Gail yoze twatongola ku uputukilo wa chikuma chino, te kakumona ngwe kechi keza kahuzuluka ku yinyengo ya kufwa cha mukwo-lunga, Rob. Alioze aye kanashimbwila kumumona nawa mu chifuchi chaha chize Zambi atulakenya. Aye yamba ngwenyi: “Chisoneko chize nazanga chinji chili Usolwelo 21:3, 4.” Chize chakwamba ngwo: “Zambi kumakatwama hamwe no. Iye makakusumuna masoji eswe ku meso jo. Kufwa kuchichi kapwa nawa; kukuchi kapwa nawa kunenganyana, chipwe miteto, chipwe yikola, ka: mumu yuma yitangu hiyinahu.”

Gail ngwenyi: “Chilakenyo chino chili chipema chinji. Kashika nakunyonga chinji hali atu waze akufwisa atu waze azanga chinji, alioze keshi ni kutalatala cha uhindukilo.” Gail kakutwama nikulita ni ufulielo wenyi, ha kukalakala ngwe mukwa-kulihana mwene mu mulimo wa kwambujola wa shimbu lieswe, hakulweza enyembo jenyi chilakenyo cha Zambi cha kulutwe lia matangwa muze ‘kufwa kuchichi kapwako nawa.’

Muhasa kwamba ngwe ‘chilakenyo chino chikalu kulingiwa.’ Alioze tala chilweza cha umwe lunga yoze te avuluka ngwo Yombi. Aye kayijile chinji. (Yombi 2:7) Ha chino, Yombi yazanga kufwa kwenyi, alioze, aye te kanafuliela mu ndundo ja Zambi ngwo mamuhindwisa hanga atwame ni mwono hano hashi. Ni ufulielo weswe yamba ngwenyi: “Muma wa afu; ukanguhengeke . . . Musanyika mba mungukumbulula; muwivwa usona ha chitanga cha moko je.” (Yombi 14:13, 15) Yombi kafulielele ngwenyi, Zambi yenyi te mamuvwila usona nawa te mamuhindwisa.

Kwasala hakehe, Zambi makahindwisa Yombi ni atu akwo anji, muze makapwisa hashi heswe paraisu. (Luka 23:42, 43) Mbimbiliya yinambe mu Yilinga 24:15 ngwo, “kumukukapwa uhindukilo.” Yesu kanatulweze ngwenyi: “Kanda nukomoka ha chuma chino: mumu ola muyiza, muze waze eswe ali mu mafuka makevwa liji lienyi, makatuhuka.” (Yoano 5:28, 29) Yombi makamona kumanunuka cha chilakenyo chacho. Iye makashimbwila kuhiluka nawa “ku tachi ja ukweze wenyi,” nawa musunya wenyi muukanunga ngwe wa “mukweze” ku miaka yeswe. (Yombi 33:24, 25) Nawa chenacho muchikalingiwa kuli waze akutayiza chilakenyo chipema cha Zambi cha uhundukilo hano hashi.

Nyi hiunafwisa umwe mutu yoze wazanga chinji, yikuma twahanjika kota kuyichi kuhwisa yinyengo yeswe yize unevu. Alioze kupukuna ha yilakenyo ya Zambi yize yili mu Mbimbiliya, muyihasa kukwaha kutalatala ni kukutakamisa hanga ununge ni mwono we.—1 A-Tesalonika 4:13.

Unazange kunyingika nawa chize muhasa kunyongonona mu yinyengo? Nyi uli ni yimwe yihula, ngwe ai, “Mumu liaka Zambi akwecha lamba ni upi hanga ulingiwe?” Yako ha site yetu, jw.org, hanga utale chize Mbimbiliya yakutakamisa ni kuhana makumbululo apema.