MUTWE WAKULILONGESA 37
Tuzeyelenu kuli Yehova—Mumu liaka nawa Kuchi?
“Shinaho chikolo chatutamba kuzeyela kuli Tata.”—HEPRE. 12:9.
MWASO 9 Yehova Mwanangana Wetu!
CHIKUMA CHILEMU *
1. Mumu liaka twatamba kuzeyela kuli Yehova?
TWATAMBA kuzeyela * kuli Yehova mumu kali Tangi yetu. Amu ali Tangi yetu, iye kali ni ulite wa kutulweza yize twatamba kulinga ni yize kutwatambile kulinga. (Uso. 4:11) Alioze, chikuma chikwo chilemu chize twatamba kumuzeyela chili kuyula chenyi chipema. Ha miaka yeswayi, manguvulu a hano hashi kakwete wata hali akwo. Alioze, nyi twatesa kuyula cho ni cha Yehova, mutumona ngwetu Yehova kakuyula ni mana, zango, keke ni upeme.—Kutuhu. 34:6; Roma 16:27; 1 Yoa. 4:8.
2. Kulita ni A-Hepreu 12:9-11, mumu liaka twatamba kwononokena Yehova?
2 Yehova keshi kuzanga hanga tumwononokene ku tachi. Alioze, kakushimbwila hanga tumwononokene mumu twakumuzanga nawa kali Tata yetu wa zango. Ha mukanda wenyi kuli A-Hepreu, Paulu yamba ngwenyi, twatamba “kuzeyela kuli Tata” mumu chino chakutuyukisa.—Tanga A-Hepreu 12:9-11.
3. (a) Kuchi twakusolola ngwetu tunazeyela kuli Yehova? (b) Yihula yika mutukumbulula ha mutwe uno?
3 Kuchi mutuhasa kusolola ngwetu, tunazeyela kuli Yehova? Chitangu, ha kumwononokena mu yuma yeswe. Chamuchiali, ha kusa tachi hanga tuhone kujikijila ha malinjekela jetu. (Yishi. 3:5) Chuma chikwo chize muchitukwasa kuzeyela kuli Yehova, chili kunyingika yitanga yenyi yipema. Mumu liaka? Mumu yuma yeswe yize akulinga yakukatuka ha yitanga yacho. (Samu 145:9) Nyi twanyingika kanawa Yehova, mutumuzanga chinji. Nawa nyi twamuzanga, kutuchi kufupiwa shimbi jinji ha yize mutulinga ni ha yize kutuchi kulinga. Hachino, mutusa tachi hanga tupwe ni manyonga a Zambi ni kwecha kulinga yuma yipi. (Samu 97:10) Alioze, ha mashimbu amwe kwononokena Yehova muchihasa kukaliwa. Mumu liaka chino chakulingiwa? Nawa yika makulwana amu chikungulwila, atata, ni amama mahasa kulilongesa ha chilweza cha Nehemia; Ndawichi; ni Maria, naye ya Yesu? Mutwe uno, muukumbulula yihula yino.
MUMU LIAKA MUCHIHASA KUPWA CHIKALU KUZEYELA KULI YEHOVA
4-5. Kulita ni A-Roma 7:21-23, mumu liaka kuzeyela kuli Yehova muchihasa kupwa chikalu?
4 Chikuma chimwe chize chakupwisa chikalu kuzeyela kuli Yehova, chili shili yize twahingile kuli yisemi jetu atangu. Kashika ha mashimbu amwe, chakukaliwa kwononokena Zambi. Muze Alama ni Eva ahonene kwononokena Zambi ha kulia muhuko uze akanjishile, o yasolola ngwo ene mahasa kukwata yiyulo hakutwala ku chipi ni chipema. (Uputu. 3:22) Musono, atu anji keshi kwononokena Yehova nawa ene kakukwata yiyulo hakutwala ku chipi ni chipema.
5 Kuzeyela kuli Yehova muchihasa kupwa chikalu chipwe kuli waze amunyingika ni kumuzanga. Postolo Paulu kapalikile mu kapinda wacho. (Tanga A-Roma 7:21-23.) Chizechene ngwe Paulu, ni yetu tunazange kulinga yize yalita kumeso ja Yehova. Chipwe chocho, nihindu twatamba kulikolweza hanga twehuke nyonga lia kulinga yuma yipi.
6-7. Chikuma chikwo chika chize muchihasa kupwisa chikalu kuzeyela kuli Yehova? Hana chilweza.
6 Chikuma chikwo chize chakupwisa chikalu kuzeyela kuli Yehova, chili munyachi wetu ni kuze twasemukinyine. Atu anji, manyonga jo kakulimika ni manyonga ja Yehova. Kashika twatamba kusa tachi mba tulitusule ku manyonga jacho. Tutalenu chimwe chilweza.
7 Ku yihela yimwe, akweze kakwashinjila hanga alihane chinji ku milimo yize mazuka mbongo jinji. Yino ye yalingiwile kuli Maria. * Muze te kanda achinyingika umwenemwene, iye kalilongesele ku shikola yize akulemesa chinji mu chifuchi cho. Asoko jenyi te kakumushinjila hanga alinge mulimo uze mazuka mbongo jinji. Maria neye che te akuzanga. Alioze, muze aputukile kulilongesa Mbimbiliya ni kuzanga Yehova, iye yalumuna nyonga lienyi. Chipwe chocho, Maria yamba ngwenyi: “Ha mashimbu amwe, nakuwana milimo yize nguzuka mbongo jinji, alioze ngunanyingika ngwami, yino muyingukinda kulingila Yehova ngwe chize ngunamulingila haliapwila. Mumu lia kuze nakolelele, kuchishi kupwa chashi kulituna mulimo. Kashika nakulemba kuli Yehova hanga angukwase kukumba cheseko cha kutayiza mulimo uze mungukinda kumulingila kanawa.”—Mateu 6:24.
8. Yika mutuhengwola haliapwila?
8 Ngwe chize twamona, kuzeyela kuli Yehova chili mumu lia upeme wetu. Alioze, kuli waze ali ni umwe wata, ngwe makulwana amu chikungulwila, atata ni amama, kuli nawa chikuma chikwo chize o atamba kuzeyela kuli Zambi. Chikuma chacho chili kusa tachi hanga alingile akwo yuma yipema. Mutuhengwola yimwe yilweza ya Mbimbiliya yize muyitulongesa chize mutuzachisa wata wetu hanga tuvwise Yehova kuwaha.
YIZE MAKULWANA MAHASA KULILONGESA HALI NEHEMIA
Makulwana kanalingi milimo ku Zuwo lia Wanangana, ngwe chize Nehemia alingile ha kutungulula yipanga ya Yerusaleme (Tala maparagrafu 9-11) *
9. Kapinda muka apwile nenyi Nehemia?
9 Yehova hanahane kuli makulwana amu chikungulwila chiteli chinene chakufunga atu jenyi. (1 Petu. 5:2) Makulwana mahasa kulilongesa chize mafunga atu ja Yehova ha kwimbulula chilweza cha Nehemia. Ngwe nguvulu, Nehemia te kakwete wata unji hali A-Yunda. (Nehe. 1:11; 2:7, 8; 5:14) Achinyonga kapinda yoze Nehemia apalikile. Iye kevwile ngwo, A-Yunda te keshi kuvumbika tembele nawa te keshi kukwasa A-Levi ngwe chize Shimbi yambile. Chikwo nawa, A-Yunda te keshi kwononokena shimbi ya Sambata, nawa amwe a kuli ayo te hanalimbate ni mapwo akwa-mavungu. Kuchi Nehemia te mahasa kuhwisa kapinda wacho?—Nehe. 13:4-30.
10. Yika Nehemia alingile mba akumbe kapinda yoze amwene?
10 Nehemia kakazachishile chipi wata wenyi hanga ashinjile atu ja Zambi atayize manyonga jenyi. Alioze, yalemba kuli Yehova ni mbunge yeswe ha kumwita usongwelo. Iye nawa yalongesa atu Shimbi ya Yehova. (Nehe. 1:4-10; 13:1-3) Chikwo nawa, Nehemia kapwile mukwa-kulikehesa nawa yakalakala hamwe ni A-Yunda akwo ha kutungulula yipanga ya Yerusaleme.—Nehe. 4:15.
11. Kulita ni 1 A-Tesalonika 2:7, 8, kuchi makulwana atamba kutwama ni mandumbu jo mu chikungulwila?
11 Makulwana hanji kechi kupalika mukapinda yoze amwene Nehemia, alioze mahasa kumwimbulula mu milali yeka ni yeka. Chakutalilaho, ayo kakukalakala chinji hanga akwase mandumbu jo. Ayo keshi kulimona ngwe kahiana akwo mumu lia wata uze akwete. Alioze, kakufunga chikungulwila ni zango. (Tanga 1 A-Tesalonika 2:7, 8.) Makulwana katamba kusolola zango ni kulikehesa ha chize akuhanjika ni akwo. Andrew, umwe mukulwana yamba ngwenyi: “Nanyingikine ngwami, nyi mukulwana mu chikungulwila masolola upeme ni zango kuli akwo, chino chakukwata mandumbu ku mbunge. Yitanga yacho yakukwasa mandumbu hanga alivwashane ni makulwana.” Tony, umwe mukulwana mukwo yoze halinga miaka yinji yamba ngwenyi: “Yami nakweseka kukaula chiyulo chize chili ha A-Fwilipu 2:3, nawa nakusa tachi hanga ngumone ngwo akwetu kanguhiana. Chino chakungukwasa nguhone kulimona ngwe nguli mwata wa mandumbu jami.”
12. Mumu liaka chili chipema makulwana kulikehesa?
12 Makulwana katamba kulikehesa, ngwe chize Yehova akulikehesa. Chipwe ngwe kali chitunda wa yuma yeswe hano hashi, iye ‘kakuhetama’ ni kuchiza “chiswale mu fufuta.” (Samu 18:35; 113:6, 7) Kashika Yehova keshi kuzanga waze akulizata ni kulisamba.—Yishi. 16:5.
13. Mumu liaka makulwana atamba kufunga kanawa limi?
13 Mukulwana yoze wa kuzeyela kuli Yehova, katamba kufunga kanawa limi lienyi. Nyi ka, muze umwe mamuhona vumbi, iye mahasa kumukumbulula ni utenu. (Tia. 1:26; Ngala. 5:14, 15) Andrew, yoze hitwatongola yamba ngwenyi: “Ha mashimbu amwe, nyi umwe ndumbu manguhona vumbi nakwivwa ngwe ngumukumbulule chipi. Alioze, muze nakupukuna ha yilweza ya atu ashishika yize yili mu Mbimbiliya, changukwasa kumona ulemu wa kupwa mukwa-kulikehesa ni kusolola umbovu.” Hachino, mukulwana yoze wa kuzeyela kuli Yehova, kakuhanjika ni zango hamwe ni umbovu kuli mandumbu jenyi mu chikungulwila, kuchingako makulwana-ni-akwo.—Kolo. 4:6.
YIZE ATATA MAHASA KULILONGESA KULI MWANANGANA NDAWICHI
14. Chiteli chika atata ali nacho mu usoko, nawa yika Yehova anashimbwila hali ayo?
14 Yehova hanahane kuli tata chiteli cha kupwa mwata wa mu usoko, nawa kanashimbwila hanga iye ahane kuli ana jenyi fumbo ni kwakanyamisa. (1 Kori. 11:3; Efwe. 6:4) Alioze wata wa tata uli ni haze wasulila, mumu neye makakumbulula kuli Yehova yoze hali iye minyachi yeswe hanayiluku majina. (Efwe. 3:14, 15) Mba asolole ngwo kanazeyela kuli Yehova, atata katamba kuzachisa kanawa wata wo kulita ni chize Yehova akuzanga. Atata mahasa kulilongesa yuma yinji ku mwono wa Mwanangana Ndawichi.
Yilemba ya umwe tata mukwa-Kristu, yatamba kusolola kulikehesa chenyi (Tala maparagrafu 15-16) *
15. Chilweza chika chipema chize Ndawichi anakahichikila atata mu usoko?
15 Kuchizako kupwa mwata wa usoko, Yehova kasele Ndawichi ngwe kasongo wa vungu lieswe lia Izalele. Amu te mwanangana, Ndawichi kapwile ni ndundo jinji. Ha mashimbu amwe, kakazachishile kanawa wata wenyi nawa yalinga uhenge unene. (2 Samue. 11:14, 15) Alioze Ndawichi kasolwele ngwo, kakuzeyela kuli Yehova ha kutayiza fumbo lize amuhele. Iye te kakwazulula mbunge yenyi ha kulemba kuli Yehova, nawa te kakusa tachi hanga akaule yiyulo ya Yehova. (Samu 51:1-4) Chikwo nawa, Ndawichi kapwile mukwa-kulikehesa ha kutayiza yiyulo yipema hi wika ko ya malunga, alioze ni ya mapwo. (1 Samue. 19:11, 12; 25:32, 33) Ndawichi kalilongesele ha uhenge wenyi nawa kalemesene uwayilo wa Yehova ku mwono wenyi.
16. Malongeso aka atata mahasa kulilongesa ha chilweza cha Ndawichi?
16 Nyi uli tata, muhasa kulilongesa yuma yinji ha chilweza cha Ndawichi. Chakutalilaho, kanda uzachisa chipi wata uze Yehova akwehele. Nyi mulinga upi utayize, nawa ni akwenu makwaha chiyulo chize chinakatuka mu Mbimbiliya, chitayize ni mbunge yeswe. Nyi walinga chino, asoko je makuvumbika mumu lia kupwa mukwa-kulikehesa. Muze unalembe hamwe ni asoko je, azulula mbunge ye kuli Yehova, hanga asoko je evwe chize wa kujikijila ha ukwaso ni usongwelo wa Yehova. Chahiana ulemu, lemesa uwayilo wa Yehova ku mwono we. (Shimbi 6:6-9) Nyingika ngwe, chawana chilemu chize muhasa kuhana kuli asoko je chili chilweza che chipema.
YIZE AMAMA MAHASA KULILONGESA HA CHILWEZA CHA MARIA
17. Chiteli chika Yehova ahanyine kuli amama?
17 Yehova hanahane chiteli chilemu kuli amama mu usoko. Ayo kali ni wata hali ana jo. (Yishi. 6:20) Yeswe yize mama akulinga ni yize akuhanjika, muyihasa kukwata hali ana jenyi ku mwono wo weswe. (Yishi. 22:6) Tutalenu yize amama mahasa kulilongesa ha chilweza cha Maria, naye ya Yesu.
18-19. Yika amama mahasa kulilongesa ha chilweza cha Maria?
18 Maria te kanyingika kanawa Yisoneko yisandu. Iye te kakuvumbika chinji Yehova, chocho yapwa ni usepa ukolo ni iye. Nawa kapwile ni kulinga yeswayo Yehova mamwita, chipwe ngwe yuma yacho muyalumuna mwono wenyi.—Luka 1:35-38, 46-55.
Nyi umwe mama kanahongo hanji kanapihilila, iye katamba kusa tachi hanga asolole zango kuli asoko jenyi (Tala paragrafu 19) *
19 Nyi uli mama, kuli mutapu unji wa kwimbulwilamo Maria. Kuchi muhasa kuchilinga? Chitangu, funga kanawa usepa we ni Yehova. Linga longeso lie lia wika, nawa pwako ni kulemba yena mwene kuli Yehova. Chakutalilaho, hanji kakulelele kuli yisemi waze te akulivutula ni kawashi nawa te akukalumukina ana. Hanji wa kunyonga ngwe, uno we mutapu upema wakulelelamo ana. Chipwe muze mulilongesa chize Yehova akuzanga hanga amama alele ana jo, muchihasa kukaliwa kuhwima mbunge ni kulihumikiza ni ana je. Chipi-chipi, nyi ayo malinga yuma yize kuyalite muze yena unahongo. (Efwe. 4:31) Ha mashimbu amutapu au, watamba kwita ukwaso kuli Yehova mu yilemba. Lydia, umwe mama yamba ngwenyi: “Ha mashimbu amwe, muze mwanami te akunguhona vumbi, te nakulemba kuli Yehova hanga angukwase nguhone kumukalumukina. Ha mashimbu waze ngunahanjika te nakumana ni kulemba mu mbunge hanga Yehova angukwase. Kulemba te chakungukwasa kuhwima mbunge.”—Samu 37:5.
20. Kapinda muka amama amwe akupwa nenyi, nawa kuchi mahasa kumukumba?
20 Amama amwe kakwete umwe kapinda: chakwapwila chikalu kusolola kuli ana jo ngwo kakwazanga. (Titu 2:3, 4) Amama amwe kaalelele kuli yisemi waze te keshi kusolola zango kuli ana jo. Nyi kakulelele kuli yisemi amutapu au, kanda ufunyina upi uze alingile yisemi je. Mba uchilinge, watamba kuzeyela kuli Yehova ni kulilongesa chize muhasa kuzanga ana je. Yena hanji mumona ngwe chili chikalu kwalumuna manyonga je, chize wakwivwa ni yize wakulinga. Chipwe chocho, ni ukwaso wa Yehova muhasa kuchilinga! Nyi walinga chocho, mulikwasa yena mwene hamwe ni asoko je.
NUNGA NI KUZEYELA KULI YEHOVA
21-22. Kulita ni Izaia 65:13, 14, yika mutuzukako nyi mutuzeyela kuli Yehova?
21 Mwanangana Ndawichi, kanyingikine ulemu wa kuzeyela kuli Yehova. Yamba ngwenyi: “Longeso lia Yehova liamwenemwene, liakuwahisa mbunge. Shimbi ya Yehova ya kulinanga, yakupangulwisa meso.” Yawezela nawa ngwenyi: “Kavumbi ke kakumutoweza nayo. Ha kuyilinga kuchili kwononona chinene.” (Samu 19:8, 11) Musono, tunahase kumona kalisa ha kachi ka waze akuzeyela kuli Yehova ni waze keshi kumuzeyela. Waze akuzanga kuzeyela kuli Zambi “makemba ni chiseke mu mbunge.”—Tanga Izaia 65:13, 14.
22 Muze makulwana amu chikungulwila, atata ni amama akuzeyela kuli Yehova, ayo kakupwa ni mwono upema, asoko jo kakuwahilila nawa chikungulwila cheswe cha kulinunga. Chahiana ulemu, kakuvwisa Yehova kuwaha ku mbunge. (Yishi. 27:11) Chino chili chiwape chinene chize mutuhasa kuzuka ku mwono wetu!
MWASO 123 Kuzeyela ku Ululikiso wa Zambi
^ kax. 5 Mutwe uno muusolola mumu liaka twatamba kuzeyela kuli Yehova. Nawa mutushimutwina chize waze ali ni ndambu ya wata, ngwe makulwana amu chikungulwila, atata ni amama—yize mahasa kulilongesa ha chilweza cha Nguvulu Nehemia; Mwanangana Ndawichi; ni Maria, naye ya Yesu.
^ kax. 1 ULUMBUNWISO WA AMWE MALIJI: Maliji kuzeyela ni kwononoka kakwete ulumbunwiso upi kuli atu waze akushinjila hanga ononokene umwe ku tachi. Alioze, tuvumbi twa Zambi ene e akuzanga kumwononokena. Kashika, kutwatambile kumona ngwetu kuzeyela kuli Zambi chili chuma chipi.
^ kax. 7 Ha mutwe uno, majina amwe kapwa kwalumuna.
^ kax. 62 ULUMBUNWISO WA YIZULIE: Umwe mukulwana wa mu chikungulwila kanalulieka yimwe ku Zuwo lia Wanangana hamwe ni mwanenyi, ngwe chize Nehemia neye akwashile kutungulula yipanga ya Yerusaleme.
^ kax. 64 ULUMBUNWISO WA YIZULIE: Umwe tata kanalembe kuli Yehova ni mbunge yeswe mu jina lia usoko wenyi.
^ kax. 66 ULUMBUNWISO WA YIZULIE: Umwe mwana, kapalikisa maola ni kuheha, chocho kahashile kulinga milimo ya ku zuwo ni ya ku shikola. Naye yoze wakatuka ku mulimo ni kuhonga, kanamufumbu chakuhona kumukalumukina.
