1-2. Kulita ni 1 Petulu 4:7, 8, yika muyitukwasa muze mutupalika ha mashimbu akalu?

AMU tunakundama ku songo lia “matangwa a kusula,” mutuhasa kupalika mu lamba linji. (2 Timo. 3:1) Chakutalilaho, tutalenu yize yalingiwile mu chimwe chifuchi cha ku chitokelo cha Africa. Hanyima lia kusakula mwata wa mu chifuchi, atu yaputuka kulimika chocho yikusoloka chizavu cha yilianyi. Mumu lia vunda yacho, mandumbu jetu yapalika mu ponde ha tukweji kuhiana asambano. Yika yaakwashile ha mashimbu jacho akalu? Amwe akuli ayo yachinyina ku mazwo ja mandumbu akwo waze te atwama ku yihela kuze kwakapwile vunda. Umwe ndumbu yamba ngwenyi: “Ngunakawahilila chinji ha kupwa hamwe ni masepa jami ha mashimbu jacho. Tunakalitakamisa umwe ni mukwo.”

² Muze “Luyinda munene” maputuka, ni yetu mutukawahilila ha kupwa hamwe ni masepa jetu waze akutuzanga. (Uso. 7:14) Kashika, tunafupiwa haliapwila kukolesa usepa wetu ni mandumbu jetu. (Tanga 1 Petulu 4:7, 8.) Mutuhasa kulilongesa yuma yinji ha chilweza cha profeta Jeremia. Mumu lia ukwaso wa masepa jenyi, iye yahasa kulilamwina ha mashimbu akalu muze Yerusaleme te kanda ayinongesa. * Kuchi mutuhasa kwimbulula Jeremia?

3. (a) Yika te muyihasa kutwala Jeremia kulihandununa ni akwo? (b) Yika Jeremia alwezele Mbaruke, nawa yika yalingiwileko?

³ Jeremia katwamine ni atu waze te keshi kushishika kuli Zambi  ha miaka 40 hanji kuhiana. Mukachiko, amwe kapwile enyembo jenyi, akwo kota kapwile akwa-kumahio ku Anatote, mbonge yize asemukinyine. (Jere. 11:21; 12:6) Chipwe chocho, Jeremia kakalihandunwine ni akwo. Alioze, iye kalwezele chize te akwivwa kuli mukwa-kusoneka wenyi washishika, Mbaruke. Ni yetu nawa, yatulweza yuma yacho kupalikila mu Mbimbiliya. (Jere. 8:21; 9:1; 20:14-18; 45:1) Muchihasa kupwa ngwe, muze Mbaruke te anasoneka yuma yeswe yize yalingiwile ku mwono wa Jeremia, mwaali wo yalizanga ni kulilemesa umwe ni mukwo.—Jere. 20:1, 2; 26:7-11.

4. Mulimo uka Yehova ahanyine kuli Jeremia, nawa kuchi mulimo wacho wakolesele usepa wa Jeremia ni Mbaruke?

⁴ Ha miaka yinji, Jeremia ni hamu lieswe yatoweza A-Izalele hakutwala ku yize te muyilingiwa mu Yerusaleme. (Jere. 25:3) Hachino, Yehova yahana uhashi kuli atu jenyi hanga alikonyeke. Yehova yahana mulimo kuli Jeremia hanga asoneke mu chivungo utowezo weswe uze Iye ahanyine kuli atu jenyi. (Jere. 36:1-4) Muze Jeremia ni Mbaruke te analingi mulimo wacho hamuwika, uze kota wambachile tukweji anji, kwamba pundu yize apwile ni kuhanjika yakolesele ufulielo wo.

5. Kuchi Mbaruke asolwele ngwenyi kali sepa mupema kuli Jeremia?

⁵ Muze ahwishile kusoneka chivungo, Jeremia yazanga hanga sepa lienyi Mbaruke atange sango jacho kuli atu. (Jere. 36:5, 6) Mulimo wacho te muusa mwono wenyi mu ponde, alioze Mbaruke yawulinga ni hamu lieswe. Shina muhasa kunyonga ha chize Jeremia evwile kuwaha muze Mbaruke anjilile mu tembele ni kutangila atu chivungo chacho? (Jere. 36:8-10) Yilolo A-Yunda yanyingika yize Mbaruke alingile, chocho yamusanyika hanga atange chivungo chacho ni liji mwilu ku meso jo. (Jere. 36:14, 15) Yilolo yalweza Mwanangana Jehoakime maliji a Jeremia. Ni vumbi lieswe, Yilolo yalweza Mbaruke ngwo: “Yako ukaswame, ni  yena ni Jeremia, kanda nulweza niumwe kuze nuli.” (Jere. 36:16-19) Chino chapwile chiyulo chipema!

6. Yika Jeremia ni Mbaruke alingile muze apalikile mu yihungumiona?

⁶ Mwanangana Jehoakime yapihilila ni maliji waze apwile ha chivungo cha Jeremia. Hachino, yocha chivungo chacho, nawa yasa Jeremia ni Mbaruke mu zuwo lia ususu. Alioze, Jeremia kakevwile woma. Iye yanda chivungo chikwo yachihana kuli Mbaruke. Hachino muze Jeremia te anahanjika sango ja Yehova, Mbaruke te kanasoneka “maliji aze eswe  . . . [a] mukanda uze Jehoakime Mwanangana wa A-Yunda ochele mu jiko.”—Jere. 36:26-28, 32.

7. Yika kota yalingiwile kuli Jeremia ni Mbaruke muze akalakalile hamuwika?

⁷ Atu waze akumona lamba hamuwika kanji-kanji kakupwa masepa apema. Jeremia ni Mbaruke kakalakalile hamuwika hanga asoneke cheka chivungo chize ochele kuli Mwanangana mupi Jehoakime. Ha mashimbu jacho, kota Jeremia ni Mbaruke kamwene yitanga yipema hali umwe ni mukwo, chocho yapwa masepa apema. Yika mutuhasa kulilongesa ha chilweza cha malunga wano aali ashishika?

8. Mumu liaka hanji chakukaliwa kulweza akwetu chize tunevu, nawa mumu liaka twatambile kuhonga?

⁸ Shina chakupwa chikalu kulweza akwenu chize unevu? Chino chakulingiwa mumu hanji umwe wakulemekene ku mbunge. (Yishi. 18:19, 24) Hanji yena wakulivwa ngwe kuushi mashimbu ni tachi ja kulinga usepa. Alioze kanda uhonga. Nyi tunazange hanga mandumbu jetu apwe hamwe ni yetu muze mutupalika mu yihungumiona, twatamba kwajikijila haliapwila ni kupwa ni chako chakwalweza yize twakunyonga ni chize twakwivwa. Yino yili jila yilemu yize muyitukwasa kupwa ni masepa amwenemwene.—1 Petu. 1:22.

9. (a) Kuchi Yesu asolwele ngwo kakujikijila kuli masepa jenyi? (b) Kuchi kulihanjekesa kanawa ni akwenu muchihasa kukolesa usepa we ni akwenu? Hana chilweza.

⁹ Yesu te kakujikijila kuli masepa jenyi. Iye kachisolwele muze te akuhanjika no ni mbunge yeswe ni kwalweza chize te akwivwa. (Yoa. 15:15) Kuchi muhasa kwimbulula chilweza chenyi? Pwako ni kulianyina ni akwenu uwahililo we, yinyengo ni yipikalo ye. Muze umwe mahanjika ni yena, mupanjike kanawa. Hachino, muhasa kunyingika manyonga ni yitanga yenyi ni yuma yikwo yize yenweswe nwakuzanga. Tutalenu chilweza cha Cindy, umwe pangi wa miaka 29. Iye kalikachile ni Maria Luísa, umwe pionelu wa miaka 67. Hita Liamawana chimene, o eswe kakukalakala hamuwika mu munda, nawa kakushimutwina yikuma yeka ni yeka. Cindy yamba  ngwenyi: “Ami nakuzanga kuhanjika ni masepa jami hakutwala ku yikuma yilemu, mumu chino chakungukwasa kwanyingika ni kwapanjika kanawa.” Mba usepa ukole, wa kufupiwa kuuhinjila meya, chekwamba kulihanjekesa kanawa. Ngwe Cindy, ni yena nyi waputuka kuhanjika ni akwenu, mumona ngwo usepa wenu muukola chinji kuhiana.—Yishi. 27:9.

10. Kulita ni Yishima 27:17, yika muyihasa kulingiwako muze tunakalakala ni mandumbu jetu?

¹⁰ Jeremia ni Mbaruke kakolesele usepa wo, muze apwile ni kukalakala hamuwika. Chizechene nawa, muze twakukalakala hamwe ni mandumbu jetu ni kumona yitanga yo yipema, twakulilongesa yuma yinji kuli ayo ni kwazanga chinji. (Tanga Yishima 27:17.) Chakutalilaho, achinyonga yize yakulingiwako muze uli mu munda ni umwe sepa. Muze nunakalakala, mumona chize iye analumbununa ni hamu lieswe yize twafuliela hanji chize anahanjika ni shindakenyo yeswe hakutwala kuli Yehova ni yilakenyo yenyi. Kuchi wakwivwa? Kota zango lie hali sepa wacho liakukola.

11-12. Hana chilweza chinasolola ngwo kwambujola muchihasa kukolesa usepa.

¹¹ Tutalenu yilweza yaali yize yinasolola ngwo, kwambujola hamuwika chakukolesa usepa. Adeline umwe pangi wa miaka 23, kalwezele umwe pangi avuluka ngwo Camila hanga aye ni kwambujola ku chihela kuze te kunafupiwa ukwaso. Adeline yamba ngwenyi: “Twazangile chinji kwokesa zango lietu mu mulimo wa kwambujola. Mu waali wetu twafupiwile utakamiso ku ufulielo.” Shina kukalakala hamuwika chaakwashile lume? Yamba nawa ngwenyi: “Kusongo lia hita tangwa, te twakulishimwinya hakutwala ku yize tunevu, chize twalitakamisanga umwe ni mukwo ni chize Yehova akusongwela mulimo wetu. Yize twapwile ni kuhanjika yapwile yipema chinji, chocho mu waali wetu yitulinyingika kanawa.”

¹² Layala ni Marianne, mapangi aali twamishi amu França, kayile ni kwambujola mu Bangui, mbonge yinene ya Centro-Africana ha poso jitano. Layala yamba ngwenyi: “Yami ni Marianne twapalikile mu yimwe yipikalo. Alioze,  kulihanjekesa chipema ni zango lia Ukristu yakolesele usepa wetu. Namwene ngwami Marianne kapwa mwashi kutwama nenyi. Iye te kakuzanga chinji atu mu ngiza yacho nawa te kakuzanga chinji kwambujola. Yino yapwile ni kungukomwesa chinji hakutwala hali iye.” Yena kuwafupiwile kwalukila mu chifuchi chikwo mba wivwe chocho. Kashika, sako mashimbu hanga ukalakale hamwe ni mandumbu amu chikungulwila chenu. Chino muchikukwasa kwanyingika kanawa ni kupwa ni usepa upema ni ayo.

13. Kapinda muka mahasa kusolokako muze tunakalakala hamuwika ni masepa jetu?

¹³ Ha mashimbu amwe muze twakukalakala ni masepa jetu, kutushi kumona wika yitanga yo yipema alioze twakumona nawa uhenge wo. Yika muyihasa kutukwasa mba tukumbe kapinda wacho? Nyonga nawa ha chilweza cha Jeremia. Yika yakwashile profeta Jeremia hanga amone yitanga yipema ya akwo, chakuhona kulikwachilila ha uhenge wo?

14. Yika Jeremia alilongesele hali Yehova, nawa kuchi chino chamukwashile?

¹⁴ Kuchizako mukanda uze ukwete jina lienyi, kota Jeremia mwe wasonekene mukanda Utangu ni wa Wamuchiali wa Mianangana. Pundu lume, chiteli chino chakwashile Jeremia kumona chize Yehova akusolwela yihenge keke. Chakutalilaho, Jeremia kanyingikine upi uze alingile Mwanangana Ahabe ni chize alikonyekene, mba Yehova yecha kuneha upi ha matangwa jenyi. (1 Mia. 21:27-29) Chikwo nawa, Jeremia te kananyingika lusango wa Manase yoze walingile upi unji kuli Yehova kuhiana Ahabe. Chipwe chocho, muze Manase alikonyekene Yehova yamukonekena. (2 Mia. 21:16, 17; 2 Sango 33:10-13) Kunyingika sango jino kota chakwashile Jeremia hanga embulule Yehova, ha kupwa mukwa kulihumikiza ni kusolola keke kuli masepa jenyi.—Samu 103:8, 9.

15. Kuchi Jeremia embulwile kulihumikiza cha Yehova muze Mbaruke ahonene kulawola?

¹⁵ Achinyonga chize Jeremia akwashile Mbaruke. Tangwa limwe, Mbaruke yahona kulawola ha chiteli chize apwile nacho. Alioze Jeremia kakehukile hazehene sepa lienyi. Chipwe chocho, Jeremia yakwasa Mbaruke ha kumwambulwila kanawa lusango wacho, chakuhona kumuswekela yize Zambi atumine kumulweza. (Jere. 45:1-5) Yika mutuhasa kulilongesa ha lusango yono?

16. Kulita ni Yishima 17:9, yika twatamba kulinga mba usepa wetu ununge ni kukola?

¹⁶ Kutwatambile kushimbwila unguno hali mandumbu jetu. Kashika muze mutulikata no, twatamba kusa tachi hanga usepa wacho ununge ni kukola. Nyi umwe sepa matulinga umwe upi, mutuhasa kumwaha chiyulo chipema chize chinakatuka mu Mbimbiliya, chakuhona kumuswekela. (Samu 141:5) Nawa nyi umwe sepa matulemeka ku mbunge, twatamba kumukonekena. Muze mutumukonekena, kutwatambile kuhanjika nawa ha kapalia wacho kulutwe lia matangwa. (Tanga Yishima 17:9) Ha mashimbu wano akusula, chili chilemu kulihulikila ha yitanga yipema ya mandumbu jetu ni kwecha kulikwachilila ha tupalia two. Nyi twalinga chino, mutukolesa usepa wetu ni mandumbu jetu. Nawa muze luyinda munene maputuka, mutukafupiwa ukwaso wa umwe ni mukwo.

17. Kuchi Jeremia asolwele kupwa sepa wamwenemwene ha mashimbu a lamba?

¹⁷ Jeremia kasolwele kupwa sepa wamwenemwene ha mashimbu a lamba. Ebede-meleke, chilolo wa chota kanakapulwila Jeremia eche kufwila mu wina uze te unazala ni malowa. Hamukunda wa chino, Ebede-meleke yevwa woma wa kumushiha kuli yilolo. Muze Jeremia anyingikine chino, kakaholele ni kunyonga ngwo sepa lienyi te mahasa kulipulwila mwene. Chipwe  muze apwile mu zuwo lia ususu, Jeremia yalinga yize te mahasa kulinga. Yalweza sepa lienyi Ebede-meleke chilakenyo cha kulembejeka chize Yehova alingile kuli iye.—Jere. 38:7-13; 39:15-18.

18. Kulita ni Yishima 17:17, yika twatamba kulinga muze umwe sepa anapalika mu yipikalo?

¹⁸ Musono, mandumbu jetu kanapalika mu yipikalo yalisa. Anji akuli ayo kanapalika mu luyinda wa chisemewa, minyiko ni yilungo. Akwo kanapalika mu upi uze atu akuneha, ngwe jita ni ungalwe. Muze yino yakulingiwa, amwe akuli yetu twakupwa ni uhashi wakutambula mandumbu jacho ku mazuwo jetu. Eka kali ni uhashi wa kuhana ukwaso wa mbongo. Alioze, chuma chize tulieswe mutuhasa kulinga chili kulemba kuli Yehova ni kwita hanga akwase mandumbu jetu. Muze twakwivwa ngwo, umwe ndumbu hanji umwe pangi kananenganyana, chakupwa chikalu kunyingika yize mutwamba ni yize mutulinga. Alioze tulieswe tuli ni yinji yakuhana. Chakutalilaho, mutuhasa kusa mashimbu jetu hanga tupwe hamwe ni masepa jetu. Mutuhasa kumupanjika kanawa muze anahanjika. Mutuhasa nawa kumutangila chimwe chisoneko cha Mbimbiliya twazanga chinji, chize muchimutakamisa. (Iza. 50:4) Chahiana ulemu chili kupwa hamuwika ni mandumbu jetu muze ayo mafupa ukwaso wetu.—Tanga Yishima 17:17.

19. Kuchi usepa ukolo tukwete ni mandumbu jetu mukatukwasa kulutwe lia matangwa?

¹⁹ Haliapwila twatamba kununga ni kukolesa usepa wetu ni mandumbu jetu. Mumu liaka? Mumu akwa-kole jetu kakuzachisa mahuza hanga atuhandunune. Ayo kakutulingisa hanga tweche kulijikijila hanji kulikwasa umwe ni mukwo. Alioze, ayo kechi kuhasa kutuhandununa. Kukushi nyichimwe chuma chize muchihasa kupihisa usepa uze tukwete ni mandumbu jetu. Usepa wetu muununga hi wika ko mu chifuchi chino cha mwokono, alioze ndo ku miaka ya mutolo!