Muze waze alimbata akukalakala hamuwika, o kakupwa ngwe umwe mukwa-kwendesa ndeke ni chikwashi chenyi waze anende wenyi umuwika. Nyi mapwa mu kapinda, o kechi kunyonga wika ali ayo ene, alioze manyonga hali umwe ni mukwo.

CHIYULO CHA MU MBIMBILIYA: “Hi aali nawa ko, alioze musunya umuwika.”—Mateu 19:6.

“Umbachiso kuushi ngwe mulimo uze mutu mahasa kulinga ukawenyi. Waze alimbata katamba kukalakala hamuwika hanga ahase kuwahilila mu ulo wo.”—Christopher.

Muze waze alimbata mazwela, nyi keshi kukalakala hamuwika, o mahasa kulihulikila wika ha tupalia twa umwe ni mukwo, shimbu te afupe kuhwisa kapinda wo. Hachino, milonga yikehe-yikehe muyipwa yinene-yinene.

“Kukalakala hamuwika chili chilemu chinji mu ulo. Nyi ami ni lunga liami kutwakalakalile hamuwika, twakupwa wika ngwe atu waze atwama mu zuwo limuwika, alioze mutu ni mutu ni mwono wenyi. Atu waze atwama chimuwika, alioze keshi kukwachila yiyulo yilemu hamuwika.”—Alexandra.

LIHULE NGWE

• Shina nakunyonga ngwami mbongo jize akungufweta ku mulimo jili ja “yami wika”?

• Kutala nakuhasa kuhwima wika muze nguli kusuku ni mutu yoze nalimbata nenyi?

• Chipwe ngwe ngunanyingika ngwami yoze nalimbata nenyi kakuzanga chinji asoko jenyi, shina nakwehuka kuhanjika no?

KULIHANJIKISA UMWE NI MUKWO

• Yuma yika mu ulo wetu yize twakuhasa kulinga hamuwika?

• Yuma yika yize mutuhasa kululieka mu ulo wetu?

• Yuma yika twatamba kulinga mba tuhase kukalakala hamuwika?

YUMA YIZE MUHASA KULINGA

• Nyonga ngwe unase ndundu, mba yoze walimbata nenyi mapwa mu chizavu chikwo, ena muopwa mu chizavu cheka. Shimbu upwe mu chizavu chalisa, yika watamba kulinga hanga nuhase kupwa mu chizavu chimuwika?

• Shimbu unyonge ngwe: ‘Kuchi munguhasa kukumba?’ Nyonga ngwe: ‘Kuchi mutuhasa kukumba mu waali wetu?’

“Kanda ufupa yoze wapemesa ni yoze wahengesa. Chuma chilemu chili kupwa ni sambukila ni kulinunga mu usoko.”—Ethan.

CHIYULO CHA MU MBIMBILIYA: “Kanda nutala mweswe wa kuli yenu ku yuma yenyi mwene, alioze mweswe wa kuli yenu akatale ku yuma ya akwo nawa.”—A-Fwilipu 2:3, 4.