1. Yika muyihasa kutukwasa mba tujikijile hali umwe mutu?

 MUTU yoze akwo akujikijila kakusa tachi hanga amanunune yuma yize akulakenya ni kuhanjika umwenemwene. (Samu 15:4) Tunanyingika ngwetu, mutuhasa kujikijila hali mutu wacho. Ni yetu nawa twatamba kupwa atu waze mandumbu jetu majikijila. Yika mutuhasa kulinga mba o atujikijile?

2. Yika mutulilongesa ha mutwe uno?

² Kutwatambile kushinjila akwetu hanga atujikijile. Twatamba kusolola ngwetu tuli atu waze mahasa kutujikijila. Amwe kakwamba ngwo, ujikijilo wapwa ngwe mbongo, chakupwa chikalu kujiwana chashi kujitokesa. Alioze mutuhasa kujikijila muli Yehova mumu “milimo yenyi yeswe kakuyilinga ni umwenemwene.” (Samu 33:4) Nawa iye kanazange hanga twimbulule chilweza chenyi. (Efwe. 5:1) Mutulilongesa yilweza ya tuvumbi twenyi waze amwimbulwile ni kusolola ngwo kapwile atu waze te akujikijila. Nawa mutulilongesa yitanga yitano yize muyitukwasa kupwa atu waze akwetu mahasa kujikijila.

3-4. Kuchi profeta Daniele asolwele ngwo kali mutu yoze mahasa kujikijila, nawa yika mutuhasa kulihula?

³ Profeta Daniele kahichikile chilweza chipema cha chize mutuhasa kupwa atu waze akwetu majikijila. Chipwe muze amutwalile ngwe funge mu Babilonia, nihindu kasolwele ngwo akwo mahasa kumujikijila. Atu kaputukile kumujikijila chinji muze Yehova amukwashile kulumbununa yilota ya Mwanangana Nabukanezore. Ha amwe mashimbu, Daniele katambile kulweza mwanangana ngwenyi, yize alinga Yehova kayizangile. Kuchakapwile chashi kuli Daniele kuhanjika yuma  yacho, mumu mwanangana kapwile mutu mukalu, nawa te kechi kuzanga kwivwa lusango wacho. (Danie. 2:12; 4:20-22, 25) Ha kupalika cha miaka yinji, Daniele yasolola nawa ngwenyi kapwile mutu yoze mahasa kujikijila ha kulumbununa muyimako-yimako sona jize jasolokele ku chikalakala cha zuwo lia mwanangana mu Babilonia. (Danie. 5:5, 25-29) Kulutwe, Dariu Ka-Media ni yilolo jenyi kanyingikine ngwo Daniele kapwile ni “spiritu mupema wahiana.” Ayo eswe kanyingikine ngwo, Daniele kapwile mutu yoze mahasa kujikijila mumu “kawanyine kapalia muli iye.” (Danie. 6:3, 4) Chipwe miata waze te keshi kuwayila Yehova kanyingikine ngwo Daniele kapwile mutu yoze mahasa kujikijila!

⁴ Ha kunyonga ha chilweza cha Daniele, lihule ngwe: ‘Kuchi anangunyingika kuli atu waze hi Yela ja Yehova ko? Shina kanangunyingika ngwe mutu yoze mahasa kujikijila yoze wakulinga kanawa milimo yenyi?’ Mumu liaka chili chilemu kulihula chocho? Mumu nyi twapwa atu waze akwetu akujikijila yitanga yetu muyihalisa Yehova.

5. Yika yakwashile Hanania kupwa mutu yoze akwo akujikijila?

⁵ Ha mwaka 455 K.M.J., muze Nguvulu Nehemia ahwishile kutungulula yipanga ya Yerusaleme, yafupa malunga waze te atu akujikijila hanga afunge mbonge. Mukachi ka malunga yacho, Nehemia katongwele Hanania hanga apwe nguvulu wa mbonge. Mbimbiliya yakwamba ngwo, Hanania kapwile “mutu wamwenemwene [yoze] wevwilile woma Zambi kuhiana akwo anji.” (Nehe. 7:2) Hanania kalingile kanawa mulimo weswawo amuhele,  iye kachilingile mumu te kakuzanga Yehova nawa kakazangile kumuvwisa chinyengo. Kwimbulula chilweza chenyi muchitukwasa kupwa atu waze akwetu majikijila mu mulimo wa Yehova.

6. Kuchi Techiku asolwele kuli Paulu ngwo mahasa kumujikijila?

⁶ Tutalenu chilweza cha Techiku, umwe Mukwa-Kristu yoze Paulu apwile ni kujikijila chinji. Muze Paulu apwile mu zuwo lia ususu, kafulielele ha ukwaso wa Techiku ha kumuvuluka ngwo “kavumbi wamwenemwene.” (Efwe. 6:21, 22) Paulu ketele kuli Techiku hanga atwale mikanda yize asonekenene mandumbu amu Efwesu ni Kolosu ni kumulweza hanga aakolweze ni kwatakamisa. Paulu kapwile ni shindakenyo ngwenyi, Techiku te malinga kanawa mulimo wacho. Chilweza cha Techiku chinatwiwulula mandumbu anji ashishika waze twakujikijila mu yikungulwila yetu akutufunga ku ufulielo.—Kolo. 4:7-9.

7. Yika mutuhasa kulilongesa hakutwala ku ujikijilo wa makulwana ni tuvumbi?

⁷ Musono, twakusakwila chinji hakupwa ni makulwana ni tuvumbi waze mutuhasa kujikijila. Chizechene ngwe, Daniele, Hanania ni Techiku, o kakulemesa chinji yiteli yo. Chakutalilaho, twakufuliela ngwetu yihanda yeswe ya kukunguluka cha hakachi ka poso, kayihana kuli mandumbu. Nawa makulwana kakusakwilila muze mandumbu ni mapangi waze akutambula yihanda malilulieka kanawa ni kuyisolola ha kukunguluka. Chikwo nawa, muze twakusanyika alongi jetu a Mbimbiliya ha kukunguluka cha kusongo lia poso, twakupwa ni shindakenyo ngwetu mukupwa ndumbu yoze malinga pande ja mbunga. Yetu twakupwa ni shindakenyo ngwetu, kutuchi kuhona mikanda yize mutuzachisa mu munda. Kwamba pundu, mandumbu waze akwete yiteli mu chikungulwila kakutufunga kanawa, nawa twakusakwilila chinji Yehova ha mulimo wacho. Mba yika hita umwe wa kuli yetu malinga hanga asolole ngwo mahasa kumujikijila?

8. Ha yika twatamba kukeya muze tunahanjika hakutwala kuli akwetu? (Yishima 11:13)

⁸ Twakuzanga chinji mandumbu jetu, kashika twakulihulumba hali ayo. Alioze, twatamba kukeya hanga tuhone kuhiana makano ha kulinjisa mu yuma yo yize kuyatutalile. Ha mashimbu a Paulu, Akwa-Kristu amwe mu yikungulwila kapwile “akwa kalundanganyishi, akwa moko a jiji, nikuhanjika yuma yize kuyatele.” (1 Timo. 5:13) Yetu kutwazangile kupwa chocho. Alioze tunyongenu nyi umwe matulweza yuma ya ku mwono wenyi ni kwamba ngwo kanda tuyilweza mutu niumwe. Chakutalilaho, tuchinyongenu ngwetu, umwe pangi matulweza musongo uze ali nawo hanji yuma yikwo yize anapinji nayo, mba matwita hanga tuhone kuyilweza niumwe. Nyi chino muchilingiwa, twatamba kulinga yize iye atwita. * (Tanga Yishima 11:13.) Tutalenu yikuma yikwo haze chakupwa chilemu kufunga yuma yize tunanyingika hanji ngwetu yahengama.

9. Kuchi hita umwe mu usoko mahasa kupwa mutu yoze majikijila?

⁹ Mu usoko. Yikuma yimwe yatamba kusulila wika mu usoko. Chakutalilaho, hanji lunga kananyingika ndako jimwe jakusehesa jize mukwo-pwo akwete. Shina maputuka kulweza akwo yuma yacho hanga evwise mukwo-pwo sonyi? Ka, hi chocho ko! Iye kakuzanga mukwo-pwo nawa kazangile kumuvwisa yikola ku mbunge. (Efwe. 5:33) Akweze no  kakuzanga kwasolwela vumbi. Kashika, yisemi Akwa-Kristu katamba kwiwuluka chikuma chino. Ayo katambile kuvwisa ana jo sonyi ha kulweza akwo uhenge wo. (Kolo. 3:21) Ana no katamba kukeya hanga ahone kumwanga sango jize mujihasa kuvwisa sonyi asoko akwo. (Shimbi 5:16) Muze hita umwe mu usoko akusa tachi hanga ahone kumwanga sango jize jinatale wika hali asoko, usoko wa kulinunga chinji.

10. Kupwa sepa wamwenemwene yika chinachingi? (Yishima 17:17)

¹⁰ Mu usepa. Ha mashimbu amwe, twakufupiwa kushimutwina ni masepa jetu ha kwalweza chize tunevu ku mbunge. Ha mashimbu akwo, kulweza akwetu chize tunevu ku mbunge muchihasa kupwa chikalu. Hanji kutushi ni chako cha kulweza akwetu yize yakutupikala, kashika mutwivwa yikola ku mbunge nyi mutunyingika ngwetu, sepa lietu yoze twalwezanga yimwe kayilweza atu akwo. Chikwo nawa, chili chipema kupwa ni masepa waze mutuhasa kujikijila. Atu waze keshi kumwanga sango jize mutwalweza kali ‘masepa jetu amwenemwene.’—Tanga Yishima 17:17.

11. (a) Kuchi makulwana ni mapwo jo masolola ngwo kali atu waze akwo mahasa kujikijila? (b) Kulita ni chizulie, yika mutuhasa kulilongesa hali mukulwana yoze waya ni kukwasa umwe pangi hanyima kali ni usoko wenyi? (Tala chizulie.)

¹¹ Mu chikungulwila. Makulwana a mu chikungulwila waze keshi kumwanga sango jambala, kapwa ‘ngwe chiswamo ha fuji, uchinyino ha kangonga’ kuli mandumbu jo. (Iza. 32:2) Tunanyingika ngwetu, mutuhasa kulweza makulwana yuma yeswayo chakuhona kwivwa woma ngwo mayilweza atu akwo. Ni yetu nawa kutwatambile kushinjila mandumbu wano hanga atulweze yuma yize kutushi ni ulite wa kuyinyingika. Chikwo nawa, tunasakwilila mapwo ja makulwana mumu keshi kushinjila malunga jo hanga aalweze sango jambala. Kwamba pundu, chili chipema muze mapwo ja makulwana keshi kunyingika sango jimwe hakutwala kuli mandumbu mu chikungulwila. Pwo lia umwe mukulwana, yamba ngwenyi: “Nakusakwilila  chinji mukwetu-lunga mumu lia kuhona kungulweza sango ja mandumbu a mu chikungulwila waze akufupiwa ukwaso wenyi ku ufulielo, nawa keshi kungulweza chipwe majina jo. Chakupwa chipema kuhona kumbata yilemu ya yuma yize chishi ni uhashi wakuyihwisa. Chino chakungukwasa kutwama kanawa ni mandumbu eswe mu chikungulwila. Nawa nakufuliela ngwami, nyi nalweza mukwetu-lunga yuma yize yinangupikala, kechi kuyilweza atu akwo.” Kwamba pundu, yetu eswe tunazange hanga tupwe atu waze akwetu majikijila. Mba yitanga yika muyitukwasa kuchilinga? Tuhengwolenu yitanga yitano yize muyitukwasa.

12. Lumbununa mumu liaka mutuhasa kwamba ngwetu zango lili fundamentu ya ujikijilo.

¹² Zango lili fundamentu ya ujikijilo. Yesu kambile ngwenyi, shimbi jaali yitangu jili kuzanga Yehova ni mwenyembo wetu. (Mateu 22:37-39) Yetu twakuzanga Yehova, kashika tunazange kwimbulula chilweza chenyi ha kupwa atu waze akwetu mahasa kujikijila. Chakutalilaho, zango hali mandumbu jetu liakutukwasa tuchine kulweza atu akwo sango ja ku mwono wo jize tunanyingika. Mumu liaka? Mumu tunanyingika ngwetu, chino muchihasa kupihisa lufuma wo, kweevwisa sonyi hanji yikola ku mbunge.—Yoa. 15:12.

13. Kuchi kulikehesa muchitukwasa kupwa atu waze akwetu mahasa kujikijila?

¹³ Kulikehesa muchitukwasa kupwa atu waze akwetu majikijila. Ndumbu yoze walikehesa, keshi kufupa kupwa mutu mutangu kulweza akwo sango jize ayo kanda achivwa. (Fwili. 2:3) Iye nawa katambile kulisolola kuli akwo ngwo, kananyingika sango jimwe alioze kechi kwalweza jo. Chikwo nawa, nyi tuli akwa-kulikehesa kutuchi kulweza atu manyonga jetu hakutwala ku yimwe yikuma yize Mbimbiliya ni mikanda yetu kuyishi kulumbununa.

14. Kuchi malinjekela akutukwasa kupwa atu waze akwetu mahasa kujikijila?

¹⁴ Mutu yoze ukwete malinjekela kananyingika ngwo kuli ‘mashimbu a kuhola, ni mashimbu a kuhanjika.’ (Chilu. 3:7) Chishima chimwe chinambe ngwo, “kuhanjika chapwa ngwe prata, alioze kuhola chapwa ngwe oru.” Maliji wano kanalumbunuka ngwo, ha mashimbu amwe kuhola chapwa chipema kuhiana kuhanjika. Kashika, mukanda wa Yishima 11:12, unambe ngwo: “Mukwa malinjekela kakuhola.” Tutalenu chilweza cha umwe ndumbu. Iye kali ha ukulwana ha miaka yinji, nawa mumu lia yinyingi yize ali nayo kakumusanyika ku yikungulwila yikwo hanga akwase kuhwisa yimwe milonga. Mukulwana mukwo yoze wakukalakala nenyi yamba ngwenyi: “Iye kakusa tachi jinji hanga ahone kutulweza sango ja mu yikungulwila yikwo.” Maliji ja ndumbu yono kanatukwase kumona ngwo, malinjekela ja mukulwana wacho kakumukwasa kuzuka vumbi lia makulwana akwo. Ayo kananyingika ngwo mahasa kumujikijila.

15. Hana chilweza chinasolola chize kuhanjika umwenemwene chakukwasa akwetu hanga atujikijile.

¹⁵ Kuhanjika umwenemwene chili chitanga chikwo chize tunafupiwa mba akwetu atujikijile. Twakujikijila mutu wa mutapu au mumu kakuhanjika umwenemwene mu yuma yeswe. (Efwe. 4:25; Hepre. 13:18) Tunyongenu ngwe unazange kululieka uhashi we wakulongesa. Hachino, mwita yiyulo kuli ndumbu yoze unanyingika hanga akukwase kumona haze unafupiwa kululieka. Iya muzanga hanga akukwasa ha chikuma chacho? Mutu yoze makulweza umwenemwene nyi yoze mazanga kukuvwisa wika kuwaha? Nyi unazange kululieka yimwe, kumbululo lili zwalala. Mbimbiliya yinambe ngwo: “Kukanjisa cha ku meso chinawaha  kuhiana zango lize liapwa lia kusweka. Mbandu ja kasendo kujapwa ja kukwasa.” (Yishi. 27:5, 6) Muchihasa kupwa chikalu kwivwa sepa lietu mahanjika umwenemwene ha yize tunafupiwa kululieka, alioze ha kupalika cha mashimbu mutuyuka chinji.

16. Kulita ni Yishima 10:19, mumu liaka twatamba kulihumikiza?

¹⁶ Nyi tunazange hanga akwetu atujikijile twatamba kupwa atu waze akulihumikiza. Chitanga chino muchitukwasa tuhone kulweza akwetu yuma yambala. (Tanga Yishima 10:19.) Muchihasa kupwa chikalu kulihumikiza muze tunazachisa internet. Nyi kutwakanyanyine, chakuhona kunyingika mutuhasa kumwanga sango jize te kutwatambile kulweza atu akwo. Nyi twasa sango ha internet, kutuchi kuhasa nawa kunyingika chize sango jacho majizachisa ni ponde yize muyizako. Kulihumikiza necho muchihasa kutukwasa muze akwa-kole jetu matushinjila hanga twalweze sango hakutwala kuli mandumbu ni mapangi jetu. Chakutalilaho, yino muyihasa kulingiwa mu chifuchi chize mulimo wetu uli wakukanjisa, mba mapulisha mahula mandumbu sango ja mu ululikiso wetu. Ha yikuma yino mutuhasa kukaula chiyulo chili ha Samu 39:1, chinambe ngwo: “Mungufunga kanwa liami.” Twatamba kupwa atu waze akwetu mahasa kujikijila, mu usoko, kuli mandumbu ni mapangi jetu hanji kuli mutu mweswawo. Kashika, mba akwetu atujikijile, twatamba kupwa akwa-kulihumikiza.

17. Kuchi mutuhasa kukwasa mandumbu mu chikungulwila apwe ni kulijikijila?

¹⁷ Twakusakwilila Yehova ha kupwa mu usoko wa mandumbu jetu a hashi heswe muze muli atu waze akwete zango nawa a ujikijilo! Yetu eswe tuli ni chiteli cha kusolola ngwo, akwetu mahasa kutujikijila. Nyi yetu eswe mutusa tachi hanga tusolole yitanga ngwe zango, kulikehesa, malinjekela, kuhanjika umwenemwene ni kulihumikiza, mutukwasa mandumbu eswe mu chikungulwila hanga apwe ni kulijikijila. Mba tupwe atu waze akwetu mahasa kujikijila, chino kuchishi kulingiwa ha tangwa limuwika, twatamba kuchilinga ha yisuho yinji. Nyi twachilinga, mutwimbulula Tata yetu Yehova ni kununga kupwa atu waze akwetu mahasa kujikijila.