mutu nyi hanafu hanatusuka ku shili.” Mu maliji akwo, Yehova hanakonekena shili ya akwa-ululi wano muze afwile, alioze keshi kuvulama yitanga yo ya ululi. (Hepre. 6:10) Akwa-ululi waze makahindwisa nyi mafupa hanga majina jo anunge mu mukanda wa mwono katamba kununga ni kushishika.
16. “Uhindukilo wa upatwilo” yika unalumbunuka?
16 Mba yika mutwamba hali waze alingile yuma yipi shimbu te kanda achifwa? Chipwe ngwe shili yo kayijimwine muze afwile, nihindu kakalingilile Yehova ni ushishiko muze te ali ni mwono. Majina jo keshi akusoneka mu mukanda wa mwono. Uhindukilo wa “waze hanalingi yipi” we umuwika ni wa “yihenge” uze anatongola ha Yilinga 24:15. Ayo makapwa ni “uhindukilo wa upatwilo.” * Chino chinalumbunuka ngwo, Yesu makahengwola yihenge jacho hanji ngwetu kwapalikisa mu cheseko. (Luka 22:30) Hanyima lia amwe mashimbu, mba Yesu makanyingika nyi o kanatela kwasoneka majina jo mu mukanda wa mwono. Mba chino chilingiwe, o katamba kwecha yitanga yipi yize apwile ni kulinga ni kuhana mwono wo kuli Yehova.
17-18. Waze eswe makahindwisa yika makafupiwa kulinga, nawa kulita ni Usolwelo 20:12, 13 ha yika makaapatwila?
17 Hanyima lia kwahindwisa chipwe akwa-ululi chipwe yihenge, eswe makafupiwa kwononokena shimbi ja mu mikanda yaha jize mutukapwa najo ha kanunu ka miaka. Postolo Yoano kanalumbununa usolwelo uze amwene, ngwenyi: “Namwene afu, anene ni akepe, kanamana kulutwe lia ngunja. Apakwile mikanda, mba apakwile mukanda ukwo, uze wa mwono. Apatwilile afu ku yuma yize yasonewene mu mikanda, nikulita ni yitanga yo.”—Uso. 20:12, 13.
18 Ha yika makapatwila waze makahindwisa? Shina makaapatwila ha yuma yize alingile muze te kanda achifwa? Ka! Twiwulukenu ngwetu, mutu kakumukonekena shili yenyi muze akufwa. Kashika, waze makahindwisa kechi kaapatwila kulita ni yize alingile muze te kanda achifwa. Ayo makaapatwila kulita ni yize makalinga ha malongesa waze makatambula mu chifuchi chaha. Chipwe malunga ashishika ngwe, Noa, Samuele, Ndawichi ni Daniele makafupiwa kulilongesa hakutwala kuli Yesu Kristu ni kufuliela ha chitapo chenyi. Nyi malunga wano makapwa ni yuma yinji yakulilongesa, mba yika mutwamba hali yihenge waze makahindwisa!
19. Yika muyikalingiwa kuli waze makalituna uhashi uze makapwa nawo wakulingila Yehova?
19 Yika muyikalingiwa kuli waze makalituna uhashi uze makapwa nawo wakulingila Yehova? Usolwelo 20:15 unambe ngwo: “Nyi kachi umwe kamuwanyine wa kusoneka mu mukanda wa mwono, amunyashine mu chitende cha kahia.” Chochene lume, wano makaanongesa liakulu. Kashika, chili chilemu kusa tachi hanga jina lietu alisoneke mu mukanda wa mwono ni kunungamo!
Umwe ndumbu kanalongesa akwo ha Kanunu ka Miaka ya Kuyula cha Yesu (Tala paragrafu 20)
20. Mulimo uka unene muukalingiwa ha Kanunu ka Miaka ya Kuyula cha Yesu? (Tala chizulie ha chifukilo.)
20 Kanunu ka Miaka ya Kuyula cha Yesu makapwa mashimbu apema! Mukukalingiwa yuma yinji yipema. Chakutalilaho, mukukalingiwa mulimo unene wa kulongesa atu hashi heswe. Nawa makapwa mashimbu waze makahengwola akwa-ululi ni yihenge. (Iza. 26:9; Yili. 17:31) Mulimo uno wa kulongesa kuchi muukapwa? Ha mutwe uno muuhataho, mutulilongesa chize mulimo wacho muukalingiwa.
MWASO 147 Chilakenyo cha Mwono wa Mutolo
^ Ha mutwe uno, mutumonaho ulumbunwiso waha ha maliji a Yesu waze ali ha Yoano 5:28, 29 anahanjika hakutwala “ku uhindukilo wa mwono” ni “uhindukilo wa upatwilo.” Mutulilongesa nawa yuma yinji hakutwala ku uhindukilo uno waali.
^ Mukanda uno kaputukile kuusoneka chize ku “fundamentu ya hashi,” kukatuka haze atu atambwile uhashi wa kuzuka mwono kupalikila mu ukuule wa Yesu. (Mateu 25:34; Uso. 17:8) Kashika, Abele mahasa kupwa mutu mutangu yoze jina lienyi liasonewene mu mukanda wa mwono.
^ Chitangu twapwile ni kunyonga ngwetu, liji “upatwilo” anazachisa hano linalumbunuka upatwilo uze kuwalitele hanji ngwetu kuhisa mutu. Kwamba umwenemwene, liji lino mulihasa kulumbununa “upatwilo kuwalitele.” Alioze liji “upatwilo” lize Yesu azachishile ha Yoano 5:29 chinasoloka ngwe linatale ha yuma yinji, ngwe kulihukilila hali umwe mutu hanji ngwe chize umwe mukanda wa Ngregu unambe, “kuhengwola mutu.”
