1-2. (a) Chitanga chika Mose asolwele, nawa yika iye alingile? (b) Mumu liaka twatamba kupwa yimbovu hanji akwa-kulikehesa?

MBIMBILIYA yakwamba hali Mose ngwo, mukwa “kushimbika iye wahianyine atu eswe apwile hashi.” (Kwa. 12:3) Shina chino chinalumbunuka ngwo Mose kakapwile ni tachi, chikakajanyi hanji ngwo te kakwivwa woma wa akwo? Atu anji che akumona mutu yoze walikehesa. Alioze chino hi chamwenemwene ko. Mose kapwile kavumbi ka Zambi wa tachi, hamu nawa te keshi kukakajana. Ni ukwaso wa Yehova, yaya ni kuhanjika ni mwanangana wa ndundo wa mu Engitu. Nawa, kota kasongwelele atu 3,000,000 mu puya ni kukwasa vungu lia Izalele hanga akumbe akwa-kole jo.

² Yetu kutushi kupalika mu yuma yize Mose apalikile, alioze hita tangwa twakuliwana ni atu hanji yuma yize yakukaliwisa tupwe akwa-kulikehesa. Chipwe chocho, kakutukwasa hanga tupwe ni chitanga chino. Yehova kanalakenya ngwenyi, “yimbovu kumahinga chifuchi.” (Samu 37:11) Shina wakulimona ngwe uli mukwa-kulikehesa? Kutala akwenu no che akukumona? Shimbu kanda tukumbulula yihula yino, twatamba kunyingika yize kulikehesa chinalumbunuka.

3-4. (a) Kulikehesa yika chinalumbunuka? (b) Yitanga yika yiwana yize tunafupiwa mba tupwe akwa-kulikehesa, nawa mumu liaka?

³ Kulikehesa * chapwa ngwe chimwe chuma chakusa ulombo  upema. Mu jila yika? Ngwe chizechene chilangaji akuchinga ulombo weka ni weka hanga alinge chuma chipema, ni yetu twatamba kuchinga yitanga yipema yeka ni yeka mba tupwe akwa-kulikehesa. Yitanga yacho yimwe yili umbovu, kwononoka, kushimbika ni hamu. Mumu liaka tunafupiwa yitanga yino mba tuvwise Yehova kuwaha?

⁴ Yimbovu e wika akwononokena upale wa Zambi. Mba tulinge upale wa Zambi, twatamba kupwa akwa-kushimbika. (Mateu 5:5; Ngala. 5:23) Muze mutulinga upale wa Zambi, acho twakuvwisa Satana uli. Alioze chipwe ngwe tuli akwa-kulikehesa nawa akwa-kushimbika, nihindu atu anji hano hashi ha Satana kakutuvwila kole. (Yoa. 15:18, 19) Hachino, tunafupiwa hamu mba tukumbe Satana.

5-6. (a) Mumu liaka Satana keshi kuzanga akwa-kulikehesa? (b) Yihula yika mutukumbulula?

⁵ Mutu yoze keshi kulikehesa kali mukwa-kulizata, kakwivwa uli chamuvwila, nawa keshi kwononokena Yehova. Mutu wacho kakwimbulula Satana. Kashika kanda ukomoka nyi mutu wacho keshi kuzanga akwa-kulikehesa! Akwa-kulikehesa kakusolola upi wenyi hatoma, mumu o kakwete yitanga yize iye keshi nayo. Chikwo nawa, chipwe Satana, ayo kakumusolola ngwo mukwa-mahuza. Mumu liaka? Mumu yeswayo malinga hanji mahanjika, nihindu kechi kukwika yimbovu kulingila Yehova!—Yombi 2:3-5.

⁶ Ha mashimbu aka muchihasa kupwa chikalu kulikehesa? Nawa mumu liaka twatamba kununga ni kulikehesa? Mba tukumbulule yihula yino, tutalenu chilweza cha Mose, A-Hepreu atatu waze apwile mu undungo mu Babilonia ni Yesu.

7-8. Yika Mose alingile muze amuhonene vumbi?

⁷ Muze matwaha wata: Muchihasa kupwa chikalu kuli waze akwete wata anunge ni kulikehesa, chipi-chipi nyi mutu yoze ayo anayulu maahona vumbi hanji kwakumika ha yize akulinga. Kutala chino hichinalingiwa kama kuli yena? Kuchi muwivwa nyi umwe mu usoko we masolola yitanga yacho? Kuchi mulinga? Tutalenu chize Mose alingile ha yitanga yacho.

⁸ Yehova katongwele Mose ngwe kasongo wa A-Izalele ni kumwaha chiteli cha kusoneka  shimbi jize te jakusongwela vungu liacho. Te chakusoloka pundu ngwo, Yehova mwe te wakukwasa Mose. Chipwe chocho, mandumbu jenyi Miriame ni Arone, yalimika nenyi ni kumwamba ngwo, kakwachile chiyulo chipi hamukunda wa pwo yoze ambachile. Atu amwe waze ali ni yiteli ngwe ya Mose mahasa kwivwa uli hanji kufupa kufunyisa upi ha upi, alioze Mose kakachilingile. Iye te keshi kuvutuka ni kawashi. Iye nawa yeta kuli Yehova hanga ahwise musongo wa Miariame. (Kwa. 12:1-13) Mumu liaka Mose alingile chocho?

9-10. (a) Yika Yehova anazangile hanga Mose anyingike? (b) Yika miata amu usoko ni makulwana amu chikungukwila mahasa kulilongesa hali Mose?

⁹ Mose kechele Yehova hanga amufumbe. Ha miaka 40 muze te Mose uchili mu usoko wa wanangana mu Engitu, iye te hi chimbovu ko. Ha shimbu limwe, iye yatenuka chocho yashiha Ka-Engitu yoze te unalingi yuma yipi hali Ka-Izalele. Mose yanyonga ngwe, Yehova te mawahilila ha yize alingile. Yehova yakwasa Mose ha miaka 40 hanga anyingike ngwo, mba asongwele kanawa vungu lia Izalele, iye te kafupiwile wika hamu, alioze ni umbovu. Mba apwe chimbovu, iye te kanafupiwa nawa kulikehesa, kwononoka ni kushimbika. Iye yakaula kanawa fumbo liacho, chocho yapwa kasongo mupema.—Kutuhu. 2:11, 12; Yili. 7:21-30, 36.

¹⁰ Musono, makulwana amu chikungulwila ni miata amu usoko, katamba kwimbulula chilweza cha Mose. Muze akwahona vumbi, ayo keshi kutenuka ni kawashi. Ni kulikehesa cheswe, ayo kakutayiza uhenge wo. (Chilu. 7:9, 20) Ayo nawa kakushishika ha kukaula usongwelo wa Yehova muze anatale umwe kapalia. Chipwe chocho, kakuchilinga ni umbovu. (Yishi. 15:1) Miata amu usoko ni makulwana amu chikungulwila waze akulinga chocho, kakuvwisa Yehova kuwaha, kakuneha sambukila ni kuhana chilweza cha kulikehesa kuli akwo.

11-13. Chilweza chika atuselele A-Hepreu waze atatu?

¹¹ Muze matuhungumiona: Putu ku mashimbu a kunyima, manguvulu kakuhungumiona tuvumbi twa Yehova. Ayo mahasa kutulamikiza ngwo twakulinga yuma yinji yipi, alioze chikuma akutusumina mulonga chili mumu ‘twakwononoka kuli Zambi, hi kuli atu ko.’ (Yili. 5:29) Mahasa kutukekuna, kutusa mu kamenga hanji kutuhungumiona. Chipwe chocho, ni ukwaso wa Yehova, twakulihumikiza ni kulikehesa ha yuma yeswayi.

¹² Tutalenu chilweza cha A-Hepreu atatu waze apwile mu undungo—Hanania, Mishaele ni Azaria. * Mwanangana wa Babilonia yaalweza hanga awayile kaponya wa oru. Ni vumbi  lieswe, yamulumbunwina mumu liaka ayo katambile kuwayila kaponya wacho. Ayo yanunga ni kwononokena Zambi, chipwe ngwe mwanangana kaalwezele ngwo maakonga mu lutengo wa kahia. Yehova kazangile kulamwina akweze jacho ha shimbi lizeliene, alioze ayo kakanyingikine ngwo iye che te malinga. Chipwe ngwe, kakanyingikine yize Yehova te ananyongo hali ayo, nihindu yatayiza yeswayo te muyilingiwa ku mwono wo. (Danie. 3:1, 8-28) Ayo kasolwele ngwo, akwa-kulikehesa kakwete hamu liamwenemwene. Kashika, chipwe ngwe mianangana matwamba hanga twehuke Yehova, hanji amwe mamba ngwo matuhungumiona nyi twalingile yize ayo anazange, hanji kutumwesa lamba nihindu yino kuyichi kutukinda kuwayila Yehova.—Kutuhu. 20:4, 5.

¹³ Nyi ushishiko wetu kuli Zambi mupwa mu cheseko, shina mutwimbulula A-Hepreu wano atatu? Ni vumbi lieswe twakufuliela ngwetu, Yehova matufunga. (Samu 118:6, 7) Twakusolola umbovu ni vumbi kuli waze akulimika ni yetu. (1 Petu. 3:15) Twakulituna kulinga yuma yize muyihasa kupihisa usepa wetu ni Yehova.

14-15. (a) Yika muyihasa kulingiwako muze tunazakalala? (b) Kulita ni Izaia 53:7, 10, mumu liaka mutuhasa kwamba ngwetu, Yesu kali chilweza chipema cha mutu yoze masolola kulikehesa muze anazakalala?

¹⁴ Muze tunazakalala: Tulieswe twakuzakalala ha mukunda wa yikuma yeka ni yeka. Mutuhasa kuzakalala muze tunambe kulinga yeseko ya ku shikola hanji muze tunambe kulinga umwe mulimo. Hanji mutuhasa kuzakalala muze tunayi ku shipitali hanga atupime. Muze tunazakalala muchihasa kupwa chikalu kulikehesa. Hachino, chuma chize te kuchishi kutupinjisa muchihasa kutupinjisa mumu lia kuzakalala. Mutuhasa kuhanjika maliji waze kalitele kuli akwetu ni kuhona kwasolwela zango. Nyi hiunazakalala hengwola chilweza cha Yesu.

¹⁵ Ha tukweji akasula hano hashi, Yesu kanakazakalala chinji. Kanyingikine ngwenyi te mamushiha, nawa ngwenyi te mamona lamba linji. (Yoa. 3:14, 15; Ngala. 3:13) Ha tukweji amwe muze te kanda achifwa, iye yamba ngwenyi te kanazakalala. (Luka 12:50) Nawa ha amwe matangwa muze te kanda afwa, Yesu yamba ngwenyi: “Haliapwila mbunge yami yinalipikala.” Maliji waze azachishile muze alembele kanasolola ngwo te kakulikehesa ni kwononokena Zambi, hakwamba ngwenyi: “Tata, ngulamwine ha ola yino. Alioze ha chikuma chino hinguneza ha ola yino. Tata, chichimieka jina lie.” (Yoa. 12:27, 28) Muze mashimbu akufwa chenyi akundamine, Yesu ni hamu lieswe yalihana mwene kuli akwa-kole ja Zambi, waze amukolesele sonyi ni kumushiha chitaka. Chipwe ngwe kapwile ni kuzakalala hamwe ni yikola, nihindu ni vumbi lieswe Yesu yalinga upale wa Zambi. Kashika mutuhasa kwamba pundu ngwetu, Yesu kali chilweza chipema cha mutu yoze wasolwele kulikehesa muze apwile ni kuzakalala!—Tanga Izaia 53:7, 10.

16-17. (a) Yika masepa ja Yesu alingile yize yesekele umbovu wenyi? (b) Kuchi mutuhasa kwimbulula Yesu?

¹⁶ Ha ufuku wenyi wakasula hano hashi, masepa jenyi amwenemwene yeseka kulikehesa chenyi. Achinyonga chize te anazakalala ha ufuku wacho. Shina te manunga ni kushishika ndo ku kufwa chenyi? Nyi kakashishikile kachi atu keshi ni kutalatala cha mwono wa mutolo. (Roma 5:18, 19) Yitanga yenyi te muyihasa kupihisa hanji kufumanyisa jina lia Tato. (Yombi 2:4) Hachino, ha kulia chenyi chakasula ni apostolo jenyi, ayo yaputuka kulihamika “hakachi ko hakutwala kuli yoze mamuvuluka ngwo, munene wahiana akwo.” Ha chikuma chino, Yesu kakwashile masepa jenyi ha yisuho yinji, kuchingako ufuku wacho!  Chipwe chocho, Yesu kakevwile uli. Alioze yalihumikiza. Ni zango lieswe hamwe ni hamu, Yesu yaalumbunwina nawa yitanga yize te ayo atamba kupwa nayo. Kusulaho, iye yaachichimieka ha kumukwasa ni ushishiko weswe.—Luka 22:24-28; Yoa. 13:1-5, 12-15.

¹⁷ Nyi yuma yino muyilingiwa kuli yetu, yika twatamba kulinga? Mutuhasa kwimbulula Yesu ha kusolola umbovu chipwe ngwe tunazakalala. Ni vumbi lieswe tukaulenu shimbi ya Yehova ya kununga ni ‘kulihumikiza umwe ni mukwo.’ (Kolo. 3:13) Mutwononokene shimbi yino nyi twanyingika ngwetu, tulieswe twakuhanjika ni kulinga yuma yize yakuvwisa akwetu kupiha. (Yishi. 12:18; Tia. 3:2, 5) Nawa hita shimbu tuchichimiekenu akwetu ha yitanga yo yipema.—Efwe. 4:29.

18. Kuchi Yehova akukwasa yimbovu kukwata yiyulo yipema, alioze yika ayo atamba kulinga?

¹⁸ Nyi twalikehesa mutukwata yiyulo yipema. Muze tuli mu ukalu wa yize mutusakula ku mwono wetu, Yehova matukwasa kukwata yiyulo yipema, alioze chino muchilingiwa wika nyi mutupwa akwa-kulikehesa. Iye kanalakenya ngwenyi, mevwa ‘kwita cha yimbovu.’ (Samu 10:17) Nawa makalinga yuma yinji kuhiana kwivwa yize twakumwita. Mbimbiliya yinambe ngwo: “Yihomboloji maasongwela mu upatwilo; malongesa yihomboloji jila yenyi.” (Samu 25:9) Yehova kakutwaha usongwelo wacho kupalikila mu Mbimbiliya, mikanda, yinema ni kukunguluka chize akululieka kuli “ndungo wamwenemwene wa kanyama.” * (Mateu 24:45-47) Twatamba kulikehesa ha kunyingika ngwetu tunafupiwa ukwaso, ha kulilongesa yize Yehova anatwehe ni kukaula yize anatulongesa.

19-21. Upi uka alingilile Mose ku Kandeshe, nawa yika twalilongesa ha upi wacho?

¹⁹ Nyi twalikehesa mutwehuka kulinga uhenge. Nyonga nawa ha chilweza cha Mose. Iye kanungine ni kulikehesa ha miaka yinji ni kuvwisa Yehova kuwaha. Hakupalika cha miaka 40 mu puya, Mose yahona kulikehesa. Ndumbwenyi yoze kota walamwinyine mwono wenyi mu Engitu yafwa, chocho yamufunda ku Kandeshe. Chikwo nawa, A-Izalele yaputuka kulimika ni Mose ngwo te keshi kwafunga kanawa. Ha chisuhwo chino, o “yalitachika ni Mose,” mumu lia kuhona meya. Chipwe ngwe, Yehova kalingile yikomokeso yinji kupalikila muli Mose, nawa chipwe ngwe, Mose kasongwelele  A-Izalele ni zango lieswe, nihindu o yalinyenyeta. Ayo kakalinyenyetele wika hamukunda wa meya, alioze ni hali Mose nawa, ngwe iye mwe te uli ni chitela.—Kwa. 20:1-5, 9-11.

²⁰ Hamukunda wa uli, Mose yatokesa umbovu wenyi. Shimbu ahanjike ku liwe ngwe chize Yehova amulwezele, iye yakalumukina atu ni kulifumanyisa mwene. Chikwo nawa, yalamba ku liwe yisuho yaali chocho yikutuhuka meya anji. Iye kalingile shili yinene, mumu lia kulizata ni kwivwa uli. (Samu 106:32, 33) Mose kakanjilile mu Chifuchi cha Chilakenyo, mumu lia kuhona kulikehesa.—Kwa. 20:12.

²¹ Ha chilweza chino, twawanaho malongeso alemu. Chitangu, twatamba kusa tachi hanga tupwe akwa-kulikehesa. Nyi mutwecha kupwa akwa-kulikehesa mutuhasa kulizata ni kuputuka kuhanjika yuma yize kuyalitele. Chamuchiali, kuzakalala muchihasa kutukokolola, kashika twatamba kusa tachi hanga tupwe akwa-kulikehesa chipwe muze tuli mu kapinda.

22-23. (a) Mumu liaka twatamba kupwa akwa-kulikehesa? (b) Yika maliji a Zefania 2:3 anasolola?

²² Makatufunga. Kwasala hakehe, Yehova mashiha atu eswe api hano hashi, muhakasala wika yimbovu. Acho mba hashi muhakapwa sambukila yamwenemwene. (Samu 37:10, 11) Shina mukapwa mukachi ka yimbovu jacho nyi? Mukapwamo nyi watayiza mutambi wa Yehova uze alingile kupalikila muli profeta Zefania.—Tanga Zefania 2:3.

²³ Mumu liaka mukanda wa Zefania 2:3 unambe ngwo: “Hanji manusweka”? Maliji wano kasolo kulumbunuka ngwo, Yehova kechi kuhasa kufunga waze akumulingila nawa waze iye akuzanga. Alioze kanalumbunuka ngwo, ni yetu twatamba kulinga chimwe mba Yehova atufunge. Tuli ni kutalatala cha kulilamwina ha “tangwa lia ufwatulo wa Yehova,” ni kuzuka mwono wa mutolo. Alioze mba tuuzuke, twatamba kusa tachi haliapwila hanga tulikehese ni kuvwisa Yehova kuwaha.