Shina unafuliela ngwe atu mahasa kuhwisa kapinda yoze wakutokesa sambukila ni ufunge? Mutu yoze unazange kuchilinga, katamba chitangu kunyingika chishina cha kapinda ni kuchiza yuma yize yakutumwesa lamba.

Ngwe chilweza, umwe mweji avuluka ngwo Tom te kanayiji, chocho yafwa. Mumu liaka afwile? Umwe ndotolo yoze te unatale Tom shimbu kanda afwa kasonekene ngwenyi: “Muze aputukile kuyiza, kushi mutu yoze wafupile kulianga kunyingika yuma yize te yinamuyijisa.” Chinasoloka ngwe atu waze afungile Tom muze te aputukile kuyiza, kamuhele wika yitumbo hanga alivwe kanawa.

Ni musono nawa, atu che akulinga. Ngwe chilweza, hakutwala kukuhwisa milonga, nguvulu kakusa jimwe shimbi ni kusa videovigilância ni kufumba kanawa mapulisha. Alioze, chipwe ngwe kulinga chino mashimbu amwe chakukwasa, kuchishi kuhwisa chishina cha kapinda yoze wakuneha lamba. Yitanga ya atu kanji-kanji yakukwata ha yize atu akufuliela ni ha yize akuzanga.

Daniel, yoze watwama mu chifuchi cha ku Sule ya America kuze kukushi mbongo jinji, yamba ngwenyi: “Te twakumbata mwono washi nawa yilianyi te keshi kutupinjisa. Alioze haliapwila, ku chihela chacho kukushi nawa sambukila. Kuhona mbongo, chasolwele kupwa cho. Ayo kali ni kuzo, chikwo nawa, keshi kulemesa upite ni mwono wa akwo.”

Umwe lunga avuluka ngwo Elias, kachinyine mbwanja yize yapwile ku Médio Oriente, kulutwe, yaputuka kulilongesa Mbimbiliya. Iye yamba ngwenyi: “Akweze anji, kaakolwezele kuli asoko jo ni akwa-kuyula mu chifuchi cho. Kwasa jita hanga aalemese mu chifuchi. Atu waze te anase no jita, no yalinga chimuwika! Chino changuhele chinyengo. Kashika, yingumona ngwami, chatambile kufuliela kuli manguvulu.”

Umwe mukanda ukulu wa mana wakwamba ni shindakenyo ngwo:

• “Kunyonga cha mbunge jo chapiha chize ku wanuke wo.”—Uputukilo 8:21.

• “Mbunge kuyakwonga kuhiana yuma yeswe, ni kupiha chikolo. Iya mayinyingika?”—Jeremia 17:9.

• “Mumu mu mbunge mwakutuhuka manyonga api, . . . ni utanji, ni wiji, ni shindakenyo ya mahuza.”—Mateu 15:19.

Atu hano hashi keshi kuhasa kuhwisa yuma yize yinatupinjisa. Kwamba pundu, chinasoloka ngwe yuma yacho yinayi ni kupiha kuhiana, ngwe chize twamona ha kapinda yoze twahanjika ha mutwe twapalika. (2 Timoteu 3:1-5) Yuma yino yinahiana chipwe ngwe musono tuli ni sango jiinji ni uhashi uze tulinawo wa kuhanjika ni akwetu! Mba, mumu liaka kutushi kutwama kanawa hano hashi ni sambukila? Kutala tunazange yuma yinji kuhiana yize mutuhasa kuhana? Shina tuneseka kulinga yuma yize kutushi kuhasa?

Chipwe ngwe te tuli ni uhashi wa kulinga yikomokeso hanga tuhwise kapinda yoze uli hano hashi, nihindu te kutuchi kuhasa kufunga atu eswe hano hashi. Mumu liaka? Mumu lia uhenge wetu.

Umwenemwene uli uno: ‘Jila ya mutu kuyapwile ya kuli iye mwene. . . chipwe kusongwela mashimbo jenyi.’ (Jeremia 10:23) Ewa, Zambi kakatutangile  hanga tuyule atu-ni-akwetu. Chizechene ngwe atu kakaatangile hanga atwame mushi lia meya hanji mutetela, chizechene nawa, atu kakaatangile hanga aliyule ene!

Nyonga ha chino: Shina atu kakuzanga hanga akwo aalweze chize mahasa kutwama ku mwono hanji kwalweza shimbi jize atamba kukaula? Kutala atu kakuzanga hanga akwo aalweze yize atamba kulinga hakutwala ku kuselumuna mwana hanji kulinga yuma yize muyihasa kwatwala ku kufwa ni hakutwala ku kufumba ana? Yino yili wika yuma yikehe yize yakutwala atu hanga alihandunune. Kashika, chipwe ngwe chili chikalu kutayiza, yize Mbimbiliya yakwamba yili yamwenemwene. Kutushi ni uhashi wa kuyula atu-ni-akwetu. Mba kulihi mutuhasa kuwana ukwaso?

Yehova mahasa kutukwasa, mumu iye mwe watutangile. Iye keshi kutuvulama. Tunanyingika chino mumu Mbimbiliya yakusolola ngwo, Yehova kakulihulumba hali yetu. Muze twakunyingika kanawa sango ja mu Mbimbiliya, twakupwa ni manyonga alita. Chikwo nawa, mutuhasa kunyingika mumu liaka chize ku shakulu, yuma yinapiha. Kashika, umwe mukwa-mana wa ku Alemanha yasoneka ngwenyi: “Atu ni manguvulu keshi kulilongesa ha yuma yize yalingiwile ku shakulu chipwe kulinga yuma kulita ni shimbi jize jinakatuka ha sango ja shakulu.”

Umwe lunga mukwa-mana kambile ngwenyi: “Mana kakusoloka zwalala mu yitanga.” (Luka 7:35) Chilweza chimwe cha mana wano, tunachiwane ha mukanda wa Samu 146:3, uze unambe ngwo: ‘Kanda nufuliela mwana mutu yoze keshi kuhasa kukwasa.’ Kukaula chiyulo chino, muchitufunga ku sango ja mahuza. Kenneth, yoze watwama ku yimwe mbonge ya ku Norte ya Estados Unidos kuze kuli chinji upupilo, kambile ngwenyi: “Akwa-mafwefwe anji kakulakenya atu ngwo ayo makapemesa yuma yeswe, alioze keshi kuhasa. Chino chakutwiwulula yize Mbimbiliya yakwamba.”

Daniel, yoze hitwatonogola, kanambe ngwenyi: “Hita tangwa, nakupwa ni shindakenyo ngwami, atu keshi kuhasa kuliyula kanawa. . . . Chipwe ngwe uli ni mbongo ku chimangu hanji uli ni yuma yikwo yize muyihasa kukwaha mbongo, kuchalumbunukine ngwo yena mukapwa ni mwono upema kulutwe hanji ufunge. Yami namwene chize atu akumona lamba ni kwivwa yinyengo ha chikuma chino.”

Mbimbiliya kuyishi kutufunga wika hanga tuhone kushimbwila yuma yize kutushi kuhasa kuzuka, alioze yakutwaha nawa kutalatala ngwe chize mutumona.