MUTWE WAKULILONGESA 36
Armagedone Yili Lusango Mupema!
‘Yaakungulula kuma kuze anavuluka . . . ngwo, Armagedone.’—USO. 16:16.
MWASO 150 Fupenu Zambi Akanulamwine
CHIKUMA CHILEMU *
1-2. (a) Mumu liaka Armagedone yili lusango mupema kuli atu? (b) Yihula yika mutukumbulula ha mutwe uno?
“ARMAGEDONE.” Atu muze akwivwa liji lino ayo kakunyonga ngwo, yimwe jita ya mata a mbomba hanji luyinda wa chisemewa. Alioze yize Mbimbiliya yakwamba hakutwala ku Armagedone yili yipema nawa yakutuvwisa kuwaha! (Uso. 1:3) Jita ya Armagedone kuyichi kashiha atu eswe, alioze muyikalamwina amwe! Mu mulali uka?
2 Mbimbiliya yakwamba ngwo, jita ya Armagedone muyikalamwina atu ha kushiha manguvulu a hashi. Jita yacho muyikashiha atu api ni kulamwina atu apema, nawa muyikanongesa atu waze akupihisa hashi. (Uso. 11:18) Mba tunyingike kanawa yikuma yino, tuhengwolenu yihula yino yiwana: Armagedone yika yinalumbunuka? Yuma yika muyikalingiwa mba Armagedone yize? Yika mutulinga mba tukalilamwine ha Armagedone? Kuchi mutuhasa kununga ni kushishika haliapwila muze Armagedone yinakundama?
ARMAGEDONE YIKA YINALUMBUNUKA?
3. (a) Liji “Armagedone” yika linalumbunuka? (b) Kulita ni Usolwelo 16:14, 16, mumu liaka mutuhasa kwamba ngwetu Armagedone hi chihela ko chize mutuhasa kumona?
3 Tanga Usolwelo 16:14, 16. Liji “Armagedone” liakusoloka kamuwika mu Mbimbiliya, nawa linakatuka ku limi lia Hepreu lize linalumbunuka Mulundu wa Megidu. (Uso. 16:16) Megidu yapwile mu mbonge ya Izalele. (Yoshu. 17:11) Alioze, Armagedone kuyalumbunukine chimwe chihela chize mutuhasa kumona. Yinalumbunuka mashimbu waze “mianangana a yifuchi yeswe ya hashi” makalikungulula hanga alimike ni Yehova. (Uso. 16:14). Kashika ha mutwe uno, mutuzachisaho liji “Armagedone” hanga tuhanjikile jita yize muyikalingiwa hanyima lia kulikungulula cha mianangana eswe a hashi. Kuchi tunanyingika ngwetu, Armagedone yili chihela chize kuchishi kumoneka? Chitangu, hano hashi kuheshi mulundu wa Megidu. Chamuchiali, chihela cha Megidu chili chikehe chinji, kashika kuchichi kukumbana “mianangana a yifuchi yeswe ya hashi,” yizavu yo ya maswalale ni yikungo yo ya jita. Chamuchitatu, ngwe chize mutulilongesa ha mutwe uno, jita ya Armagedone muyikaputuka muze “mianangana” a hano hashi, makalukukila tuvumbi twa Zambi hashi heswe.
4. Mumu liaka Yehova ahanyine jina ku jita yenyi yinene ya kasula lize linalite ni Megidu?
4 Mumu liaka Yehova ahanyine jina ku jita yenyi yinene ya kasula lize linalite ni Megidu? Mumu ku Megidu ni ku Mungulunga wa Yezerele uze uli hakamwihi, kwapwile ni kulingiwa jita jinji. Ha mashimbu amwe, Yehova kakwashile tuvumbi twenyi mu jita jacho. Chakutalilaho, “ku njiji ja Megidu,” Zambi yakwasa mukwa-kuyula Mbarake hanga akumbe tujita twa A-Kanana waze te akusongwela kuli Sisera. Mbarake ni profeta wa pwo Debola kahalishile Yehova mumu lia kukumba cho cha yikomokeso. O yemba ngwo: “Matongonoshi mu majila jo ashile jita ni Sisera. Mba muhwiji wa Kishone waahungumwine.”—Kuyu. 5:19-21.
5. Kulisa chika chinene chili ha jita ya Armagedone ni jita yize ashile Mbarake?
5 Mbarake ni Debola kamanunwine mwaso wo ni maliji wano ngwo: “Yehova, chocho akafwe akwa kole je eswe. Alioze masepa je akapwe ngwe tangwa muze mulivumbuka ni tachi jalio.” (Kuyu. 5:31) Mu jita ya Armagedone, akwa-kole ja Zambi kumakaashiha, alioze waze akumuzanga kumakaalamwina. Alioze kuli kalisa munene ha jita jino jiali. Mu jita ya Armagedone, tuvumbi twa Zambi kechi kasa jita. Chipwe mata kechi kapwa no! Kwamba umwenemwene, tachi jo mujikapwa kuhola ni kufuliela muli Yehova ni muli tujita twenyi amu malilu.—Iza. 30:15; Uso. 19:11-15.
6. Yika Yehova makazachisa hanga anongese akwa-kole jenyi ha Armagedone?
6 Yika Yehova makazachisa hanga anongese akwa-kole jenyi ha Armagedone? Iye mahasa kuzachisa uhashi weka ni weka. Chakutalilaho, iye mahasa kuzachisa minyiko ya hashi, chiwe ni mihenyo. (Yombi 38:22, 23; Eze. 38:19-22) Yehova mahasa kulingisa akwa-kole hanga alishihe ene ni ene. (2 Sango 20:17, 22, 23) Iye mahasa kuzachisa angelo hanga ashihe atu api. (Iza. 37:36) Chipwe mazachisa yuma yeswayo, nihindu Yehova makakumba. Akwa-kole jenyi eswe makashiha. Alioze, akwa-ululi eswe makaalamwina.—Yishi. 3:25, 26.
YUMA YIKA MUYIKALINGIWA MBA ARMAGEDONE YIZE?
7-8. (a) Kulita ni 1 A-Tesalonika 5:1-6, mutambi uka walipwila uze manguvulu makatwa? (b) Mumu liaka mutambi wacho muukapwa wa mahuza?
7 Shimbu ‘tangwa lia Yehova’ kanda liheta makatwa mutambi wa “sambukila ni kutwama kawape.” (Tanga 1 A-Tesalonika 5:1-6.) Liji tangwa lia Yehova lize lili ha 1 A-Tesalonika 5:2, linalumbunuka “luyinda munene.” (Uso. 7:14) Kuchi mutukanyingika tangwa lize luyinda munene makaputuka? Mbimbiliya yinambe ngwo, makatwa umwe mutambi walipwila. Mutambi wacho, muukapwa chilayi chize muchikasolola ngwo luyinda munene hakundama.
8 Uno mukapwa mutambi wa “sambukila ni kutwama kawape” uze Mbimbiliya hiunambe. Mumu liaka manguvulu a hashi makatwa mutambi wacho? Shina mangana a ma yingeleja makalichinga no? Kota. Chipwe chocho, tunanyingika ngwetu, mutambi wa “sambukila ni
kutwama kawape” muukapwa mahuza akwo a andemoniu. Mahuza jacho makapwa api chinji, mumu atu makanyonga ngwe kaheta kuhwima, kuma kali mu ponde ya luyinda munene. Ngwe chize Mbimbiliya yakwamba, “hohene kwenyeka muchitulumuka hali ayo ngwe kufumbajala cha pwo yoze uli ni ufumba.” Mba yika muyikalingiwa kuli tuvumbi twa Yehova ashishika? Ayo hanji makatungumuka mumu lia kaputu wa susumuku wa luyinda munene. Chipwe chocho, makapwa akulilulieka kulu.9. Kuchi Zambi makanongesa hashi ha Satana?
9 Ha matangwa ja Noa, Yehova kanongesele hashi heswe ha shimbu limuwika. Alioze, chifuchi chino cha Satana, makachinongesa mu yihanda yaali. Chitangu, makanongesa Babilonia Yinene, yize yinalumbunuka uwayilo wa mahuza wa hashi heswe. Kusulaho, mba manongesa chihanda chikwo ha Armagedone, chize chinachingi akwa-mafwefwe, maswalale ni akwa-mingoso. Tuhengwolenu mu yimako-yimako yihanda yino yaali.
10. Kulita ni Usolwelo 17:1, 6, ni 18:24, mumu liaka Yehova makanongesa Babilonia Yinene?
10 “Upatwilo wa mwe chikoi munene.” (Tanga Usolwelo 17:1, 6; 18:24.) Hamukunda wa Babilonia Yinene, atu anji keshi kuvumbika nawa jina lia Zambi. Iye kakulongesa mahuza hakutwala kuli Zambi. Ngwe umwe pwo chikoi, uwayilo wa mahuza kuushi kushishika kuli Yehova, mumu wa kukwasa manguvulu a hano hashi. Iye kakuzachisa ndundo jenyi hanga azuke mbongo kuli waze akuyamo ni kumwanga manyinga anji, kuchingako ni manyinga ja tuvumbi twa Zambi. (Uso. 19:2) Kuchi Yehova makanongesa Babilonia Yinene?
11. “Ngongo muchila,” yika analumbunuka, nawa kuchi Zambi makazachisa “kumi lia mbinga” hanga anongese Babilonia Yinene?
11 Mba anongese “chikoi munene,” Yehova makazachisa “kumi lia mbinga” ja “ngongo muchila.” Ngongo, kanalumbunuka kulinunga cha mavungu (Nações Unidas.). Kumi lia mbinga linalumbunuka manguvulu waze akukwasa kulinunga cha mavungu. Ha shimbu lize Uso. 17:3, 16) Kunongesa chacho, muchikapwa cha kafuji-fuji ni kusoloka ngwe chalingiwa “ha tangwa limuwika.” Waze eswe te akukwasa uwayilo wa mahuza makevwa yikola yinji ku mbunge. Mumu te wakulizata ngwo: ‘Ngunatwama ngwe mwanangana-wa-pwo, hi nguli twamishi ko, chichi kamona chinyengo nichimwe.’—Uso. 18:7, 8.
Zambi hanatese, manguvulu jacho makalimika ni Babilonia Yinene. Ayo “makamupwisa wahululu, makamupwisa ni uselesele” ha kumutambula upite ni kusolola upi wenyi kuli eswe. (12. Yehova keshi kecha akwa-mavungu hanga alinge yika, nawa mumu liaka?
12 Zambi keshi kecha akwa-mavungu hanga anongese tuvumbi twenyi. Mumu tuvumbi twenyi, kahalishile jina lienyi ni kwononokena shimbi ya kutuhuka mu Babilonia Yinene. (Yili. 15:16, 17; Uso. 18:4) Ayo kakalakalile chinji hanga akwase akwo atuhukemo. Kashika, tuvumbi twa Yehova keshi “katambula ya ku lamba lienyi.” Chipwe chocho, ufulielo wo muukapwa mu cheseko.
Chipwe ngwe kali kweswako, tuvumbi twa Zambi makajikijila muli iye muze Ngoke makaalukukila (Tala paragrafu 13) *
13. (a) Ngoke iya? (b) Kulita ni Ezekiele 38:2, 8, 9, yika muyikatwala Ngoke ha chihela chize kuchishi kumoneka, avuluka ngwo Armagedone?
13 Chize Ngoke makalukukila atu ja Zambi. (Tanga Ezekiele 38:2, 8, 9.) Hanyima lia kunongesa uwayilo weswe wa mahuza, mukukasala uwayilo umuwika hano hashi. Uwayilo wa Yela ja Yehova. Kwamba pundu, Satana makevwa uli unji. Iye makasolola uli wacho hakuzachisa milolo ya andemoniu. Mumu lia milolo yacho, chimwe chizavu cha akwa-mavungu muchikalukukila tuvumbi twa Yehova. (Uso. 16:13, 14) Chizavu chacho kakuchivuluka ngwo, “Ngoke wa mu chifuchi cha Mangoke.” Muze akwa-mavungu makalukukila tuvumbi twa Yehova, mba hi o maheta ha chihela chize kuchishi kumoneka, avuluka ngwo Armagedone.—Uso. 16:16.
14. Yika Ngoke makanyingika?
14 Ngoke makajikijila ha ‘kwoko lienyi lia musunya,’ e maswalale jenyi a ndundo. (2 Sango 32:8) Alioze yetu mutukajikijila kuli Yehova, Zambi yetu. Nyonga lino kuli akwa-mavungu mulikapwa ngwe lia uhepuke. Mumu liaka? Mumu Babilonia Yinene te yikwete ndundo, alioze tuzambi twenyi kakahashile kumulamwina kuli “ngongo” ni ‘kumi lienyi lia mbinga.’ (Uso. 17:16) Hachino, Ngoke makanyonga ngwo muchipwa chashi kutushiha eswe. Mbimbiliya yinambe ngwo, iye makalukukila atu ja Yehova “ngwe lelwa lia kufuka chifuchi.” (Eze. 38:16) Alioze Ngoke makatungumuka hafwa mu muheto. Chizechene ngwe Falau mu Kalunga-lwiji Muchila, Ngoke makanyingika ngwo kuma te kanalimika ni Yehova.—Kutuhu. 14:1-4; Eze. 38:3, 4, 18, 21-23.
15. Yika Yesu makalinga ha jita ya Armagedone?
15 Yesu ni tujita twenyi a mu malilu makapulwila tuvumbi twa Zambi ni kunongesa Ngoke hamwe ni maswalale jenyi. (Uso. 19:11, 14, 15) Mba yika muyikalingiwa kuli Satana, mukwa-kole wa Yehova, yoze wamwangine milolo ya mahuza yize yatwalile akwa-mavungu ku Armagedone? Yesu makanyasa Satana ni andemoniu jenyi mu jondo, nawa o makalingamo kanunu ka miaka.—Uso. 20:1-3.
YIKA MULINGA MBA UKALILAMWINE HA ARMAGEDONE?
16. (a) Kuchi mutuhasa kusolola ngwetu ‘tunanyingika Zambi’? (b) Ha Armagedone, yika muyikalingiwa kuli atu waze anyingika Zambi?
16 Chipwe ngwe twakuwayila Yehova ha miaka yinji hanji ka, nihindu iye mahasa kutulamwina ha Armagedone. Alioze mba chino chilingiwe, twatamba ‘kunyingika Zambi’ ni “kwononoka ku sango lipema lia Mwene wetu Yesu.” (2 Tesa. 1:7-9) Yetu ‘twakunyingika Zambi’ muze mutunyingika yize akuzanga ni yize keshi kuzanga ni muze mutunyingika shimbi jenyi. Chikwo nawa, twakusolola ngwetu, tunanyingika Zambi muze mutumuzanga ni kumwononokena ni muze mutuwayila wika iye. (1 Yoa. 2:3-5; 5:3) Nyi twachilinga, ‘Zambi makatunyingika,’ chekwamba mutukapwa ni utayizo wenyi. (1 Kori. 8:3) Nyi twapwa ni utayizo wa Zambi, iye makatulamwina ha Armagedone.
17. Yika chinalumbunuka “kwononoka ku sango lipema lia Mwene wetu Yesu”?
17 “Sango lipema lia Mwene wetu Yesu” linachingi Mateu 6:33; 24:14) Nawa, twakwononoka ku sango lipema muze twakukwasa mandumbu a Kristu akuwayisa, waze akwete yiteli yinji.—Mateu 25:31-40.
umwenemwene weswe uze Yesu alongesele uli mu Liji lia Zambi. Yetu twakwononoka ku sango lipema, muze mutukaula yize twakulilongesa ku mwono wetu. Chakutalilaho, twakusa kulutwe Wanangana wa Zambi ha kutwama kulita ni shimbi jenyi ni kwambujola sango lipema kuli akwetu. (18. Kuchi mandumbu a Kristu akuwayisa makafunyisa upeme uze anakaasolwela kuli “mapanga akwo”?
18 Kwasala hakehe hanga tuvumbi twa Zambi akuwayisa afunyise upeme uze anakaasolwela kuli “mapanga akwo.” (Yoa. 10:16) Mu mulali uka? Muze jita ya Armagedone kanda yichiputuka, akwa-Kristu eswe akuwayisa 144,000 makaahindwisa ni kuya mu malilu ngwe ana ja Zambi waze kechi kafwa. Ayo makalinga chihanda cha tujita a mu malilu waze makanongesa Ngoke ni kulamwina “mbunga yinene” ya atu waze akuwayila Yehova. (Uso. 2:26, 27; 7:9, 10) Kwamba pundu, mbunga yinene muyikasakwilila chinji mumu lia kukwasa tuvumbi twa Yehova akuwayisa waze te achili hashi!
KUCHI MUTUHASA KUNUNGA NI KUSHISHIKA MUZE SONGO LINAKUNDAMA?
19-20. Chipwe ngwe twakupalika mu yipikalo, yika muyitukwasa mba tununge ni kushishika muze Armagedone yinakundama?
19 Ha mashimbu wano akusula nawa akalu, tulieswe tunapalika mu yipikalo yinji. Chipwe chocho, mutuhasa kunyongonona ni uwahililo. (Tia. 1:2-4) Chuma chize muchitukwasa hanga tunyongonone chili kununga ni kulemba. (Luka 21:36) Chikwo nawa, kutanga Mbimbiliya hita tangwa ni kupukuna ha yize tunatange, kuchingako uprofeto uze kwasala hakehe hanga umanunuke. (Samu 77:12) Nawa twatamba kununga ni kwambujola sango lipema. Kulinga yuma yino, muchitukwasa tukolese ufulielo wetu ni kufunga kutalatala chetu!
20 Achinyonga chiseke chize mukevwa muze Babilonia Yinene makayinongesa, ni muze Armagedone muyikapalika! Chahiana ulemu, achinyonga kuwaha chize mutukevwa muze atu eswe makalemesa jina lia Zambi ni ulite wenyi wa kuyula! (Eze. 38:23) Chochene, jita ya Armagedone yili lusango mupema kuli waze ananyingika Zambi, akwononokena Mwanenyi ni kunyongonona ndo ku songo.—Mateu 24:13.
MWASO 143 Tunungenu Kukalakala, Kutalatala, ni Kushimbwila
^ kax. 5 Tuvumbi twa Yehova kakushimbwila jita ya Armagedone ha miaka yinji. Kashika mutwe uno, muulumbununa Armagedone, yuma yize muyikalianga kulingiwa mba Armagedone yize ni chize mutuhasa kununga ni kushishika muze Armagedone yinakundama.
^ kax. 71 ULUMBUNWISO WA YIZULIE: Mutukamona yuma ya kukomwesa hano hashi. Chipwe chocho (1) mutununga ni kwambujola ndo haze mutuhashila, (2) mutununga ni kulilongesa Mbimbiliya, nawa (3) mutununga ni kujikijila ha ukwaso wa Zambi.
^ kax. 85 ULUMBUNWISO WA YIZULIE: Mapulisha kanayi hanga apupe zuwo lia amwe asoko Yela ja Yehova, alioze asoko jacho kanafuliela ngwo Yesu ni angelo kanamono yize yinalingiwako.