Kukonekena chinalumbunuka kuvulama chuma chipi chize umwe akwamba hanji akulinga chakuhona kutulika toto. Alioze, chino kuchalumbunukine ngwo watamba kulengulula uhenge hanji kusolola ngwe nichimwe chalingiwa chakuhi.

CHIYULO CHA MU MBIMBILIYA: “Lihumikizenu umwe ni mukwo, nikulikonekena umwe ni mukwo, nyi kachi umwe munengo ali nawo kuli mukwo.”— A-Kolosu 3:13.

“Nyi wakuzanga umwe mutu kuchi kuhasa kulihulikila ha tupalia twenyi, alioze muosa tachi hanga ulihulikile ha yitanga yenyi yipema.”—Aaron.

Kutulika toto muchihasa kukunehena misongo ku mujimba ni mu manyonga, chikwo nawa muchihasa kushiha ulo we.

“Tangwa limwe, mukwetu lunga yangwita ukonekeno mumu lia yuma yize angwambile. Chapwile chikalu chinji kumukonekena, alioze hinguchilinga. Haliapwila, nakuliseha mumu lia kuhona kuchilinga ha shimbu lizeliene. Twalipinjishile wika chamokomoko.”—Julia.

LIHULE NGWE:

Muze mukwenu lunga hanji mukwenu pwo makulemeka ku mbunge, lihule ngwe:

• ‘Shina yami mwe nakulivutula nikawashi ha chuma cheswacho?’

• ‘Shina yuma yize angulinga yinafupiwa lume ukonekeno nyi munguhasa kuyilengulula?’

KULIHANJIKISA UMWE NI MUKWO

• Mashimbu angahi akupalika mba tulikonekene?

• Yika mutuhasa kulinga hanga tupwe ni kulikonekena kawashi-washi?

YUMA YIZE MUHASA KULINGA

• Nyi walivutula, kanda unyonga ngwe yoze walimbata nenyi kazanganga kukuvwisa uli.

• Eseka kukonekena. Iwuluka ngwe, “yetu eswe twakutalinga mu yuma yinji.”—Tiangu 3:2.

“Chapwa chashi kukonekena nyi eswe kahengesa. Alioze chili chikalu kuchilinga nyi wanyingika ngwe umwe wika mwe wahengesa. Ha shimbu liacho, kukonekena chakufupiwa kulikehesa.”—Kimberly.

CHIYULO CHA MU MBIMBILIYA: “Litese nikawashi ni mukwa kole ye.”—Mateu 5:25.