Mumu Liaka Musono Atu Anji Keshi Kulivumbika Ayoene?
CHILI CHILEMU KULIVUMBIKA YETWENE
Atu waze akulivumbika ene, kakuhasa kukumba yeseko. Ayo nawa keshi kuhonga ni kawashi.
-
Akwa-kuhengwola kakwamba ngwo, atu waze akulinyongena ene yuma yipi, kanji-kanji ha kupalika cha mashimbu keshi kuhasa nawa kulia kanawa, kakuyiza ku manyonga ni kusakalala. Atu wano nawa mahasa kuputuka kunwa chinji walwa ni kushipa makanya asasu.
-
Atu waze akulivumbika ene keshi kutesa mwono wo ni mwono wa akwo. Kashika, chili chashi kuli ayo kutwama kanawa ni akwo ni kupwa ni usepa ukolo. Alioze, waze keshi kulivumbika ene, kakupatwila chinji akwo, chino chakwakinda kutwama kanawa ni akwo.
-
Atu waze akulivumbika ene, keshi kuhonga muze akupalika mu yipikalo. Ayo keshi kwecha hanga uhenge wo wakinde kumanununa yize atesele kulinga ku mwono. Alioze, waze keshi kulivumbika ene kakupinda chinji muze akulinga tupalia. Kashika, ayo kakuhonga kawashi.
YIZE MUHASA KULINGA
Sakula kanawa waze mulikata no. Likate ni masepa waze atwama ni vumbi, waze akulihulumba hali yena ni waze makutakamisa.
Kwasa akwenu. Muze wakukwasa akwenu, chipwe atu waze keshi kuhasa kukukwasa, muwahilila chinji. Muhasa kuwahilila chipwe ngwe atu keshi kukumona muze unakwasa akwenu.
Kwasa ana je alivumbike ene. Muhasa kukwasa ana je alivumbike ene ha kwecha akumbe yipikalo yize mahasa kukumba ukawo. Chino muchihasa kwakwasa kunyingika chize mahasa kukumba yipikalo ku mwono wo. Nyi nwalinga chocho, ana jenu malilongesa chize mahasa kulivumbika ene nawa makola kanawa.
YIZE TUNALINGI
Kukunguluka cha Yela ja Yehova ni malongeso a Mbimbiliya waze twakusongwela, kakukwasa atu kulivumbika ene ni kupwa ni yitanga yipema.
KUKUNGULUKA CHETU CHA HITA POSO
Ha kukunguluka chetu cha hita poso, twakwivwa pande ja Mbimbiliya jize jakutukwasa kunyingika chize mutuhasa kulivumbika yetwene. Kukunguluka chetu chili chawana. Mutu mweswawo mahasa kukunguluka ni yetu. Ha kukunguluka chetu, mulilongesa . . .
-
mumu liaka uli mulemu kuli Zambi
-
yize watamba kulinga ku mwono
-
chize muhasa kupwa ni usepa ukolo ni akwenu
Ha kukunguluka chetu, muhasa kunyingika masepa waze akulihulumba hali akwo.—1 A-Korindu 12:25, 26.
Mba unyingike yikuma yikwo hakutwala ku kukunguluka chetu, fupa chinema chinambe ngwo, Yika Yakupwa mu Zuwo Lia Wanangana? ha site jw.org.
MALONGESO JETU A MBIMBILIYA
Yetu twakusongwela malongeso a Mbimbiliya kuli eswe waze anazange kulilongesa, twakwalongesa ni mukanda Wahilila ku Mwono ku Miaka Yeswe! Ha mukanda wacho, muwanaho yisoneko yilemu, ulumbunwiso walita wa yisoneko yacho, yihula yipema, yinema ya utakamiso ni yizulie yipema. Malongeso jetu a Mbimbiliya kakukwasa atu kulivumbika ene ni kutwama kanawa.
Mba unyingike nawa yize muhasa kuzuka ha kulilongesa Mbimbiliya ni Yela ja Yehova, fupa chinema chinambe ngwo, Mumu Liaka Twatamba Kulilongesa Mbimbiliya? ha site jw.org.
Kota Muzanga Chinji Yuma Yize Mumona
SANGO JA YETU
Eta Umwe Eze ni Kukumeneka
Kushimutwina chimwe chihula cha mu Mbimbiliya, kunyingika yuma yinji hakutwala kuli Yela ja Yehova.
SANGO JA YETU
Yako Kukunguluka cha Yela ja Yehova cha ha Chikungulwila
Nyingika kuze twakulikungulwila ni chize uwayilo wetu wapwa. Atu eswe mahasa kupwa ha kukunguluka chacho nawa keshi kwitako mbongo.
