Tala chize Mbimbiliya yinakumbulula yihula yino.

Mukanda wa Yilinga 24:15 unambe ngwo, “kumukukapwa uhindukilo wa akwa ululi ni wa yihenge.” Akwa-ululi kali atu waze apwile ni kwononokena Zambi muze te kanda achifwa, kashika majina jo kali akusoneka mu mukanda wa mwono. (Mala. 3:16) Yihenge kali atu waze muze te kanda achifwa kakapwile ni uhashi wa kulilongesa hakutwaka kuli Yehova, kashika majina jo keshi akusoneka ku mukanda wa mwono.

Mukanda wa Yoano 5:28, 29 newo unahanjika ha yizavu yino yene yaali yize anatongola ha Yilinga 24:15. Yesu kambile ngwenyi “waze hanalingi yipema” kumakapwa ni “uhindukilo wa mwono; waze hanalingi yipi ku uhindukilo wa upatwilo.” Akwa-ululi kali atu waze alingile yuma yipema muze te kanda afwa. Uhindukilo wo muukapwa wa mwono mumu majina jo hanaasoneka mu mukanda wa mwono. Mba yika mukwamba hali yihenge? Yihenge kali atu waze apwile ni kulinga yuma yipi muze te kanda achifwa, kashika uhindukilo wo muukapwa wa upatwilo. Majina jo kanda achaasoneka mu mukanda wa mwono, o makapalika ha mashimbu a upatwilo hanji ngwetu, makapwa mu cheseko. Ha mashimbu jacho, o makapwa ni uhashi wa kulilongesa hakutwala kuli Yehova ni kusoneka majina jo mu mukanda wa mwono.

Mukanda wa Usolwelo 20:12, 13 unambe ngwo, atu eswe waze makahindwisa katamba kwononokena “yuma yize yasonewene mu mikanda.” Mikanda yacho yili shimbi jaha jize Yehova makatwaha mu chifuchi chaha. Yehova makanongesa waze eswe makalituna kumwononokena.—Iza. 65:20.

Mukanda wa Daniele 12:2 unambe ngwo, amwe waze hanafu “makaahindwisa hanga akapwe ni mwono wa mutolo, akwo ku sonyi ni sau lia mutolo.” Chisoneko chino chinahanjika ha yize muyikalingiwa kusongo lia kanunu ka miaka—amwe makazuka “mwono wa mutolo,” akwo “sau lia mutolo,” chekwamba, amwe makatwama ku miaka yeswe, akwo kumakaanongesa liakulu.—Uso. 20:15; 21:3, 4.

Achinyongenu ha chino: Chikuma cha yizavu yino yaali ya atu makahindwisa chinapu ngwe cha atu waze anazange kuya ni kutwama mu chifuchi chambala. Akwa-ululi kanapu ngwe yilambala waze matambula mikanda hanga atwame mu chifuchi ni kukalakalilamo, o kakupwa ni utuswilo. Alioze, yihenge kanapu ngwe yilambala waze akutambula mikanda yakutwama shimbu likehe mu chifuchi. Yilambala jacho nyi kanazange kununga ni twama mu chifuchi chacho, katamba kupwa ni yitanga yipema. Chizechene nawa, yihenge waze makahindwisa makafupiwa kukaula shimbi ja Yehova ni kupwa akwa-ululi nyi kanazange kununga ni kutwama mu Paraisu. Chipwe ngwe matambula mikanda ya kutwama mu chifuchi shimbu linji hanji shimbu likehe, nihindu amwe mahasa kupwa akwa-chifuchi chacho, akwo kechi kwatayiza. Yino yinatale ha yitanga yize ayo masolola mu chifuchi chize anatwama ngwe yilambala. Chizechene nawa, waze makahindwisa mba azuke ni mwono wa mutolo hanji kwonwona muchikatala ha yize makalinga mu chifuchi chaha.

Yehova iye Zambi wa zango, nawa kali Zambi ya ululi. (Shimbi 32:4; Samu 33:5) Zango lize akwete mulikasoloka muze makahindwisa akwa-ululi ni yihenge. Alioze, iye makashimbwila hanga waze eswe makahindwisa ononokene shimbi jenyi. Waze mazanga Yehova ni kumwononokena e wika makatwama ni mwono mu chifuchi chaha.