Kwasala hakehe Wanangana wa Zambi unehe sambukila ni kulinunga hashi heswe. Samu 72:7 unambe ngwo, mukukapwa “kulumbama cha sambukila.” Shimbu lika Wanangana wa Zambi muputuka kuyula hano hashi? Kuchi yino muyikalingiwa? Yika muhasa kulinga hanga kuyula cha Wanangana wa Zambi chikuyukise?

Mbimbiliya yaliangile kwamba yuma yize te muyilingiwa hano hashi yize muyisolola ngwo Wanangana wa Zambi kwasala hakehe uputuke kuyula hano hashi. Yuma yacho yinalumbunuka “chilayi” chize Yesu ambile chize chinachingi jita, zala, yikola, minyiko ni kwoka cha uhulia.—Mateu 24:3, 7, 12; Luka 21:11; Usolwelo 6:2-8.

Uprofeto ukwo unambe ngwo: “Alioze nyingika chino (ngwe), ha matangwa akusula, mukukapwa mashimbu akalu chinji, ni kapinda. Mumu atu makapwa akwa-kulizanga ene, akwa-kuzanga mbongo, . . . keshi kwononoka yisemi jo, keshi kusakwilila, keshi kushishika, keshi kuzanga akwo, keshi kulivwashana ni akwo, yilamikiji, keshi kulihumikiza, yilianyi, asasu, keshi kuzanga yuma yipema, . . . akwa-kulizata chinji, kakuzanga kuheha, keshi kuzanga Zambi.” (2 Timoteu 3:1-4) Yitanga ngwe yino, yaputukile kulu kusoloka, alioze haliapwila yinahiana chikolo hashi heswe.

Uprofeto uno weswe, waputukile kumanunuka ha mwaka 1914. Akwa-kuhengwola kahanjikile hakutwala ku chize hashi halumukine chinji ha kupalika cha mwaka wacho. Ngwe chilweza, umwe mukwa-kuhengwola yuma ya shakulu, kasonekene ngwenyi: “Jita ya ha mwaka 1914, yalumwine yuma yinji hashi heswe. Chipwe ngwe te yuma yasolokele ngwe yinende kanawa, hazehene yikulingiwa yuma yinji ngwe upupilo, kole ni yuma yikwo yipi.”

Chikwo nawa, yuma yacho yakutwaha chiseke mumu yinalumbunuka ngwo, kwasala hakehe Wanangana wa Zambi uputuke kuyula hano hashi. Kashika, Yesu kahanjikile ha chikuma chino muze ambile ngwenyi: “Sango jino jipema ja Wanangana kumakajambujola hashi heswe, jikapwe shindakenyo ku mavungu eswe, mba songo mulikeza.”—Mateu 24:14.

Sango jino jipema che chikuma chilemu mu mulimo wa kwambujola wa Yela ja Yehova. Kashika, mukanda uze akuzachisa uli ni mutwe ngwo Kaposhi wa Kutalila Kanambujola Wanangana wa Zambi. Mukanda uno, wakuhanjika chinji hakutwala ku yuma yipema yize Wanangana wa Zambi muukalinga hano hashi.

Mba tuwane kumbululo, tuhengwolenu yikuma yino yiwana:

1. Wanangana wa Zambi kuushi kayula kupalikila muli manguvulu akwa-mafwefwe waze anayulu hano hashi musono.

2. Manguvulu a hano hashi mazanga kununga ni kuyula, kashika meseka kulimika ni Wanangana wa Zambi.—Samu 2:2-9.

3. Wanangana wa Zambi muunongesa mawanangana eswe waze mazanga kununga ni kuyula. (Daniele 2:44; Usolwelo 19:17-21) Jita yino ya hashi heswe ya kasula yili Armagedone.—Usolwelo 16:14, 16.

4.   Waze eswe makaula usongwelo wa Wanangana wa Zambi makaafunga ku jita ya Armagedone ni kunjila mu chifuchi chaha. Ayo makapwa mbunga yize Mbimbiliya yakuvuluka ngwo “mbunga yinene” waze makapwa tununu a tununu twa atu. —Usolwelo 7:9, 10, 13, 14.

Kulilongesa hakutwala ku Wanangana wa Zambi chili chuma chitangu chize muchitukwasa kunjila mu Wanangana wacho. Yesu kambile ngwenyi: “Mba apwe ni mwono wa mutolo, katamba kukunyingika yena Zambi umuwika wamwenemwene, ni Yesu Kristu, yoze yena watumine.”—Yoano 17:3.

Kunyingika kanawa kupwa cha Yehova, chakuyukisa atu mu majila anji. Tutalenu wika majila aali: Chitangu, ufulielo wo muli Yehova wakukola. Ufulielo uno, wakwaha shindakenyo ngwo Wanangana wa Zambi uli wamwenemwene, chikwo nawa kwasala hakehe uputuke kuyula. (A-Hepreu 11:1) Chamuchiali, kakuzanga Zambi ni enyembo. Zango lio hali Zambi, liakwakwasa kumwononokena ni mbunge yo yeswe. Zango lio hali enyembo, liakwakwasa kukaula shimbi yilemu yize Yesu ambile ngwenyi: “Chuma chize nunazange hanga akwenu alinge hali yenu, ni yenu chilingenu hali ayo.”—Luka 6:31.

Chizechene ngwe tata wa zango, Sakatanga wetu kanazange wika upeme hali yetu. Iye kanazange hanga tupwe ni “mwono wamwenemwene.” (1 Timoteu 6:19) Atu anji musono, keshi ni “mwono wamwenemwene” mumu mwono unakale chinji. Tutalenu yikuma yimwe yipema yize Wanangana wa Zambi mukalinga hanga akwase atu jenyi kupwa ni “mwono wamwenemwene.”