Fumbo lize liakukatuka mu Mbimbiliya, likwete tachi jize jakutukwasa kwalumuna mwono wetu. Tutalenu yilweza yaali yize yinatale ha chikuma chino: Ricardo ni Andrés.

RICARDO: Muze napwile ni miaka 15, nanjilile mu chizavu cha yilianyi. Masepa jami kapwile ni kungushinjila kulinga yuma yinji. Te ngunazange kupalikisa miaka 10 mu zuwo lia ususu! Chino muchihasa kusoloka ngwe uhepuke. Alioze, kuze te natwama, atu kapwile ni kulemesa waze te akupalikisa miaka yinji mu zuwo lia ususu. Te nakuzanga kupwa ngwe ayo.

Napwile chingalwe ni kushipa makanya asasu, kulinga utanji ni upupilo. Tangwa limwe ufuku, te tunaliloza mata. Nanyongene ngwe te mangushiha, alioze yinguchina. Hachino, yinguputuka kunyonga chinji ha mwono wami ni yize te nakuzanga kulinga. Kashika, yingukwata chiyulo cha kwalumuna mwono wami. Alioze, kuchi te munguhasa kuchilinga? Kulihi te munguhasa kuwana ukwaso?

Asoko jami amwe te keshi kuwahilila. Ayo kapwile ni yipikalo yinji. Alioze, usoko wa matu kapwile ni kuwahilila ku mwono. Te ngunanyingika ngwami, ayo kali atu apema, mumu kapwile ni kukaula shimbi ja mu Mbimbiliya. Ha mashimbu amwe kunyima, ayo kangulongesele ngwo jina lia Zambi, Yehova. Kashika, muze te hikwapalika mashimbu akehe wika chize haze twalilozelele mata, yingulemba ni kuvuluka jina lia Yehova ni kumwita hanga angukwase. Nakomokene, mukwachako, umwe Chela cha Yehova, yangongwela ku pito liami! Kulutwe, iye yapwa longeshi wami.

Yingupwa ni kapinda munene. Masepa jami akulu, te kakungusanyika hanga tupwe hamuwika. Chipwe ngwe kuchapwile chashi, yingwamba kuli ayo ngwami ka. Te ngunazange kununga kulilongesa Mbimbliya. Chiyulo chize nakwachile chalumwine mwono wami, mumu nawana uwahililo wamwenemwene.

Tangwa limwe nalembele kuli Zambi hanga ngupalikise miaka 10 mu zuwo lia ususu hanga akwetu anguvumbike. Kashika, yingulemba kuli Yehova hanga angutayize kulinga miaka 10 ngwe pionelu, ngukwase akwetu ngwe chize angukwashile. Zambi yangukumbulula, hinalinga miaka 17 ngwe pionelu wa shimbu lieswe! Munguhasa kwamba ngwami, chanjilile nilimwe tangwa mu zuwo lia ususu.

Anji akuli masepa jami akulu, kali mu mazuwo a ususu. Akwo hanafu. Nyi natala kunyima, nakusakwilila chinji kuli asoko jami waze ali Yela. Ayo kasele tachi hanga apwe atu alisa ni kutwama kulita ni shimbi ja mu Mbimbiliya. Napwile ni kwavumbika chinji kuhiana vumbi lize te nakusolwela masepa jami yingalwe. Chikwo nawa, nakusakwilila chinji Zambi ha kungulongesa kutwama kulita ni Shimbi jenyi.

 ANDRÉS: Nasemukinyine ni kukolela ku chihunda cha uswale, kuze atu anji apwile ni kunwa makanya asasu, kuneha mbwanja, kulishiha ni kulinga utanji. Tata kapwile chizengi ni kunwa makanya asasu. Iye ni mama te kakuzwela chinji ni kulilamba.

Naputukile kunwa walwa ni makanya asasu muze te nguchili kanuke. Napwile nawa ni kupalikisa mashimbu anji mu yipendo, ni kwiya yuma hanga nguyilanjise. Kulutwe, tata yaputuka kungulongesa kusaka makanya asasu ni yuma yikwo yipi ku yifuchi yeka ni kuyilanjisa mu chifuchi chetu. Hachino, yingupwa ni mbongo jinji. Alioze, tangwa limwe mapulisha yeza ku zuwo liami. Yangukwata ni kungusa mu zuwo lia ususu ha miaka yitano mumu lia kweseka kushiha mutu.

Muze te nguli mu zuwo lia ususu, nevwile mutambi wakusanyika atu hanga apanjike pande ja Yela ja Yehova. Ni yami yinguya ko. Yize nevwile, yangukwachile ku mbunge, kashika yinguputuka kulilongesa no Mbimbiliya. Ayo kalumbunwine kanawa Yisoneko. Yangulweka chize mutuhasa kukaula yitanga yipema ya Zambi.

Hazehene, yingunyingika ngwami, mba ngwalumune mwono wami, te mungufupiwa ukwaso, mumu waze napwile no mu zuwo lia ususu, te keshi kuzanga yize te ngunalingi. Kashika, yingulemba ni kwita tachi ni mana, chocho Yehova yangukwasa. Chamwenemwene, napwile ni hamu lia kuhanjika ni akwetu hakutwala ku Mbimbiliya.

Ha tangwa lia kungutusula mu zuwo lia ususu, nevwile mwongo mumu te ngunazange kununga kutwamamo! Ha kukatuka, akwetu yeza ni kungushika. Amwe akuli ayo yangulweza ni zango ngwo, “yako ku zuwo kafunga ketu.”

Kunyonga ha chize mwono wami te mupwa nyi te chatayijile Zambi, chakunguvwisa woma. Ngunasakwilila chinji ha kunyingika ngwami, Zambi kakunguzanga chinji, iye kamwene ngwenyi, mwono wami muhasa kupema. a