Ha mwaka 1913, Tata, John Mills, yamupapachisa mu Mbonge ya Nova Iorque muze te ali ni miaka 25. Ndumbu Russell yahanjika pande ja upapachiso. Hakupalika cha amwe mashimbu, Tata yaya ku Trinidade, kuze alimbachile ni Constance umwe Njimi nawa Longi wa Mbimbiliya. Tata yakwasa sepa lienyi William R. Brown kusolola “Chinema cha Yitangiwa,” (Foto Drama de Criação). Ayo yanunga ni kuchilinga ndo ha mwaka 1923, muze usoko wa Brown ayile ni kukalakala ku África Ocidental. Tata ni Mama waze eswe te akwete kutalatala cha kuya mu malilu, yanunga mu Trinidade.

Yisemi jami kapwile ni ana livwa, mwana mutangu jina lienyi te Rutherford yoze kulutwe wapwile kasongo wa Sociedade Torre de Vigia de Bíblias e Tratados. Muze nasemukine ha 30 Dezembro 1922 yanguluka jina lia ndumbu Clayton J. Woodworth, yoze te wakusoneka A Idade de Ouro. (Haliapwila Despertai!.) Yisemi jetu kasele tachi hanga tuhwise shikola yikehe, chipwe chocho ayo katukwashile chinji hanga tutese yuma ya ku spiritu ku mwono wetu. Mama te kanyingika kanawa Mbimbiliya. Tata te kakuzanga kutulongesa yishima ya mu Mbimbiliya, ha kuzachisa mujimba wenyi weswe hanga atukwase tunyingike kanawa chize yuma yacho yalingiwile.

Tachi jo janehene mihuko yipema. Atatu a kuli yetu ana a malunga yituya ku Shikola ya Ngiliate. Mapangi jetu atatu kalingile upionelu ha miaka yinji mu Trinidade ni Tabago. Kupalikila mu malongeso ni yilweza yo yipema, yisemi jetu yatutumba “mu zuwo lia Yehova.” Utakamiso wo watukwashile kununga ni kukolela mu zuwo lia ‘Zambi yetu.’—Samu 92:13.

Zuwo lietu liapwile chihela cha mulimo wa kwambujola. Mapionelu te kwe akulikungulwila, hanyima mahanjika hakutwala kuli Ndumbu George Young, umwe ndumbu mishionaliu wa ku Canada yoze wejile ni kumeka Trinidade. Yisemi jetu te kakutulweza  hakutwala kuli atu waze apwile no, usoko wa Brown, waze ayile ku África Ocidental. Yino yeswe yangukwashile hanga nguputuke kwambujola muze te nguli ni miaka kumi.

Ha mashimbu jacho, mikanda yetu te yakusolola zwalala saki ja uwayilo wa mahuza, mingoso ya kuzo ni yuma ya mafwefwe. Hachino, ha mwaka 1936 mangana a yingeleja yalweza nguvulu wa Trinidade hanga akanjise mikanda yetu yeswe. Chocho yitusweka mikanda, alioze yitununga ni kuyizachisa mu usweke ndo haze yahwilile. Yatulweza hanga twambujole mu mbunga, ni kinga, kuzachisa tumafwo ni mafwo akulizezeleka mu kota. Hamwe ni chizavu chize te chakwenda ni mashinyi a kwambujola no mu mbonge ya Tunapuna, yituheta ndo ku mambonge a kusuku mu Trinidade. Chino chapwile chipema chinji! Kulinga yuma yino ya ku spiritu changukwashile hanga angupapachise muze te nguli ni miaka 16.

Yize angulongesele kuli yisemi jetu muze te nguchili kanuke, ni kuputuka kwambujola mu wanuke yangukwashile kuzanga kupwa mishionaliu. Zango liacho lianungine ndo ha mwaka 1944 muze nayile ku Aruba hanga ngukalakale hamwe ni Ndumbu Edmund W. Cummings. Twawahililile chinji ha kukungulula atu kumi ha Chiwanyino cha Kwiwuluka Kufwa cha Yesu ha mwaka 1945. Ha mwaka uze wasulileho, yituputuka chikungulwila chitangu ha tungu liacho.

Hakupalika cha amwe mashimbu, yingwambujola kuli Oris Wiliams, mukwa-mulimo-ni-mukwetu. Oris yazanga kukalila yize te anyingika hakutwala kuli Zambi. Alioze, kupalikila mu longeso lia Mbimbiliya, iye yanyingika kanawa yize Mbimbiliya yakulongesa, mba yamupapachisa ha 5 Janeiro 1947. Kulutwe lia matangwa yitulizanga mba yitulimbata. Iye yaputuka upionelu mu Novembro ya 1950. Hamwe ni Oris mwono wami yipema chinji.

Ha mwaka 1955 yatusanyika ku shikola ya Ngiliate. Muze te tunalilulieka, ami ni Oris yitukatuka ku mulimo uze te twakalakala, yitulanjisa zuwo lietu ni yikumba yikwo, chocho yituhichika Aruba. Ha 29 Julho 1956 yitutambula liploma lia shikola ya Ngiliate ya 27, ni kututuma ku Nigéria.

Muze hanyonga kunyima Oris yamba ngwenyi: “Spiritu ya Yehova muyihasa kukwasa mutu hanga ejilile muze mapalika mu yuma yipema ni yipi mu mulimo wa mishionaliu. Kulisa ni mukwetu-lunga, yami te chishi kuzanga kupwa mishionaliu. Te nakuzanga kupwa ni zuwo ni kusema ana jami. Alioze nalumwine nyonga liami muze nanyingikine ngwami sango lipema katamba kuliambujola kawashi-washi. Muze twahwishile shikola ya Ngiliate yatutuma mu mulimo wa mishionaliu. Muze te tuli mu ulungu, Queen Mary, Worth Thornton yoze te wakalakala mu chipatulo cha Ndumbu Knorr, yatushika ngwenyi, ‘Wenyi upema!’ Iye yatulweza ngwenyi te mutukalakala ku Mbetele. Nahongele muze nevwile lusango wacho! Alioze yingwalumuna nyonga liami ni kuputuka kuzanga Mbetele, kuze napwile ni milimo yeka-ni-yeka. Ha milimo yacho, uze nazangile chinji wapwile kukalakala ku chipatulo cha kutambwila ngeji. Nakuzanga atu, nawa mulimo uno wangukwashile kunyingika kanawa mandumbu mu Nigéria. Atu anji te kakuheta ku Mbetele a too ni fufuta, hanahongo ni pwila hamwe ni zala. Chapwile chipema kukwasa wano mandumbu hakwaha yize te akufupiwa. Yino yeswe te yili milimo ya Yehova, kashika te yakungunehena uwahililo ni chiseke.” Ewa, hita mulimo watukwashile kukola ku ufulielo.

Ha chimwe kuliwana cha asoko mu Trinidade 1961, Ndumbu Brown yatulweza yimwe yuma yipema yize amwene mu África. Ni yami yingwalweza kukola cha mulimo wetu mu Nigéria. Ndumbu Brown yangukangayika ni kulweza Tata ngwenyi: “Johnny, ena kanda uchiya kama mu África, alioze Woodworth hayamo!” Tata yamba ngwenyi: “Worth, nunga mu mulimo we! Nunga lume!” Utakamiso wa mandumbu wano akola ku ufulielo, wakolesele zango liami lia kununga mu mulimo wa kwambujola.

Ha mwaka 1962, yangusanyika ku shikola ya Ngiliate ya 37, yitulilongesa ha tukweji kumi.  Kusulaho, Ndumbu Wilfred Gooch, yoze te mukulwana mu komite ya mutango mu Nigéria, yaya ku shikola ya 38, chocho yamutuma mu Inglaterra. Yinguputuka kusongwela mulimo wa mutango mu Nigéria. Ha kwimbulula chilweza cha Ndumbu Brown, yingwenda chinji hanga ngunyingike ni kuzanga mandumbu jami mu Nigéria. Ayo kakapwile ni yikumba yinji yize mutu mweswawo atamba kupwa nayo, alioze uwahililo wo ni chiseke cho yasolwele ngwo, mwono wamwenemwene kuwatalile wika ha mbongo ni yikumba yize mutu mahasa kupwa nayo. Chipwe chocho te nakuwahilila kwamona chize anasoloka kanawa ku kukunguluka. Muze te akwiza ku Kukunguluka cha mambonge anji te kakwiza mu mashinyi anene-anene ni mu bolekaja * (tulela waze akuzachisa mu chifuchi cho). Tulela jacho kanji-kanji te kakwasoneka tumwe tuyishima. Yishima yacho, chimwe te chakwamba ngwo: “Masoto-soto a meya mahasa kuneha kalunga-lwiji.”

Chishima chacho chapwile ni kulumbunuka ngwo, Tachi jize hita mutu masa; yetu twakuwezaho ni jetu. Ha mwaka 1974, kuchizako Estados Unidos, Nigéria yiyipwa chifuchi chitangu chize chapwile ni akwa-kwambujola 100,000. Mulimo te unende kanawa!

Muze mulimo wa kwambujola te unakolo, jita yiyiputuka mu Nigéria ha mwaka 1967 ndo 1970. Ha amwe tukweji, mandumbu jetu ku Biafra sali likwo lia Lwiji Níger kakapwile nawa ni ukwaso wa mutango. Te twakwatwalila kulia cha ku spiritu. Ngwe chize twatongola ku uputukilo, mumu lia kulemba ni kujikijila kuli Yehova, chocho yituzauka lwiji wacho ha yisuho yinji.

Nakwiwuluka wenyi ukalu uze te twakulinga wa kuya sali likwo lia Níger, ha kusa mwono wetu mu ponde mumu lia jita, misongo ni yipikalo yikwo nawa. Chapwile chikalu kupalika maswalale a federal, alioze te chikalu chinji kuli waze apwile sali lia Biafra. Ha chisuho chimwe, nazaukile Lwiji Níger ha ufuku mu wato uze te unakatuka ku Asaba ni kuya ku Onitsha, nayileko hanga ngutakamise tulayi waze apwile mu Enugu. Mu wenyi ukwo yinguya ni kutakamisa makulwana amu mbonge ya Aba. Mu Port Harcourt, kukunguluka chetu chahwile ni yilemba muze maswalale a federal alukukilile maswalale waze apwile ku Biafra.

Kukunguluka chino chapwile chilemu ha kuhwimisa mbunge ja mandumbu jetu ha kwasolwela ukwaso wa zango lia Yehova ni kwakwasa ha yize te anafupiwa hanga ehuke yuma ya mafwefwe ni kulinunga. Mandumbu mu Nigéria kakumbile kanawa yipikalo yino. O yasolola zango lize liahiana kole ya munyachi, chocho yafunga kulinunga cho cha Ukristu. Chapwile chiwape kupwa hamwe no muze te anapalika mu yipikalo!

Ha mwaka 1969, Ndumbu Milton G. Henschel kapwile kasongo ha kukunguluka cha mambonge cha yifuchi yinji, “Sambukila Hano Hashi,” chize chalingiwile mu chihela cha kwashila konda ya Yankee, mu Nova Iorque, yingulilongesa chinji kuli iye. Chino changukwashile, mumu ha mwaka 1970 yitulinga kukunguluka cha yifuchi yinji mu Lagos, Nigéria, chakwamba ngwo, “Atu a Mbunge Yipema.” Kukunguluka chino chalingiwile muze jita te hiyahwa, twahashile kuchilinga ni ukwaso wa Yehova. Kukunguluka chacho chalingiwile mu malimi 17, nawa hapwile atu 121,128. Ndumbu Knorr ni Henschel ni mandumbu akwo waze akatukile ku Estados Unidos ni Inglaterra kamwene umwe upapachiso wa atu anji 3,775 mukachi ka upapachiso uze hiunalingiwa kukatuka ha Pentekoste! Kukwasa kululieka kukunguluka chino, chapwile mulimo unene ku mwono wami. Kwoka cha akwa-kwambujola kuchapwile wika kwoka cheswacho, alioze chapwile chinene kuhiana!

Ha miaka kuhiana 30 yize napwile mu Nigéria, ha mashimbu amwe te nakukalakala ngwe kalayi wa kwendangana nawa ngwe kalayi wa kumeneka yifuchi mu África Ocidental. Mishionaliu kasakwililile chinji ha utakamiso uze hita mutu atambwile. Chapwile chipema ha kuya ni kwakolweza ngwo ayo te keshi ukawo. Mulimo uno wangukwashile kunyingika ngwo, kusolola zango hali hita mutu yili jila yipema yakwakwashilamo hanga afunge tachi ni kulinunga cha ululikiso wa Yehova.

 Twahashile wika kukumba yipikalo ni misongo yize jita yanehene ni ukwaso wa Yehova. Nihindu te twakumona ukwaso wa Yehova. Oris yamba ngwenyi:

“Yetweswe aali te twakuyiza chinji malária. Ha shimbu limwe, Worth yamutwala ku shipitali mu Lagos mwene chakuhona kunyingika. Chocho yangulweza ngwo, iye kechi kumona mwono, alioze yahinduka! Muze haputuka kulinyingika, iye yambujola Wanangana wa Zambi kuli lunga yoze te unamuwuku. Kulutwe, ami ni Worth yituputuka kumeneka lunga wacho te avuluka ngwo Nwambiwe, yoze wazangile kulilongesa Mbimbiliya. Yatayiza umwenemwene, kulutwe yapwa mukulwana wa mu chikungulwila mu Aba. Ni yami nakwashile atu anji kupwa tuvumbi twa Yehova, chipwe akwa-Musulumanu. Twazangile chinji kunyingika ni kuzanga atu amu Nigéria, chako cho, mianda ni malimi jo.”

Lino liapwile longeso likwo: Mba mulimo wetu wende kanawa mu chifuchi cha yilambala, chafupiwile kuzanga mandumbu jetu chipwe ngwe chako cho chalisa ni cha yetu.

Muze hitwakalakala mu Mbetele ya Nigéria, ha mwaka 1987 yatutuma ngwe mishionaliu mu limwe tungu lipema lia Lucia mu Caribe. Uno wapwile mulimo upema chinji, alioze newo wapwile ni yipikalo yawo. Kulisa ni África kuze te malunga akumbata mapwo anji, kuno ku Lucia malunga te kakutwama ni mapwo chakuhona kwambata kulita ni shimbi. Tachi ja Liji lia Zambi, jakwashile alongi jetu anji a Mbimbiliya kwalumuna mwono wo.

Mumu lia ushinakaji ha mwaka 2005 Chizavu cha Tusongo yatutuma ku chishina chinene ku Brooklyn, mu Nova Iorque, E.U.A. Hita tangwa nakuchichimieka Yehova mumu lia mukwetu-pwo Oris. Ha mwaka 2015 iye yamushiha kuli mukwa-kole yetu kufwa, kufwisa mutu chapwa chikalu chinji. Iye kapwile chikwashi mupema nawa pwo wa zango. Ha miaka 68 yize twapwile hamuwika te nakumuzanga hita tangwa. Yitunyingika ngwetu, jila ya uwahililo mu ulo ni mu chikungulwila, yili kuvumbika wata, kukonekena akwetu ni mbunge yeswe, kununga ni kulikehesa ni kusolola mihuko ya spiritu.

Muze te twakunenganyana, te twakufupa ukwaso wa Yehova hanga tununge ni kulinga kanawa mulimo wetu. Muze apwile ni kutwalumuna yiteli, te twakumona ngwetu yuma yinayi ni kupema hita shimbu, alioze yuma yahiana kupema yili kulutwe!—Iza. 60:17; 2 Kori. 13:11.

Ku Trinidade ni Tobago, Yehova kawahishile mulimo wa yisemi jami ni mandumbu akwo nawa. Kulita ni lusango wa haliapwila, atu 9,892 hanjila mu uwayilo wamwenemwene. Mu Aruba, mandumbu anji kasele tachi hanga akolese chikungulwila chitangu chize napwile. Haliapwila ha tungu liacho hali yikungulwila ya jama 14. Hakutwala ku Nigéria, akwa-kwambujola hapwa unji wa 381,398. Nawa ha tungu lia Lucia, atu 783 kanakwase Wanangana wa Yehova.

Haliapwila nguli ni miaka 90. Samu 92:14 yinambe kuli waze atumbile mu zuwo lia Yehova ngwo: “Kumakema mihuko ndusu mu ushinakaji wo. Kumakahaka. Kumakapwa a wisu.” Nakusakwilila chinji ha kuzachisa mwono wami mu mulimo wa Yehova. Fumbo lize natambwile ku wanuke liangukwasa kulingila Yehova. Mumu lia zango lienyi lingunu, Yehova kanangweche hanga ngununge “mu yiize” yenyi.—Samu 92:13.