SHINA HASHI MANONGESAHO?
Mushitu
MISHITU kakuyivuluka ngwo, “yihunguhungu, nawa yuma yize yakufunga mwono hano hashi.” Mumu liaka? Mumu mitondo yakukoka mwiku upi uze muuhasa kutushiha, sali likwo, muyituhwisa mwiku upema uze twakuhwima. Chikwo nawa, 80% ya mitondo ni tushitu yatwama mu mishitu. Nyi kukushi mishitu, yetu kutuchi kuhasa kununga ni mwono.
Ponde Yize Yiliko
Hita mwaka, tununu a tununu twa mitondo kakuyipatula. Chino kanji-kanji kakuchilinga hanga alime minda. Hakupalika cha miaka 75, chihanda cha mishitu ya hashi heswe hiyinakuu.
Nyi mushitu umwe wakuwa, acho twakuwisa mitondo ni tushitu waze atwamamo ni kuyuka chize chakwiza ku mushitu wacho.
Hashi Kawumbileho Hatwame ku Miaka Yeswe
Mishitu yimwe nyi mayivuka, nihindu yikwete uhashi wa kufuna ngwe chize yapwile, ha shimbu liacho mitondo yakoka chinji. Ha mashimbu wano ene, atu waze atala ha yuma ya mishitu kakomokene ha kumona chize mishitu yimwe yize avukile yasokele kafuji-fuji. Tala yimwe yilweza:
-
Akwa-malinjekela kahengwile mishitu yize avukile mumu lia minda, kulutwe yecha kulima ha yihela yacho. Kuhengwola chize alingile ku yihela 2,200 mu América ni mu África Ocidental chasolwele ngwo, hakupalika cha miaka kumi mavu mahasa kulilulieka kanawa, chocho mitondo muyiputuka kusoka cheka.
-
Kulita ni kuhengwola chize anatongola ha umwe mukanda, akwa-kuhengwola kambile ngwo, hakupalika cha miaka 100 mishitu yino muyihasa kufuna ngwe chize yapwile shimbu te kanda ayivuka.—Science.
-
Ha mashimbu wano ene akwa-ciencia mu Brasil, katesele kukola kawashi-washi cha mishitu ku yihela yaali, chihela chimwe atu kakwashile kulinga nichimwe, chikwo atu yakwasa ha kulinga yuma yeka ni yeka.
-
Mukanda umwe unambe yino hali akwa-kuhengwola jacho ngwo: “Ayo kanakawahilila chinji ha kunyingika ngwo kumana kukwafupiwile kutumba mitondo.” Chipwe ngwe ha yihela yacho katumbileho mitondo, nihindu ha kupalika cha miaka yitano wika yihela yacho “yiyizala too ni mitondo ya kulisokela yene.”—National Geographic.
Yize Atu Aneseka Kulinga
Hashi heswe, atu kanase tachi hanga afunge mishitu ni kukwasa kusoka cha mishitu yize avukile. Mba yika yalingiwako? Kulita ni chipatulo chimwe cha Nações Unidas, “hakupalika cha miaka 25, kuvuka mishitu chatepuluka chinji ndo ha 50%.”
Alioze kulinga yino kuchakumbanyine ha kufunga mishitu. Kulita ni umwe ululikiso uze wakufunga mishitu hashi heswe ngwo, “Kuvuka cha mishitu ya ku tropical choka chinji ha kupalika cha yimwe miaka.”
Kulinga mapaya chakuhona utayizo wa nguvulu, chinatwale atu kupwa ni mbongo jinji, mba mumu lia kuzo yino, atu kanakuwisa mishitu ya ku tropical.
Atu waze akukalakala hanga afunge mishitu, kakuteta mitondo mujila yalita ni kulima mitondo yeka.
Kutalatala Chika Tunawane mu Mbimbiliya?
“Yehova a Zambi yasokesa mitondo yeswe yipema ku meso, ni yize yipema ya kulia.”—Uputukilo 2:9.
Sakatanga wa mishitu, kalingile hita mushitu mu jila ya kukomwesa. Nyi atu mayivuka mu jila jipema, muyisoka cheka mumu yikwete uhashi wacho. Zambi kanazange kufunga mishitu ni yuma yeswe yize yatwamamo.
Atu kakuyula chipi yuma yize yili hano hashi, alioze Mbimbiliya yinasolola ngwo, Zambi makahwisa yuma yino yipi yize atu analingi. Hachino, hashi ni yuma yeswe yiliho, muyinunga ku miaka yeswe. Tanga mutwe, “Zambi Kanalakenya Ngwenyi Hashi Kuhechi Kunonga,” ha lifwo 15.
a Yehova lie jina lia Zambi.—Samu 83:18.
