1, 2. Yihula yika twatamba kulihula hakutwala ku maliji a Yesu waze ali ha Mateu 24:14?

YESU kambile ngwenyi ha matangwa akusula, sango lipema lia Wanangana te maliambujola kuli atu eswe. (Mateu 24:14) Amu tuli Yela ja Yehova, kanatunyingika hashi heswe ha mukunda wa mulimo wetu wakwambujola. Atu amwe kakuzanga sango yize twakwambujola, alioze akwo keshi kujizanga. Chipwe chocho, atu amwe waze keshi kuzanga sango jetu kakuvumbika mulimo wetu. Tuli ni shindakenyo ngwetu, yetu wika e twakulinga mulimo uze Yesu ambile. Mumu liaka tunahase kwamba chocho? Kuchi tunanyingika ngwetu mulimo wetu wakwambujola uli uzewene Yesu ambile?

² Mayingeleja anji kakwamba ngwo, kakwambujola sango ja Yesu. Alioze kwambujola cho chakusulila wika mu mayingeleja, ku televizau, ha internet, hanji kulweza wika akwo yize ayo ananyingika hakutwala kuli Yesu. Akwo kakunyonga ngwo, kukwasa atu waze anahono hanji kulinga milimo ya mbunge yipema ngwe kupwa mandotolo, mangana, hanji alongeshi yili jila yakwambulwilamo sango lipema. Shina milimo yacho yinalumbunuka ngwo yili mulimo wakwambujola uze Yesu ambile?

3. Kulita ni Mateu 28:19, yuma yika yiwana yize tumbaji twa Yesu atamba kulinga?

³ Shina Yesu kazangile hanga tumbaji twenyi apwe ni kushimbwila atu hanga aye kuli ayo? Ka! Muze Yesu te hamuhindwisa kulu, aye yahanjika ni kulakaji a tumbaji twenyi ngwenyi: “Yeenu nukatayise tumbaji a ku mavungu eswe, nikuapapachisa . . . , nikualongesa kufunga yuma yize yeswe nanuhele shimbi.” (Mateu 28:19, 20) Ha chino, amu tuli tumbaji twa Yesu, twatamba kulinga yuma yiwana. Twatamba kutayisa tumbaji, kwaapapachisa, ni kwaalongesa. Alioze chitangu, twatamba kuya kuli atu. Umwe mukwa-kuhengola Mbimbiliya yamba ngwenyi: “‘Kuya’ chili chiteli cha mukwa-kufuliela mweswe, chipwe mapatununa jila hanji kalunga-lwiji.”—Mateu 10:7; Luka 10:3.

4. Yika chinalumbunuka kupwa “akwa kutela atu”?

⁴ Yika Yesu te akushimbwila kuli tumbaji twenyi? Shina kazangile hanga mutu ni mutu ambujole ukawenyi, nyi kazangile hanga jililulieke kanawa ngwe chizavu? Amu chili chikalu chinji mutu umuwika kwambujola atu aku “mavungu eswe,” ha chino, tumbaji twenyi te katamba kulilulieka mu chimwe chizavu. Kashika, Yesu asanyikine tumbaji twenyi hanga apwe “akwa kutela atu.” (Tanga Mateu 4:18-22.) Yesu te keshi kuhanjika hakutwala kuli mukwa-kutela yishi yoze te mazachisa ndopo ni nguna, nikushimbwila hanga yishi eze alie. Alioze yishi waze Yesu te anambe kali waze akuta ni wanda. Kuta chino cha yishi chakufupiwa kuhondangana, ululikiso ni atu anji waze makalakala hamuwika.—Luka 5:1-11.

5. Yihula yika yiwana yize twatamba kukumbulula, nawa mumu liaka?

⁵ Mba tunyingike aya waze anambujola sango lipema musono, twatamba kukumbulula yihula yino yiwana:

• Sango jika tumbaji twa Yesu te atamba kwambujola?

• Nyonga lio kuchi liatamba kupwa?

• Majila aka o atamba kuzachisa ha kwambujola sango jacho?

• Kulihi mulimo wacho watamba kuheta, nawa watamba kulinga mashimbu angahi?

Makumbululo a yihula yino matukwasa kunyingika waze analinga mulimo uno wakulamwina mwono, ni kukolesa zango lietu liakununga ni kwambujola sango lipema.—1 Timoteu 4:16.

6. Mumu liaka watamba kutayiza ngwe Yela ja Yehova kakwambujola sango jamwenemwene?

⁶ Tanga Luka 4:43. Yesu te kakwambujola “sango lipema lia Wanangana,” kashika, anazange hanga tumbaji twenyi no ajambujole. Atu aka akwambujola sango jacho hashi heswe? Kali wika Yela ja Yehova! Chipwe atu waze keshi kutuzanga no kakutayiza nyonga liacho. Chakutalilaho, umwe ngana mishionaliu yoze watwamine mu yifuchi yinji, kahanjikile ni umwe Chela cha Yehova. Mu yifuchi yeswe yize te ngana wacho akuya te kakuhula Yela ja Yehova hakutwala ku sango jize ayo akwambujola. Aye yamba ngwenyi, “Ayo eswe te yihepuke, mumu te kakuhana kumbululo lioliene limuwika ngwo: ‘sango lipema lia Wanangana.’” Kumbululo lia ngana wacho linasolola ngwo yetu tushi yihepuke, alioze tuli akwa-Kristu amwenemwene waze alinunga. (1 A-Korindu 1:10) Wanangana wa Zambi uli nawa chikuma chitangu chize chili ha Kaposhi Wakutalila Kanambujola Wanangana wa Yehova. Mukanda uno uli mu malimi 254, nawa kakuufwambwisa mu unji wa 59,000,000, chino che chakulingisa mukanda wacho hanga aunyingike hashi heswe!

7. Kuchi tunanyingika ngwetu mangana a mayingeleja waze akwamba ngwo kali akwa-Kristu keshi kwambujola sango jize jalita?

⁷ Mangana a mayingeleja waze akwamba ngwo kali akwa-Kristu keshi kwambujola hakutwala ku Wanangana wa Zambi. Nyi mahanjika hakutwala ku Wanangana, anji akuli ayo kakwamba ngwo uli nyonga lize liatwama mu mbunge ya mutu. (Luka 17:21) Ayo keshi kulongesa atu ngwo Wanangana uli umwe unguvulu wa mu malilu uze anayulu kuli Yesu. Alioze ayo kakuhanjika wika hakutwala kuli Yesu ha Natale hanji ha Chizomboka. Ayo keshi kulongesa ngwo Wanangana muukahwisa lamba lieswe lia atu, nawa ngwo hikwasala hakehe hanga uhwise yuma yeswe yipi hano hashi. (Usolwelo 19:11-21) Kwamba umwenemwene, mangana jacho keshi kunyingika yize Yesu makalinga ngwe Mwanangana mu Wanangana wa Zambi. O keshi kunyingika nawa mumu liaka atamba kujambujola, mumu kanyingikine ulumbunwiso wa maliji ja Yesu.

8. Nyonga lika lipi lize twatamba kwehuka hakulinga mulimo wakwambujola?

⁸ Tumbaji twa Yesu katambile kwambujola sango lipema hanga apwe ni mbongo hanji atunge mazuwo anene-anene. Yesu yamba ngwenyi: “Hinunatambula wana, hanenu wana.” (Mateu 10:8) Kashika, mulimo wakwambujola kuwatambile kupwa ngwe mungoso. (2 A-Korindu 2:17) Tumbaji twa Yesu katambile kufupa hanga afwete ha mukunda wa mulimo wo wakwambujola. (Tanga Yilinga 20:33-35.) Chipwe ngwe shimbi ya Yesu yili zwalala, nihindu mayingeleja anji kakulalwoka ni kwita mbongo hanga alulieke nacho mayingeleja jo, ni kufweta mangana hamwe ni atu akwo waze akalakala no. Hachino, mangana anji a mayingeleja kanapu pichi.—Usolwelo 17:4, 5.

9. Kuchi Yela ja Yehova akusolola ngwo kakwambujola sango lipema ni nyonga lialita?

⁹ Shina Yela ja Yehova kakwita mbongo mu mazuwo jo a Wanangana hanji ha kukunguluka cha mambonge? Ka! Mulimo wo kakuukwasa wika ni milambu ya ku mbunge. (2 A-Korindu 9:7) Ha mwaka uze wapalika, Yela ja Yehova kalinganga tununu aali a tununu a maola mu mulimo wa kwambujola sango lipema ni kusongwela malongeso a Mbimbiliya kuhiana tununu livwa ha tukweji eswe. Keshi kwaafweta ha mulimo wo wakwambujola, chipwe chocho, o kakuwahilila chinji ha kuzachisa mbongo jo hanga alinge mulimo wacho. Umwe mukwa-kuhengola yamba hakutwala kuli Yela ja Yehova ngwenyi: “Nyonga lio litangu lili kwambujola.” Yamba nawa ngwenyi, Yela ja Yehova keshi ngana yoze wakutambula fweto. Ha chino, nyi kutushi kwambujola ha mukunda wa mbongo, mba ni nyonga lika twakulinga mulimo wacho? Twakuulinga mumu twakuzanga Yehova ni atu waze twakwambulwila sango jacho. Nyonga liacho linamanununa uprofeto uze uli ha Samu 110:3. (Tanga.)

10. Majila aka Yesu ni tumbaji twenyi azachishile hanga ambujole sango lipema?

¹⁰ Majila aka Yesu ni tumbaji twenyi azachishile hanga ambujole sango lipema? Ayo te kakuya kuze mahasa kuwana atu. Chakutalilaho, ayo te kakwambujola mu matapalo ni ha yitanda. Ayo nawa te kakufupa atu ku mazuwo jo. (Mateu 10:11; Luka 8:1; Yilinga 5:42; 20:20) Mulimo kwambujola ku zuwo ni zuwo wapwile umwe ululikiso uze alingile hanga atwale sango lipema kuli atu eswe.

11, 12. Hakutwala ku chikuma cha kwambujola sango lipema kuchi tachi jize akusa mayingeleja waze akwamba ngwo kali akwa-Kristu jalisa ni ja Yela ja Yehova?

¹¹ Shina mayingeleja waze akwamba ngwo kali akwa-Kristu, kakwambujola sango lipema ngwe chize Yesu alingile? Kwamba umwenemwene, mangana kakwafweta mba alongese atu jo. Mangana wano keshi kutayisa tumbaji aha, alioze kakufunga wika atu waze ali no mu yingeleja. Ha mashimbu amwe, ayo kakweseka kukolweza atu jo hanga ambujole sango lipema. Chakutalilaho, ha mwaka 2001, Papa João Paulo II kambile mu umwe mukanda ngwenyi, atu eswe amu yingeleja katamba kwambujola sango lipema ni kusolola zango ngwe lia postolo Paulu, yoze wambile ngwenyi: “Lamba liami, nyi chambujolele sango lipema.” Papa yamba nawa ngwenyi, mulimo uno wakwambujola katambile kuulinga wika kuli atu akehe waze akutambula fumbu alioze kuli mbunga yeswe ya yingeleja. Alioze, atu akehe wika akukaula ukolwezo wacho.

¹² Mba yika mutwamba hali Yela ja Yehova? Ayo wika e akwambujola ngwo Yesu kanayula ngwe Mwanangana kuputuka ha mwaka 1914. Ayo kakwononokena Yesu nawa kakusa mulimo wakwambujola kulutwe ku mwono. (Marku 13:10) Umwe mukanda unambe ngwo, mulimo wakwambujola uli chuma chilemu chinji kuli Yela ja Yehova. (Pillars of Faith—American Congregations and Their Partners.) Unambe nawa ngwo muze akuwana atu waze ali ni zala, waze ananenganyana, ni waze anayiza, o kakukwasa atu jacho, alioze keshi kuvulama mulimo wo ulemu wakwambujola sango lipema hakutwala kusongo lia hano hashi, ni kulongesa atu hakutwala ku ulamwino. Yela ja Yehova kakununga ni kwambujola sango lipema hakwimbulula majila waze Yesu ni tumbaji twenyi apwile ni kuzachisa.

13. kulihi mulimo wakwambujola watamba kuheta?

¹³ Yesu kambile ngwenyi, tumbaji twenyi te mambujola ni kulongesa sango lipema “mu yifuchi yeswe ya hashi.” Ayo kaatumine hanga atayise tumbaji aku “mavungu eswe.” (Mateu 24:14; 28:19, 20) Maliji wano kanalumbunuka ngwo sango lipema te katamba kuliambujola hashi heswe.

14, 15. Yika yinasolola ngwo Yela ja Yehova kanamanununa uprofeto wa Yesu ha chize mulimo wa kwambujola unatohwa? (Tala chizulie ha uputukilo.)

¹⁴ Yela ja Yehova e wika akumanununa uprofeto wa Yesu uze unambe ngwo, sango lipema akaliambujole hashi heswe. Mumu liaka twamba chocho? Mumu mu Estados dos Unidos muli mangana 600,000 a mayingeleja waze akwamba ngwo kali akwa-Kristu, chipwe chocho mu chifuchi chacho muli Yela ja Yehova kuhiana 1,200,000 waze akwambujolamo sango lipema. Hashi heswe yingeleja ya Katolika yili ni mangana 400,000, alioze Yela ja Yehova hashi heswe kali kuhiana 8,000,000 waze anambujola sango lipema mu yifuchi 240. Kwamba umwenemwene, Yela ja Yehova kanambujola sango lipema hashi heswe, jize jinahalisa ni kulemesa Yehova!—Samu 34:1; 51:15.

¹⁵ Amu tuli Yela ja Yehova, nyonga lietu lili kusa tachi hanga twambujole sango lipema kuli atu anji shimbu songo kanda liheta. Mba tulinge mulimo wacho, twakulumbununa ni kufwambwisa tununu twa mikanda, tuposhi, tumikanda ni makonvite a kukunguluka cha mambonge ni a kwiwuluka kufwa cha Yesu mu malimi 700. Mikanda yacho twakuyihana yawana kuli atu. Ha mwaka uze wapalika, twatuhwisanga 4.5 a tununu a mikanda yize yakulumbununa Mbimbiliya. Twatuhwisanga nawa 200 a tununu a Mbimbiliya Tradução do Novo Mundo mu malimi 130. Mu site yetu mu sango mu unji wa mu malimi 750. Yela ja Yehova e wika akulinga mulimo uno wakukomokesa.

16. Kuchi tunanyingika ngwetu Yela ja Yehova kakwete spiritu ya Zambi?

¹⁶ Mulimo wakwambujola watamba kulinga mashimbu angahi? Yesu kambile ngwenyi, sango lipema te maliambujola ndo muze songo muliza. Amu tuli Yela ja Yehova, tunahase kunyongonona mu mulimo wakwambujola ha matangwa wano akusula mumu tuli ni ukwaso wa spiritu yisandu ya Yehova. (Yilinga 1:8; 1 Petulu 4:14) Atu a mayingeleja jimwe mahasa kwamba ngwo: “Tuli ni spiritu yisandu.” Mba kutala ayo mahasa kulinga mulimo uze Yela ja Yehova akulinga ha matangwa wano akusula? Mayingeleja amwe kakweseka kwambujola ngwe chize twakulinga yetu, alioze keshi kuhasa kuchilinga. Akwo kakwete zango liakwambujola, alioze kakuchilinga ha amwe mashimbu. Akwo kakununga ni kuya ni kwambujola ku zuwo ni zuwo, alioze keshi kwambujola sango lipema lia Wanangana. Ha chino ayo keshi kulinga mulimo uze Yesu aputukile.

17, 18. (a) Kuchi mutuhasa kupwa ni shindakenyo ngwetu Yela ja Yehova e wika akwambujola sango lipema lia Wanangana musono? (b) Yika yakutukwasa hanga tununge ni kwambujola sango lipema?

¹⁷ Aya waze akwambujola sango lipema lia Wanangana musono? Yela já Yehova e akulinga mulimo wacho! Kuchi tunachinyingika? Mumu twakwambujola sango jize jalita, sango lipema lia Wanangana. Amu twakuya ni fupa atu mu munda, kashika twakuzachisa majila waze alita. Tukwete nyonga lialita ha kwambujola, chino chinalumbunuka ngwo, twakuzanga Yehova nawa twakuzanga atu. Mulimo wetu wakwambujola hiwatohwa chinji mumu twakwambujola kuli atu aku mavungu eswe ni malimi eswe. Nawa mutununga ni kwambujola sango lipema lia Wanangana ndo muze songo lia hano hashi muliza!

¹⁸ Chili kukomoka chinene ha kumona milimo yilemu yize atu ja Yehova analingi hanga ambujole sango lipema ha matangwa wano akusula. Mba kuchi twakuhasa kulinga milimo yino yeswe? Postolo Paulu yalumbununa ngwenyi: “Yoze wakulinga muli yenu iye Zambi, chipwe kupala hanji kulinga chize chamupemena.” (A-Fwilipu 2:13) Yehova nihindu manunga ni kutwaha tachi jize mutufupa hanga tuhase kwambujola sango lipema!—2 Timoteu 4:5.