Kulihanjikisa kanawa chakulingiwa muze yena ni ana je nwakuhanjika zwalala ha yuma yize nwakwivwa ni yize nwakunyonga.

Muchihasa kupwa chikalu kuhanjika, chipi-chipi ni akweze. Umwe mukanda avuluka ngwo Breaking the Code wakwamba chino: “Ku mashimbu a kunyima chapwile ngwe yisemi, kapwile ni utuswilo wa kunyingika yuma yeswe yize te yinapalika ku mwono wa ana jo. Haliapwila chuma chize nwatamba kulinga chili wika kushimbwila yuma yipi yize muyihasa kulingiwa.” Kashika, lino lie shimbu lize ana jenu akufupiwa kuhanjika chinji ni yenu!

Eseka kuhanjika ni mwane ha shimbu lize iye anazange. Chipwe ngwe chino muchifupiwa kuhanjika nenyi ha ufuku.

“Hanji muhasa kumuhula ngwe: ‘Shina unazange kuhanjika ni yami haliapwila? Ngwami musono twananga tangwa lieswe chimuwika!’ Muze ana jetu mafupa kuhanjika ni yetu, kutwatambile kulinyenyeta, mumu yisemi eswe kakushimbwila hanga ana jo aalweze chize anevu.”—Lisa.

“Nakuzanga kulianga kupomba. Alioze mashimbu amwe, kulishimwinya ni ana jami ha muchima-ufuku chakuwaha chinji.”—Herbert.

CHIYULO CHA MU MBIMBILIYA: “Niumwe kanda afupa kufumbuka chenyi mwene, alioze mutu mweswe akafupe kufumbuka cha mukwo.”— 1 A-Korindu 10:24.

Kanda wecha yuma yikwo yikulalwise. Umwe chisemi wa lunga yamba ngwenyi: “Ha mashimbu amwe, nakunyonga ha yuma yeka muze ana jami anahanjika ni yami. Ayo kakumona lume ngwo chisolo kwapanjika!”

Nyi wapwa ngwe chisemi yono, eseka kujima TV ni kuvulama telefone hanji tablet ye. Lihulikile ha yize mwane anakulweze. Solola ngwe, unamupanjika chipwe ngwe yuma yize anambe yinasoloka ngwe yili yangwaza.

“Twatamba kusolola kuli ana jetu ngwetu, twakulemesa chinji yuma yize ayo akwivwa. Nyi ana jetu mayambashana ha chikuma chino, o mahasa kuya ni kufupa ukwaso kuli atu eka.”—Maranda.

“Kanda ulivutula ni kawashi chipwe ngwe yuma yize ana je anambe muyisoloka ngwe kuyalitele.”—Anthony.

CHIYULO CHA MU MBIMBILIYA: “Kashika kanyamenu ha chize munwivwa.”—Luka 8:18.

Sakula mashimbu alita. Ha mashimbu amwe, akweze keshi kuzanga chinji kuhanjika ni yisemi jo muze analitale meso ni meso.

“Muze tunendela mu mashinyi, twakuzachisa uhashi wacho hanga tuhanjike. Kutwama tulieswe ha chitwamo chimuwika chakutukwasa hanga tuhanjike ha yuma yinji yipema.”—Nicole.

Mashimbu a kulia no kali apema chinji hanga nuhanjike ha yuma yeka ni yeka.

“Muze tunali, tulieswe twakuhanjika ha yuma yipema ni yipi yize yalingiwa ha tangwa liacho. Chino chakutukwasa tupwe alinunga, chikwo nawa chakutwaha shindakenyo ngwetu, kutwafupiwile kukumba yeseko ukawetu.”—Robin.

CHIYULO CHA MU MBIMBILIYA: “Mutu ni mutu alipupwise kwivwa, alioze apwe makoke kuhanjika.”—Tiangu 1:19.