Utu we kuwatalile wika ha mutu kunyingika jina lie hanji chifwa che. Alioze utu we unatale ha kupwa che ni yuma yize wakufuliela. Utu we unatale nawa ha yuma yeswe yize wakulinga ni kupwa che cha muchima ni haze.

Nyi wanyingika kanawa utu we, mununga ni kulinga yuma yize wakutayiza ni kuhona kwecha hanga alongi-ni-akwenu akuhepwise.

“Atu anji kapwa ngwe mambuneka. Mambuneka keshi kusakula mazalo waze mazala mumu kuli atu waze akwasakwila mazalo.”—Adrian.

“Nalilongesa kukalila yuma yalita chipwe muze nguli ha mashimbu akalu. Ngunanyingika atu waze ali masepa jami amwenemwene kupalikila mu yitanga yo ni chize yami napwa muze nguli hamwe no.”—Courtney.

CHIYULO CHA MU MBIMBILIYA: “Kanda nulitesa ni ndako ja mwakono, alioze alumukenu ku kupwisa chaha cha kunyonga chenu.”—A-Roma 12:2.

Kunyingika kanawa yuma yize wakuhasa kulinga, ni yize kushi kuhasa kulinga ni yize wakufuliela, muchikukwasa kulinyingika musono ni yize unazange kupwa kulutwe lia matangwa. Jila yipema ya kuchilingilamo, yili kuputuka kukumbulula yihula yize yinahateho.

Yuma yize wakuhasa kulinga kanawa: Yuma yika yipema yize nakulinga? Utotombo uka ngukwete? Chakutalilaho, nyi unazange kunyingika yuma yize wakuhasa kulinga kanawa, muhasa kulihula ngwe: ‘Nakuhasa kulihumikiza? Shina nguli chikilikita? Nakuzanga kulianyina yuma yami ni akwetu? Muze nakulitesa kuliwana ni umwe mutu, shina nakulianga kuheta?’

YUMA YIZE MUHASA KULINGA: Shina chakukukalila kunyingika yuma yize wakuhasa kulinga kanawa? Nyi chenacho, eta kuli yisemi je hanji kuli umwe sepa hanga akulweze yuma yipema yize o akumona kuli yena ni mumu liaka.

CHIYULO CHA MU MBIMBILIYA: “Mutu ni mutu akeseke chitanga chenyi mwene, chocho makapwa ni kulisamba chenyi ha kutwala kuli iye mwene wika, hi ha kutwala ku yuma ya mbala ko.”—A-Ngalashia 6:4.

Yuma yize kushi kuhasa kulinga: Yika natamba kululieka ku mwono wami? Ha mashimbu aka chakupwa chikalu kwehuka chimwe cheseko? Ha mashimbu aka natamba kulihumikiza?

CHIYULO CHA MU MBIMBILIYA: “Nyi mutwamba ngwetu Kutushi shili, tunaliongo, mba umwenemwene kuushimo muli yetu.”—1 Yoano 1:8.

Yuma yize nakufuliela: Ku nyonga liami, chuma chipi ni chipema chika? Mumu liaka nakunyonga chocho? Shina nakufuliela kuli Zambi? Yika yakungwaha shindakenyo ngwami iye katwamako? Chuma chika nakumona ngwami kuchalitele? Mumu liaka? Yuma yika nakutayiza ngwami muyikalingiwa kulutwe lia matangwa?

CHIYULO CHA MU MBIMBILIYA: “Maseliekela makulayila, ni malinjekela makakufunga.”—Yishima 2:11.