Muze lunga ni pwo akulivumbika umwe ni mukwo, ayo kakulisolwela zango chipwe muze mapwa ni manyonga alisa ha chimwe chikuma. Mukanda Lessons to Transform Your Marriage wakuhanjika hali waze alimbata ni kulivumbika ngwo: “Atu wano keshi kulikwachilila wika ha chiyulo cho ene, alioze, o kakuhanjika hakutwala ku kalisa yoze watwama hakachi ko, kulipanjika kanawa ni kulivumbika umwe ni mukwo. Kashika, chino chakwakwasa hanga alivwashane.”

CHIYULO CHA MU MBIMBILIYA: “Zango . . . kulishi kufupa yuma yalio-liene.”—1 A-Korindu 13:4, 5.

“Kuvumbika pwo liami chinalumbunuka kunyingika ulemu uze akwete ni kuhona kulinga chuma chize muchimuvwisa uli hanji muchipihisa ulo wetu.”—Micah.

Mu ulo nyi kumushi vumbi, yihanjikiso ya waze alimbata yakupwa wika ya kulikekuna, kulilenya hanji kulilelesa. Akwa-kuhengwola amwe kakutayiza ngwo, yuma yacho yakupwa chilayi chize chinasolola ngwo, kota ulo wacho kumuufwa.

“Maliji akalu, kulenya hanji kwihia mukwenu pwo, muchihasa kumutwala hanga anyonge ngwe keshi ulemu. Muchihasa nawa kutepulula zango lize akwete hali yena ni kushiha ulo wenu.”—Brian.

LIHULE NGWE

Lihulikile ha yuma yize muhanjika ni yize mulinga ha poso. Hanyima lihule ngwe:

• Yisuho yingahi nahanjika maliji akalu kuli mutu yoze nalimbata nenyi? Chikwo nawa lihule ngwe, yisuho yingahi namuchichimieka?

• Mu majila aka nasolola vumbi kuli mutu yoze nalimbata nenyi?

KULIHANJIKISA UMWE NI MUKWO

• Maliji aka hanji yitanga yize muyihasa kukwasa hita umwe wa kuli yenu kulivwa ngwenyi, mukwo kakumuvumbika?

• Maliji aka hanji yitanga yize muyihasa kukwasa hita umwe wa kuli yenu kumona nyi mukwenu kakukuvumbika?

YUMA YIZE MUHASA KULINGA

• Soneka yuma yitatu yize mukwenu pwo hanji mukwenu lunga atamba kulinga hanga akuvumbike. Mutu ni mutu mahasa kusoneka kamwe kamukanda ni kuuhana kuli mukwo. Hanyima, senu tachi hanga nuse mu yitanga yuma yize mukwenu asoneka.

• Soneka yuma yize wakuzanga kuli mukwenu pwo hanji mukwenu lunga ha umwe mukanda. Hanyima, lweza mukwenu ngwe, wakuzanga chinji yitanga yenyi.

“Kuvumbika lunga liami chinalumbunuka kusolola mu yitanga ngwami, nakumulemesa ni kuzanga hanga awahilile ku mwono. Kuchafupiwile kulinga yuma yinji. Alioze yuma yikehe-yikehe yize mulinga ha tangwa, muyihasa kusolola ngwo, wakuvumbika mukwenu yoze walimbata nenyi.”—Megan.

Kwamba pundu, chikuma chilemu chili, mukwenu kulivwa ngwenyi wakumuvumbika, hi kunyonga ko ngwo uli mukwa-vumbi.

CHIYULO CHA MU MBIMBILIYA: “Zalenu mbunge ja keke, ni utu, ni mbunge ja kulikehesa, ni kushimbika, ni uhomboloji.”—A-Kolosu 3:12.