1-2. (a) Yika muyitukwasa kunyongonona ha yipikalo ya hita tangwa? Lumbununa. (b) Yika mutulilongesa ha mutwe uno?

“MUZE nakunyonga ha yipikalo yize napalikile, namwene ngwe te kuchichi kuhasa kuyikumba ukawami.” Shina yino hinalingiwa kuli yena? Ewa, anji a kuli yetu, yino hiyinalingiwa. Hanji yena wambile chino, muze wanyongene ha tachi wapwile najo ja kukumba umwe musongo hanji kufwa cha umwe mutu yoze wazanga chinji. Nyi wanyonga ha yize wapalikile, mumona ngwo wahashile kunyongonona mumu spiritu yisandu ya Yehova ye yakuhele “tachi” jahiana.—2 Kori. 4:7-9.

² Ni yetu twakufupiwa ukwaso wa spiritu yisandu hanga twehuke yitanga yipi ya hano hashi. (1 Yoa. 5:19) Chikwo nawa, twakwasa jita ni “maspiritu a ungulungulu.” (Efwe. 6:12) Hamukunda wa yipikalo yino, kashika ha mutwe uno mutulilongesaho majila aali waze matukwasa kukumba yipikalo yacho kupalikila mu ukwaso wa spiritu yisandu. Mutulilongesa nawa yize twatamba kulinga mba tuhase kuyuka ha ukwaso wa spiritu yisandu.

3. Jila yimwe yika yize spiritu yisandu yakutukwashilamo muze tuli mu yipikalo?

³ Jila yimwe yize spiritu yisandu yakutukwashilamo, yili kutwaha tachi, hanga tuhase kulihulikila kanawa ha yiteli yetu, chipwe ngwe twakumona lamba lieswalio. Postolo Paulu kanyingikine ngwo kakuwayila Yehova mumu te kakujikijila ha “tachi ja Kristu.” (2 Kori. 12:9) Ha wenyi wamuchiali ngwe mishionaliu, iye kakalakalile chinji hi wika ko mu mulimo wa kwambujola, alioze ni mulimo wa ku musunya. Iye katwamine mu Korindu ku zuwo lia Akwila ni Prisila, waze te akulinga mbalaka. Amu te Paulu neye akulinga mulimo wacho, yakalakala no ha matangwa amwe. (Yili. 18:1-4)  Spiritu yisandu yahanyine tachi kuli Paulu hanga alinge mulimo wenyi wa ku musunya hamwe ni mulimo wa kwambujola.

4. Kulita ni 2 Korindu 12:7b-9, kapinda muka Paulu apwile nenyi?

⁴ Tanga 2 Korindu 12:7b-9. Ha versu jino Paulu kasonekene ngwenyi kanase jita ni “lumbambo mu mujimba.” Yika Paulu ambile kwamba? Nyi yena uli ni umwe lumbimbo mu mujimba, muwivwa yikola yinji. Kashika, Paulu kazangile kwamba ngwenyi, te kanapalika mu kapinda mukalu. Iye kambile ngwenyi te kanamweseka kuli ‘umwe mungelo wa Satana’ yoze atumine hanga ‘amumbufule.’ Hanji hi Satana ko ni andemonyu jenyi asekele Paulu. Alioze, muze amwene “lumbambo” yoze Paulu apwile nenyi, ayo yasa tachi hanga amuchoke lumbambo wacho. Chapwile ngwe kanamushindakenya lumbambo wacho kuhiana. Mba yika Paulu alingile?

5. Kuchi Yehova akumbulwile yilemba ya Paulu?

⁵ Chitangu, Paulu kazangile hanga “lumbambo” wacho amuchizeyo. Yamba ngwenyi: “Naliumbile kuli Mwene [Yehova] katatu . . . hanga chikatuke kuli yami.” Ewa, chipwe ngwe Paulu kapwile ni kulemba, nihindu lumbambo wacho kakamukatukile. Shina Yehova te kanalengulula yilemba ya Paulu? Ka, hi chocho ko. Iye yamukumbulula. Yehova kakahwishile yikola ya Paulu, alioze yamwaha tachi hanga anunge ni kunyongonona. Yehova yamba ngwenyi: “Tachi jami kakujipwisa jingunu mu ulelu.” (2 Kori. 12:8, 9) Ni ukwaso wa Zambi, Paulu yanyongonona ni uwahililo hamwe ni sambukila ya ku mbunge!—Fwili. 4:4-7.

6. (a) Kuchi Yehova mahasa kukumbulula yilemba yetu? (b) Kuchi yisoneko atongwola mu paragrafu muyitutakamisa?

⁶ Ngwe Paulu, shina hiunaliumbu kama kuli Yehova hanga ahwise yipikalo ye? Hanji wakuliumba mashimbu eswe kuli Yehova, alioze kapinda we keshi kuhwa. Hachino, muputuka kunyonga ngwe Yehova kakumba nyima. Nyi chino chinalingiwa kuli yena, iwuluka chilweza cha Paulu. Ngwe chize Yehova akumbulwile yilemba yenyi, iye makumbulula nawa yilemba ye! Hanji Yehova keshi kuhwisa yipikalo ye. Alioze kupalikila mu spiritu yisandu, iye makwaha tachi jize mufupiwa hanga unyongonone mu yipikalo yacho. (Samu 61:3, 4) Muhasa kulivwa ngwe ‘kuushi nawa ni tachi,’ alioze Yehova kechi kukwehuka.—2 Kori. 4:8, 9; Fwili. 4:13.

7-8. (a) Mu jila yika spiritu yisandu yili ngwe fuji? (b) Kuchi Petulu alumbunwine chize spiritu yisandu yakukalakala?

⁷ Jila yikwo yika yize spiritu yisandu yakutukwashilamo? Ngwe chize fuji yakutwala ulungu mu kalunga-lwiji yoze uli ni mikanya yinji, chizechene nawa, ni spiritu yisandu muyihasa kutukwasa kunyongonona ni kuwayila Yehova muze mutupalika mu yipikalo yinji, ndo ni haze mutunjilila mu chifuchi chaha chize Zambi hanalakenya.

⁸ Amu postolo Petulu apwile mukwa-kuta yishi, iye te hejilila kwendela mu ulungu. Hachino, mba alumbunune kanawa chize spiritu yisandu yakukalakala, Petulu kazachishile liji lize linatale ha kwenda mu ulungu. Yasoneka ngwenyi: “Uprofeto niumwe kuwejile niumwe mwaka ku upale wa atu, alioze atu ahanjikile cha kuli Zambi, nikuhungumuka kuli Spiritu Musandu.” Liji lia Ngregu ‘kuhungumuka’ mulihasa kulumbunuka ‘kusongwela hanji kutwala.’—2 Petu. 1:21.

9. Nyonga lika Petulu apwile nalio muze azachishile liji ‘kuhungumuka’?

⁹ Nyonga lika Petulu apwile nalio muze azachishile liji ‘kuhungumuka’? Luka, yoze wasonekene mukanda wa Yilinga, neye kazachishile liji liacho hanga alumbunune ulungu uze te ‘akuhungumuna’ ni fuji. (Yili. 27:15) Ngwe chize ambile umwe mukwa-kuhengwola yisoneko, muze Petulu asonekene ngwenyi, akwa-kusoneka Mbimbiliya  ‘kahungumukine’ kuli spiritu yisandu, iye kazachishile liji lize te mulitwala atu hanga anyonge ku vela ya ku ulungu. Kashika Petulu ambile ngwenyi, ngwe chize fuji yakuhungumuna ulungu, aprofeta ni akwa-kusoneka Mbimbiliya no kahungumwine kuli spiritu yisandu hanga alinge kanawa mulimo wo. Mukwa-kuhengwola yisoneko wacho kambile nawa ngwenyi, aprofeta kasele tachi hanga akwachise vela jo. Kashika Yehova te akwakwasa ha kwaha “fuji” hanji ngwetu, spiritu yisandu. Akwa-kusoneka Mbimbiliya kalingile chihanda cho ha kukaula usongwelo wa spiritu yisandu.

10-11. Yuma yika yaali twatamba kulinga mba spiritu yisandu yitusongwele? Hana chilweza.

¹⁰ Kwamba pundu, musono, Yehova keshi kuzachisa nawa spiritu yisandu hanga yikwase atu kusoneka mikanda ya Mbimbiliya. Alioze, Yehova kananungu ni kulinga chihanda chenyi ha kuzachisa spiritu yisandu hanga yisongwele atu jenyi. Kashika nyi tunazange hanga spiritu yisandu yitusongwele, twatamba kupwa ni shindakenyo ngwetu tunalingi kanawa chihanda chetu. Mba kuchi mutuhasa kuchilinga?

¹¹ Tunyongenu ha chilweza chino. Nyi tahwili kanazange hanga fuji yimukwase, katamba kulinga yuma yiali. Chitangu, iye katamba kusa ulungu wenyi kuze kunejilila fuji. Mumu nyi tahwili masa ulungu ku chihela chize kuchishi fuji, ulungu wenyi kuuchi kukatuka ha chihela chacho. Chamuchiali, iye katamba kukwata vela ni kujazulula kanawa. Chipwe ngwe kuli fuji yinji, nihindu, mba ulungu wende vela jatamba kupwa jakwazulula kanawa mba yikwate fuji. Chizechene nawa, ni yetu mutuhasa kunyongonona ni ukwaso wa spiritu yisandu ya Yehova. Mba tuyuke ukwaso wa spiritu yisandu, twatamba kulinga yuma yaali. Chitangu, twatamba kupwa kuze spiritu ya Yehova yili, chekwamba, kulinga yuma yize spiritu yenyi yakutusongwela hanga tulinge. Chamuchiali, twatamba kukwachisa kanawa vela jetu, hanji ngwetu, kulinga milimo yacho ni mbunge yeswe. (Samu 119:32) Nyi twalinga chocho, spiritu yisandu muyitwaha tachi hanga tununge  ni kunyongonona chipwe muze mutupalika mu yipikalo, ni kutukwasa kuwayila Yehova ni ushishiko weswe ndo mu chifuchi chaha.

12. Yika mutushimutwina haliapwila?

¹² Ndo hano, twalilongesa majila aali waze spiritu yisandu yakutukwashilamo. Chitangu, spiritu yisandu yakutwaha tachi jize mujitukwasa kununga ni kushishika chipwe muze mutupalika mu yeseko. Chamuchiali, spiritu yisandu yakutukwasa kununga ni kulingila Yehova ni kutusongwela mu jila ya mwono wa mutolo. Haliapwila, mutushimutwina yuma yiwana yize tunafupiwa kulinga mba tuyuke ha ukwaso wa spiritu yisandu.

13. Kulita ni 2 Timoteu 3:16, 17, kuchi Mbimbiliya muyihasa kutukwasa, alioze yika twatamba kulinga?

¹³ Chitangu, kulilongesa Mbimbiliya. (Tanga 2 Timoteu 3:16, 17.) Liji lia Ngregu analumbununa ngwo “mwiku wa Zambi,” linalumbunuka “kufuza cha kuli Zambi”. Zambi kazachishile spiritu yisandu hanga “afuze” hanji ase manyonga jenyi mu manyonga ja akwa-kusoneka Mbimbiliya. Muze twakutanga Mbimbiliya ni kupukuna ha yize twakutanga, shimbi ja Zambi jize twakutanga jakunjila mu manyonga jetu ni mu mbunge. Manyonga wano akuhwimina kuli Zambi kakutukwasa hanga twalumune mwono wetu ni kuvwisa Yehova kuwaha. (Hepre. 4:12) Alioze mba spiritu yisandu yitukwase, twatamba kusa mashimbu hanga tulilongese Mbimbiliya ni kupukuna kanawa ha yize twakutanga. Hachino, Liji lia Zambi mulisongwela yuma yeswe yize mutulinga ni yize mutuhanjika.

14. (a) Mumu liaka mutuhasa kwamba ngwetu spiritu yisandu ya Yehova yakutusongwela muze tuli ha kukunguluka? (b) Yika muyitukwasa mba tuyuke ni ukwaso wa spiritu yisandu muze tuli ha kukunguluka?

¹⁴ Chamuchiali, kuya ku kukunguluka. (Samu 22:22) Kwamba pundu, spiritu yisandu ya Yehova yakutusongwela muze tuli ha kukunguluka. (Uso. 2:29) Mumu liaka mutuhasa kwamba chocho? Mumu muze tuli ha kukunguluka hamwe ni mandumbu jetu, twakwita spiritu yisandu mu yilemba, twakwimba miaso ya Wanangana yinakatuka mu Liji lia Zambi, nawa twakulihulikila ha malongeso a Mbimbiliya waze mandumbu akulongesa ni ukwaso wa spiritu yisandu. Spiritu yisandu yakukwasa nawa mapangi kulilulieka kanawa hanga asolole yihanda yo ha kukunguluka. Alioze mba tuyuke ni ukwaso wa spiritu yisandu, twatamba kulilulieka kanawa hanga tuhane makumbululo ha kukunguluka. Nyi twalinga chocho, muze mutupwa ha kukunguluka muchipwa ngwe “tunakwachisa vela” jetu.

15. Kuchi spiritu yisandu yakutukwasa mu mulimo wa kwambujola?

¹⁵ Chamuchitatu, kwambujola sango lipema. Muze twakuzachisa Mbimbiliya ha kwambujola ni kulongesa, twakwecha hanga spiritu yisandu yitukwase mu mulimo wetu. (Roma 15:18, 19) Alioze, mba tuyuke ni ukwaso wa spiritu yisandu, twatamba kwambujola chinji ni kuzachisa Mbimbiliya mashimbu eswe nyi muchilita. Chuma chize muchihasa kutukwasa hanga tufumbuke mu mulimo wa kwambujola, chili kuzachisa maliji akuhanjika no waze ali ha Mukanda Wakuzachisa ha Kukunguluka cha Mwono ni Mulimo Wetu.

16. Mulali uka uze mutuhasa kwichilamo spiritu yisandu?

¹⁶ Chamuchiwana, lemba kuli Yehova. (Mateu 7:7-11; Luka 11:13) Mulali umwe uze mutuhasa kwichilamo spiritu yisandu uli kulemba kuli Yehova. Kukushi nichimwe chize muchihasa kukwika yilemba yetu hanga yihete kuli Yehova. Chikwo nawa, kukushi nichimwe chuma chize muchihasa kukwika spiritu yisandu ya Zambi kuheta kuli yetu—chipwe yikalakala ya zuwo lia ususu hanji Satana kechi kuhasa kuyikwika. (Tia. 1:17) Kuchi twatamba kulemba mba tuyuke ni ukwaso wa spiritu yisandu? Mba tukumbulule, tuhengwolenu chilweza chize tunawane mu Evanjelu ya Luka, chize muchitukwasa kulilongesa hakutwala ku yilemba. *

17. Yika twalilongesa ha chilweza chize chili ha Luka 11:5-9, 13, hakutwala ku yilemba?

¹⁷ Tanga Luka 11:5-9, 13. Chilweza cha Yesu chinasolola chize twatamba kulemba ni kwita spiritu yisandu. Ha chilweza chino, lunga yawana yize te anafupiwa ha mukunda wa kununga ni “kuketeka chenyi.” Chipwe ngwe ha muchima ufuku, iye kakevwile woma wa kwita ukwaso kuli sepa lienyi. Yika chilweza chino chinatulongesa hakutwala ku yilemba? Iye yamba ngwenyi: “Etenu, mba kumakanwaha; fupenu, mba kumunukawana; ngongwelenu, mba kumakanwazulwila.” Mba yika twalilongesa ha chilweza chino? Twalilongesa ngwetu, nyi tunazange kutambula ukwaso wa spiritu yisandu, twatamba kununga ni kulemba.

18. Kulita ni chilweza cha Yesu, mumu liaka mutuhasa kupwa ni shindakenyo ngwetu Yehova matwaha spiritu yenyi yisandu?

¹⁸ Chilweza cha Yesu chinatukwasa nawa kumona mumu liaka Yehova akutwaha spiritu yisandu. Lunga wa ha chilweza chino te kanazange kupwa mukwa-kuzumbula ngeji mupema. Iye te keshi nichimwe chize te mahana kuli ngeji wacho yoze wejile ha muchima ufuku, alioze te katamba kumuzumbula. Yesu kambile ngwenyi lunga wa ha chilweza chino, kamukwashile hamukunda wa kuketeka hanji ngwetu, kununga ni kungongwela. Yika Yesu te anazange kulongesa? Nyi mutu yoze uli chihenge mahasa kukwasa sepa lienyi yoze unanungu ni kumwita ukwaso, kuma Tata yetu, Yehova yoze uli mukwa-zango, keshi kuhasa kuhana spiritu yisandu kuli waze akununga ni kumwitayo? Kashika, mutuhasa kupwa ni shindakenyo ngwetu, Yehova makumbulula yilemba yetu nyi twamwita spiritu yisandu.—Samu 10:17; 66:19.

19. Mumu liaka mutuhasa kupwa ni shindakenyo ngwetu mutukumba?

¹⁹ Satana kechi kuhonga ni kweseka kutupiangula. Alioze mutuhasa kupwa ni shindakenyo ngwetu mutuhasa kukumba. Mumu liaka? Mumu spiritu yisandu yakutukwasa mu majila aali. Yitangu, spiritu yisandu yakutwaha tachi hanji ndundo jize tunafupiwa hanga tukumbe yeseko. Yamuchiali, spiritu yisandu yapwa tachi jize “jakukwachisa vela jetu,” jize jakutukwasa tununge ni kuwayila Yehova ndo ni haze mutunjilila mu chifuchi chaha. Kashika, sako tachi hanga uyuke ni ukwaso uze spiritu yisandu yakuhana!