KULI YISEMI
7: Yitanga Yipema
YIKA CHINO CHINALUMBUNUKA?
Yitanga yipema yili manyonga waze twakufuliela ni waze akusongwela mwono wetu. Chakutalilaho, mashimbu eswe wakusa tachi hanga ulinge kanawa yuma. Kashika, hanji unazange kulongesa mwane hanga neye apwe ni kulinga yuma yacho.
Yitanga yipema neyo yinatale ha chize twakukalakala ni akwetu. Chakutalilaho, mutu yoze ukwete yitanga yipema, kapwa chikilikita, mukwa-ululi, chikwo nawa keshi kunyonga wika hali iye mwene. Kashika chapwa chashi mutu kupwa ni yitanga yacho shimbu achili mukweze.
CHIYULO CHA MU MBIMBILIYA: “Fumba mwana mu jila yize chamutamba kuya, mba muze mapwa mukulwana kechi kuyihichika.”—Yishima 22:6.
MUMU LIAKA CHINO CHILI CHILEMU?
Ha mashimbu wano a internet chili chilemu chinji kusolola yitanga yipema. Umwe chisemi avuluka ngwo Karyn yamba ngwenyi: “Mutuhasa kuwana yuma yize kuyalitele ha telefone yeswayo hanji ha mashimbu eswawo. Ana jetu mahasa kupwa sali lietu chakuhona yetwene kunyingika ngwo ayo kanatale yuma yipi.”
CHIYULO CHA MU MBIMBILIYA: “Waze hakola . . . mana ali no a kulifumba, akase chinyingi hakachi ka chipema ni chipi.”—A-Hepreu 5:14.
Kupwa ni yitanga yipema ku mulimo necho chapwa chilemu chinji. Chino chinatale ha kusolola ndako jipema, ngwe kwamba ngwo “lisesa” ni “twasakwila mwanyi.” Chinatale nawa, ha kusolola kuli akwenu ngwo wakulihulumba hali ayo. Musono chakupwa chikalu kumona yitanga yino kuli atu a mu chifuchi chino waze akulihulikila wika ha ma telefone.
CHIYULO CHA MU MBIMBILIYA: “Chize nunazange atu akalinge kuli yenu, lingenu nawa kuli ayo chizechene.”—Luka 6:31.
YIZE MUHASA KULINGA
Solola zwalala yitanga ye yipema. Chakutalilaho, kulita ni akwa mana amwe, muchipwa chashi ana kukaula usongwelo wa yisemi jo nyi ayo maputuka kwalweza ngwo, kulisumbakenya shimbu atu kanda achilimbata chili shili.
YUMA YIZE MUHASA KULINGA: Shimbwila muze munwivwa sango jimwe hanji muze mukulingiwa yimwe yuma mba uhase kuhanjika kanawa ni ana je hakutwala ku yitanga yipema. Chakutalilaho, nyi nwevwa sango jinatale ha ungulungulu hanji katonde, muhasa kulweza mwane ngwe: “Chili chipi chinji kumona chize atu amwe akusolwela akwo katonde. Shina unanyingika mumu liaka yuma yacho yakulingiwa?”
“Nyi umwe mukweze kanyingikine kalisa watwama hakachi ka chipi ni chipema, muchipwa chikalu chinji kusakula yuma yize malinga.”—Brandon.
Longesa ana je hanga asolole yitanga yipema. Chipwe twanuke akehe no mahasa kulilongesa kwamba “lisesa” ni “twasakwila mwanyi” hanji kulihulumba hali akwo. Mukanda Parenting Without Borders unambe hali ana ngwo: “Chili chipema ana kunyingika ngwo kanalingi chihanda cha umwe usoko, yimwe shikola ni chimwe chihunda. Nyi malianga kunyingika chino, muchipwa chashi kuli ayo kusolola umbovu ni kukwasa akwo chakuhona kunyonga wika hali ene.”
YUMA YIZE MUHASA KULINGA: Sakula milimo yimwe yize mwane mahasa kulinga ku zuwo. Chino muchimukwasa kumona ngwo kulingila akwo yuma yipema chili chilemu chinji.
“Nyi ana jetu mejilila kulinga milimo ya ku zuwo, chino muchikaakwasa chipwe muze maya ni kutwama ukawo. Mumu kufunga yiteli yo, muchipwa chuma chize akulinga mashimbu eswe.”—Tara.
