MUMU LIAKA KUVUMBIKA ASOKO CHILI CHILEMU?

• Mukanda Os Sete Princípios para Fazer o Casamento Funcionar, unambe ngwo, muze waze alimbata akulisolwela vumbi, kakusolola zango lio kuli umwe ni mukwo. Hi wika ko ha “yuma yinene-yinene, alioze chipwe ha yuma yekehe-yikehe matangwa eswe.”

• Akwa-mana kakwamba ngwo, twanuke waze akulilongesa kuvumbika akwo, kakulivwa kanawa, kakupwa ni usepa upema ni yisemi jo, chikwo nawa, keshi kupinda chinji ni manyonga.

 YIZE MUHASA KULINGA

Lingenu katalilo hamuwika. Chitangu, pwako ni shindakenyo nyi eswe mu usoko wenu kananyingika yize yinalumbunuka kulisolwela vumbi. Chamuchiali, soneka yitanga yize hita mutu atamba kupwa nayo ni yize atamba kwehuka. Chamuchitatu, hanjikenu hakutwala ku katalilo wacho hanga yenweswe nuputuke kulinga yize nwasele ha katalilo.

Pwako chilweza chipema. Shina wakupatwila chinji asoko je muze akuhengesa? Shina wakwakekuna hamukunda wa yiyulo yize akuhana hanji kwalengulula ni kwapatwila maliji muze ayo anahanjika ni yena?

Yize muhasa kulinga: Iwuluka ngwe, watamba kuvumbika yoze walimbata nenyi ni ana je, ha kwehuka kunyonga ngwe ayo katelele vumbi.

Litune ni vumbi. Muze unalumbununa mumu liaka kuwatayijile nyonga lia umwe mu usoko wenu, kanda uhanjika maliji ngwe “yena mashimbu eswe” hanji “yena kuushi kulinga chinganji.” Maliji ngwe wano mahasa kulemeka ku mbunge yoze unahanjika nenyi ni kumuvwisa kupihia hanji kunutwala hanga nuzwele.