1. Kuchi Ka-Samaria yoze awukile kuli Yesu asolwele usakwililo?

MALUNGA kumi kapwile mu ponde yinene. Ayo kapwile ni mbumba, kashika kakapwile ni kushimbwila ngwo meza kahinduka. Alioze tangwa limwe, ayo yamona Longeshi Munene, Yesu kusuku. Ayo kevwile ngwo, Yesu te kanawuku misongo yeka ni yeka, kashika o apwile ni shindakenyo ngwo no maawuka. Chocho yakololoka ngwo: “Yesu, Mwata tuvwile kama keke!” Hachino, malunga jacho kumi yaawuka. Kutushi ni kuyambashana ngwetu, ayo eswe kanakawahilila ha keke yize Yesu anakaasolwela. Umwe wa kuli ayo kakasakwilile * wika Yesu mu mbunge, alioze kachisolwele ku yitanga. Lunga wacho te Ka-Samaria, chipwe chocho yahalisa Zambi “ni liji linene.”—Luka 17:12-19.

2-3. (a) Yika muyihasa kulingiwa ha mashimbu amwe? (b) Yika mutulilongesa ha mutwe uno?

² Ngwe Ka-Samaria wacho, twatamba kusakwilila atu waze akutulingila yuma yipema. Alioze ha mashimbu amwe, mutuhasa kuvulama kusakwilila akwetu hanji kwalweza yize tunevu ku mbunge mumu lia yitanga yo yipema.

³ Ha mutwe uno, mutulilongesaho ulemu wa kusakwilila akwetu ha yize mutuhanjika ni yize mutulinga. Mutulilongesa nawa yimwe yilweza ya mu Mbimbiliya ya atu waze asakwililile  ni waze kakasakwililile. Nawa mutushimutwina yihela yize mutuhasa kusolwelamo usakwililo wetu.

4-5. Mumu liaka twatamba kusakwilila akwetu?

⁴ Yehova hanatwehe chilweza cha chize mutusakwilila akwetu. Jila yimwe yize iye akuchilingila, yili kuyukisa atu waze akumuvwisa kuwaha. (2 Samwe. 22:21; Samu 13:6; Mateu 10:40, 41) Nawa Yisoneko yinatukolweza hanga ‘twimbulule Zambi, ngwe ana a zango.’ (Efwe. 5:1) Kashika, chikuma chilemu cha mumu liaka twatamba kusakwilila akwetu, chili ngwo tunazange kwimbulula Yehova.

⁵ Tutalenu chikuma chikwo cha mumu liaka twatamba kusakwilila akwetu. Kusakwilila chapwa ngwe kulia chipema chize tunazange kulianyina ni akwetu. Nyi twanyingika ngwetu akwetu kasakwilila mumu lia yize twalingila, chino chakutuvwisa kuwaha chinji. Nawa nyi twasakwilila akwetu ha yize matulingila, no kakwivwa kuwaha. Mutu nyi twamusakwilila manyingika ngwo tachi jize asanga ha kutukwasa hanji kutwaha chimwe kujalitokelele. Chocho, usepa wetu ni mutu wacho muukola kuhiana.

6. Kulifwa chika chili ha maliji jetu a usakwililo ni muhuko wa oru?

⁶ Kusakwilila chapwa chilemu chinji. Mbimbiliya yinambe ngwo: “Liji lia kuhanjika haze hanalite liapwa ngwe mihuko ya oru mu mutonga wa prata.” (Yishi. 25:11) Muhuko wakulinga ni oru uze uli ha chikwachilo cha prata wakuwaha chinji. Nawa ukwete ulemu unji. Kuchi muwivwa nyi mutambula chawana cha mutapu au? Chochene, maliji waze musakwilila no akwenu mahasa kupwa ni ulemu wacho. Chikwo nawa, umwenemwene uli ngwo, muhuko  wakulinga ni oru wakushimbula miaka yinji. Chizechene nawa, maliji a usakwililo mahasa kununga ku mbunge ya yoze waevwa ku mwono wenyi weswe.

7. Ngwe chize twamona ha Samu 30:12, kuchi Ndawichi ni atu akwo waze asonekene masamu asolwele usakwililo wo?

⁷ Tuvumbi anji a Zambi ku shakulu kapwile ni kusakwilila. Umwe wa kuli ayo kali Ndawichi. (Tanga Samu 30:12.) Iye yasakwilila mumu lia uwayilo wa linanga, chocho yausolola ku yitanga yenyi. Yahana yuma yinji ya ulemu yize te matunga nayo tembele. Chisemuko cha Asafwe no kasakwililile Yehova ha kwimba masamu hanji miaso ya uhaliso. Ha umwe mwaso, ayo yachichimieka Zambi mumu lia ‘yitanga yenyi ya kukomwesa.’ (Samu 75:1) Kwamba pundu, Ndawichi ni chisemuko cha Asafwe kasakwililile chinji Yehova hamukunda wa yiwape yeswe yize azukile kuli iye. Shina muhasa kwimbulula wano akwa-kwimba masamu?

8-9. Kuchi postolo Paulu asolwele usakwililo wenyi kuli mandumbu jenyi, nawa yika yalingiwileko?

⁸ Postolo Paulu, kasakwililile mandumbu jenyi ni kusolola usakwililo wacho mu mutapu uze te akuhanjika hakutwala kuli ayo. Mu yilemba yenyi, iye te kakusakwilila Zambi hamukunda wa ayo. Chikwo nawa, iye kasolwele usakwililo wenyi ha mikanda yize aasonekenene. Kukatuka ha versu 1 ndo ha versu 15 ya mukanda wa A-Roma 16, Paulu yatongola majina 27 ja akwa-Kristu-ni-akwo. Paulu yewuluka Prisila ni Akwila waze “atumbikile kota joene” hamukunda wa iye, nawa yatongola Febe ngwe “mukwa kukwasa anji,” kuchingako ni Paulu. Iye kachichimiekene mandumbu jacho azango, mumu lia milimo yo yikalu.—Roma 16:1-15.

⁹ Paulu kanyingikine ngwenyi, mandumbu jenyi no te yihenge, alioze ha maliji jenyi akasula a mukanda wa A-Roma, iye yalihulikila ha yitanga yo yipema. Mandumbu jacho kawanyine utakamiso ha kwivwa maliji a Paulu kanaatange mu chikungulwila. Chocho usepa wo ni Paulu yiukola chinji kuhiana. Shina wakusakwilila ha yuma yipema yize mandumbu je akuhanjika hanji akulinga mu chikungulwila chenu?

10. Yika mutuhasa kulilongesa ha chize Yesu asakwilile tumbaji twenyi?

¹⁰ Ha sango jize atumine ku yimwe yikungulwila ku Azia Yikehe, Yesu yasakwilila tumbaji twenyi ha mulimo uze alingile. Chakutalilaho, hakutwala ku chikungulwila cha Tayatera, iye yaputuka lusango wenyi ngwenyi: “Ngunanyingika yitanga ye, ni zango, ni ufulielo, ni uvumbiko, ni kunyongonona, ni yitanga ye ya kusula yahiana yitangu.” (Uso. 2:19) Yesu kakatongwele wika mulimo wo unji, alioze yaachichimieka nawa ha ndako jize jaatwalile ku yitanga yipema. Chipwe ngwe, Yesu kazangile kuhana yiyulo kuli amwe mu Tayatera, nihindu iye yaatakamisa kuuputukilo ni kusongo lia sango jenyi. (Uso. 2:25-28) Kunyonga ha wata uze Yesu akwete ngwe mutwe wa yikungulwila yeswe, kafupiwile kutuchichimieka ha mulimo uze twakumulingila. Chipwe chocho, iye kakuchilinga ni zango lieswe. Chino chili chilweze chipema kuli makulwana amu chikungulwila.

11. Ngwe chize anasolola ha A-Hepreu 12:16, kuchi Esau ahonene kusolola ulemu ku yuma yisandu?

¹¹ Chaluyinda, atu amwe ku shakulu kakasakwililile. Chakutalilaho, Esau chipwe ngwe kamulelele kuli yisemi waze te akuzanga ni kuvumbika Yehova, nihindu iye kahonene kulemesa yuma yisandu. (Tanga A-Hepreu 12:16.) Kuchi kuhona chenyi usakwililo chasolokele  zwalala? Chasolokele muze alanjishile ukulwana wenyi kuli mwanakwo Yakomba, hamukunda wa chimwe kulia. (Uputu. 25:30-34) Kulutwe, Esau yanenganyana ha chiyulo chize akwachile. Chipwe chocho, iye kakalemesele yuma yize apwile nayo, kashika kakapwile nawa ni yize mamba mumu lia kuhona kutambula yiwape ya ukulwana wenyi.

12-13. Kuchi A-Izalele ahonene usakwililo, nawa yika yalingiwileko?

¹² A-Izalele kapwile ni yuma yinji yize te muyaakwasa kusolola usakwililo. Ayo kaatuswile mu undungo, muze Yehova anehene Kumi lia Luyinda mu Engitu. Yehova yaalamwina ku ponde ha kushiha maswalale eswe a Engitu mu Kalunga-Lwiji Muchila. A-Izalele kanakawahilila chinji, chocho yemba mwaso wa kukumba hanga ahalise nawo Yehova. Alioze shina ayo kanungine ni kusolola usakwililo wo?

¹³ Muze A-Izalele aliwanyine ni yipikalo yikwo, ayo yavulama yuma yeswe yipema yize Yehova aalingilile. Hachino, ayo yahona usakwililo. (Samu 106:7) Mu mulali uka? Mbimbiliya yinambe ngwo: “Chikungulwila cheswe cha A-Izalele chalinyenyetele ni Mose ni Arone”—kumana kulinyenyeta cho te chinakwate hali Yehova. (Kutuhu. 16:2, 8) Iye yevwa yikola ku mbunge mumu atu jenyi kahonene usakwililo. Chocho kulutwe yamba ngwenyi, A-Izalele jacho te mafwila mu puya, kuchizako Yoshua ni Kalemba. (Kwa. 14:22-24; 26:65) Tutalenu chize mutwehuka kukaula yilweza yino yipi ni kwimbulula yilweza yipema.

14-15. (a) Kuchi waze alimbata mahasa kusolola usakwililo kuli umwe ni mukwo? (b) Kuchi yisemi mahasa kulongesa ana jo chize atamba kusakwilila akwo?

¹⁴ Mu usoko. Asoko kakuyuka chinji nyi malichichimieka ni kulisakwilila umwe ni mukwo. Waze alimbata nyi malichichimieka umwe ni mukwo, chino muchikolesa usepa wo. Nawa chino chakwakwasa kulikonekena umwe ni mukwo. Lunga yoze wakusakwilila mukwo-pwo keshi kumona wika yuma yipema yize iye akulinga hanji akwamba, alioze kakusolola usakwililo wenyi ha “kumuhalisa.” (Yishi. 31:10, 28) Nawa pwo yoze ukwete mana kakulweza mukwo-lunga yitanga yize akuzanga kuli iye.

¹⁵ Yisemi, kuchi munuhasa kulongesa ana jenu hanga apwe ni kusakwilila akwo? Nyingikenu ngwenu, ana jenu membulula yize nwakuhanjika ni yize nwakulinga. Kashika pwenu chilweza chipema chakusakwilila ana jenu  muze malinga yuma yipema. Chikwo nawa, longesenu ana jenu hanga apwe ni kusakwilila akwo muze maalingila yuma yipema. Kwasenu ana jenu hanga anyingike ngwo kusakwilila akwo ni mbunge yeswe muchihasa kukwasa akwo. Chakutalilaho, umwe mwana-pwo avuluka ngwo Clary yamba ngwenyi: “Mama muze te ali ni miaka 32 susumuku yasala ni kulela ana atatu ukawenyi. Muze nakumbanyishine miaka 32 ni yami yingumona lamba lize mama amwene. Chocho yingumusakwilila ha tachi jize asele hanga atulele hamwe ni mandumbu jami. Ha mashimbu wanoene, iye kangulweza ngwenyi, maliji jami kamukwachile chinji ku mbunge, kashika ndo ni haliapwila kakumuvwisa kuwaha.”

16. Hana chilweza chize chinasolola ngwo kusakwilila akwetu muchihasa kwakolweza.

¹⁶ Mu chikungulwila. Muze mutusakwilila mandumbu jetu, acho tunaakolweza. Chakutalilaho, Jorge, umwe mukulwana wamu chikungulwila yoze uli ni miaka 28 kayijile chinji. Chocho kakahashile kukunguluka ha kakweji wa muwundu. Chipwe muze aputukile kukunguluka, nihindu te keshi kuhasa kulinga chihanda ha kukunguluka. Ndumbu Jorge yamba ngwenyi: “Te nakulivwa ngwe kuchishi ulemu mumu lia musongo wami ni kuhona kulinga milimo ya mu chikungulwila. Alioze hakuhwa cha kukunguluka chimwe, umwe ndumbu yangulweza ngwenyi: ‘Ndumbu ngunakusakwilila ha chilweza che chipema chize asoko jami anakaula. Kota hiwavula, alioze pande jize te wakuhanjika jakututakamisa chinji. Jakutukwasa hanga tukole ku ufulielo.’ Maliji wano kangukwachile ku mbunge, chocho yinguputuka kulila. Wano e maliji te ngunafupiwa ha shimbu liacho.”

17. Ngwe chize anatongola ha A-Kolosu 3:15, kuchi mutuhasa kusakwilila Yehova ha kupwa chihanyi?

¹⁷ Zambi yetu chihanyi. Yehova kakutwaha kulia chinji cha ku spiritu. Chakutalilaho, twakutambula malongeso angunda ha kukunguluka chetu, ha mikanda ni ha ma site jetu. Kutala kanda uchivwa kama jimwe pande, kutanga chimwe chikuma hanji kutala chinema, yiwamba ngwe chochene, ‘Yino ye te ngunafupiwa.’ Kuchi mutuhasa kusakwilila Yehova? (Tanga A-Kolosu 3:15.) Jila yimwe yakusakwililamo ha yawana yipema yize akutwaha yili kulemba kuli iye mashimbu eswe.—Tia. 1:17.

18. Mu majila aka mutuhasa kusolwelamo usakwililo ku Zuwo lietu lia Wanangana?

¹⁸ Yetu nawa twakusakwilila Yehova muze twakufunga yihela yetu ya uwayilo ha kuyikomba  ni kuyilulieka kanawa. Twakulianyina mulimo wa kukomba ni kufunga Mazuwo a Wanangana, nawa mandumbu waze akukalakala ku yikwata ya kuhanjikila ni ya yinema kakuyifunga hanga yichine kupiha. Nyi twafunga kanawa Mazuwo jetu a Wanangana, mashimbula nawa kechi kufupiwa milimo yinji. Hachino, mutufunga mbongo hanga tutunge Mazuwo a Wanangana hashi heswe ni kutungulula akwo.

19. Yika walilongesa ha chilweza cha kalayi wa mbonge ni mukwo-pwo?

¹⁹ Waze akukalakala chinji mumu lia yetu. Nyi mutusakwilila atu jacho, maliji jetu mahasa kwalumuna manyonga jo ha mulimo ukalu uze akulinga hanji kapinda yoze akupalika. Tutalenu chilweza cha umwe kalayi wa mbonge ni mukwo-pwo. Ayo kahongele chinji mumu kambulwile sango lipema mu ivernu ha tangwa lia muwundu. Kwapwile chishika chinji, chocho mukwo-pwo yazala kazaku wa chishika. Mukwachako, yalweza mukwo-lunga ngwenyi, iye te kechi kuhasa kununga nawa mu mulimo wa kumeneka yikungulwila. Ha chimene chacho, ayo yatambula mukanda kukatuka ku chishina, mukanda wacho te unahanjika hakutwala kuli pwo. Mukanda yiumuchichimieka ha mulimo wenyi wa kwambujola ni ha kunyongonona chenyi. Mukanda yiusolola ukalu uze wakupwa ha kututuluka ku zuwo ni zuwo hita poso. Mukwo-lunga yamba ngwenyi: “Maliji wano a utakamiso kamukwachile ku mbunge, kashika tunde hoho, kanda eza kwamba nawa ngwo mecha mulimo wacho. Hachino, ha yisuho yinji muze te nakufupa kwecha mulimo wacho, iye te kakungukolweza hanga tununge.” Mandumbu wano kalingile miaka 40 mu mulimo wa kumeneka yikungulwila.

20. Yika twatamba kulinga hita tangwa, nawa mumu liaka?

²⁰ Tusenu tachi hanga tupwe ni kusakwilila akwetu ha yize mutuhanjika ni ha yize mutulinga. Maliji jetu aku mbunge hanji yitanga yetu muyihasa kukwasa akwetu alivwe kanawa mu chifuchi chino chize atu keshi kusakwilila akwo. Kusakwilila akwetu ni mbunge yeswe, muchihasa kutukwasa hanga tulinge usepa uze mununga ndo ku miaka ya mutolo. Chahiana ulemu mutwimbulula Tata yetu chihanyi nawa yoze wakusakwilila akwo, Yehova.