1, 2. (a) Kuchi Yela ja Yehova akwivwa hakutwala ku Mbimbiliya? (b) Chihanda chika cha Mbimbiliya chize wazanga chinji?

YETU, Yela ja Yehova, twakuzanga chinji Mbimbiliya. Yakutwaha utakamiso, kutalatala ni usongwelo uze mutuhasa kufuliela. (A-Roma 15:4) Hi mukanda wa mana ja atu ko, alioze uli “liji lia Zambi.”—1 A-Tesalonika 2:13.

² Anji a kuli yetu tukwete yihanda ya Mbimbiliya yize twakuzanga chinji. Amwe kakuzanga kutanga Evangelu mumu yakusolola yitanga yipema ya Yehova kupalikila muli Yesu. (Yoano 14:9) Akwo kakuzanga mikanda ya uprofweto ngwe Usolwelo, uze wakutusolwela ‘yuma yize kwasala hakehe hanga yilingiwe.’ (Usolwelo 1:1) Eka kakuwana utakamiso muze akutanga Masamu, akwo kakuzanga kutanga yiyulo yipema ya mu mukanda wa Yishima. Pundu lume, Mbimbiliya yili mukanda wa atu eswe.

3, 4. (a) Kuchi twakwivwa hakutwala ku mikanda yetu? (b) Mikanda yika twakutambula yize yakutala wika ha yimwe yizavu ya atu?

³ Amu twakuzanga Mbimbiliya, twakuzanga nawa mikanda yetu, mumu yakukatuka ha Liji lia Zambi. Mikanda yeswe, tumikanda, tuposhi, ni mikanda yikwo yize twakutambula yili ukwaso uze wakwiza kuli Yehova. Mikanda yacho yakutukwasa hanga tukundame kuli iye ni kununga ni kukola mu ufulielo.—Titu 2:2.

⁴ Mikanda yetu, yinji kakuyisonekena kanji-kanji Yela ja Yehova. Alioze, kuli yimwe yize akusonekena yimwe yizavu ya atu ngwe akweze hanji yisemi. Yikuma ni yinema yinji yize yili mu site yetu kakuyisonekena kanji-kanji atu waze hi Yela ja Yehova ko. Yikuma yacho yakusolola ngwo, Yehova kananungu ni kuhana usongwelo unji kuli atu eswe.—Izaia 25:6.

5. Mutuhasa kupwa ni shindakenyo ngwetu Yehova kakuwahilila ni yika?

⁵ Anji akuli yetu twakuzanga kupwa ni mashimbu anji hanga tutange Mbimbiliya ni mikanda yetu. Alioze kota kutuchi kuhasa kupalikisa maola wowene ha kulilongesa mukanda ni mukanda uze mututambula. Mutuhasa kupwa ni shindakenyo ngwetu, Yehova kakuwahilila muze twakuzachisa mashimbu jetu ni mana hanga tutange ni kulilongesa Mbimbiliya hamwe ni mikanda yetu. (A-Efwesu 5:15, 16) Alioze kuli umwe upi uze twatamba kwehuka. Upi uka wenawo?

6. Yika te muyihasa kutulingisa hanga tuhone kuyuka ku ukwaso wa Yehova?

⁶ Nyi kutwakanyamine, mutuhasa kunyonga ngwetu yihanda yimwe ya Mbimbiliya hanji yimwe mikanda kuyatutalile. Chakutalilaho, kuchi mutwamba nyi chimwe chihanda cha Mbimbiliya muchisoloka ngwe kuchishi ni ukwaso ku mwono wetu? Yika mutwamba nyi tushi kulinga chihanda cha atu waze asonekena umwe mukanda? Shina twakutanga wika sango jacho fuji-fuji hanji kwecha kujitanga jeswe? Nyi che twakulinga, twakutokesa sango jilemu jize te mujitukwasa. Kuchi mutuhasa kwehuka muheto wacho? Twatamba kwiwuluka ngwetu sango jeswe jize mututambula jinakatuka kuli Yehova. Twakutanga mu Mbimbiliya ngwo: ‘Yami Yehova nguli Zambi yenu, yoze wakunulongesa hanga nukayuke.’ (Izaia 48:17) Mu mutwe uno, mutulilongesa yiyulo yitatu yize muyitukwasa hanga tuyuke ku ukwaso weswe uze Yehova akutwaha.

7. Mumu liaka twatamba kutanga Mbimbiliya ni manyonga waze alita?

⁷ Kutanga ni nyonga lize lialita. Chili umwenemwene ngwo yihanda yimwe ya Mbimbiliya kayisonekene wika hakutwala kuli umwe mutu hanji chizavu cha atu. Alioze Mbimbiliya yakwamba ngwo, “Yisoneko yeswe yapwa we mwiku wa Zambi, neyo kuyafumbuka.” (2 Timoteu 3:16) Kashika twatamba kupwa ni manyonga alita muze tunatange Mbimbiliya. Umwe ndumbu kakwiwuluka ngwenyi, iye mahasa kulilongesa yuma yinji ha chimwe chikuma. Yino yakumukwasa kuwana malongeso waze keshi kumulumbunukina kanawa. Kashika, muze kanda tuchitanga Mbimbiliya, twatamba kwita Yehova hanga atukwase kupwa ni manyonga alita ni mana hanga tunyingike malongeso waze tunazange kulilongesa.—Ezera 7:10; tanga Tiangu 1:5.

8, 9. (a) Muze tunatange Mbimbiliya, yihula yika mutuhasa kulihula? (b) Yika shimbi jize jinatale makulwana amu yikungulwila jinatulongesa hali Yehova?

⁸ Kuhula yihula. Muze unatange Mbimbiliya, mana nawa lihule yena mwene yihula ngwe yino: ‘Yika yino yinangulongesa hakutwala kuli Yehova? Kuchi munguhasa kuzachisa sango jino ku mwono wami? Kuchi munguhasa kuzachisa sango jino hanga ngukwase akwetu? Nyi twapukuna ha yihula yino, mutuyuka chinji ha yize tunatange mu Mbimbiliya. Tutalenu chilweza chimwe. Mbimbiliya yinasolola yimwe yitanga yize makulwana amu yikungulwila atamba kupwa nayo. (Tanga 1 Timoteu 3:2-7.) Alioze anji akuli yetu kutushi makulwana, kashika mutuhasa kunyonga ngwetu sango jacho kujishikuhasa kutukwasa. Chipwe chocho, tuzachisenu yihula yitatu yize twatongola ku uputukilo hanga tumone chize yitanga yacho muyihasa kutukwasa yetweswe.

⁹ “Yika yino yinangulongesa hakutwala kuli Yehova?” Yehova hanatwehe katalilo wa shimbi hakutwala kuli makulwana amu yikungulwila. Iye hanase shimbi yilemu yize malunga waze akufunga yikungulwila atamba kukaula. Chino chinasolola ngwo chikungulwila chikwete ulemu unji kumeso ja Yehova. Mbimbiliya yinambe ngwo, hanachilande “ni manyinga” ja Mwanenyi. (Yilinga 20:28) Kashika Yehova akushimbwila makulwana hanga apwe yilweza yipema, mumu ayo makalumbununa kuli iye chize akufunga mandumbu mu chikungulwila. Iye kanazange hanga ayo atufunge kanawa. (Izaia 32:1, 2) Kashika, nyi twatanga shimbi jacho, mutulilongesa chize Yehova akutufunga.

10, 11. (a) Muze tunatange shimbi jize jinatale makulwana, kuchi mutuhasa kukaula sango jacho ku mwono wetu? (b) Kuchi mutuhasa kuzachisa sango jacho hanga tukwase akwetu?

¹⁰ “Kuchi munguhasa kuzachisa sango jino ku mwono wami?” Nyi uli mukulwana mu chikungulwila, watamba kuhengula mashimbu eswe katalilo wa shimbi yacho ni kweseka kululieka yimwe yitanga ku mwono we. Nyi uli umwe yoze ‘unafupa mulimo wa kalayi,’ watamba kukaula shimbi jino hanga ujame. (1 Timoteu 3:1) Chipwe chocho, akwa-Kristu eswe mahasa kulilongesa yuma yinji ha shimbi jacho. Chakutalilaho, Yehova kanashimbwila hanga yetweswe tupwe ni mana ni kunyonga kanawa. (A-Fwilipu 4:5; 1 Petulu 4:7) Nyi makulwana mapwa ‘yilweza hali mapanga,’ mutuhasa kulilongesa kuli ayo ni ‘kwimbulula ufulielo wo.’—1 Petulu 5:3; A-Hepreu 13:7.

¹¹ “Kuchi munguhasa kuzachisa sango jino hanga ngukwase akwetu?” Mutuhasa kuzachisa katalilo yono wa shimbi jize jinatale makulwana amu chikungulwila hanga tukwase alongi a Mbimbiliya ni atu akwo waze akuzanga sango jetu, hanga anyingike chize makulwana alisa ni mangana a yingeleja. Katalilo wacho mahasa nawa kutukwasa hanga twiwuluke mulimo ukalu uze makulwana akulinga mu chikungulwila chetu. Chino muchitukwasa hanga tuvumbike mandumbu jacho. (1 A-Tesalonika 5:12) Nyi twaavumbika ni mbunge yeswe, o malinga mulimo wo ni chiseke.—A-Hepreu 13:17.

12, 13. (a) Nyi twazachisa yuma yize tulinayo, kuhengwola chamutapu uka twatamba kulinga? (b) Hana chilweza chize chinasolola ngwo sango jikulu mujihasa kutukwasa kunyingika malongeso waze mutumona ngwe akalu.

¹² Kuhengwola. Muze tunalilongesa Mbimbiliya mutuhasa kufupa makumbululo a yihula ai:

• Iya wasonekene chihanda chino cha Mbimbiliya?

• Kulihi nawa shimbu lika achisonekene?

• Yuma yika yilemu yize yalingiwile muze asonekene mukanda uno?

Sango jacho mujihasa kutukwasa kunyingika malongeso waze tunamono ngwe akalu.

¹³ Chakutalilaho, mukanda wa Ezekiele 14:13, 14, unambe ngwo: “Muze chifuchi chimwe muchinguvulumuna hakulinga ni mafwefwe, ni yami munguzoza kwoko liami ni kulimika nacho, ni kumakuna mulambu wacho wa mbolo ni kutumako kapunga, ni kusutulako atu ni tushitu. Chipwe kachi wano malunga atatu, Noa, ni Daniele, ni Yombi atwamamo, hindu mapulula mwono wo wika ha mukunda wa ululi wo. Chocho anambe Mwene Yehova.” Nyi mutuhengwola, mutulilongesa ngwetu, Ezekiele kasonekene maliji wano te hikwapalika miaka 612 mba Kristu yasemuka. Noa ni Yombi te hanafu kulu ha kulakaji ja miaka, alioze Yehova nihindu te machinunga ni kwiwuluka ushishiko wo. Daniele te uchili ni mwono. Alioze te uchili ni miaka 20 muze Yehova ambile ngwenyi iye mukwa-ululi ngwe Noa ni Yombi. Yika twalilongesa ha chikuma chino? Twalilongesa ngwetu, Yehova kakumona ni kulemesa tuvumbi twenyi ashishika, kuchingako ni akweze.—Samu 148:12-14.

14. Kuchi mikanda yize akufwambwishila akweze yakwaakwasa, nawa kuchi atu akwo muhasa kuyuka? (Tala chizulie hauputukilo.)

¹⁴ Mikanda ya akweze. Twalilongesa ngwetu mutuhasa kuyuka ha kutanga yihanda yeswe ya Mbimbiliya. Chizechene nawa, mutuhasa kuyuka ha kutanga mikanda yetu yeswe. Tutalenu yimwe yilweza. Ha miaka yino, Yehova kanahane sango jinji kuli akweze. ^[1] (Tala maliji akusongo.) Sango jacho jakukwasa akweze kulimika ni yihungumiona ya ku shikola ni yipikalo yize yakusoloka ha kukola cho. Alioze kuchi yetweswe mutuhasa kuyuka ha kutanga yikuma ni mikanda yacho? Muze twakutanga sango jacho, twakulilongesa kapalia yoze akweze akupwa nenyi, ha chino mutuhasa kumona chize mutwaakwasa ni kwaatakamisa.

15. Mumu liaka akwa-Kristu waze hakola katamba kuzanga sango jize jinatale akweze?

¹⁵ Akwa-Kristu waze hakola katambile kulizata hanga ehuke kutanga sango ja akweze. Yipikalo yinji yize akusolola mu mikanda yacho yinatale akwa-Kristu eswe. Chakutalilaho, yetweswe twatamba kukalila ufulielo wetu, kufunga manyonga jetu, kwehuka yeseko ya masepa ni masepa api hamwe ni kuheha chipi. Kashika chipwe ngwe mikanda yacho kakuyisonekena akweze, alioze sango jacho jinakatuka mu Mbimbiliya nawa akwa-Kristu eswe mahasa kuyuka ha kujikaula.

16. Ha yika nawa mikanda yetu yakukwasa akweze hanga alinge?

¹⁶ Mikanda yize akusonekena akweze muyihasa nawa kwaakwasa hanga akolese usepa wo ni Yehova. (Tanga Chilumbununyi 12:1, 13.) Makulwana no mahasa kuyuka. Chakutalilaho, ha kakweji wa Abril 2009 Despertai! yatuhukile ni chikuma cha “Jovens Perguntam” chakwamba ngwo, “Kuchi Munguhasa Kuzanga Kutanga cha Mbimbiliya?” (“Como Tornar a Leitura da Bíblia Agradável?”) Mutwe wacho uli ni yiyulo yinji yipema nawa uli ni kasha yize mutu mahasa kuteta, hanga azachise ha kutanga Mbimbiliya. Shina makulwana mahasa kuyuka ha chikuma chacho? Umwe mama wa zuwo yamba ngwenyi, kutanga Mbimbiliya mashimbu eswe te chikalu chinji kuli iye. Alioze yazachisa yiyulo yize yili ha mutwe wacho, haliapwila kakwivwa usona wa kutanga cha Mbimbiliya. Yamba ngwenyi, kakuwahilila ha kumona chize mikanda ya Mbimbiliya yalita nawa ya kumupema, yaweza nawa ngwenyi, “Kanda nguchivwa kama chiseke chize ngunevu ha kutanga Mbimbiliya.”

17, 18. Kuchi mutuhasa kuyuka ha kutanga yikuma yize akusonekena mbunga? Hana chilweza.

¹⁷ Mikanda ya mbunga. Kukatuka ha mwaka wa 2008 twakuwahilila kutambula Kaposhi wa Kutalila wakulilongesa nenyi. Kaposhi wacho kamusonekena wika Yela ja Yehova, alioze tuli nawa ni kaposhi wa kutalila wa mbunga. Kuchi twakuyuka ha kutanga tuposhi jacho? Tutalenu chimwe chilweza. Nyi wasanyika mutu hanga eze kukunguluka mu Zuwo lia Wanangana, nyi mutu wacho meza, muwivwa kuwaha chinji. Muze ndumbu anahanjika pande ena munyonga hali mutu wacho. Ni kulihula ngwe, kuchi mutu yono anevu ku mbunge hakutwala ku yuma yize anevu, nawa munyonga chize sango jacho mujihasa kwalumuna mwono wenyi. Ha chino, sango jacho mujikukwata ku mbunge nawa musakwilila chinji ha chikuma chacho.

¹⁸ Chuma chamutapu au muchihasa kulingiwa kuli yetu muze mututanga mikanda yize asonekena mbunga. Chakutalilaho, Kaposhi wa mbunga ni yikuma yize yili ha jw.org yinazachisa maliji a Mbimbiliya ni kwaalumbununa mu maliji ashi waze atu ananyingika. Muze mututanga sango jacho, mutwokesa chinyingi chetu ni kuzanga umwenemwene wa Mbimbiliya uze hi tunanyingika kanawa. Chikwo nawa, mutuhasa kunyingika jila jaha jakulumbunwinamo ufulielo wetu mu munda. Chizechene nawa, Despertai! kakukolesa ufulielo wetu ha kunyingika ngwetu Sakatanga kwali. Kakutukwasa nawa kunyingika chize mutuhasa kukalila ufulielo wetu.—Tanga 1 Petulu 3:15.

19. Kuchi mutuhasa kusolola usakwililo wetu ha ukwaso uze Yehova akutwaha?

¹⁹ Chochene, Yehova kakutwaha yiyulo ni sango jinji hakutwala ku ufulielo wetu. (Mateu 5:3) Tunungenu ni kutanga ni kukaula sango jeswe jize Yehova akutwaha. Nyi twalinga chocho, mutuyuka nawa mutusolola kuli Yehova ngwetu, tunasakwilila chinji ha ukwaso weswe uze akutwaha.—Izaia 48:17.