Muze lunga ni pwo malilakenya kulimbata, o kakumona chilakenyo chacho ngwe chuma cha mutolo. Chino chakwakwasa kulifunga. Eswe kakufuliela ngwo, hita umwe wa kuli ayo manunga ni kuvumbika chilakenyo chize alakenyene chipwe muze anamono lamba.

Atu amwe waze alimbata kakununga mu ulo mumu, kakwashinjila kuli asoko hanji enyembo jo. Alioze, muchipema chinji nyi chilakenyo cha waze alimbata muchikatuka ha zango ni vumbi lize akulisolwela umwe ni mukwo.

CHIYULO CHA MU MBIMBILIYA: “Lunga kanda akahichika mukwo-pwo.”—1 A-Korindu 7:11.

“Nyi wakulemesa chilakenyo che cha ulo, kuchi kulivutula ni kawashi, chipwe kutulika toto ha mashimbu anji. Alioze kapinda mweswe masoloka mu ulo mapwa wika ngwe yikwiko, hi uchinyino ko wa kulilakula.”—Micah.

Muze mukusoloka kapinda, pwo ni lunga waze keshi ni chilakenyo cha ulo mahasa kunyonga ngwo ‘kota kakatutangile tutwame chimuwika.’ Hachino mafupa majila akushihilamo ulo wo.

“Atu anji chipwe muze akulimbata, kakunyonga nawa ha chuma chikwo—kulilakula. Atu jacho kakunjila mu ulo ni nyonga liacho, mumu keshi kulilakenya chuma nichimwe muze ulo wo wakuputuka.”—Jean.

LIHULE NGWE

Muze nunazwele . . .

• Shina wakunyonga hanji kuliseha mumu lia kulimbata ni lunga hanji pwo yoze uli nenyi?

• Shina wakunyonga ngwe, nyi ngwe nanyingikine kachi nalimbachile ni mutu mukwo?

• Kutala wakwamba ngwe: “Kuli yami kwahwa, yuma yahwa!” hanji ngwe “mungufupa mutu mweka yoze mangulemesa?”

Nyi wakumbulula ngwe, “ewa” ha yihula yimwe, chino chinasolola ngwo watamba kulemesa chinji chilakenyo cha ulo we.

KULIHANJIKISA UMWE NI MUKWO

• Shina mutuchinunga ni kulilemesa umwe ni mukwo ngwe chize twapwile ni kulinga muze te twachilimbata, nyi ka? Nyi nwakumbulula ngwenu ka, fupenu kunyingika mumu liaka chino chinalingiwa.

• Yika twatamba kulinga mba tununge ni kulemesa chilakenyo chetu cha ulo?

YUMA YIZE MUHASA KULINGA

• Ha mashimbu amwe, eseka kusonekena mutu yoze walimbata nenyi amwe maliji a zango.

• Sako foto ya yoze walimbata nenyi ha mesa ye ya milimo. Chino muchihasa kusolola ngwo, unalemesa chilakenyo cha ulo wenu.

• Sanyika yoze walimbata nenyi ha telefone yisuho yinji ha tangwa. Chilinge muze unakalakala hanji muze uli kusuku nenyi.

CHIYULO CHA MU MBIMBILIYA: “Chize Zambi hananungu, niumwe mutu kanda achihandununa.”—Mateu 19:6.