MUTWE WAKULILONGESA 46
Shina Unafungu Kanawa “Lukepwe wa Ufulielo” we?
“Andenu lukepwe wa ufulielo.”—EFWE. 6:16.
MWASO 119 Twatamba Kupwa ni Ufulielo
CHIKUMA CHILEMU *
1-2. (a) Kulita ni Efwesu 6:16, mumu liaka tunafupiwa “lukepwe wa ufulielo”? (b) Yihula yika mutukumbulula ha mutwe uno?
SHINA uli ni “lukepwe wa ufulielo”? (Tanga A-Efwesu 6:16.) Kwamba pundu, uli nenyi. Ngwe chize lukepwe akufunga chihanda cha mujimba wa umwe swalale, ni ufulielo we mukufunga ku yitanga yipi ya chifuchi chino cha mwokono, ngwe utanji, ungalwe ni ndako jeswe jipi jize Zambi keshi kuzanga.
2 Alioze tuli ha “matangwa akusula,” nawa ufulielo wetu mupalika mu yeseko yinji. (2 Timo. 3:1) Kashika, twatamba kuhengwola kanawa hanga tumone nyi lukepwe wetu wa ufulielo kali kanawa. Kuchi muhasa kuchilinga? Nawa yika muyikukwasa mba ununge ni kukolesa ufulielo we? Mutwe uno muukumbulula yihula yino.
HENGWOLA KANAWA LUKEPWE WE
Hanyima lia yimwe jita, maswalale te katamba kululieka kanawa lukepwe wo (Tala paragrafu 3)
3. Yika tujita te akulinga ni lukepwe wo, nawa mumu liaka?
3 Ku mashimbu a kunyima, tujita kanji-kanji te kakuzachisa lukepwe yoze te akufuka ni kupu. Maswalale te kakusa maji ku lukepwe hanga kupu lihone kupiha nawa hanga yihanda ya utale yihone kukwachika ngengeya. Muze te lukepwe a kupiha, swalale te katamba kumululieka shimbu lizeliene. Chino te chakumukwasa kulianga kulilulieka shimbu jita yikwo kanda yiza. Kuchi chilweza chino chinatale ha ufulielo wetu?
4. Mumu liaka watamba kuhengwola kanawa lukepwe wa ufulielo we, nawa kuchi watamba kuchilinga?
4 Ngwe maswalale aku shakulu, watamba kuhengwola ni kufunga kanawa lukepwe we matangwa eswe, hanga uliange kulilulieka kanawa muze muya ku jita. Ngwe akwa-Kristu, twakwasa jita ni akwa-kole jetu a maspiritu api. (Efwe. 6:10-12) Kashika, chili chiteli che kufunga lukepwe wa ufulielo we. Mba kuchi mupwa ni shindakenyo ngwe muhasa kukumba yeseko? Chitangu, watamba kulemba kuli Zambi hanga akukwase. Kusulaho, watamba kuzachisa Liji lia Zambi hanga uhase kumona yuma ngwe chize iye akuyimona. (Hepre. 4:12) Mbimbiliya yinambe ngwo: “Fuliela Yehova ni mbunge ye yeswe; kanda ukajikijila ha malinjekela ja yena mwene.” (Yishi. 3:5, 6) Haliapwila, nyonga ha yuma yize walingile ku mwono we hakutwala ku chikuma chino. Chakutalilaho, shina unakapwa ni kulipikala hamukunda wa mbongo? Kutala wewulukile chilakenyo cha Yehova chili ha A-Hepreu 13:5 chinambe ngwo: “Chichi kukuhichika nichimwe, chipwe kukwehuka ka”? Shina muze wewulukile chilakenyo chino, wapwile ni shindakenyo ngwo Yehova makukwasa? Nyi chenacho, chino chinasolola ngwo unafungu kanawa lukepwe wa ufulielo we.
5. Yika muhasa kunyingika nyi wahengwola kanawa ufulielo we?
5 Mukomoka chinji nyi wa hengwola kanawa ufulielo we. Muhasa kunyingika ulelu we uze te kanda uchimona kama. Chakutalilaho, kusakalala, mahuza ni kukokoloka muyihasa kupihisa ufulielo we. Mba nyi yino yinalingiwa kuli yena, kuchi muhasa kufunga ufulielo we ku yuma yacho?
LIFUNGE KANAWA HAKUTWALA KU MAHUZA, KUSAKALALA NI KUKOKOLOKA
6. Kusakalala chika chili chipema?
6 Kusakalala chimwe chili chipema. Chakutalilaho, chili chipema kulihulumba ha chize mutuvwisa Yehova ni Yesu kuwaha. (1 Kori. 7:32) Nyi twalinga shili yinene, twakulihulumba chinji hanga tululieke usepa wetu ni Zambi. (Samu 38:18) Chikwo nawa, twakulihulumba hanga tuvwise yoze twalimbata nenyi kuwaha ni kufunga kanawa asoko jetu hamwe ni mandumbu jetu amu ufulielo.—1 Kori. 7:33; 2 Kori. 11:28.
7. Kulita ni Yishima 29:25, mumu liaka kutwatambile kuvwila atu woma?
7 Chikwo nawa, kusakalala chinji muchihasa kupihisa ufulielo wetu. Chakutalilaho, mutuhasa kulipikala chinji hakutwala ku yize mutulia ni yize mutuzala. (Mateu 6:31, 32) Kashika, mba tweche kulipikala, mutuputuka kulihulikila ha chize mutuhasa kuzuka yuma yacho. Kusulaho mutuputuka kuzanga chinji mbongo. Nyi twecha hanga yuma yino yilingiwe, ufulielo wetu kuli Yehova muputuka kutepuluka, ni usepa wetu ni iye mupwa mu ponde. (Marku 4:19; 1 Timo. 6:10) Chuma chikwo chize muchihasa kutepulula ufulielo wetu, chili kulipikala chinji ha yize akwetu akunyonga hali yetu. Hachino, mutuputuka kwivwa woma wa kutukekuna hanji kutuhungumiona kuli akwetu kuhiana kuvwila Yehova woma. Kashika, mba tulifunge ha ponde yacho, twatamba kuliumba kuli Yehova hanga atwehe ufulielo ni hamu lize tunafupiwa hanga tukumbe yeseko.—Tanga Yishima 29:25; Luka 17:5.
(Tala maparagrafu 8) *
8. Yika twatamba kulinga nyi twevwa ngwo wano kali mahuza?
8 Satana “tato ya mahuza,” kakuzachisa waze ali sali lienyi hanga amwange mahuza hakutwala kuli Yehova ni hali mandumbu jetu. (Yoa. 8:44) Chakutalilaho, yitanganyanyi kakumwanga mahuza ni kupihisa lufuma hakutwala ku ululikiso wa Yehova kupalikila mu masite, televizau, yisanji ni yuma yikwo nawa. Mahuza wano a Satana kali “kahia ka mwe chingulungulu.” (Efwe. 6:16) Mba yika twatamba kulinga nyi umwe maputuka kuhanjika hakutwala ha mahuza wano? Kwecha kumupanjika! Mumu liaka? Mumu twakufuliela kuli Yehova ni kujikijila hali mandumbu jetu. Kwamba umwenemwene, twatamba kwehuka kuhanjika ni yitanganyanyi. Kashika, kanda wecha hanga umwe mutu hanji chuma cheswacho, kuchingako kuzanga kunyingika chimwe chitutwale kulikumbushona no.
9. Kuchi kukokoloka muchihasa kutukwata?
9 Kukokoloka muchihasa kupihisa ufulielo wetu. Ha mashimbu amwe, mutuhasa kukokoloka hamukunda wa yipikalo yetu. Ewa, kutwatambile kulelesa yipikalo yacho. Alioze kutwatambile kunyonga chinji hakutwala ku yipikalo yacho mashimbu eswe. Mumu nyi ka, mutuhasa kuvulama yuma yeswe yipema yize Yehova hanatulakenya. (Uso. 21:3, 4) Kukokoloka muchihasa kuputuka kukeketesa zango lietu kuli Yehova ni kwecha kumuwayila. (Yishi. 24:10) Alioze chino kuchishi kulingiwa kuli yetu.
10. Yika twalilongesa hakutwala ku maliji a umwe pangi?
10 Tutalenu chilweza cha umwe pangi wa mu Estados Unidos. Mukwo-lunga kayijile chinji, kashika iye te mafupiwa kumufunga kanawa. Mba yika yakwashile pangi yono kufunga ufulielo wenyi? Iye katumine umwe mukanda ku chishina chinene haze ambile ngwo: “Yipikalo yetu ha mashimbu amwe yakutukokolwesa. Alioze kutalatala chetu chakututakamisa. Ngunasakwila chinji ha kulia cha ku spiritu chize Yehova akutwaha hanga tukolese ufulielo ni hamu lietu. Kwamba pundu, twakufupiwa yiyulo ni utakamiso wacho. Chino chakutukwasa kununga ni kukumba yeseko yize Satana akuzachisa hanga atupiangule.” Maliji a pangi yono, mahasa kututakamisa hanga tuhone kukokoloka! Kuchi acho? Iwuluka ngwe yeseko yeswe yakukatuka kuli Satana. Fuliela ngwe Yehova makutakamisa. Nawa, nunga ni kulemesa kulia cha ku spiritu chize iye akutwaha.
Shina unafungu kanawa “lukepwe wa ufulielo” we? (Tala maparagrafu 11) *
11. Mba tunyingike nyi ufulielo wetu unafupiwa kuukolesa, yihula yika twatamba kulihula?
11 Shina wamona chize watamba kukolesa ufulielo we? Ha tukweji apalika, shina wahasa kwehuka kulipikala? Kutala wehuka kupanjika mahuza ja yitanganyanyi, chakuhona kulikumbushona no? Shina wahasa kukumba kukokoloka? Nyi wakumbulula ngwo “ewa” chinalumbunuka ngwo ufulielo we uli kanawa. Alioze twatamba kununga ni kulawola, mumu Satana kali ni miheto yikwo yize mahasa kuzachisa hanga atupiangule. Tushimutwinenu umwe wa ku miheto yacho.
LIFUNGE KU ZANGO LIA KUPWA NI UPITE UNJI
12. Yika muyihasa kulingiwa nyi twalipikala chinji hakutwala ku upite?
12 Kupwa ni upite unji muchihasa kutulalwisa hanga tuhone kufunga kanawa lukepwe wa ufulielo wetu. Postolo Paulu kambile ngwenyi: “Niumwe swalale mu jita malilimba ni yuma ya mwono uno; hanga akapemene kuli yoze hanamusela ku uswalale.” (2 Timo. 2:4) Hachino, maswalale amu A-Roma te katambile kulinjisa mu mingoso. Yika te muyihasa kulingiwako nyi umwe swalale mahona kukaula usongwelo wacho?
13. Mumu liaka swalale katambile kulinjisa mu mingoso?
13 Tuchinyongenu ha chikuma chino. Chimwe chizavu cha maswalale matangwa eswe kakulilongesa kwasa jita ni mikwale. Hachino, swalale umwe kechi kuya ni kulilongesa ni akwo. Iye kanalanjisa kulia ha chitanda. Ha ufuku, maswalale-ni-akwo kanalulieka yikumba ya jita ni kuhela mikwale yo. Alioze swalale yoze unalanjisa kulia, malulieka yuma yize makalanjisa tangwa lieka. Muze hikwacha, akwa-kole jo maalukukila. Swalale muka yoze walilulieka kanawa hanga ase jita ni kuzuka utayizo wa kapitau? Swalale muka yoze muzanga hanga apwe sali lie? Shina yoze waliluliekanga kanawa nyi yoze te unalingi yuma yeka?
14. Ngwe maswalale ja Kristu, yika yili ni ulemu chinji kuli yetu?
14 Ni yetu tuli ngwe maswalale apema. Kutushi kuvulama chikuma chetu chilemu cha kuzuka utayizo wa Tupitau twetu, Yehova ni Kristu. Kuli yetu, chikuma chino chili chilemu chinji kuhiana chuma cheswacho chize chifuchi cha Satana muchihasa kutwaha. Twakusa mashimbu ni tachi jetu hanga tuwayile Yehova ni kufunga kanawa lukepwe wa ufulielo wetu, hamwe ni yuma yeswe yize yinalingi chihanda cha lukepwe wetu wa ku spiritu.
15. Utowezo uka Paulu ahanyine, nawa mumu liaka?
15 Kutwatambile kukokoloka! Mumu liaka? Postolo paulu kambile ngwenyi “waze mazanga kupwa pichi,” ‘mapianguka ku ufulielo.’ (1 Timo. 6:9, 10) Liji ‘kupianguka’ linalumbunuka kununga ni kufupa chinji yikumba yize kutwafupiwile. Mutuhasa kusa mbunge yetu mu ponde ya kupwa ni usolo upi “wa kuhulamisa ni wa kulemeka.” Shimbu tweche hanga usolo upi unjile mu mbunge yetu, twatamba kunyingika ngwetu, Satana kanazachisa miheto yacho hanga akekemese ufulielo wetu.
16. Kulita ni sango jili ha Marku 10:17-22 yika muyitukwasa kunyonga ha yihula yimwe?
16 Hanji ukwete mbongo ja kulanda yikumba yinji. Shina chili chipi kulanda yuma yize twakuzanga, alioze kutushi kuyizachisa? Ha mashimbu amwe hi chipi ko. Alioze nyonga ha yihula yino: Chipwe ngwe ngukwete mbongo jakulanda yikumba, shina mungupwa ni mashimbu hanji tachi jakuzachisa yuma yacho? Shina nakuzanga chinji yuma yize ngukwete? Kutala nakulihulikila chinji ha yikumba yize muyihasa kungupwisa ngupwe ngwe mukweze yoze pichi walitunyine kukaula Yesu? (Tanga Marku 10:17-22.) Kwamba pundu, chuma chilemu chili kwashiwisa mwono ni kuzachisa mashimbu ni tachi jetu ha kulinga upale wa Yehova!
NUNGA NI KUFUNGA KANAWA LUKEPWE WA UFULIELO WE
17. Yika kutwatambile kuvulama?
17 Kutwatambile kuvulama ngwetu tuli mu yimwe jita. Twatamba kulilulieka matangwa eswe hanga tuhase kwasa jita yacho. (Uso 12:17) Mandumbu ni mapangi jetu katambile kutumbachila lukepwe wetu wa ufulielo. Mumu chiteli cha kumbata hanji kukolesa kanawa lukepwe wa ufulielo wetu, chili cha yetwene.
18. Mumu liaka maswalale te akufunga kanawa lukepwe wo?
18 Ku mashimbu akunyima, swalale yoze te wakusolola hamu mu jita, kapwile ni kumulemesa. Alioze nyi te mafuna ku zuwo chakuhona lukepwe, te kakulivwa ngwe chihepuke. Umwe mukwa-kuhengwola sango ja shakulu Ka-Roma avuluka ngwo, Tácito yamba ngwenyi: “Nyi umwe swalale mahichika lukepwe wenyi, jili sonyi jinji.” Kashika maswalale te akufunga kanawa lukepwe wo.
Umwe pangi kanafungu kanawa lukepwe wa ufulielo wenyi mumu kakutanga hita tangwa Liji lia Zambi, kakuya ku kukunguluka nawa kakulihana mu mulimo wa kwambujola (Tala paragrafu 19)
19. Kuchi mutuhasa kununga ni kufunga kanawa lukepwe wa ufulielo wetu?
19 Ni yetu twatamba kufunga kanawa lukepwe wa ufulielo wetu. Kuchi acho? Ha kuya ku hita kukunguluka ni kuhanjika ni akwetu hakutwala kuli Yehova hamwe ni Wanangana wenyi. (Hepre. 10:23-25) Chikwo nawa, twatamba kutanga Mbimbiliya hita tangwa ni kulemba kuli Yehova hanga atukwase kukaula yuma yize twakulilongesa. (2 Timo. 3:16, 17) Nyi twachilinga, Satana kechi kuhasa kutupiangula ni miheto yenyi. (Iza. 54:17) “Lukepwe wa ufulielo” wetu matufunga. Mutumana ngu, ha kukalakala ni hamu lieswe hamwe ni mandumbu jetu. Mutulinga Yuma yize yinahiana kukumba jita ya hita tangwa nawa mutupwa ni chiwape chakumona Yesu kanakumbu Satana ni atu jenyi.—Uso. 17:14; 20:10.
MWASO 118 “Weza Kama ku Ufulielo Wetu!”
^ kax. 5 Tujita te kakufupiwa lukepwe wo hanga alifunge ku ponde. Ufulielo wetu uli ngwe lukepwe. Ngwe chize tujita te atamba kufunga lukepwe wo, ni yetu tunafupiwa kufunga kanawa ufulielo wetu. Ha mutwe uno, mutushimutwinaho yize mutuhasa kulinga mba tupwe ni shindakenyo ngwetu “lukepwe wa ufulielo,” wetu kali kanawa.
^ kax. 58 ULUMBUNWISO WA YIZULIE: Amwe asoko kanatale TV chocho yikusoloka yitanganyanyi waze te anahanjika mahuza hakutwala kuli Yela ja Yehova. Haze-hene chisemi wa lunga yajima TV.
^ kax. 60 ULUMBUNWISO WA YIZULIE: Kulutwe, ha mashimbu a uwayilo wo wa mu usoko tata kanazachisa Mbimbiliya hanga atakamise ufulielo wa usoko wenyi.
