Kufumba chinalumbunuka kusongwela hanji kulongesa. Kanji-kanji chakufupiwa kufumba mwana yoze wakulinga chinji yuma yipi. Alioze ha mashimbu anji, kufumba chili kulongesa mwana hanga amone kalisa wa chipi ni chipema. Chino muchimukwasa kukwata yiyulo yipema chakuhona kuyalumuna.

Ha miaka yino, yisemi amwe kota keshi kuhasa nawa kufumba ana jo. Ayo kakwivwa woma ngwo nyi machilinga, ana jo manenganyana. Alioze yisemi waze akwete mana kakutesa shimbi jalita ni kukwasa ana jo hanga ajononokene.

“Twanuke kakufupiwa kupwa ni shimbi jalita jize mujakwasa kukola kanawa. Nyi ngwe kapwile ni fumbo liacho, o mahasa kupwa ngwe wato uze kuushi leme. Hakupalika cha mashimbu wato wacho, muuhasa kwatwala kweka hanji kushimbama.”—Pamela.

Kanda uhonga. Nyi mwane kahashile kukaula fumbo lie, fupa kumukwasa. Alioze muchichimieke muze mononokena shimbi je.

“Mashimbu eswe, nakuchichimieka ana jami muze akwononoka chipwe ngwe twatwama mu chifuchi chino chipi. Nyi wapwa ni chako cha kuchichimieka ana je, o mahasa kutayiza usongwelo weswawo mwaha.”—Cristine.

CHIYULO CHA MU MBIMBILIYA: “Cheswacho mutu makuwa, chenacho makacha nawa.”—A-Ngalashia 6:7.

Kanda upwa mukalu chinji. Tesa miaka ni utotombo wa mwane hamwe ni yuma yipi yize akulinga. Kanji-kanji fumbo liakupema muze liakulita ni upi uze mutu alinga. Chakutalilaho, hanji mwane mahona kwononokena shimbi je hakutwala ku telefone. Hachino yena mwe musakula nyi iye mazachisa telefone ha mashimbu akehe wika ha tangwa hanji kumutambula lume ye telefone. Chikwo nawa, nyi chuma chize mwane alinga kuchapwile chinene chinji, kanda ulemesa upi wacho.

“Nakufupa kunyingika nyi mwanami kahona kwononoka mumu kazangile lume nyi hanji te kanyingikine upi alinga. Mumu hatwama kalisa hakachi ka manyonga api waze twatamba kwehuka ni yuma yize mutu malinga chakuhona kunyingika.”—Wendell.

CHIYULO CHA MU MBIMBILIYA: “Yenu atato, kanda nukehia ana jenu kuchina mahonga mu mbunge.”—A-Kolosu 3:21.

SOLOLA ZANGO: Chakupwa chashi ana kutayiza umwe usongwelo muze mamona ngwo, yisemi kakwafumba ni zango.

“Muze mwanetu apwile ni kuhengesa, te twakumwiwulula ha chiseke chize twakwivwa ha yiyulo yipema yize hanakwata. Twapwile ni kumulweza ngwetu, nyi mazanga kulinga chuma chalita, chino kuchichi kupihisa lufuma wenyi. Nyonga lietu liapwile kumukwasa hanga amone ngwo, tuli sali lienyi.”—Daniel.

CHIYULO CHA MU MBIMBILIYA: ‘Zango uhomboloji ni utu lili nawo.’—1 A-Korindu 13:4.