MALONGESO A CHIFUKILO | YIHULA HAKUTWALA KU YITANGIWA YA MU MALILU
Yihula Hakutwala ku Yitangiwa ya Mu Malilu
Hiunalihula kama hakutwala mu malilu ni waze atwamamo? Nyi hiunalihula kama, kuushi ukawe. Ha miaka yinji, atu kakulihula hakutwala ha chikuma chino. Amwe kafuliela ngwo, atu atwama mu malilu kali ashakulu jetu waze twatamba kuwayila. Eka kakunyonga nawa ngwo, malilu chili chimwe chihela chipema cha sambukila kuze mwatwama angelo ni atu apema waze akufwa. Mba atu akwo kakwamba ngwo, malilu kali chimwe chihunda muze mwatwama tununu a tununu a tuzambi.
Atu anji kakwamba ngwo, kutuchi kuhasa kunyingika ni chimwe hakutwala ku yuma ya mu malilu, mumu kukushi niumwe yoze wakatukile mu malilu ni kupwa chela hanga atulumbunwine chikuma chino. Kunyonga cha mutapu uno kuchalitele. Yesu Kristu kapwile mu malilu muze te kanda achiza hano hashi. Kalumbunwine kuli mangana a mayingeleja ngwenyi: “Nakatukile mwilu mukulinga upale wa yoze wangutumine, hi upale wa yami mwene ko.” Kashika, Yesu yalweza apostolo jenyi umwenemwene, ngwenyi: “Mu zuwo lia Tata muyili yipatulo yinji.”—Yoano 6:38; 14:2.
Tato ya Yesu, kali Zambi, jina lienyi Yehova, kashika “zuwo” lia Yehova mu malilu liatwama. (Samu 83:18) Ha chino, kukushi niumwe yoze mahasa kulumbununa yuma ya mu malilu kanawa kuhiana Yehova Zambi ni Yesu Kristu. Ayo te kakusolola yuma yinji ya mu mulilu kupalikila mu usolwelo uze te akuhana kuli atu ashishika.
Mutwe muusulaho muulumbununa yisoneko yimwe ya mu Mbimbiliya hakutwala ku yize atu ashishika amwene mu usolwelo. Muze mutanga usolwelo wacho, iwuluka ngwe yuma ya mu malilu hi yuma ko yize mutuhasa kumona hanji kukwata. Ha chino, sapu atulumbunwine yuma ya mu malilu ha kuzachisa yuma yize muyipwa yikalu yetu kunyingika, Zambi yahana usolwelo wa yuma ya mu malilu ha kuzachisa yuma yize twanyingika kanawa. Usolwelo muukukwasa kunyingika waze atwama mu malilu muze ‘muli yipatulo yinji.’
