Yuma yize mutu akutesa kulinga, kuyatambile kupwa wika mu manyonga—Kulinga yuma yize watesa chakufupiwa kulilulieka kanawa ni kusa tachi.

Mutuhasa kutesa kulinga yuma ha shimbu likehe. Mutuhasa kutesa yize mutulinga ha matangwa akehe anji poso. Mutu mahasa nawa kutesa kulinga yuma ha kupalika cha amwe tukweji. Yuma yikwo muyihasa kumbata mashimbu anji ngwe mwaka umuwika hanji miaka yinji mba tuyilinge. Yuma yize twakutesa kulinga ha mashimbu anji, mutuhasa kuyiteta mu milimo yikehe-yikehe.

Kulinga yuma yize watesele kulinga, muchihasa kukolesa usepa we ni akwenu, ni kuwahilila ku mwono.

Kulijikijila yena mwene: Nyi wahasa kulinga yuma yikehe-yikehe yize watesa kulinga, muhasa kulijikijila ngwe muhasa nawa kulinga yuma yinene-yinene. Chikwo nawa, muopwa ni tachi ja kukumba yuma ya hita tangwa, ngwe yuma yipi yize akwenu akulinga.

Usepa: Atu eswe kakuzanga kupwa ni masepa waze akutesa kulinga yuma ku mwono, hanji ngwetu atu waze ananyingika yuma yize anazange ku mwono ni kusa tachi hanga ayilinge. Chakutalilaho, nyi yena ni sepa lie nunakatesa kulinga yuma yimuwika, kukalakalila hamuwika muchinukwasa kukolesa usepa wenu.

Uwahililo: Nyi wahasa kulinga yuma yize watesele, muwahilila chinji.

“Nakuzanga chinji kutesa kulinga yuma. Mumu chakungukwasa kulihulikila ha yuma yacho. Nyi wahasa kulinga yuma yize watesele, mba muze mutala kunyima, mukomoka ni kwamba ngwe: ‘Chochene, nahasa kulinga yize natesele.’”—Christopher.

CHIYULO CHA MU MBIMBILIYA: “Yoze matala ku fuji kechi kukuwa mbuto; yoze matala ku malelwa kechi kucha.”—Chilumbununyi 11:4.

Tala yuma yize watamba kulinga hanga yikukwase kumanununa yize watesele.

Nyingika yize unazange. Soneka yuma yize unazange kulinga. Sakula Chuma chize mulianga kulinga mba usakule chamuchiali, chamuchitatu ndo haze muhwishila yuma yeswe.

Linga katalilo. Hita chuma chize mulinga, kaula yikuma yino:

• Tesa mashimbu waze mafupiwa ha kulinga chuma chacho.

• Tesa chize mulinga chuma chacho.

• Nyonga ha kapinda yoze mahasa kusoloka ni chize muhasa kumukumba.

Maola a kuputuka. Kuwafupiwile kutesa yuma yeswe mu yimako-yimako mba uputuke kulinga yuma. Lihule ngwe: ‘Chuma chika natamba kulianga kulinga mba ngumanunune yize natesele?’ Chuma chilemu putuka wika. Muze muputuka, tala chize yuma yinende.

CHIYULO CHA MU MBIMBILIYA: “Manyonga a yipalakata katwala kukulumbama wika.”—Yishima 21:5.