KU MASHIMBU a Mbimbiliya, kaselo te kakufunga zuwo hanji yuma ya mutu mukwo. Mu limi lia Hepreu ni Ngregu liji “kaselo” kanji-kanji te kakulilumbununa ngwe kavumbi yoze wakufunga limwe zuwo hanji kalayi.

Yosefwe mwana wa Yakomba, kapwile ndungo mu Engitu, alioze yapwa kaselo ku zuwo lia Potifwa mwata wenyi. Mbimbiliya yakwamba ngwo, mwata wenyi “Ka-Engitu yahichika yeswe mu kwoko lia Yosefwe.” (Uputu. 39:2-6) Kulutwe muze Yosefwe apwile mukwa-kuyula mulemu mu Engitu, neye yasakula umwe kaselo hanga afunge zuwo lienyi.—Uputu. 44:4.

Ha matangwa ja Yesu, miata te kakutwama kusuku ni minda yo. Kashika miata te kakusakula amwe tuselo waze matala-tala milimo ya hita tangwa yize te akwa-milimo akulinga mu minda yacho.

Iya te akusakula hanga apwe kaselo? Umwe mukwa-kusoneka Ka-Roma Columela yoze watwamine ku sekulu yitangu yamba ngwo, ndungo yoze te akusakula hanga apwe kalayi hanji kaselo, kapwile mutu yoze te “wanyingika kulinga kanawa umwe mulimo.” Iye te katamba kupwa mutu yoze te “masa shindakenyo ngwo, milimo yize akwa-milimo alinga yili yipema chakuhona kutenuka.” Yawezela nawa ngwenyi: “Chuma chilemu kuli kaselo chapwile kuhona kuyonga ngwe kananyingika yuma yeswe, alioze te katamba kuzanga kulilongesa yuma yaha.”

Liji lia Zambi lia kuzachisa chilweza cha kaselo hanga lisolole milimo yize yakulingiwa mu chikungulwila cha akwa-Kristu. Chakutalilaho, postolo Petulu kakolwezele akwa-Kristu azachise utotombo uze aahele kuli Zambi hanga “alinge nacho nikulita umwe kuli mukwo, ngwe tuselo apema a vumbi.”—1 Petu. 4:10.

Yesu neye kazachishile chilweza cha kaselo ha chishima chili ha Luka 16:1-8. Chikwo nawa, ha umwe uprofeto hakutwala ku chilayi cha kwiza chenyi ngwe Mwanangana, Yesu yalakenya kuli tumbaji twenyi ngwo, te masakula “ndungo wamwenemwene wa kukanyama,” hanji ngwetu “kaselo wamwenemwene.” Mulimo ulemu wa kaselo yono, te muupwa kuhana kulia cha ku spiritu chize tumbaji a Kristu te mafupiwa ha matangwa akusula. (Mateu 24:45-47; Luka 12:42) Twakuwahilila chinji ha kupwa hakachi ka waze akutambula mikanda yize kaselo wamwenemwene akululieka ni kuhana kuli atu hashi heswe.