Kulinunga cha Mavungu (Nações Unidas) kanazange hanga atu a hashi heswe “alinunge.” Nyonga lio lili ngwo: Yifuchi yeswe yilivwashane, yivumbike ulite wa hita mutu ni kufunga hashi. Mumu liaka? Maher Nasser kambile ngwenyi: “Kwalumuka cha hashi, ungalwe, kwoka cha katonde, kapinda yoze atu keshi kuhasa kuhwisa, jita, kututuluka cha atu mumu lia jita, upupilo uli hashi heswe, misongo yize yakusambuluka ni kapinda mukwo, yakulingiwa ku yihela yeswe.”

Atu akwo kakukalila unguvulu wa hashi heswe ngwe poeta, estadista wa ku Italia Dante (1265-1321) ni físico Albert Einstein (1879-1955). Dante kapwile ni kufuliela ngwenyi, sambukila kuyichi kuhasa kununga mu chifuchi chalihandununa nawa cha mafwefwe. Iye katongwele maliji a Yesu Kristu anambe ngwo: “Wanangana weswe walihandununa wene wakunonga.”—Luka 11:17.

Muze te hikwalingiwa Jita Yamuchiali ya Hashi Heswe, Albert Einstein kasonekene umwe mukanda ni kuuhana ku chipatulo cha Assembleia Geral das Nações Unidas ni kulumbununa chize amwene mbomba jaali jize atu azachishile. Iye yamba ngwenyi: “Nações Unidas katamba kusa tachi kawashi-washi hanga akwase ni kufunga atu hashi heswe.”

Alioze, shina atu waze te malinga chihanda mu unguvulu wacho, mahasa kupwa akwa-kalimbalimba, kumwesa atu lamba ni kuhona kuyula kanawa? Kutala no mahasa kusolola yitanga yipi? Yihula yino yinatwiwulula umwe mukwa-kuhengwola sango, yoze wambile ngwenyi: “Ndundo jakutwala mutu kupwa ni kalimbalimba nawa ndundo jize atu akujikijila nejo mujihasa kupwa ni kalimbalimba.”

Mba tupwe ni sambukila hano hashi, twatamba kulinunga. Kuchi muchihasa kulingiwa? Shina mutuhasa lume kulinunga? Mbimbiliya yakusolola ngwo ewa, mutuhasa lume. Mu mutapu uka? Chino kuchishi kalingiwa kupalikila muli unguvulu wa hano hashi. Alioze, muchikalingiwa kupalikila muli unguvulu uze Zambi hanasakula. Chikwo nawa, unguvulu wacho, makasolola ulite wenyi wa kuyula yitangiwa yenyi. Nguvulu muka mwenawo? Mbimbiliya yakuvuluka unguvulu wacho ha jina, “Wanangana wa Zambi.”—Luka 4:43.

Yesu Kristu kahanjikile hakutwala ku Wanangana wa Zambi muze alembele ngwenyi: “Wanangana wenu wize. Upale wenu ulingiwe hano hashi.” (Mateu 6:9, 10) Ewa, Wanangana wa Zambi muukakwasa hanga upale wa Zambi ulingiwe hi upale ko wa manguvulu a hano hashi.

Wanangana wa Zambi kakuuvuluka nawa ngwo: “Wanangana wa mu malilu.” (Mateu 5:3) Mumu liaka? Mumu muukayula hashi kukatuka mu malilu. Chino chinalumbunuka ngwo, Wanangana wa Zambi kuushi kufupiwa yikumba hanji mbongo. Chino muchikakwasa chinji atu waze makapwa mu Wanangana uno!

Ngwe chize liji “wanangana” liakusolola, Wanangana wa Zambi uli umwe unguvulu wamwenemwene. Mwanangana wa Wanangana uno kali Yesu Kristu yoze Zambi ahele wata. Hakutwala kuli Yesu, Mbimbiliya yakwamba ngwo:

• “Chiyulo kumuchikapwa ha chipaya chenyi . . . Kutanda cha chiyulo chenyi ni cha sambukila kuchichi kusula.”—Izaia 9:6, 7.

•   “Yamwaha chiyulo, ni uhenya, ni wanangana, hanga akwa mavungu eswe ni minyachi yeswe, ni malimi eswe akamulingile. Chiyulo chenyi . . . kuchichi kahwa.”—Daniele 7:14.

• “Wanangana wa hano hashi hiwapwa wa Mwene wetu [Zambi], ni wa Kristu wenyi.”—Usolwelo 11:15.

Mba umanunune kulemba cha Yesu, Wanangana wa Zambi muukakwasa hanga upale wa Zambi ulingiwe hano hashi. Mu Wanangana wacho, atu eswe makalilongesa chize mahasa kululieka hashi hakapwe paraisu ni kutwamamo.

Chahiana ulemu, Wanangana wa Zambi muukalongesa atu eswe. Atu eswe makaalongesa shimbi jimuwika ni kulivwashana ni kulinunga hamuwika. Kashika, Izaia 11:9 wakwamba ngwo: “Niumwe mavwisa yikola hanji kwonwona . .  mumu hashi muhakazala ni chinyingi cha Yehova ngwe meya akufuka kalunga-lwiji.”

Atu waze makatwama hashi kulutwe lia matangwa, kumakapwa alinunga ni kutwama ni sambukila ngwe chize Kulinunga cha Mavungu (Nações Unidas) te akuzanga kulinga. Mukanda wa Samu 37:11 wakwamba ngwo, atu eswe “kumawahilila mu kulumbama cha sambukila.” Hakupalika cha mashimbu, maliji ngwe mulonga, kupihisa hashi, uswaole ni jita, kechi kayihanjika nawa. Tangwa lika chino muchikalingiwa? Ha mashimbu aka Wanangana wa Zambi mukaputuka kuyula? Kuchi mukayula? Kuchi yena muhasa kuyuka ha kuyula cha Wanangana wa Zambi? Tutalenu kumbululo.