1. Tongola jimwe shimbi ja mu Mbimbiliya, nawa kuchi mujihasa kutukwasa ni twajononokena?

MU MBIMBILIYA, Yehova kakutwaha shimbi ja zwalala jize jakutulweza yize iye akuzanga hanga tulinge. Chakutalilaho, iye kakutulweza ngwo, twatamba kwehuka kuwayila tuponya, kwiya, kuzengewa, hanji kulinga yuma ya utanji. (1 A-Korindu 6:9, 10) Mwana wa Yehova, Yesu, kahanyine shimbi kuli tumbaji twenyi ngwenyi: “Kashika yeenu nukatayise tumbaji a ku mavungu eswe, nikuapapachisa mu jina lia Tata, ni lia Mwana, ni lia spiritu musandu, nikualongesa kufunga yuma yize yeswe nanuhele shimbi. Nyingikenu, yami hamuwika ni yenu nguli matangwa eswe ndo kumanunuka cha miaka.” (Mateu 28:19, 20) Yuma yeswe yize Yehova ni Yesu akutulweza hanga tulinge yakutukwasa ku mwono. Shimbi ja Yehova jakutulongesa hanga tulifunge yetwene ni asoko jetu ni kutukwasa hanga tupwe ni mijimba yipema hamwe ni chiseke. Chikuma chilemu chili kwononokena shimbi ja Yehova hamwe ni shimbi ya kwambujola, nyi twalinga chocho, iye mawahilila ni kutuwahisa.

2, 3. (a) Mumu liaka Mbimbiliya kuyishi kutwaha yiyulo hakutwala ku yikuma yeswe ya ku mwono? (b) Yihula yika mutushimutwina mu mutwe uno? (Tala chizulie ha uputukilo.)

² Chikwo nawa, Mbimbiliya kuyishi kutwaha yiyulo hakutwala ku yikuma yeswe ku mwono wetu. Chakutalilaho, kutushi kuwana ndusu lume jimwe shimbi ja mu Mbimbiliya jize jinatale wika ha chize twatamba kuzala. Chino chakusolola mana ja Yehova. Chipwe ngwe atu hashi heswe kakuzala mutapu wa mazalo eka ni eka, nawa mutapu wa kuzala unayi ni kwalumuka mashimbu eswe, nihindu shimbi ja Mbimbiliya kujishi kuhwa ulemu. Nawa Mbimbiliya kuyishi ni shimbi jinji hakutwala ku mulimo hanji kuheha chize twatamba kusakula hanji chize twatamba kulinga hanga tutwame kawape. Yehova kakwecha hanga mutu ni mutu ni miata amu usoko hanga akwate yiyulo hakutwala ku yuma yacho.

³ Kashika nyi mutufupa kukwata chimwe chiyulo chinene chize muchihasa kwalumuna mwono wetu nawa nyi kutwawanyine shimbi ja Mbimbiliya hakutwala ku chikuma chacho, mutuhasa kulihula ngwetu: ‘Shina Yehova kanase mbunge ha chiyulo chize ngunakwate? Kutala mungumuvwisa kuwaha ha yize yeswe mungusakula kulinga chakuhona kwehuka shimbi ja mu Mbimbiliya? Kuchi munguhasa kupwa ni shindakenyo ngwami, Yehova mawahilila ha yize ngunazange kulinga?’

4, 5. Kuchi yiyulo yetu muyihasa kutwa kuli yetwene ni kuli akwetu?

⁴ Amwe atu kakumona ngwe mahasa kulinga yeswayo anazange kulinga ku mwono wo. Alioze twakuzanga kulinga yize muyivwisa Yehova kuwaha. Kashika shimbu liswe muze kanda tuchikwata chimwe chiyulo, twatamba kunyonga hakutwala ku yize Mbimbiliya yakwamba ni kwononokena shimbi yacho. Chakutalilaho, Mbimbiliya yakutulweza chize Zambi akwivwa hakutwala ku kuzachisa manyinga, kashika twakukaula shimbi yacho. (Uputukilo 9:4; Yilinga 15:28, 29) Mutuhasa kulemba kuli Yehova hanga atukwase kukwata yiyulo yize muyimuvwisa kuwaha.

⁵ Yiyulo yetu yakutwa kuli yetwene ni kuli akwetu. Chiyulo chipema muchihasa kutukwasa hanga tukundame kuli Yehova. Chiyulo chipi muchihasa kupihisa usepa wetu ni Yehova. Yiyulo yetu muyihasa nawa kutwa kuli akwetu. Kutwazangile kulinga chuma nichimwe chize muchihasa kwivwisa kupiha mandumbu jetu hanji kukekemesa ufulielo wetu. Kutwazangile nawa kuneha vunda mu kachi ka mandumbu jetu mu chikungulwila. Kashika chili chilemu kukwata yiyulo yipema.—Tanga A-Roma 14:19; A-Ngalishia 6:7.

6. Yika yatamba kusongwela yiyulo yetu?

⁶ Kuchi mutuhasa kukwata yiyulo yipema haze Mbimbiliya kuyishi kwamba pundu yize twatamba kulinga? Shimbu tulinge yize tunazange twatamba kunyonga kanawa hali yetwene ni kukwata chiyulo chize muchivwisa Yehova kuwaha. Chocho mutuhasa kupwa ni shindakenyo ngwetu iye matukwasa hanga tuzuke yuma yipema ha chiyulo chetu.—Tanga Samu 37:5.

7. Haze kuheshi shimbi ya Mbimbiliya, kuchi mutuhasa kunyingika yize Yehova akuzanga hanga tulinge ha chimwe chikuma?

⁷ Kuchi mutuhasa kunyingika yuma yize muyivwisa Yehova kuwaha? Mukanda A-Efwesu 5:17 unatulweze ngwo: “Nyingikenu upale wa Mwene.” Nyi kukushi shimbi ya Mbimbiliya niyimwe, twatamba kunyingika yize Yehova akuzanga hanga tulinge ku mwono wetu. Kuchi mutuhasa kuchilinga? Twatamba kulemba kuli iye ni kwecha hanga spiritu yenyi yisandu yitusongwele.

8. Kuchi Yesu anyingikine yize Yehova azangile hanga iye alinge? Hana chilweza.

⁸ Yesu mashimbu eswe te kakunyingika yize Yehova akuzanga hanga iye alinge. Chakutalilaho, kaali keswe muze mbunga te yili ni zala, Yesu yalemba ni kwaaha kulia kupalikila mu chikomokeso. (Mateu 14:17-20; 15:34-37) Alioze muze iye evwile zala mu puya nawa Ndiapu azangile hanga alumune mawe apwe mbolo, Yesu kalitunyine kuchilinga. (Tanga Mateu 4:2-4.) Aye te kananyingika kanawa Tato, kashika anyingikine ngwenyi, Yehova keshi kuzanga hanga iye azachise spiritu yisandu ni kuhwisa usolo wenyi mwene. Kapwile ni shindakenyo ngwenyi, Tato te mamusongwela ni kumwaha kulia ha shimbu lize lialita.

9, 10. Yika muyitukwasa kukwata yiyulo ya mana? Lumbununa.

⁹ Ngwe Yesu ni yetu mutuhasa kukwata yiyulo yipema ni twafuliela mu usongwelo wa Yehova. Mbimbiliya yinambe ngwo: “Fuliela Yehova ni mbunge ye yeswe; kanda ukajikijila ha malinjekela ja yena mwene. Ukamutayize mu yilinga ye yeswe mba iye makalulamisa majila je. Kanda ulimona ngwe uli mukwa mana kuhiana; pwako ni woma wa Yehova ukatewuluke ku yipi.” (Yishima 3:5-7) Muze mutulilongesa Mbimbiliya ni kunyingika chize Yehova akunyonga, mutuwana yize iye akuzanga hanga tulinge ha chikuma ni chikuma. Nyi twalilongesa chinji ha chize Yehova akunyonga muchipwa chashi kuli yetu kukwata yiyulo yize muyimuwvisa kuwaha. Ha chino, yetu mutupwa ni ‘mbunge ya kwononoka.’—Ezekiele 11:19.

¹⁰ Achinyonga umwe pwo yoze uli ku ulo maya ni kulanda yuma mu loji, mba hi mamona jimwe sapato jipema chinji. Alioze jinafwika ndando yinji. Chipwe ngwe mukwo-lunga keshiho, nihindu aye manyingika chize mukwo-lunga manyonga nyi malanda sapato jacho. Kuchi machinyingika? Ayo alimbachile kulu, kashika iye ananyingika chize mukwo-lunga akuzanga hanga jizachise mbongo jize alinajo. Chizechene nawa, muze twakulilongesa chize Yehova akunyonga ni yize alingile ku mashimbu akunyima, twakunyingika chize mutulinga ha chikuma ni chikuma.

11. Yihula yika mutuhasa kulihula muze tunatanga hanji kulilongesa Mbimbiliya? (Tala kasha “Muze Unalilongesa Mbimbiliya, Lihule Yena Mwene.”)

¹¹ Kuchi muhasa kunyingika yize Yehova akunyonga? Chuma chilemu chize mutuhasa kulinga chili kutanga ni kulilongesa Mbimbiliya mashimbu eswe. Muze mutulinga chocho, mutuhasa kulihula ngwetu: ‘Yika chino chinangulongesa hali Yehova? Mumu liaka aye alingile chocho?’ Chizechene ngwe Ndawichi, ni yetu twatamba kwita kuli Yehova hanga atukwase kumunyingika kanawa. Ndawichi kasonekene ngwenyi: “Ngulweze majila je Yehova. Ngusongwele mu umwenemwene we, ungulongese; mumu yena uli Zambi ya ulamwino wami, kuli yena nakutatatata tangwa lieswe.” (Samu 25:4, 5) Muze mutulilongesa chimwe chuma hali Yehova, mutuhasa kunyonga ha yikuma yize mutuhasa kuzachisa sango jacho. Mutuhasa kujizachisa mu usoko, ku mulimo, ku shikola, hanji mu mulimo wa kwambujola. Muze mutunyonga ha chimwe chikuma, chino muchipwa chashi kunyingika chize Yehova te mazanga hanga tuzachise sango jacho.

12. Kuchi mikanda ni kukunguluka chetu yakutukwasa kunyingika chize Yehova akunyonga ha yikuma yeka ni yeka?

¹² Jila yikwo yize muyitukwasa kunyingika kunyonga cha Yehova yili kupanjika kanawa yuma yize akutulongesa mu ululikiso wenyi kupalikila mu Mbimbiliya. Chakutalilaho, muze tunambe kukwata chimwe chiyulo mikanda yino (“Índice das Publicações da Torre de Vigia” ni “Guia de Pesquisa para Testemunhas de Jeová”) muyihasa kutukwasa kunyingika yize Yehova akunyonga. Mutuhasa nawa kuyuka ku kukunguluka chetu muze tunapanjika kanawa ni kuhana makumbululo, ni muze mutupukuna ha yize analongesa. Chino muchitukwasa kunyonga ngwe chize Yehova akunyonga. Ha chino, mutuhasa kukwata yiyulo yize muyimuvwisa kuwaha nawa iye matuwahisa.

13. Hana chimwe chilweza cha chize yetu mutuhasa kukwata chimwe chiyulo cha mana muze mutuhengula yize Yehova akunyonga.

¹³ Tutalenu chimwe chilweza cha chize mutuhasa kukwata chiyulo cha mana muze mutuhengula chize Yehova akunyonga. Achinyonga ngwe unazange kupwa pionelu. Yena watamba kwalumuna yimwe yuma ku mwono we hanga uhase kupalikisa mashimbu anji mu sango lipema. Alioze nihindu kushi ni ushindakenyo nyi pundu muwahilila ni mbongo jikehe hanji yikumba yikehe. Ewa, Mbimbiliya kuyishi kwamba ngwo, twatamba kupwa pionelu mba tuwayile Yehova. Mutuhasa kununga ni kuwayila Yehova ni ushishiko weswe ngwe akwa-kwambujola. Alioze, Yesu kambile ngwenyi, Yehova makawahisa waze akusa tachi hanga ase Wanangana wa Zambi kulutwe. (Tanga Luka 18:29, 30.) Mbimbiliya yakwamba nawa ngwo, Yehova kakuwahilila muze twakulinga yeswe yize mutuhasa hanga tumuhalise, nawa kanazange hanga tumuwayile ni chiseke. (Samu 119:108; 2 A-Korindu 9:7) Nyi twalemba ha yuma yino ni kuyipukuna, mutuhasa kukwata chimwe chiyulo chipema kulita ni yize yinapalika ku mwono wetu nawa Yehova matuwahisa.

14. Kuchi muhasa kunyingika nyi umwe mutapu wa mazalo unevwisa Yehova kuwaha?

¹⁴ Chilweza chikwo chino: Kota yena wakuzanga chinji umwe mutapu wa mazalo, alioze unanyingika ngwe nyi wazala mazalo jacho mahasa kwivwisa kupihia amwe mandumbu mu chikungulwila. Mbimbiliya kuyishi kwamba pundu hakutwala ku umwe mutapu wa mazalo. Mba kuchi muhasa kunyingika chize Yehova akunyonga ha chikuma chacho? Mbimbiliya yinatulweze ngwo: “Mapwo aliwahise ni mazalo aze analite, ni kuhomboka ku meso ni mana; hi ni kuyindako cha kambu ko, hanji ni oru, hanji kakanga, hanji mahina ja ndando yikalu; alioze aliwahise ni yitanga yipema ngwe chize chinatambe mapwo akutayiza uwahililo wa Zambi.” (1 Timoteu 2:9, 10) Kwamba umwenemwene, tuvumbi eswe ja Yehova hamwe ni malunga mahasa kulilongesa ku maliji wano. Nyi twapwa akwa-kushimbika, mutunyonga chize akwetu mahasa kwivwa hakutwala ku mazalo waze mutuzala. Nawa ha mukunda wa zango lize tulinalio hali mandumbu jetu, kashika twakwehuka kweevwisa kupihia. (1 A-Korindu 10:23, 24; A-Fwilipu 3:17) Nyi twahengula yize Mbimbiliya yakwamba ni chize Yehova akunyonga, mutuhasa kukwata yiyulo yize muyivwisa Yehova kuwaha.

15, 16. (a) Kuchi Yehova mevwa nyi twanunga ni kunyonga yuma ya utanji? (b) Muze tunasakula kuheha kuchi mutuhasa kunyingika yize muyivwisa Yehova kuwaha? (c) Kuchi twatamba kukwata yiyulo yilemu?

¹⁵ Mu Mbimbiliya, tunalilongesa ngwetu, Yehova kakwivwa chinyengo chinji muze atu akulinga ni kunyonga ha yuma yipi. (Tanga Uputukilo 6:5, 6.) Kashika Yehova keshi kuzanga hanga tulinyonge hanji kulilota ngwe tunalinga yuma ya utanji. Kwamba umwenemwene, nyi twanunga ni kunyonga yuma yacho mutuhasa kuyilinga. Alioze, Yehova kanazange hanga tunyonge yuma yisandu nawa yipema. Kambaji Tiangu kasonekene ngwenyi, mana ja Yehova “hatangu apwa atoma, a sambukila, a umbovu, ashi, a too ni keke ni mihuko yipema, keshi katonde, keshi ulembekese.” (Tiangu 3:17) Kashika, Mbimbiliya yakutulongesa ngwo, twatamba kwehuka kuheha cheswacho chize muchihasa kutulingisa hanga tunyonge hanji kupwa ni manyonga a luchisa. Nyi twanyingika kanawa yize Yehova akuzanga ni yize keshi kuzanga, muchipwa chashi kuli yetu kunyingika mikanda, yinema, hanji yiheho yeka ni yeka yize twatamba kutala. Kuchishi kufupiwa kuhula akwetu yize twatamba kulinga.

¹⁶ Muze mutufupa kukwata chimwe chiyulo, kanji-kanji kwakusoloka manyonga eka ni eka, waze mutuhasa kusakula hanga tuvwise Yehova kuwaha. Alioze muze mutuzanga kukwata chiyulo chilemu, muchilita kuhula umwe mukulwana wa mu chikungulwila hanji umwe ndumbu chipwe pangi yoze wajama hanga atwehe umwe usongwelo. (Titu 2:3-5; Tiangu 5:13-15) Chochene, kutwatambile kwita mutu wacho hanga atukwachile chiyulo. Alioze, twatamba kunyonga kanawa ha yize tunanyingika hakutwala ku Mbimbiliya mba tukwate chiyulo yetwene. (A-Hepreu 5:14) Postolo Paulu yamba ngwenyi: Mutu “mweswe kumambata chiteli chenyi mwene.”—A-Ngalishia 6:5.

17. Kuchi mutuyuka nyi twakwata yiyulo yize muyivwisa Yehova kuwaha?

¹⁷ Nyi twakwata yiyulo yize muyivwisa Yehova kuwaha, mutukundama kuli iye, mutupwa ni utayizo wenyi nawa matuwahisa. (Tiangu 4:8) Mba hi ufulielo wetu muli Yehova muukola. Kashika tupukunenu ha yize twakutanga mu Mbimbiliya hanga tuhase kunyingika chize iye akunyonga. Chipwe chocho, mashimbu eswe mutupwa ni kulilongesa yuma yaha hakutwala Yehova. (Yombi 26:14) Alioze nyi twasa tachi jinji haliapwila hanga tulilongese hakutwala kuli iye, mutupwa akwa-mana nawa mutuhasa kukwata yiyulo yipema. (Yishima 2:1-5) Manyonga ja atu kakwalumuka, alioze a Yehova keshi kwalumuka. Mukwa-Masamu ngwenyi: “Yiyulo ya Yehova yakola mbe ku miaka ya mutolo; manyonga a mbunge yenyi kakola ndo ku yisemuko yeswe.” (Samu 33:11) Mutuhasa kukwata yiyulo yipema muze mutulilongesa kunyingika chize Yehova akunyonga ni kulinga yize muyimuvwisa kuwaha.