1-2. (a) Chilweza chika chinasolola ngwo atu kakusemuka ni nyonga lia kwatakamisa nawa kakwete uhashi wa kutakamisa akwo? (b) Kuchi twanuke amwe akulemana?

HITA mutu kakusemuka ni nyonga lia kumutakamisa nawa kakwete uhashi wa kutakamisa akwo. Chakutalilaho, kanuke nyi malimbuka ni kulilemeka muze anahehe konda, iye mahasa kuya ni kulila kuli Naye hanji kuli Tato. Yisemi jenyi kechi kuhasa kuwuka mbandu yacho, alioze mahasa kumutakamisa. Ayo mahasa kumuhula yize yalingiwako, kumukusumuna masoji, kumulembejeka, nawa hanji mahasa kumusaho yitumbo chipwe kumukasaho chipuzu. Hachino, mwana mahasa kuhola ni kuputuka nawa kwasa konda. Kulutwe, mba hi mbandu muyiya.

² Ha mashimbu amwe, twanuke kakulemana mu milali yipi. Amwe kakwapihisa ha kulisumbakenya no. Kanuke mahasa kumupihisa kamuwika hanji ha miaka yinji. Ha yisuho yeswe yaali, nihindu kupihisa kanuke muchihasa kumunehena yikola ku mbunge yize kuyishi kuhwa ni kawashi. Ha mashimbu amwe, mutu yoze wapihisa kanuke kakumukwata ni kumuzangamisa. Ha mashimbu akwo, muchihasa kusoloka ngwe mutu wacho kechi keza kamuzangamisa. Chipwe ngwe, mutu wacho mamuzangamisa ha shimbu lizeliene, alioze kanuke yoze apihisa mahasa kununga ni kwivwa yikola ku mbunge ndo ku ukulwana.

3. Ngwe chize atongwola ha 2 A-Korindu 1:3, 4, yika Yehova anazange hali mapanga jenyi, nawa yihula yika mutushimutwina?

³ Nyi umwe pangi hanji ndumbu mu chikungulwila kamupihishile ku wanuke, nihindu machivwa yikola ku mbunge, mumu lia yize amulingile. Mba ukwaso uka mutuhasa kumwaha? (Tanga 2 A-Korindu 1:3, 4.) Kwamba pundu, Yehova kanazange hanga mapanga jenyi azuke zango ni utakamiso uze anafupiwa. Kashika, tushimutwinenu  yihula yino yitatu: (1) Mumu liaka waze apihishile ku wanuke anafupiwa utakamiso? (2) Aya mahasa kutakamisa atu waze apihishile ku wanuke? (3) Kuchi mutuhasa kwatakamisa?

4-5. (a) Mumu liaka chili chilemu kunyingika ngwetu, twanuke kalisa ni makulwana? (b) Kanuke nyi mamupihisa kuli mutu yoze akujikijila, yika muyihasa kulingiwa kuli iye?

⁴ Makulwana amwe waze apihishile ku wanuke, chipwe ngwe hikwapalika miaka yinji, nihindu kakufupiwa utakamiso. Mumu liaka? Mba tuwane kumbululo, chitangu twatamba kunyingika ngwo twanuke kalisa chinji ni makulwana. Mutapu uze twanuke akwivwa nyi maapihisa walisa chinji ni chize makulwana akwivwa nyi maalinga yuma yipi. Tutalenu yimwe yilweza.

⁵ Twanuke kanafupiwa kupwa hamwe ni waze ayo akujikijila ni kwalela. Chino chakukwasa twanuke alivwe kawape ni kwatwala hanga ajikijile hali atu akwo waze akwazanga. (Samu 22:9) Chaluyinda, kupihisa twanuke chakulingiwa chinji ku mazuwo, kanji-kanji asoko ni masepa akwo mu usoko e akulinga upi wacho kuli twanuke. Hachino, kanuke nyi mamupihisa kuli mutu yoze akujikijila, chakupwa chikalu kujikijila hali atu akwo chipwe ngwe mukupalika miaka yinji.

6. Mumu liaka kupihisa kanuke chili chuma chipi chinji?

⁶ Twanuke keshi kuhasa kulifunga ene, kashika kupihisa twanuke chili chuma chipi. Kulisumbakenya ni kanuke shimbu kanda achikola ni kuchilinga mu ulo, muchihasa kupihisa mwono wenyi. Kashika, nyi mutu mapihisa kanuke, iye mahasa kupihisa nyonga lia kanuke wacho hakutwala ku kulisumbakenya. Chino muchihasa kutwala kanuke ahone kujikijila kuli atu akwo.

7. (a) Mumu liaka chili chashi atu waze akwete yitanga yipi kwonga twanuke, nawa kuchi atu jacho akuchilinga? (b) Yika mahuza jacho mahasa kuneha hali kanuke?

⁷ Twanuke keshi kunyonga, kupukuna, hanji kunyingika ponde ni kuyehuka ngwe chize akulinga makulwana. (1 Kori. 13:11) Kashika chili chashi atu waze akwete yitanga yipi kwonga twanuke hanga alisumbakenye no. Atu jacho kakwonga twanuke ha kwalweza ngwo, mulonga uli wa kanuke mwene, nawa ngwo chikuma chacho katambile kuchinyingika kuli atu akwo, kukushi niumwe yoze mamupanjika nyi majimbula mulonga wacho, hanji ngwo, kulisumbakenya nenyi chili mutapu upema wa kumusolwela zango. Kanuke mba anyingike ngwo wano eswe kali mahuza, mukuhasa kupalika miaka yinji. Kanuke wacho, mahasa kukola ni nyonga lia kulivwa ngwe, hanapihia, keshi ni ulemu nawa katelele kumuzanga hanji kumutakamisa.

8. Mumu liaka mutuhasa kupwa ni shindakenyo ngwetu, Yehova mahasa kutakamisa waze eswe akumona lamba?

⁸ Sango jino jakutukwasa hanga tunyingike mumu liaka waze apihishile, mahasa kwivwa yikola ku mbunge ha miaka yinji. Kashika, mulonga uno uli upi chinji! Kupihisa twanuke chili chimwe chilayi chize chinasolola ngwo, tuli ha matangwa a kusula, haze atu anji “keshi zango lia atu,” nawa ‘yingulungulu ni akwa kwonga anapiha kuhiana.’ (2 Timo. 3:1-5, 13) Miheto ya Satana yili yipi chinji, nawa chili chinyengo chinji muze atu malinga yuma yize yakuvwisa Ndiapu kuwaha. Alioze, Yehova kakwete ndundo jinji kuhiana Satana ni atu jenyi. Iye kakumona yeswe yize Satana akulinga. Kashika, mutuhasa kupwa ni shindakenyo ngwetu, Yehova kanamono lamba lize tuli nalio, iye mahasa kutwaha utakamiso uze tunafupiwa. Chili chiwape chinene kuwayila ‘Zambi ya kulembejeka cheswe; yoze wakututakamisa mu lamba lietu lieswe, hanga tuhase kutakamisa waze mapwa mu lamba lieswalio, ni kutakamisa chize yetwene akututakamisa nacho kuli Zambi.’ (2 Kori. 1:3, 4) Mba, aya waze Yehova akuzachisa hanga atutakamise?

9. Kulita ni maliji a Mwanangana Ndawichi ali ha Samu 27:10, yika Yehova akulinga kuli waze asoko jo hanaehuka?

⁹ Twanuke waze yisemi jo echele hanga aapihise hanji waze apihishile kuli masepa ni asoko jo, e anafupiwa chinji utakamiso. Mwanangana Ndawichi kanyingikine ngwenyi, utakamiso wamwenemwene wakukatuka kuli Yehova. (Tanga Samu 27:10.) Ndawichi kafulielele ngwenyi, Yehova kakufunga atu waze akwehuka kuli asoko jo. Mba kuchi Yehova akuchilinga? Iye kakuchilinga ha kuzachisa tuvumbi twenyi ashishika. Mandumbu jetu amu ufulielo kali asoko jetu. Chakutalilaho, Yesu kavulukile waze te akuwayila Yehova hamwe nenyi ngwo mama, mandumbu ni mapangi jenyi.—Mateu 12:48-50.

10. Kuchi postolo Paulu alumbunwine mulimo wenyi ngwe mukulwana mu chikungulwila?

¹⁰ Tutalenu chilweza chinasolola chize usoko wacho wapwa mu chikungulwila cha akwa-Kristu. Postolo Paulu kapwile chikilikita nawa mukulwana wamu chikungulwila yoze te washishika. Iye kahichikile chilweza chipema, ni ukwaso wa Zambi yalweza akwo hanga amwimbulule ngwe chize iye embulwile Kristu. (1 Kori. 11:1) Tutalenu chize Paulu alumbunwine mulimo wenyi ngwe mukulwana wa mu chikungulwila, hakwamba ngwenyi: ‘Tunende ni vumbi mukachi kenu, chizechene ngwe mama yoze unalele ana jenyi mwene.’ (1 Tesa. 2:7) Ni musono nawa, makulwana amu chikungulwila waze akuzanga mandumbu jo ni kwafunga, kakuhanjika maliji apema muze anazachisa Mbimbiliya hanga atakamise waze anafupiwa ukwaso.

11. Yika yinasolola ngwo hi makulwana amu chikungulwila wika ko e mahasa kutakamisa akwo?

¹¹ Shina makulwana amu chikungulwila e wika mahasa kutakamisa mandumbu waze apihishile ku wanuke? Ka. Tulieswe tukwete chiteli cha ‘kuhwimisa mbunge ya umwe ni mukwo.’ (1 Tesa. 4:18) Mapangi waze hajama ku ufulielo, mahasa kukwasa mapangi waze anafupiwa utakamiso. Chili chipema kunyingika ngwo, Yehova Zambi kakulitesa mwene ngwe umwe mama yoze wakutakamisa mwanenyi. (Iza. 66:13) Mu Mbimbiliya muli yilweza ya mapwo waze atakamishile atu waze apwile ni kumona lamba. (Yombi 42:11, MW 1991.) Musono, Yehova kakuwahilila chinji  ha kumona mapwo akwa-Kristu matakamisa mapangi waze analema ku mbunge! Ha mashimbu amwe, makulwana amu chikungulwila mahasa kwita umwe pangi yoze wajama ku ufulielo hanga akwase pangi yoze uli mu kapinda wacho. *

12. Muze tunakwase umwe ndumbu yika kutwatambile kulinga?

¹² Muze mutuzanga kukwasa umwe ndumbwetu, twatamba kukeya hanga tuhone kumuhula yuma yize mwene kazangile kuyihanjika. (1 Tesa. 4:11) Mba, yika mutulinga kuli waze anafupiwa ukwaso ni utakamiso wetu? Tuhengwolenu majila atano amu Mbimbiliya waze mutuhasa kukaula hanga tukwase akwetu.

13. Ngwe chize anasolola ha 1 Mianangana 19:5-8, yika mungelo wa Yehova alingilile Eliya, nawa kuchi mutuhasa kumwimbulula?

¹³ Linga chimwe hanga ukwase mutu yoze unamono lamba. Muze profeta Eliya apwile ni kuchina atu waze afupile ku mushiha, iye kahonene utakamiso, chocho yazanga kufwa. Yehova yatuma umwe mungelo wa ndundo hanga akwase lunga yono te unahono utakamiso. Mungelo yahana Eliya yize yeswe te anafupiwa ha shimbu liacho. Iye yamwaha kulia cha kahia ni kumukolweza hanga alie. (Tanga 1 Mianangana 19:5-8.) Lusango yono kanasolola umwenemwene uno ulemu ngwo: Ha mashimbu amwe, koma kakehe kaze mutulingila mutu mukahasa kumukwasa chinji hanga alivwe kanawa. Mutuhasa kusolola ngwetu, twakuzanga ndumbwetu yoze unamono lamba ha kumulingila yuma ngwe, kumwaha kulia, kalumbongo ni kumukwasa ha yuma yikwo nawa. Nyi kutushi kuhasa kuhanjika ni mutu hakutwala ku chize anevu mutuhasa kusolola ngwetu, twakulihulumba hali iye ha kumulingila yuma yize muyimukwasa.

14. Yika mutuhasa kulilongesa ha yize yalingiwile kuli Eliya?

¹⁴ Kwasa waze analema ku mbunge hanga alivwe kawape hamwe ni utakamiso. Mutuhasa kuwana longeso likwo ha yize yalingiwile kuli Eliya. Kupalikila mu chikomokeso, Yehova yakwasa profeta Eliya hanga ahase kwenda tando jinji ndo ku Mulundu wa Horepe. Kota Eliya kalivwile kawape muze ahetele ku chihela chino cha kusuku, kuze Yehova alingilile usendo ni atu jenyi ha miaka yinji kunyima. Kota kalivwile ngwe, mba hachina kama atu waze afupile ku mushiha. Yika mutuhasa kulilongesa ha chilweza chino? Nyi tunazange kutakamisa atu waze apihishile, chitangu twatamba kwakwasa hanga alivwe kawape. Chakutalilaho, makulwana katamba kunyingika ngwo, pangi yoze unaleme ku mbunge mahasa kulivwa kanawa ni kusolola yize anevu nyi mahanjikila nenyi ku zuwo lienyi kuhiana kuhanjikila nenyi ku Zuwo lia Wanangana hanji haze. Alioze atu amwe kakuzanga kuhanjikila yuma ya mutapu au ku Zuwo lia Wanangana.

15-16. Kupwa ni kupanjika kanawa yika chinalumbunuka?

¹⁵ Pwako ni kupanjika kanawa. Mbimbiliya yinatwehe chiyulo chino chipema ngwo: “Mutu ni mutu alipupwise kwivwa, alioze apwe makoke kuhanjika.” (Tia. 1:19) Shina twakupanjika kanawa akwetu muze anahanjika? Hanji mutuhasa kunyonga ngwetu, kupwa ni kupanjika kanawa chinalumbunuka kulisusuminya ni kutala wika kuli mutu chakuhona kuhanjika nichimwe. Alioze kupanjika kanawa chinalumbunuka yuma yinji kuhiana kulisusuminya wika. Chakutalilaho, Eliya kahanjikile ni Yehova hakumulweza yikola yize te anevu ku mbunge, chocho Yehova yamupanjika kanawa. Yehova kanyingikine ngwenyi, Eliya kapwile ni kwivwa woma, kulivwa ukawenyi ni kunyonga ngwo mulimo wenyi weswe kuwakapwile nawa ni ulemu. Ni zango lieswe, Yehova yamukwasa hanga akumbe manyonga waze apwile no. Chino chinasolola  ngwo, Yehova kapanjikile kanawa Eliya.—1 Mia. 19:9-11, 15-18.

¹⁶ Muze tunapanjika umwe ndumbu, kuchi mutuhasa kusolola umbovu, mbunge ya keke ni zango? Ha mashimbu amwe, kuhanjika amwe maliji apema, muchihasa kusolola chize tunevu ku mbunge. Muhasa kwamba ngwo: “Chapihia chinji ha kwivwa yize yalingiwile kuli yena! Kanuke niumwe katambile kupalika mu yuma ya mutapu au!” Hanji muhasa nawa kumuhula hanga upwe ni shindakenyo ngwo, wevwa kanawa yize anambe sepa lie yoze unaleme ku mbunge. Muhule ngwe: “Lisesa mwanyi, shina muhasa kama kungukwasa hanga ngwivwe kanawa yize unambe?” hanji ngwo, “Kulita ni yize wamba . . . Kuma yino ye yalingiwile ku mwono we?” Maliji wano a zango masolola kuli iye ngwo, pundu lume wamupanjika kanawa, mumu unase tachi hanga unyingike yize anapalika ku mwono.—1 Kori. 13:4, 7.

17. Mumu liaka twatamba kulihumikiza ni kupwa “makoke kuhanjika”?

¹⁷ Watamba kukanyama hanga upwe “makoke kuhanjika,” chekwamba kwecha kuhanjika chinji. Muze mutu anakulweze chize anevu, kanda umuteta liji hanga umwehe chiyulo hanji kumukwasa ha yize ananyongo. Watamba kulihumikiza! Muze Eliya ahanjikile ni Yehova hakumulweza chize te anevu, iye kapwile ni kulema ku mbunge, chocho yahanjika ni yinyengo yeswe. Kulutwe, muze Yehova hamutakamisa, Eliya yasolola nawa manyonga jenyi ha kuzachisa maliji waze-ene. (1 Mia. 19:9, 10, 13, 14) Longeso lika mutwandaho? Ha mashimbu amwe, atu waze analeme ku mbunge, kakufupiwa kutuhwisa yize anevu hakuhanjika chinji. Ngwe Yehova, twatamba kwapanjika ni uhumikizo weswe. Shimbu tulusuke ni kwalweza yize atamba kulinga hanga ahwise yipikalo yo, twatamba kwasolwela umbovu ni keke.—1 Petu. 3:8.

18. Mumu liaka kulemba hamwe ni mutu yoze unamono lamba muchihasa kumutakamisa?

¹⁸ Lemba hamwe ni mutu yoze unamono lamba. Waze analema ku mbunge mahasa kulivwa ngwe kechi kuhasa kulemba. Mutu mahasa kulivwa ngwe keshi ulemu wa kukundama kuli Yehova. Nyi mutuzanga kutakamisa mutu wacho, mutuhasa  kulemba hamwe nenyi ni kumuvuluka mu yilemba. Mutuhasa kuhanjika ni Yehova, ha kusolola zango lize yetweswe mu chikungulwila tukwete hali ndumbwetu yoze unaleme ku mbunge. Mutuhasa nawa kwita kuli Yehova hanga akwase kavumbi kenyi alivwe kanawa hamwe ni utakamiso. Yilemba yamutapu au, muyihasa kutakamisa mutu yoze unalema ku mbunge.—Tia. 5:16.

19. Yika muyihasa kutukwasa mba tutakamise mutu yoze unalema ku mbunge?

¹⁹ Sakula maliji waze mawuka mutu ni kumutakamisa. Mba uhanjike, chitangu watamba kunyonga. Mumu kuhanjika kalusulusu muchihasa kulemeka mutu ku mbunge. Alioze kuhanjika ni zango muchihasa kumuwuka. (Yishi. 12:18) Kashika, lemba kuli Yehova hanga akukwase kuwana maliji a zango, a utakamiso nawa apema. Nyingika ngwe, kukushi maliji akwete ndundo kuhiana a Yehova waze ali mu Mbimbiliya.—Hepre. 4:12.

20. Kuchi mandumbu amwe mahasa kulivwa mumu lia yize aalingile ku wanuke, nawa yika twatamba kwalweza?

²⁰ Mandumbu amwe waze apihishile ku wanuke, mahasa kulivwa ngwe keshi ulemu hanji keshi ni yuma yipema yize akwo maazangila. Nyonga lino lili lia mahuza! Kashika, zachisa Yisoneko hanga waakwase kunyingika ngwo, kali ni ulemu unji kumeso ja Yehova. (Tala mushete “ Utakamiso wa Yisoneko.”) Alweze chize mungelo wa Yehova atakamishine profeta Daniele muze apwile ni kuhonga hamwe ni kulema ku mbunge. Yehova kazangile hanga Daniele anyingike ngwenyi, te kakwete ulemu kumeso jenyi. (Danie. 10:2, 11, 19) Chizechene nawa, mandumbu jetu waze analeme ku mbunge, no kakwete ulemu unji kumeso ja Yehova!

21. Yika muyikalingiwa kuli waze eswe akulinga yuma yipi chakuhona kulikonyeka, nawa yika yetweswe twatamba kulingila waze apihishile?

²¹ Muze tunatakamisa akwetu, acho tunaakwase anyingike ngwo Yehova kakwazanga. Kutwatambile kuvulama ngwetu, Yehova kali nawa Zambi ya ululi. Yehova kananyingika atu eswe waze akupihisa twanuke. Kashika, iye makwonona waze eswe akupihisa twanuke chakuhona kulikonyeka. (Kwa. 14:18) Shimbu yino kanda yichilingiwa, tusenu tachi hanga tusolwele zango waze eswe apihishile. Kuchizako yino, chili utakamiso kunyingika ngwo, Yehova makahwisa yikola ya waze eswe apihishile hano hashi ha Satana. Hachino, kwasala hakehe yuma yacho yipi kuyichi keza nawa mu manyonga hanji ku mbunge jo.—Iza. 65:17.